မဿဲ 1
1
ယေရှုခရစ်တော်ရဲ့ ဘိုးဘေးလေကြောန်း
(လုကာ ၃.၂၃–၃၈)
1အာဗြဟံန ဒါဝိဒ်လေဟှနေဘီးဟှာ မွီးဖွားဆင်းသတ်လာဟှူ ယေရှုခရစ်တော်ရဲ့ ဆွေဇင်မျိုးဆစ်စာရင်းမာ အယ်မူမျိုးဖြစ်လေဟှယ်။
2အာဗြဟံဟှာ ဣဇာက်ရဲ့ဖ ဖြစ်ဟှယ်။
ဣဇာက်ဟှာ ယာကုပ်ရဲ့ဖ၊
ယာကုပ်ဟှာ ယုဒန သူ့ညီကိုလေရဲ့ဖ၊
3ယုဒဟှာ တာမာနရဟှူ သားလေဖြစ်ဟှူ ဖာရက်န ဇာရရဲ့ဖ၊
ဖာရက်ဟှာ ဟေဇရုံရဲ့ဖ၊
ဟေဇရုံဟှာ အာရံရဲ့ဖ၊
4အာရံဟှာ အမိနဒပ်ရဲ့ဖ၊
အမိနဒပ်ဟှာ နာရှုန်ရဲ့ဖ၊
နာရှုန်ဟှာ စာလမုန်ရဲ့ဖ၊
5စာလမုန်ဟှာ ရာခပ်နရဟှူ ဗောဇရဲ့ဖ၊
ဗောဇဟှာ ရုသနရဟှူ သြဗက်ရဲ့ဖ၊
ဩဗက်ဟှာ ယေရှဲရဲ့ဖ၊
6ယေရှဲဟှာ ဒါဝိဒ်မန်းဂီးရဲ့ဖ။
ဒါဝိဒ်မန်းဂီးဟှာ ဥရိယရဲ့မယားဖြစ်ဖူးဟှူ မီးမနရဟှူသား ရှောလမုန်ရဲ့ဖ ဖြစ်လေဟှယ်။
7ရှောလမုန်ဟှာ ရောဗောင်ရဲ့ဖ၊
ရောဗောင်ဟှာ အဘိယရဲ့ဖ၊
အဘိယဟှာ အာသရဲ့ဖ၊
8အာသဟှာ ယောရှဖက်ရဲ့ဖ၊ ယောရှဖက်ဟှာ ယဟောရံရဲ့ဖ၊
ယဟောရံဟှာ ဩဇိရဲ့ဖ၊
9ဩဇိဟှာ ယောသံရဲ့ဖ၊
ယောသံဟှာ အာခတ်ရဲ့ဖ၊
အာခတ်ဟှာ ဟေဇကိရဲ့ဖ၊
10ဟေဇကိဟှာ မနာရှေရဲ့ဖ၊
မနာရှေဟှာ အာမုန်ရဲ့ဖ၊
အာမုန်ဟှာ ယောရှိရဲ့ဖ၊
11ဗာဗုလုန်ဗြို့ဟှို ဣသရေလလူမျိုးလေ ဖမ်းဆောန်ခံရဟှူ ခီမာ ယောရှိရဲ့သားလေဟှ ယေခေါနိန ညီကိုလေဖြစ်လေဟှယ်။
12ဗာဗုလုန်ဗြို့ဟှို ဣသရေလလူမျိုးလေ ဖမ်းဆောန်ခံရဘီးန
ယေခေါနိဟှာ ရှာလသေလရဲ့ဖ ဖြစ်ဟှယ်။
ရှာလသေလဟှာ ဇေရုဗဗေလရဲ့ဖ၊
13ဇေရုဗဗေလဟှာ အာဗျုန်ရဲ့ဖ၊
အာဗျုန်ဟှာ ဧလျာကိမ်ရဲ့ဖ၊
ဧလျာကိမ်ဟှာ အာဇော်ရဲ့ဖ၊
14အာဇော်ဟှာ ဇာဒုတ်ရဲ့ဖ၊
ဇာဒုတ်ဟှာ အာခိမ်ရဲ့ဖ၊
အာခိမ်ဟှာ ဧလုဒ်ရဲ့ဖ၊
15ဧလုဒ်ဟှာ ဧလာဇာရဲ့ဖ၊
ဧလာဇာဟှာ မဿန်ရဲ့ဖ၊
မဿန်ဟှာ ယာကုပ်ရဲ့ဖ၊
16ယာကုပ်ရဲ့သားဟှာ မာရိရဲ့လန် ယောသပ် ဖြစ်လေဟှယ်။ အယ်မူမာရိဟှာ ခရစ်တော်#၁.၁၆ ခရစ်တော်၊ မန်းဂီးရာတွပ် ဘုရားသခင်ဟှ ဝီးချယ်ဟှားဟှူ ကယ်တန်ရှင် ဆိုဘီး ဓိပါယ်ရဟှယ်။ ဆိုဘီး နာမယ်ရှိဟှူ ယေရှုရဲ့မိ ဖြစ်လေဟှယ်။
17အယ်မူမျိုး မျိုးဆစ်ပေါန်းဟှာ အာဗြဟံဟှနေဘီး ဒါဝိဒ်ထိ ဆယ့်လေးဆစ်၊ ဒါဝိဒ်ဟှနေဘီး ဗာဗုလုန်ဗြို့ဟှို နယ်နှင်ဒဏ် ခံရခန်ခီထိ ဆယ့်လေးဆစ်၊ ဗာဗုလုန်ဗြို့ဟှို နယ်နှင်ဒဏ် ခံရဘီးန ခရစ်တော် မွီးလာဟှူခီထိ ဆယ့်လေးဆစ် ဖြစ်လေဟှယ်။
