UBWANDILO 7
7
Umwelesyo
1Popapo Untwa Kyala alinkumbula Noa alinkuti, “Ingilaga mu ngalaba, yuyugwe na ba nnyumba yako bosa, papo yo yuyugwe gwimwene gwe ngubwene ukuya mundu ungolofu mungulilo ya bandu balilino aba. 2Mfinyamana fyosa ifi abandu bikulya, gwegepo fihano na fibili, fiyege mbubilimbubili, ikinyambala nikikikulu; loli ifi abandu batikuya fyo gwegengepo fibili, ikinyambala nikikikulu; 3syope ninjuni sya mumpalanga gwegengepo ihano na ibili, siyege mbubilimbubili, inyambala ningikulu, kokuti uluko lwabo lwendelelege pakisu. 4Buno gasyele amasiku mahano na mabili, po nikutumaga ifula pakisu, yisakutimaga amasiku amalongo mana (40) pamusi napakilo, po nisakukapyutaga kosa aka bumi aka mbelile pakisu.” 5Popapo Noa alinkusibomba syosa bo mumo Untwa alimbulile.
6Umwene Noa ali gwa fyinja aba mia nahano nayumo (600) lula umwelesyo gwisege pa kisu. 7#Mat 24.38-39; Luk 17.27Popapo Noa pamopene nabanake nunkasi kangi nabakasi ba banake alinkwingila mungalaba ukuti bapone ku mwelesyo. 8Ifinyamana ifi bikulya na ifi batikulya, injuni kangi na kandu kosa aka kikwendela ulwanda kilinkwingila palikimo na Noa mu ngalaba fibilifibili; ikinyambala nikikikulu, 9bo mumo Kyala alimbulile Noa. 10Lelo bo gakindilepo amasiku mahano na mabili, umwelesyo gulinkufika pakisu.
11 #
2 Pet 3.6
Nkyinja kya ba mia bahano nayumo (600) ikya bumi bwa Noa, mmwesi gwa bubili, pisiku lya kalongo na mahano pamwanya mabili (17) po inyibuko syosa isya fisiba ifikulumba ifya mmisi amasolofu silinkwiguka, namatubulo gya kumwanya gyope gilinkwiguka. 12Ifula yilinkutima pa kisu amasiku amalongo mana (40), pamusi napakilo. 13Ilisiku lila Noa pamopene nabanake: Shemu, Hamu na Yafeti, kangi nunkasi gwake Noa, na bakasi ba banake; 14balinkwingila palikimo nifinyamana fyosa uluko nuluko, fyope na fi fitimigwa uluko nuluko, na ifi fikwendela ulwanda fyope uluko nu luko, na kosa aka kikupululuka mmwanya kope uluko nuluko; kangi ninjuni sya luko nuluko. 15Filinkwingila pamopene na Noa ifya luko nuluko ikinyambala nikikikulu, ukufwana na muno Kyala alimbulile Noa. 16Popapo Untwa alinkumwigalila Noa nkati.
17Ugwene umwelesyo go gulinkwendelela pakisu amasiku amalongo mana (40), gope namisi galinkwisula, galinkuyipimba ingalaba, yilinkwelela itolo pamwanya pakisu. 18Amisi galinkwisula fiyo galinkusatanila pa kisu kyosa, po lelo ingalaba, yilinkwelela itolo pamisi. 19Agene amisi go galinkwendelefa ukwisula pa kisu; bunobuno galinkufikupikila nifyamba fyosa ifitali ifi fyalipo pakisu. 20Agene amisi galinkongelapo ukwisula na pamwanya pafyamba, galinkufikupikila ukukinda amafiti kalongo na mahano (15). 21Popapo ifya bumi fyosa ifi fikwenda pakisu filinkufwa, injuni, ifitimigwa, ifinyamana, nutupeligwa utu tukwendela ntubugutila pa kisu. 22Akandu kosa pakisu aka mu mbulo mukusoka umuyi gwa bumi, kalinkufwa. 23Kyala alinkukapyuta akandu kosa aka bumi pa kisu: abandu, ifinyamana, na fyosa itolo ifi fikwendela ulwanda, kangi na si njuni sya mu mpalanga; fyosa itolo filinkupyutigwa pakisu. 24Mwene yu Noa yo alinkupona naba bali nagwe nkati mu ngalaba. Popapo amisi galinkwisula ku kwisula pa kisu ukufika amasiku mia yumo na masiku amalongo mahano (150).
Nu geselecteerd:
UBWANDILO 7: NNBII
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
BAIBULO INONGWA INUNU © Bible Society of Malawi, 2017.
