मर्कुस 12
12
अङ्गुर बारिक काथा
(मति २१:३३-४६; लुका २०:९-१९)
1उपाछु येसुइ उसब्के काथाकमाटे कहिकेभइल, “एक जेना मानुसेइ अङ्गुर रोपिकुन उक्र चारिओर बेह्रा लागाइकुन, कोलक लागि एक्टा खाल्टा खन्ल। हसे एक्टा माइचि बानाइकुन उहाइ अङ्गुरबारि कामालाहारके देइकुन आफ्नि चाहिँ बिदेसपटि लाग्ल। 2जब अङ्गुर टोर्लाहार बेला भइल, तब उहाइ एक जेना नोकरके आफ्न भाग लेइके पाठाल। 3तर उसबेइ उख्राके धरिकुन ठोक्ल, हसे केहाउ नदेइकुन पाठाल। 4उहाइ फेरि अर्क नोकरके पाठाल, तर उसबेइ उक्र मुडेक फुटाइकुन बिजेत कर्ल। 5मालिकेइ अरु नोकरके पाठाल, तर उख्राके पुनु उसबेइ मार्ल, ओसिनकरिकुन धेरइ नोकरसब्के पाठाल, तइपुनु उसबेइ कत्काके ठोक्ल र कत्काके चाहिँ मार्ल। 6अन्तिमयँ आफ्निक मायालु छाहोके ‘उसबेइ मेर छाहोम्के त पक्कइ पुनु मानमन्ता करित् हबाहाइ’ कइकुन उसब्कलघि पाठाल। 7तर बारि कामालाहारसबेइ एक आपसयँ कहल, ‘इसे त उत्तराधिकारि हखइ। आओ, हामे इख्राके मारउ, हसे इसे सम्पति हाम्रइ भइत।’ 8हसे उसबेइ मालिक्क छाहोके पुनु मारिकुन अङ्गुर बारिसे बाहार लेजिकुन घुघाइदेल।
9 “आबे अङ्गुर बारिक साहुइ किति करित्? उसे आइत, र बारि कामालाहारसब्के नास करिकुन, अङ्गुर बारि अरुके देइत्। 10किति तोहेसब धर्मक कितापयँ लेख्ल बचन नइजे पढ्ल से?
“‘जोनो पाथरके घर बानालारसबेइ काम नइजेलाग्लाहार कइकुन घुघाइदेल,
उहइ पाथर घरक जगयँ मुक्खे-पाथर बन्ल,
11 इसे सभइ परमप्रभुकमाटे भइल हखइ,
जोनोकुरा हाम्र नजरयँ अचम्मक बाटइ।’”
12उपाछु उसबेइ ओनेन्के धरिके खोज्ल, किकेकने इसे काथा उसब्कइ बिरोधयँ कहल हखइ कइकुन उसबेइ बुझ्ल। तर उसब भिडसाङ डारालगुनेइ ओनेन्के छाडिकुन जइल।
तिरो बुझालाहार बारेयँ प्रस्न
(मति २२:१५-२२; लुका २०:२०-२६)
13उपाछु येसुके केहाउ कुरायँ फासाउ कइकुन उसबेइ फरिसिसब र हेरोदिसब मद्धेक कोलोउ-कोलोउ मानुससब्के ओनेन्कलघि पाठाल। 14उसब आइकुन येसुके कहल, “गुरुजिउ, हाम्राके थाहा बाटइ कि, तोहे सत्ते बाटउ, र जोनेइ जिति कहने पुनु वास्ता नाकरउ। किकेकने तोहे कोक्रउ मुहु चाहिकुन काम नाकरउ, तर साच तरिकासे परमेसोरक पइडा सिखाताहाउ। आबे कहिके हबखाइ, बेबस्था अनुसार कइसरके तिरो तिरिके ठिक हखइ कि नइजे? 15हामे तिरो तिरिके कि नातिरिके?”
