मत्ती 11
11
यूहन्नेकी येशू ओत्सापा बात ठिर ताङाते
(लूका ७:१८-२३)
1थे खोरोङ चेलातेबा च्युन्ङीला थेबेकी चुक चुक खिता फाप्कीते सिन साकीन थेरूई ताङनामेई येशू गालील अञ्चल सार सारगी मिओनला गा लाङच्येते बात च्यि ईन्दे सिन लोपाला गाल्सुङ।
2-3थेमे बप्तिस्मा तेरकान्ते यूहन्नेकीङ येशूकी खाबाते कामगी बात थोसुङ। थेजीन थे जेलदु ओतान। थेमे थेकी थे खोरोङ चेलातेबा कोई कोईला काताङगीन “लो ख्योकोन येशू ओत्सादु ग्युक। थेमे थेला परमेश्वरगी तोङगो साबाते ख्रीष्ट हजूर खोराङ ईन्दाना था ज्येनज्यीक ओङगीते सिन ठिला स्योक,” सिन थे ओत्सापा ताङसुङ। 4थेबेकी लेप्कीन थे बात ठिनामेई येशूकी “ख्योकोनगी ङे लोप्कीन ओताते बात थोकीन ओत थेमे ङे खिन ओताते काम खेराङ मिगीराङ थोङगीन ओत। थोगी गाल्ला खेराङगी थोङातेताङ थोबाते बातओन यूहन्नाला सि। 5चुक सासीन अन्धतेबा थोङा थुप्च्या गालाते, कुज्येतेबा ख्याम्बा थुप्च्या गालाते थेमे जे खोबाते मिओन ठाक्पाते बात थेला सि। थोकराङ खाला ओन्बातेबा थोबा थुप्च्या गालाते, स्याप्ते मिओन सोम्बो लोक्पाते थेमे छ्याःङ मेताते मिओनला गा लाङच्येते बात लाप्कीन बिन्दाते बाततेबाङ गाल्ला थेला सि। 6छ्याःङ शंका मिक्किता खाला ङाला परमेश्वरगी ताङाते ईन सिन विश्वास खित्कान्ते मि भाग्यमानी ईन सिन सि,” सिन सिदुक।
येशूकी यूहन्ना चुक्ते मि ईन्दे सिन साबाते
(लूका ७:२४-३५)
7-8यूहन्ने चेलाओन थेरूकी ग्युरगीन गाल्नामेई येशूकी थेरू ओताते मिओनताङ यूहन्ने बात खिताला स्यूसुङ। थेकी थेबाला “यूहन्ना री नाङला देता ओते बेलाला ख्योकोन थेपा च्यि तार गाले? च्यि ल्हाबा खित्जीन होथेङपा ओताते काँसकी सो योम्च्येते तार गालाप? ना आउदी लेमुते खोलाक खोन्कान्ते मि तार गाले? थोक्ते मिनी गेल्बो दरवार नाङलाका देत्क्यो सिन ख्योकोनला छ्याराङ ओत। 9थोगी थेपा ख्योकोन ज्येनतोक छ्याःङ ताप्ला मेन्देकी परमेश्वर बात खित्कान्ते मिज्यीकलाका तार गाला ओतान मेन? थोक खाईन ख्योकोन ठेता खित गालाते यूहन्नानी परमेश्वर बात खित्कान्ते मिकामा मेन, थे भन्दाङ छ्येते ईन। 10च्यिला सासीन ख्रीष्टला देमा तोङच्येते बात खिन परमेश्वरगी परमेश्वर बातला ‘खोल्ला तोङा भन्दा गोमा ङा मिज्यीकला तोङगो। थेकीराङ खुई लाईदु जेसुकै ठीक खिओ,’ सिन साबा ओतान।#मलाकी ३:१ परमेश्वरगी ख्रीष्टला तोङा भन्दा गोमा तोङगो साबाते मिचेन यूहन्नाराङ ईन। 11थोगी बप्तिस्मा तेरकान्ते यूहन्नाचेन दि सा लुङबादु ओताते मिओन नाङ छ्येते ईन। थातासाक थे छेत छ्ये मि सुङ केबा मेत। तर था स्वर्गे राज्य बातराङ खिइ सासीनचेन बात खुदुकराङ ईन। यूहन्ना थोक छ्ये ईन्सीनोङ स्वर्गे राज्यदु स्यूबाते मिओन छेत छ्ये मेन। थेबा गाङे यूहन्ना भन्दाङ छ्ये ईन।
