Luke 16

Na Vavakato Vavapadana Na Nabulu Ikikerena

1Ego sa paranga laoria i Jisu sira na ona sepele: <<Koleona sa kai tinoni isisongo sa pore kai ona nabulu ko isa sa kopuniria doru ona sakasava. Ko ira kaki qai vavakato vania na tinoni isisongo api sa na veveina sa aru vivikereria na nabulu sa kopuniria sa na ona poata. 2Poni sa kuku vatomea na tinoni isisongo sa nona nabulu api, ko pira saunia, <Na sa sisa qa nongoronia ara na veveimu ao api? Mu valamea na vavakatona na mua kopu vareregena na qua isisongo, ura kopira munake kopu vareregia na qua isisongo ara sao!> saunia.

3Poni sa kole roroqu mekana sa na nabulu kopu, <Kode mina vabetosiu na qua bangara pa qua roiti sara. Ko na sa beka sa mana roitinia ara tonai? Qake boka roiti pa inuma sara, beto na tetepa tadira na tinoni ba qa keania tugu. 4Ego, jongana, pira gu sa mana roiti vei ara, ko totonai mana tavabeto pa qua roiti kopu sara ba mai koledia sira na kubo qua baere mai vatatasiu pa dia ruma,> sau.

5Ko sa kuku memeka vakamuria isa sira na tinoni qai oqoro tabaria na dia lilipu tana ona bangara. Sa nanasia isa sa na tinoni momoe, <Ao ka visa sa na mua lilipu tana bangara taqu?> saunia.

6Poni pira sau sa na tinoni isa, <Kai gogoto daramu tototoni oela olive pugeledi,> sau.

Poni sa paranga sa na nabulu tinoni kopu, <Ego, api sa na mua pepa lilipu. Mu sisiqarai toqo ko mu kutia ka limangavuluputa tototoni oela pugeledi mugu,> sau sisa.

7Beto sa nanasia mule sa kame, <Goto ao sa ai sa vei? Ka visa sa na mua lilipu tana bangara taqu?> saunia.

Poni sa paranga sa na tinoni, <Kai gogoto baiki vuiti,> sau.

Poni sa paranga sa na nabulu kopu, <Jongana, api sa na mua pepa lilipu. Mu kutia gu ka vesungavuluputa gu,> saunia.

8Ko sa doro valavatia na bangara sa na nabulu sesekena api. Ura sa doro momoe laoa na totoso vuka risa sisa, ko sa vatanania na ona toa mekana. Ira na tinoni pa kasia gusu api sa qai tavagigala jolaniria ira na tinoni tana kabere pa rorove vevei inara. 9Inara sa vei ko ma pojanigou ara sagou: mu vaiianiria sira na miu isisongo pa peso ko mi pore miu baere, ko tonai mina beto pudala poni sa mai vatogagou pa gusu kole jolana.

10Isa sa tarange pa kopudi na sakasava ikikete sa mina tarange tugu pa kopudi na sakasava lalavata; goto isa sake tarange pa kopudi na sakasava ikikete sa minake tarange tugu pa kopudi na sakasava lalavata. 11Vei muneke tarange sagou pa kopudi na isisongo pa peso, sa i sei mina rangegou ko mina vakopunigou na isisongo sosoto? 12Ko vei munake tarange sagou pa kopuna na isisongo tana goto tinoni, sa i sei mina rangegou ko mina vakopunigou sira na miu isisongo mekamiu?

13Kepore kai nabulu mina boka mekarai nabuluniria sa karu bangara. Kode kame minake tavaraguania goto kame sa mina roroqua; kode mina valavatia kame goto kame mina vakepore veveinai. Ko munake boka mekarai nabuluniria agou sa na Tamasa beto na isisongo,>> sau si Jisu.

Kaki Vaivagigalai ti Jisu

(Matiu 11.12-13)

14Ego totonai qai nongoria ira na Parese sa vei inara sa qai kole vavaledenia ira si Jisu, ura na gagale bulo poata sira. 15Poni pira sauniria i Jisu sira, <<Agou ka visa gu pira sa qu vavadoro veinigou na tinoni tuvisimiu mekamiu pa moedi na tinoni, ba na Tamasa sa gigilaiona na bulomiu. Ura ira na sakasava qai tadoro vaporeveveidi ta tinoni sa qai lulasa ikeredi jola pa dodogoro tana Tamasa.