येसुइ उसब्क कोप्टि मन थाहा पाइकुन कहिकेभइल, “किके तोहेसब मेर जाँच कर्ताहाउ? खइ, एक्टा चान्दिक सिक्का आनिकुन देखाओ।”
16उसबेइ एक्टा सिक्का आनिकुन ओनेन्के देल। हसे ओनेनेइ उसब्के कहिकेभइल, “इछिका कोक्र चित्र र छाप बाटइ?”
उसबेइ कहल, “कइसरक।”
17हसे येसुइ उसब्के कहिकेभइल, “जोनोकुरा कइसरक हखइ कइसरके नइ देओ, र जोनो परमेसोरक हखइ परमेसोरके देओ।”
ओनेन्क जबाफ सुनिकुन उसब छक्कइ पोर्ल।
मोर्लकमाटे फेरि जिउलाहार बारेयँ प्रस्न
(मति २२:२३-३३; लुका २०:२७-४०)
18मानुससब मोर्लकमाटे फेरि नाइजिओत कलाहार सदुकिसब येसुकलघि आइकुन प्रस्न पुछ्ल, 19“गुरुजिउ, मोसाइ हाम्राके यस्न लेखिदेल बाटइ कि, ‘कोलोउ मानुसक दाजुक् बिहा करिकुन सन्तान नभइतिन मोर्नेपार दाजुक लागि सन्तान भउस् कइकुन भाहिकेइ भाउजेके बिहा करिके पोरित र आफ्न दाजुक लागि सन्तान जर्माइके पोरित।’ 20एक्टा घरयँ सात जेना दाजुभाइसब रहत। पइला जेठाइ एक्टि दुलिहि आन्ल, तर उसे सन्तान नभइतिन मोर्ल। 21हसे माइलाइ उसे बेटिके बिहा कर्ल, र उसे पुनु सन्तान नभइतिन मोर्ल। हसे साइलाक पुनु ओस्नइ भइल। 22ओसिनकरिकुन सातइ भाइ पालोहिसे भाउजेके बिहा कर्ल, तर सातइ जेना सन्तान नभइतिन मोर्ल। अन्तिमयँ उसे बेटि पुनु मोर्लि। 23आबे सभइ जेना मोर्लकमाटे जिउनेपार, उसबमद्धे उसे बेटि कोक्र दुलिहि भइत? किकेकने उक्रसाङ सातइ जेना बिहा कर्ल रहत।”
24येसुइ उसब्के कहिकेभइल, “तोहेसब न त धर्मक किताप बुझ्ल बाटउ, न त परमेसोरक सक्तिके जान्ल बाटउ तोहेसब बड्क भुलयँ पोर्लक कारन इहइ नइजे से? 25किकेकने मोर्लकमाटे जिउतेखना उसब्क न बिहा भइत, न त बिहा कर्ताहात्, तर सोर्गयँ भइल सोर्गदुत जस्नइ उसब भइताहात्। 26किति तोहेसब मोर्लसब जिइकुन उठ्लाहार कुराक बारेयँ मोसाक कितापयँ नइजे पढ्ल बाटउ? परमेसोरेइ जरिराख्ल पोथ्राक बारेयँ लेखिल खन्डयँ मोसाके यस्के कहिकेभइल, ‘मोइ अब्राहाम, इसहाक र याकुबक परमेसोर हखम।’ 27तोहेसब बड्क भुलयँ बाटउ, किकेकने ओनेन् मोर्लसब्क परमेसोर नइजे, तर जिउतसब्क परमेसोर हखत।”
सभइसे बड्क आग्या
(मति २२:३४-४०; लुका १०:२५-२८)
28उछिका एक जेना धर्मगुरु आइकुन उसब्क बिबाद सुनिरहल रहत। येसुइ सदुकिसब्के ठिक जबाफ देल देखिकुन उहाइ पुनु पुछ्ल, “परमेसोरक सभइकते बड्क आग्या कोनो चाहिँ हखइ?”
