मर्कुस 11
11
इसु यरुसलेममै गया
(मत्ति २१:१-११; लुका १९:२८-४०; युहन्ना १२:१२-१९)
1इसु र तिनुका चेलाहरु यरुसलेहेमतिको जैतुन डाँडाका छेउमै बेथफागे र बेथानिया भुन्न्या ठौरमै आया। अनि इसुले आम्ना चेलाहरुमद्दि दुइ जुनाकन यइथो भुनि पठाया, 2“तुमिहरु नजिकैका गाउँमै जाउ, र जाँदैगद्दा तुमिहरुले अइले स्हम्म कोइ मान्ठले पुनि नचड्या एक गदाको बछेडो भेटाउन्याछौ। तेइकन फुकायर ल्याउ। 3कोइले तुमिहरुकन ‘क्यान फुकाउन्छौ?’ भुन्यो भुन्या, ‘प्रभुकन यइको खाँचो छ, र प्रभुले स्हाँट्टै फर्काउन्याछुन्’ भुन्नु।”
4तब तिनुहरु गया, र तेइ घरको बाइरपट्टि एक बछेडो बान्या भेटाया, र तेइकन फुकाया। 5तब ताँइ उबियाहरुमद्दि कोइ कोइले तिनुहरुकन स्होद्या, “तुमिहरु बछेडाकन फुकाइ क्यागन्याउ?”
6इसुले चेलाहरुकन सिकाया जैथै तिनुहरुले भुन्या, र मान्ठहरुले तिनुहरुकन जान दिया। 7तब चेलाहरुले बछेडाकन इसुति ल्याया, र आम्ना बर्खोहरु तेइमाथि राखिदिया, र इसु तेइमाथि चड्या। 8अनि मथ्थै मान्ठहरुले आम्ना बर्खोहरु र अरुहरुले ओडापुडाबाट रुखका पातस्हातै डाला काट्यार बाटामै ओछ्याया। 9तब इसुका अगाडि अगाडि हँड्न्या र पछाडि पछाडि आउन्याहरुले यइथो भुन्नै जयजयकार गन्न लाग्या,#भजनसंग्रह ११८:२५-२६ “परमेसोरको जय होस्! परमप्रभुको नाउमै आउन्या कति धन्याका हुन्! 10धन्या होस्, हाम्मा पुर्खा दाउदको आउन लाग्या राज्या! सोर्गमै बैन्या परमेसोरको जयजयकार होस्!”
11इसु यरुसलेममै आया र मुन्दिरभित्त पस्या। अनि इसुले ओरिपोरिका स्हबै चिज हेर्या र अबेला भया हुनाले बारै जुना स्हात इसु बेथानिया गया।
इसुले अन्जिरको रुखकन स्हराप्या
(मत्ति २१:१८-१९)
12भोलिपल्ट तिनुहरु बेथानियाबाट आउँदा इसु भोकाया। 13अनि इसुले थोक्कै पुड्डो पातले भरिया अन्जिरको एक रुख देख्यार कैले तेइमै केइ फल पाइन्छ कि भुनि इसु गया, तर ताँइ पुग्यापछि इसुले रुखमै पात मात्तै देख्या, क्यानकि तेइबेला अन्जिरको फल फल्न्या बेला भया छियोन। 14तब इसुले तेइ रुखकन भुन्या, “अब तोबाट कोइले पुनि फल नखाओस्।”
अनि यइ कुडा इसुका चेलाहरुले स्हुन्या।
इसु मुन्दिरमै गया
(मत्ति २१:१२-१७; लुका १९:४५-४८; युहन्ना २:१३-२२)
15अनि इसु यरुसलेहेम पुग्यापछि मुन्दिरभित्त पस्या, तब मुन्दिरमै बेपार गन्न्याहरुकन बाइर धपाया र रुपियाँ फेन्न्याका टेबुलहरु र परेउ बेइन्याहरुका बैन्या कुर्चि ढालिदिया। 16इसुले कैकनै केइ चिज मुन्दिरबाट ल्हिन र ल्याउन दियानुन्। 17अनि इसुले सिछ्या दिनै भुन्या, “क्या धर्मसास्तरमै यइथो लेख्यानाइ, ‘मेरो घर स्हबै जातिहरुका निम्ति प्रार्थनाको घर हुन्याछ?’ तर तुमिहरुले त यइकन डाँकाहरुको थलो बुनायाछौ।”#यसैया ५६:७; यर्मिया ७:११
