मत्ती 14

यूहन्‍ना बपतिस्मा ङेणे आले ची हत्या

(मरकुस 6:14–29; लूका 9:7–9)

1ओ समय देशा ची चौथाई चा राजा हेरोदेस ने ईशु ची चर्चा सुणली, 2ते आपणे सेवका नु केहले, “ओ यूहन्‍ना बपतिस्मा ङेणे आला छै! ओ मरला आला महु जीता हुती गेला, ऐवास्ते ओचे कनु सामर्थ चे काम प्रकट हुवी पले।”

3 # लूक 3:19,20 कांकि हेरोदेस ने आपणे भावा फिलिप्पुस ची घराआली हेरोदियास ची वजह, यूहन्‍ना नु पकड़वाती कर ब़ांहले ते कैदखाने मां नाखती ङिलते, 4कांकि यूहन्‍ना ने हेरोदेस नु केहले हुते, “यिनु राखणे तनु वाजिब कोनी।” 5ऐवास्ते हेरोदेस ओनु मरवाती नाखणा चाहवे ला, पर लौका कनु ङरता कांकि वे ओनु भविष्यवक्‍ता मनते।

6पर जिसे बेले हेरोदेस चा जनम ङिओ आला, तां हेरोदियास ची धूवे ने तेंहवारा मां नचती कर हेरोदेस नु खौश करले। 7ऐचे उपर ओणे कसम खाती कर वचन ङिला, “जको कोच्छ तु मांगे, मैं तनु ङिही।”

8वा आपणी आई चे भरावणे लारे ब़ोली, “यूहन्‍ना बपतिस्मा ङेणे आले चे ठोङ थाला मां इठे मनु मंगवाती ङे।”

9तब राजा ङुखी हुला, पर आपणी कसम ची, ते लारे ब़ेसणे आला ची वजह, आज्ञा ङिली कि ङिती ङिले जाओ। 10ते ओणे कैदखाने मां लौका नु भेज़ती कर यूहन्‍ना चे ठोङ बढवाती नाखले। 11ते ओचे ठोङ थाला मां आणले ते छुवेरी नु ङिले, ते ओनु विणे आपणी आई नु ङिले। 12बल्ति यूहन्‍ना चे चैले आले ते ओची लाशे नु चती कर दफनाती ङिले। ते जती कर ईशु नु समाचार ङिला।

पाँच हजारा नु खुलाले

(मरकुस 6:30–44; लूका 9:10–17; यूहन्‍ना 6:1–14)

13जिसे बेले ईशु ने ईं सुणले, तां ओ ब़ेड़ी उपर चढ़ती कर उठु कुई बरब्यान जग़हा मां,चाह्‍ला गेला। लौक ईं सुणती कर शहरा महु पैदल ही ओचे भांसु टुरती पले। 14ईशु ब़ेड़ी कनु उतरती कर हेक बङी भीड़ ङेखली ते वांचे उपर तरस खाला, ते वांचे बिमारा नु चंगे करले।

15जिसे बेले ङिओ थोला तां ओचे चैले ओचे गोढु आती कर किहुं लाग़ले, “हा बरब्यान जग़हा छै, ते देर हुवे पली, लौका नु विदा कर, कि वे बस्तीया मां जती कर आपणे वास्ते खाणे मोल गिहो।”

16पर ईशु ने वानु केहले, “वांचे जाणे जरुरी कोनी! तम्ही ही याहनु खाणे वास्ते ङिया।”

17वाणे ओनु केहले, “इठे अम्चे कनु पाँच रोटीया ते ङोन माछलीया नु छोड़ती नेरे कोच्छ कोनी।”

18ईशु ने केहले, “वानु माये गोढु चती आवा।” 19बल्ति ओणे लौका नु खड़ा उपर ब़ेसणे वास्ते केहले, ते वां पाँच रोटीया ते ङोन माछलीया नु चले, ते स्वर्ग़ा सनु ङेखती कर नरीकारा चा धन्यवाद करला, ते रोटीया भान्ती-भान्ती कर चैला नु ङिलीया, ते चैला ने लौका नु। 20जिसे बेले सब खाती कर रज़ती गेले। तां चैला ने बचलीया आलीया रोटीया लारे ब़ारहा टोकरे भरती कर चले। 21ते खाणे आले असतरीया ते ब़ाला नु छोड़ती कर, पाँच हजार मर्द लगभग हुते।

ईशु चे पाणीया उपर टुरणे

(मरकुस 6:45–52; यूहन्‍ना 6:15–21)

22तब ईशु ने तुरन्त आपणे चैला नु ब़ेड़ी उपर चढ़ावणे वास्ते मजबूर करले कि वे ओकनु पेहले झील चे पार चाह्‍ले जाओ, जब तक ओ लौका नु विदा करो। 23ओ लौका नु विदा करती कर, प्राथना करने वास्ते अलग़ पहाड़ा उपर चाह्‍ला गेला। ते ङिओ थोले ओ हेकला हुता। 24ओ बेले ब़ेड़ी झीली चे बीच मां लहरा लारे डगमगावे पलती, कांकि हवा सामणे ची हुती।

25ते ईशु राती चे चौथे पाहरा मां झीली उपर टुरते हुले वांचे गोढु आला। 26चैले ओनु झीली चे उपर टुरते ङेखती कर घब़राती गेले, ते किहुं लाग़ले, “हा भूत छै!” ते ङरा चे मारले धाड़-धाड़ करु लाग़ले।

27बल्ति ईशु ने तुरन्त वांचे लारे बाता करलीया ते केहले, “हिम्मत राखा! मैं छै, ङरा ना!”

28पतरस ने ओनु उत्तर ङिला, “हे प्रभु, अगर तु छी तां, मनु आपणे गोढु पाणीया उपर टुरणे ची आज्ञा ङे।”

29ईशु ने केहले, “आ!” बल्ति पतरस ब़ेड़ी कनु उतरती कर ईशु चे गोढु जाणे वास्ते पाणीया उपर टुरु लाग़ला। 30पर तेज हवाई नु ङेखती कर पतरस ङरती गेला, ते जिसे बेले ब़ुङु लाग़ला तां धाड़-धाड़ करती कर केहले, “हे प्रभु मनु बचा!”

31ईशु ने तुरन्त आपणा हाथ आग़ु करती कर पतरस नु पकड़ती गेले ते ओनु केहले, “हे अल्पविश्‍वासी, तु कां शक्‍क करला?”

32जिसे बेले वे ब़ेड़ी उपर चढ़ती गेले, तां हवा रुकती गेली। 33ते जको लौक ब़ेड़ी उपर हुते वाणे ओनु प्रणाम करले ते केहले, “तु सच्‍चमां नरीकारा चा पूत छी।”

गन्‍नेसरत मां रोग़ीया नु चंगे करले

(मरकुस 6:53–56)

34वे झील पार करती कर गन्‍नेसरत प्रदेस मां पुज़ले। 35उठले लौका ने ओनु पिछाणती गेले ते आस-पास चे सारे देशा मां समाचार भेज़ला, ते सब बिमारा नु ओचे गोढु आणले, 36ते ओकनु बिनती करु लाग़ले कि, ओ वानु आपणे ओढ़णा चे पांदा नु हाथ लाऊं ङियो, ते जितना ने ओनु हाथ लाला, वे सारे ठीक हुती गेले।

Nu geselecteerd:

मत्ती 14: ODR

Markering

Deel

Kopiëren