ယေရှုခရစ် မွီးဖွားလာဟှူကြောန်း
(လုကာ ၂.၁–၇)
18 #
လု ၁.၂၇
ယေရှုခရစ်တော် မွီးဖွားလာဟှူ ကြောန်းရာဟှ အယ်မူမျိုးဖြစ်ဟှယ်။ မိခင်မာရိဟှာ ယောသပ်န မင်္ဂလာဆောန်ဟှို့တွပ် စေ့စပ်ဘီး တူးဒူနေခန်မာ သန့်ရှင်းဟှူဝိညာဉ်တော်အားဖြင့် ဗိုက်ပိုက်နေလေဟှယ်။ 19သူ့လန် ယောသပ်ဟှာ ဖြောန့်မတ်ဟှူသူ ဖြစ်ဟှူကြောန့် မာရိဟှို လူဘောင်လယ်မာ ယှစ်ရဘဲနေအောန် တိတိဟှား ကွာရှင်းမယ် ဆိုဘီး ကြံစည်ဟှားလေဟှယ်။ 20အယ်မူမျိုး ကြံစည်နေခီမာ အိမတ်ထဲမာ ယောသပ်ဟှို ဘုရားသခင်ရဲ့ ကောန်းဂန်တမန်ဟှ “ဒါဝိဒ်အမျိုး ယောသပ်၊ နန့်မယား မာရိရဲ့ ဗိုက်တွပ် စိုးရိမ်န။ အယ်ဗိုက်ဟှာ ဘုရားသခင်ရဲ့ သန့်ရှင်းဟှူဝိညာဉ်တော်ရဲ့ တဂိုးအားဖြင့် ရလာဟှူဗိုက်ဖြစ်လေဟှယ်။ 21#လု ၁.၃၁သူဟှာ သားယော့‑က်ကျားဟှို မွီးလေ့မယ်။ အယ်မူသားဟှာ သူ့ရဲ့လူလေဟှို ပြစ်ဟှနေဘီး ကယ်တန်ပေးမယ့်သူ ဖြစ်ဟှယ်။ အယ်ကြောန့် ယေရှု ဆိုဘီး နာမယ်ပေးရမယ်” ဆိုဘီး ပြောလေဟှယ်။
22အယ်ကြောန်းရာဟှ ရှေးပရောဖက်လေအားဖြင့် ပြောဟှားဟှူ ဘုရားသခင်ရဲ့ ဗျာဒိတ်တော် ပ္လဲ့ဇောင်ဟှားလေဟှယ်။ 23ဗျာဒိတ်ပြုဟှားဇာဟှ “ကေ့ရှုဂေ့။ ပျိုမဟှာ ဗိုက်ပိုက်ဘီး သားဟှို မွီးဖွားလေ့မယ်။ အယ်သားဟှို ဧမာနွေလ ဆိုဘီး နာမယ်ပေးရမယ်” (ဧမာနွေလရဲ့ နတ်ဓိပါယ်ဟှာ “နို့လေနတူးဒူရှိဟှူ ဘုရားသခင်” ဆိုဘီး ဓိပါယ်ရလေဟှယ်)။
24ယောသပ်ဟှာ အိယာဟှ နိုးလာဘီးန ဘုရားသခင်ရဲ့ ကောန်းဂန်တမန်ပြောဟှားတိုင်း မာရိဟှို သူ့မီးမဖြစ် လတ်ထတ် ပေါန်းသင်းလိုက်လေဟှယ်။ 25#လု ၂.၂၁အယ်ကြောန့် အယ်သားဟှို မွီးဖွားခီရော့‑က်ခန်ထိ တူးဒူအိဘဲန နေလေဟှယ်။ အယ်သားဟှိုလည်း ယေရှု ဆိုဘီး နာမယ်ပေးလေဟှယ်။
Nu geselecteerd:
မဿဲ 1: NTDWB24
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
The New Testament in Dawei Language © The Word for the World International and The Dawei Bible Translation Committee, 2024.