18मुख्य पुजारिहरु र धर्मगुरुहरुले यइ स्हुन्यार इसुकन क्यागरि मारौ भुनि जुक्ति खोइन लाग्या। सारा मान्ठहरुले इसुको सिछ्यामै अचुम्म मान्या छिया। तेइबिअ तिनुहरु इसु स्हात भेइमान्ना छिया।
19तब झलपडि स्हक्यापछि इसु सहर बाइर निस्क्यार गया।
अन्जिरको रुखबाट सिछ्या
(मत्ति २१:२०-२२)
20अनि रातै तिनुहरु ताँइबाट पैलाकै बाटो भइ जाँदा तेइ अन्जिरको रुखकन जडैबाट स्हुक्या देख्या। 21तब इसुले भुन्या कुडा पत्तुरुसले स्हुम्ज्यो, र इसुकन भुन्यो, “गुरुज्यु हेर, तुमिले स्हराप्या अन्जिरको रुख त स्हुक्यो छ।”
22इसुले तिनुहरुकन भुन्या, “परमेसोरमै बिसास गर। 23स्हाँच्चि मु तुमिहरुकन भुन्दछु, यति कोइले आम्नो मुनैनो संका नगरि आपुले भुन्या कुडा पुरा हुन्छ भुन्न्या बिसास गरि यइ डाँडाकन उक्कि समुन्द्रमै जा भुन्यो भुन्या, तेइका लेखि तेइथै हुन्याछ। 24यइबिअ मु तुमिहरुकन भुन्दछु, तुमिहरुले प्रार्थनामै ज्या माग्छौ तेइ पायाँ भुन्न्या बिसास गर, र तेइ तुमिहरुको हुन्याछ। 25जब तुमिहरु प्रार्थना गन्न उबिन्छौ, तब कैको बिरुद्दमै तुमिहरुको केइ छ भुन्या माप गर, अनि सोर्गमै हुन्या बाबाले पुनि तुमिहरुका पापहरु माप गरिदिन्याछुन्। 26[तर तुमिहरुले अरुकन माप गर्यानौ भुन्या, सोर्गमै हुन्या तुमिहरुका बाबाले पुनि तुमिहरुका पाप माप गन्न्यानाइ।”]
इसुको हकका बार्यामै स्होद्या
(मत्ति २१:२३-२७; लुका २०:१-८)
27इसु चेलाहरु स्हात फेरि यरुसलेममै आया। अनि इसु मुन्दिरमै ओडोपुडो हँडिरया बेला मुख्य पुजारिहरु, धर्मगुरुहरु, र अगुवाहरु इसुति आया। 28तब तिनुहरुले इसुकन स्होद्या, “क्या हकले तुमि यिँ कामहरु गद्दाछौ? यिँ काम गन्न्या हक तुमिकन कोइले दियो?”
29इसुले तिनुहरुकन भुन्या, “मु तुमिहरुकन एक कुडा स्होद्दोछु, तुमिहरुले मुकन भुन र मु क्या हकले यिँ काम गद्दोछु, तेइ तुमिहरुकन भुन्न्याछु। 30मुकन भुन, युहन्नाले बप्तिस्मा दिन्या हक सोर्गबाट होकि मान्ठबाट हो।”
31तब तिनुहरु यइथो भुन्दै आपु आपु कुडाकानि गन्न लाग्या, “‘सोर्गबाट’ भुनौ भुन्या तिनुले भुन्न्याछुन् ‘तुमिहरुले युहन्नाकन क्यान बिसास गर्यानौ।’ 32‘मान्ठहरुबाट’ भुनौ भुन्या कस्हरि भुन्न्या?” मान्ठहरु हाम्मो बिरुद्दमै हुन्याछुन्, क्यानकि स्हबैले युहन्नाकन परमेसोरको स्हाँचो रैबार्या हुन् भुनि मान्नाछिया। 33तब तिनुहरुले इसुकन भुन्या, “हामिकन थाँ नाइ।”
इसुले तिनुहरुकन भुन्या, “मु पुनि क्या हकले यिँ काम गद्दोछु, तेइ तुमिहरुकन भुन्नैन।”
Nu geselecteerd:
मर्कुस 11: JUML
Markering
Delen
Kopiëren
Wil je jouw markerkingen op al je apparaten opslaan? Meld je aan of log in
© 2024 (Active), Mother Tongue Translators Society and Wycliffe Bible Translators, Inc. All rights reserved.