29येसुइ कहिकेभइल, “सभइकते बड्क आग्या इहइ हखइ ‘हे इस्राएलिसब सुनउ, परमप्रभु हाम्र परमेसोर एक्टाइ परमप्रभु हखत। 30तोइ परमप्रभु आफ्न परमेसोरके पुरइ मनसे, पुरइ परानसे, पुरइ दिमाखसे र पुरइ सक्तिसे माया करुक्।’ 31हसे दोस्रा चाहिँ, ‘तोइ आफ्न छिमेकिके आफ्नके जस्नइ माया करुक्।’ इसे कते बड्क आग्या अरु नइजे बाटइ।”
32हसे धर्मगुरुइ ओनेन्के कहल, “गुरुजिउ पाउयेइ ठिक कहिकेभइल, परमेसोर त एक्टाइ बाटत, ओनेन् बाहेक अरु कोलोउ पुनु नइजे बाटत। 33उहइगुनेइ ओनेन्के पुरइ मनेइ, दिमाखेइ र सक्तिइ छिमेकिके पुनु आफुके जस्नइ माया करिके नइ सभइ होमबलि र भोकसब कते राम्र हखइ।”
34उहाइ बुद्धिमानिसे जबाफ देल देखिकुन येसुइ कहिकेभइल, “तोइ परमेसोरक राज्जेसे टाढो नइजे बाटस्।” उपाछु कोलोउयेइ पुनु येसुके प्रस्न पुछिके आँट नइजेकर्ल।
ख्रिस्ट कोक्र छावा
(मति २२:४१-४६; लुका २०:४१-४४)
35येसुइ मन्दिरयँ सिखातेखना कहिकेभइल, “बेबस्थाक धर्मगुरुसबेइ ख्रिस्टके कस्के दाउदक छावा कहिके सक्ताहात्? 36किकेकने दाउद आफ्नेन नइ पबित्र आत्माकमाटे कहल बाटत,
“‘परमप्रभुइ मेर प्रभुके कहिकेभइल,
तोइ मेर दाइने हाथपटि बोसुक्,
जबसमन मोइ तेर सत्तुरसब्के, तेर गोडक पइतला हेठ नाराखम्।’
37 जब दाउद आफ्नि नइ ओनेन्के प्रभु कताहात् कने, कस्के ओनेन् दाउदक छावा भइल त?” उछिका बड्क भिडेइ ओनेन्क बचन खुसि भइकुन सुन्ल।
धर्मगुरुसब्से होसियार
(मति २३:१-३६; लुका २०:४५-४७)
38येसुइ फेरि सिछ्या देतिन् कहिकेभइल, “धर्मगुरुसब्से होसियार रहउ, जोनेइ लाबो लुगा लागाइकुन चारिओर डुलिके र बजारयँ मानमन्ता पाइके रुचाताहात्। 39हसे सभाघरयँ र भोजयँ मुक्खे ठाउयँ बोसिके खोजित। 40उसब बिधुइनिसब्क घर लुट्ताहात्, तर अरुके देखाइके लाबो-लाबो पार्थाना कर्ताहात्। यस्न मानुससबेइ पाछे धेरइ दन्ड पाउताहात्।”
बिधुइनिक भेठि
(लुका २१:१-४)
41येसु मन्दिरयँ भेठि चाढालाहार बाकस छेओ बोसिकुन, भिडेइ भेठि चाढाल चाहिराख्ल रहत। उछिका धनि मानुससबेइ धेरइ-धेरइ पइसा चाढाल रहत। 42उपाछु एक्टि गरिब बिधुइनि पुनु आइकुन ताबोक दुइ सिक्का चाढालि, जोक्र मुल्य एक रुपियाकते कम रहइ। 43हसे येसुइ आफ्नलघि चेलासब्के बोलाइकुन कहिकेभइल, “साच्चिकइ मोइ तेउह्रासब्के कहतम्, भेठि चाढालार बाकसयँ सभइकते बढि इसे गरिब बिधुइनिइ चाढालि। 44किकेकने अरुइ त आफ्नसाङ धेरइ भइलगुनेइ चाढाल, तर इसे बिधुइनिइ त आफ्निक गरिबियँ पुनु सभइ थोक चाढालि बाटि।”
Nu geselecteerd:
मर्कुस 12: DRY
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2024 (Active), Mother Tongue Translators Society and Wycliffe Bible Translators, Inc. All rights reserved.