12ईन्दालाचेन यूहन्ना थे खोरोङला परमेश्वरगी खि साबाते काम खिताला स्यूबा छुरनामेई थरिङसाकराङ स्वर्गे राज्य विरोध खित्कान्ते मिओन ओत्कीन ओत। थेबाचेन जबरजस्ती खाला थे राज्यदु स्यूक्पा छोल्गीदुक। 13यूहन्ना ओङा भन्दा गोमामेकी थे ओङ ओङसाकराङ मोशाताङ ज्येनोङ परमेश्वर बात खित्कान्ते मि गाङेकी स्वर्गे राज्य ओङगो सिन साबा ओतान। 14थेमे परमेश्वर बात खित्कान्ते एलिया लोक्ला ओङगो सिनोङ साबा ओतान। ख्योकोन पत्ते खिओ सासीन लोक्ला ओङगो साबाते एलियाचेन यूहन्नाराङ ईन। 15ङेन्दा सेम ओत्कान्ते मिकी दि बातओन लेमु खाला ङेन।
16थेमे ख्योकोन था समय मि गाङेराङ चुक्ते ईन्दे सासीन चोमु खिताला ठाउँज्यीक्तु रूला देत्कान्ते फिजाओन च्योक्ते ईन। 17थेबाचेन खोपरोङ खोपरोङ नाङराङ मिडिगो। थेबा लाला लालेकी ज्येनतेबाला ‘ङ्योकोनगी बाक चे सिन लु लाला बाजा फुला खित्जीनोङ ख्योकोन च्यिला टेरेराङ मिक्किता खाला देत्कीते? थेमे ख्योकोनगीङ दुङाल खि सिन ङ्योकोन दुङाल खित्जुम खित्जीनोङ ख्योकोनचेन च्यिला खाराक्पाराङ देत्कीते?’ सिन सिओ। 18बात च्यि सासीन यूहन्नेकी छ्याङ रक्सी सिराते बान्दा माथुसुङ। थेमे बर्तङ देत्सुङ। तर ख्योकोन गाङेकी थेला ल्हन्डीक खोबाते मि दुका सिन सासुङ। 19थेरूई परमेश्वर ओत्सादुई वाबाते मि ङाचेन दुरू वाकीन जेसुकै सोबान, थुबान। तर ङात्ताङोङ ख्योकोन ‘तोते थे चुकस्यिक ईन्दाका। थेनी आउदी सोलुन्दाईताङ छ्याङ रक्सी थुङकानज्यीकका ओताक्वा। थेमे थेनी कर लिन्कान्तेबा थेमे ज्येनोङ पापीओनताङका र्वा खिदुक,’ सिन स्येदाङ खिदुक। जे ईन्सीनोङ परमेश्वरगी खाबाते काम थोङकान्ते मिओनगीचेन दि काम थेकी आउदी बुद्धि पुरे खाईन खाबाते ईन सिन लेमु खाला छ्या स्येक्यो,” सिन सिदुक।
येशू बात मेङेन्कान्तेबाला तिरी चुक ओङगीते
(लूका १०:१३-१५)
20येशूकी कोई कोई सारगी नाङला अचम्बते काम काल्बेई खाबा ओतान। थोक ईन्सीनोङ थे सारगी मिओनचेन खोपरोङ पापी दुका सिन छ्या स्येला परमेश्वर छ्य्वापा लै माक्यासुङ। थोगी थेबाला चुक मेलेबा ओङगीते सिन येशूकी दोक सिन बात खिताला स्यूसुङ। 