Matius 1
1
Tumpuloko Yesus Kristus
(Luk. 3:23-38)
1Eimi tutura pomeduncu tumpuloko to nampomulika Yesus Kristus, muli Daud, muli Abraham. 2Abraham nampoanaka Ishak, Ishak nampoanaka Yakub, Yakub nampoanaka Yehuda pade ompi-ompina, 3Yehuda nampoanaka Peres hante Zerah lako hi Tamar. Peres nampoanaka Hezron, Hezron nampoanaka Ram, 4Ram nampoanaka Aminadab, Aminadab nampoanaka Nahason, Nahason nampoanaka Salmon, 5Salmon nampoanaka Boas lako hi Rahab, Boas nampoanaka Obed lako hi Rut, Obed nampoanaka Isai, 6Isai nampoanaka Magau Daud.
Daud nampoanaka Salomo. Tina Salomo ei bangkele Uria owi. 7Salomo nampoanaka Rehabeam, Rehabeam nampoanaka Abia, Abia nampoanaka Asa, 8Asa nampoanaka Yosafat, Yosafat nampoanaka Yoram, Yoram nampoanaka Uzia, 9Uzia nampoanaka Yotam, Yotam nampoanaka Ahas, Ahas nampoanaka Hizkia, 10Hizkia nampoanaka Manasye, Manasye nampoanaka Amon, Amon nampoanaka Yosia, 11Yosia nampoanaka Yekhonya pade ompi-ompina tempo to Israel laidagi pade laipahuru noencu rau i Babel.
12Tempora to Israel i Babel, Yekhonya nampoanaka Sealtiel, Sealtiel nampoanaka Zerubabel, 13Zerubabel nampoanaka Abihud, Abihud nampoanaka Elyakim, Elyakim nampoanaka Azor, 14Azor nampoanaka Zadok, Zadok nampoanaka Akhim, Akhim nampoanaka Eliud, 15Eliud nampoanaka Eleazar, Eleazar nampoanaka Matan, Matan nampoanaka Yakub, 16Yakub nampoanaka Yusuf balailo Maria to nampaote Yesus to laiuli Kristus, batuana: Magau to Pepakahalama to laitipa Alatala.
17Aji, humaweena naria hampulu opo lapi muli lako Abraham duu hi Daud, hampulu opo lapi muli lako Daud duuna to Israel laipahuru noencu rau i Babel, pade hampulu opo lapi muli mui lako poencura rau Babel duuna hi Kristus.
Pangotea Yesus Kristus
(Luk. 2:1-7)
18Pangotea Yesus Kristus ewa ei. Tempo Maria tina Yesus nakarohoa hante Yusuf, kapomara noncamoko, notianami Maria lako baraka Inoha to Nagaha. 19Naupawee Yusuf karohoa Maria ee tauna to nanoro, moma'i madota mampakaea Maria i tingoo todea. Etu pade Yusuf noliwo mampogaaka#1:19 Ada to Yahudi owi, ane momekarohoidamo, moma mamala hampa-hampa mogaa. Mamala mogaa, ane rabotuhi mantuku ada pogaa to Yahudi aga. belo moto'i. 20Naupawee, bula Yusuf notimba napa to laipoliwoina, nerawa hadua malaeka Pue i rara pangipina pade nangulika'i, “Yusuf muli Daud, nemoko maeka mangala Maria mupobangkele, habana ngana to i rara ntaina ee mai lako baraka Inoha to Nagaha. 21Hia mei mampaote hadua ngana balailo, pade kana mukahangai-'I Yesus#1:21 Hanga Yesus rara baha Ibrani batuana: Alatala nampakahalama.. Apa Hiami to mampakahalama todea-Na lako pehuku Alatala habana doha-dohara.”
22Humawee lauria nadupa nopaganai lolita Pue to laiparata nabi owi, iwei, 23#Yes. 7:14 “Hadua toronaa mei kana motiana bo mampaote hadua ngana balailo, pade hira mei mangkahangai ngana ee Imanuel.” Rara baha Ibrani, Imanuel ee batuana: Alatala nampodoheta.
24Nematapi Yusuf lako noturu, laituruhinami napa to laiparentakana'i malaeka Pue. Laialanami Maria laipobangkelena. 25Naupawee, moma'i laipolairina duuna Maria noana hadua ngana balailo. Yusuf nangkahangai Ngana ee Yesus.
Nu geselecteerd:
Matius 1: MYL
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