16Na Vavanau beto na kukuti tadira na tinoni kokorotai sa qai toniria na tinoni tinganai sa kamu pa totoso tai Jone Paputaiso. Podalai pa totoso isa ko sa kamu kopira sa sa tatarae sa na nongoro jongana na veveina na binangara tana Tamasa, ko na kubo tinoni sa qai podeke vivitigia ko mai tome laoa qarigu. 17Ba vei mina mumuri tu sa na oka beto na peso, ba kai gasi ikete pa Vavanau ba minake isongo vukele riuona.

18Na tinoni sa loa pale na maqotana ko sa lao alava beia mule kai goto rereko sa sa babarata tugu sisa. Beto isa na tinoni sa alavia na rereko qai loa pale sa sa babarata tugu sisa,>> sau si Jisu.

Na Tinoni Isisongo beto i Lazarasi

19<<Ego koleona sa kai tinoni isisongo sa pokoniria na poko babata jongadi na poreveveidi beto sa suvere ko sa teteku vatatalegana doru rane. 20Ko sa koleona mutugu sa kai tinoni vavaivasevina sa tutubu beto doru tinina, na isongona i Lazarasi, ko qai lalao loai ira pa atakamana tana tinoni isisongo sisa. 21Ko sa kole nyonyo ganiria na vuvuvusu gagani qai vuvukele pa tevolo tana tinoni isisongo sisa ba sake boka, goto ira na sie tu sa qai lao kole memeai na tubuna.

22Ego tonai sa mate sa na tinoni vavaivasevina, sa qai kamu tonia ira na mateana sisa, ko sa lao toqo kekeria i Ebarahami sisa ko sa somana teteku pa vavolo pa noka. Ko na tinoni isisongo ba sa mate tugu, sa tagolomo sisa. 23Totonai sa kole suvere vitigi pa heli poni sa enga sae poni sa batia i Ebarahami pa souna tu beto i Lazarasi sa korapa pa keketaina. 24Poni sa kuku viviva sisa, pira sau, <Kei, Ebarahami, tamaqu! Mu roroqu tokanisiu. Mu garunia i Lazarasi ko mi totunia pa pie sa na kakarusuna gu, ko mi lame valomosia na meaqu, ura qa vaivasevi na vitigi sara pa iku api!> sau.

25Poni pira sau si Ebarahami, <Tuqu, mu roroqua mai sisa totonai na toamu ao. Qu isongo betoria ao sira na sakasava jojongadi, goto i Lazarasi sa sa suvere vaivasevi sa totonai. Ba kopira sa suvere qeqera sisa, goto ao sa qu suvere vitigi. 26Ko nake sakasava ira gu mekadi sa! Goto kai oqili loluna na revatana jola tugu vei sa sa kole pa vaikorapaida gita, ko ira mai nyogua karovo ko mai lao ketakoi tamugou marigu sa maike boka, beto ko ira mai nyogua karovo lame pa tamigei lani marigu sa maike boka,> sau.

27Poni pira sau sa na tinoni isisongo, <Ego mina vei sa, kei Ebarahami tamaqu, qa tepa vivitigigo ara sao ko mu garunu laonia gu pa ruma tana tamaqu si Lazarasi ina! 28Ka lima sira na tasiqu marene qai korapa ketakoi. Mu pojania i Lazarasi ko mi lao poja vaneneqiniria, kita mai lame pa ia sa kolea na vitigi lani,> sau.

29Poni sa paranga si Ebarahami, <Na kukuti ti Mosese beto ko tadira na tinoni kokorotai sa qai korapa koledia, ko mai vainongoro lao gu tadira sira,> sau sisa.

30Poni pira sau sa na tinoni isisongo, <Dai, Ebarahami, tamaqu! Vei mina toa mule tu pa mate sa kai tinoni ko mina mule lao vavakato vaniria sa kode mai nongoria, ko mai gabala loaria sira na dia sela,> sau sisa.

31Poni pira sau si Ebarahami, <Vei maike nyorogua nongoria ira sa na kukuti tai Mosese beto tadira na tinoni kokorotai, poni sa vei mina toa mule tugu pa mate sa kai tinoni ko mina mule lao, ba kode mai daidia tugu vasosoto!> sau,>> sau si Jisu.

Nu geselecteerd:

Luke 16: LGA

Markering

Deel

Kopiëren