21चुक सासीन “खोराजीनताङ बेथसेदादु मिवे, ख्योकोनला था आउदी मेलेबा ओङगो। ङे ख्योकोन नाङ खाबाते अचम्बते कामतेबा टायरताङ सीदोन सारगी मि नाङ खाबा ईन्सीन थेबेकी खोपरोङ पापी दुका सिन छ्या स्येला भाङ्रे खोलाक खोन्ला खोपरोङ गोःला थाला कोन्ला खित्च्या ओतान। दोक खाला थेबा परमेश्वर छ्य्वापा लै खित्च्या ओतान। 22थोगी ङा ख्योकोनला च्यि सिते सासीन परमेश्वरगी न्याय खिते छोमु ख्योकोनला छेत सजायनी थेकी टायरताङ सीदोन सारगी मिलाङ मेतेरो। 23थेमे कफर्नहुम मिवे, ङे ख्योकोन नाङ अचम्बते काम काल्बेई खासुङ सिन ख्योकोनचेन स्वर्गने ड्वा ङेत्क्यो सिन छ्ये खाईन देत्ला दुक। तर न्याय खिते छोमु ख्योकोनलानी परमेश्वरगी नरककुण्डमाका लुक्यो। ङे ख्योकोन नाङ खाईन तेन्दाते अचम्बते कामतेबा सदोम सारदु खाईन तेन्दा ईन्सीन थेरू मि परमेश्वर छ्य्वापा लै खाला परमेश्वरगी थे सारला थोक खाला थोरूमसाक नाशराङ तोङच्या मेतान। 24थोगी ङा ख्योकोनला च्यि सिते सासीन था न्याय खिते छोमु ख्योकोनला छेत सजायनी परमेश्वरगी सदोम सारगी मिलाङ मेतेरो,” सिन सिदुक।
येशूकी मिओनला ढुक्क खाला देत ज्युत्च्येते बात
(लूका १०:२१-२२)
25थेमे थे बेलालाराङ गाङेकी थोच्या खाईन येशूकी “आबा, खो दि स्वर्गताङ पृथ्वीते मालिक ईन। ङा खुईते जय जय खिओ। च्यिला सासीन स्वर्गे राज्य बात खुई पढे माक्याबाते थेमे काल्बा बात छ्या मेस्येकान्ते मिओनला लेमु खाईन खो च्युत्सुङ। दि बातनी खुई आउदी बुद्धि ओतातेताङ काल्बेई पढे खाबाते छ्ये छ्ये मिलाङ खो च्युता मेतान। 26आबा, खोल्ला दोक खिताराङ लेमु लासुङ। दोक खाईन खुई खिता चालाते च्योकराङ ओङसुङ,” सिन सासुङ। 27याङराङ थेकी “आबेकी ओताते जति गाङे ङे जिम्माला बिन्दा ओत। थेमे ङाला गाङे बात छ्या स्ये च्युता ओत। ङा चुक्ते ईन्दे सिन आबेकीकामा छ्या स्येक्यो। थोकराङ खाला आबा चुक्ते ईन्दे सिनोङ ङेकामा छ्या स्येक्यो। ङेकामा मेन, ङे छ्या स्ये ज्युता चालाते मिओनगीङ आबाला लेमु खाला छ्या स्येक्यो।
28पीरताङ दुक्पेकी खित्सादु स्याप खाबाते मिवे, ख्योकोन ङा ओत्सादु स्योक। ङा ख्योकोनला ढुक्क खाला देत ज्युत्क्यो। 29ङा ख्योकोनताङ स्येदाङ मिक्किओ, दुक्पाङ मेतेरो। लाङ दुल्जीन लाबाते लाङताङ गारला मोबाच्योक खाला ख्योकोनोङ ङे साबाते ङेन्ला ङे खाबाच्योक खि। थोक खासीन ख्योकोन छ्याःङ पीर मिक्किता खाला देता ङेत्क्यो। 30ङा ख्योकोनगी खिता मुथुप्च्येते खि मिसिरो, ङे खि साबाते ङेन्दा दुक्पा मेत,” सिन सिदुक।
Nu geselecteerd:
मत्ती 11: JUL
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 1992 Wycliffe Bible Translators Inc. All rights reserved.
