Luk 16
16
1Ka Mâ‐a vâ tepě na beyokwedi beaju, na, Enami ea momo n‘ uhuhu, e diyakindi na yongo; e salakudwě mâ na e jongolakidi mâ jumba jaju. 2Ka mâ‐a ndiya mâ, ka mâ‐a vâ na ju, na, E lě nd‘ eame’ e yokakě ekae o pěl‘ ’âvě? ta tatuwa nyanga ’vě e hadi o âvě o diyi yongo; ’kabojana oa diye pě yongo. 3Jâ ndi ja yongo tě ja vâ n‘ ulema, na, Mbi hake lě na? ’kabojana upangiyi muamě a vengidě ’mba oviya yongo: mba yâle o tonga; mbi yokakandi ihâni j‘ ijombana. 4Mbi ka langandi nyang‘ ’amě e ka hayě, na ovaně nd‘ o bâ‐ba ka ngidě ’mba o mandabo mabu, o ’mba‐mbi ka věngěmě oviya yongo. 5Ka mâ‐a ndiya ba diyaki hangwě nuwanango běhěpi, ka mâ‐a vâ na ua bohoboho, na, O lě nuwanango upangiyi muamě na ě? 6Ka mâ‐a vâ, na, Kama ea byějâ bea mavulě. Ka mâ‐a vâ na ju, na, Nângâkâ ejanganangob‘ ’âvě, oa diya wâwâ, na nâvě oa lěndě mabo matano. 7Jâ ndi jaju ja vâ n‘ upâkwě, na, O lě nuwanango na ě? Ka mâ‐a vâ, na, Kama ea byějâ bea hwit. Ka mâ‐a vâ na ju, na, Nângâkâ ejanganangob‘ ’âvě, oa lěndě mabo logwambi. 8K‘ Upangiyi a bendě yongo tě e ha hakidi hohonganěngo yeně, ’kabojana e haki bokeli: ’kabojana bana ba he těkaně ba ndi o igona jabu iyowě wa na bana ba bwe. 9Mbi langwakiyandi inyěni, na, Lataki mboi na mamân ea bobe; ovaně nd‘ o inyěni o ka běyě oa věngěměni, ba nângâ inyěni o bediya bea ’gombe eěhěpi. 10A bweyakě ikěngě na behâlě, a ka bweya tepě ikěngě na beitě: na a ka humamě na behâlě, a ka humamě tepě na beitě. 11Nd‘ oningě o bweyeni ikěngě na mamân ea bobe, nja ka bweyidě inyěni hika ea mbambayě? 12Nd‘ oningě o bweye n‘ ikěngě na bea mot‘ upâkwě, nja ka vě inyěni ibeanyu mětě? 13O ’bě n‘ uhayi a ka dilě bahangwě babale: ’kabojana a ndi a binaka umbâkâ, na mâ‐a tândâ upâkwě; e diye nonaně vâkâna a ka bweyiděndi umbâkâ, na mâ‐a pějě upâkwě. O iběni na ngudi ya dilě Anyambě na mamân.
14Ka Farisi ba diyaki tepě n‘ itângina, ba yoka belombo těkabe beěhěpi; ba ka věhěkě Mâ. 15Ka Mâ‐a vâ na bâ, na, Inyěni ndi ba huwakidě nyolo janyu mětě o bato ba jadi; ndi Anyambě a te yowěngo melema meanyu; ’kabojana e yěněněkě jambo iněně na bato e ndi elombo e binakwě o boho boa Anyambě. 16Belekanako na basâki ba hukakiděnd‘ o Jân: oviya egombe těeně ipangiya ja Anyambě i kalakudwěndi, na moto uěhěpi a pinyilakiděnd‘ o ngiya ’mě. 17E bobâbu wa na he na oba ba tombaka, ndi hanga na epuhu ehâlě mětě e puhwanakiya o belekanako.
18A ka věngidě mwad‘ ’aju, na mâ‐a ba upâkwě, a handi ihonde; na a ka bayě pě mwajo tě a di věngudwěngo na momi ’aju ně a ha tepě ihonde.
19O diyakindi na enami ea momo e ma bâtâkâ mangâla na mavěla mayam‘, a ma jaka beja beyamu buhwa boěhěpi. 20O diyakindi n‘ ujombani dina na Lasarus, a ma nangakudwě o jâmbě jaju, penge ti. 21A vahaka o jedwě na nguhu i ma kutwaka o tagulu ea enami tě ea momo: na mbwa tepě i ma vakandi ka měngwěkě penge jaju. 22E diyakindi, o, ujombani u wakidi, ka mâ‐a bapwě na enjěl na ’la o ngonga ea Ebraham: ka enami ea wa tepě, ka mâ‐a tongwě; 23ka mâ‐a betaně mihâ maju o Hěl, a bě o majili, ka mâ‐a yěně Ebraham yaviděngo, na Lasarus o ngong‘ ’aju. 24Ka mâ‐a yama, ka mâ‐a vâ, na, Paia Ebraham, yěněkě ’mba ngěbě, na nâvě oa loma Lasarus, na, a dubake upenjo muaju o miba, na mâ‐a vâtě ’mba emi ’amě; ’kabojana mbi yěněkindi majili o ungonyi těkamu. 25Ndi Ebraham a vâki, na, Mwana o, yongakiděte o ’gombe ’âvě e diyakidi mihâ o ma pahakiyandi belombo beâvě beyamu, Lasarus tepě belombo bebe: ndi kya těkaně a ka yěněkudwěndi mbya, nd‘ âvě‐o yěněkudwě majili. 26Tombete beěhěpi ekabe be diye, ho ndi na mbelenge eněně bonguwěngo o hangan‘ ’ahu na nâvě: ovaně nd‘ o ba ka vahě o tomba oviya okava na pâ o âvě o jadi ba ka diyě ba yâlě; na ba vakiyě ovoně, ba yâlě tepě o tomba na pâ o hwě ho jadi. 27Ka mâ‐a vâ, na, Paia, mba hâhâliděnd‘ âvě lomaka mâ o ndabo ’a paia: 28ikabojana mbi na bana b‘ ina batano; ovaně nd‘ o mâ‐a ka pakuwě bâ, o banga ba pâ tepě iboko tě via majili ekavi. 29Ebraham na ju, na, Ba na Mosěs na basâki; ba yokakiye bâ. 30Ka mâ‐a vâ, na, Nyawě, Paia Ebraham: nd‘ oningě umbâkâ a vala o bâ‐ba jadi oviya iwedo, vâkânâ ba uluwendi. 31Ka mâ‐a vâ na ju, na, Oningě ba yokiye Mosěs na basâki, ba yoke pě, tombete umbâkâ a pumbuwa oviya iwedo.
Nu geselecteerd:
Luk 16: BNG1895
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Published by the American Bible Society in 1895.
