Jenesis 9
9
Nai Maromak halo aliansa ho Noé
1Nai Maromak foo bensaun ba Noé ho ba nia oan sira, hodi hatete, “Imi tenki iha oan barak baa, hodi halo nakonu mundu. 2I animal fuik, manu ho ikan sira sei tauk ba imi. Imi mak tenki domina sira. 3Imi bele haan animal sira nee hotu nia naan, hanesan imi haan ai haan hosi toos. Buat hirak nee hotu Hau foo ba imi.
4Maibee imi la bele haan naan nebee raan sei iha, tanba animal nia moris iha nia raan. 5-6Hau halo ema tuir Hau nia imajen. Tanba nee, keta oho ema. Se iha ema ka animal mak halo mate ema, nia tenki mate. 7Imi iha oan halo barak baa, hodi halo nakonu mundu nee.”
8Nai Maromak hatutan tan Nia liafuan dehan, 9“Agora Hau halo Hau nia aliansa ho imi, ho mos imi nia jerasaun sira. 10Aliansa nee kona mos ba buat hotu nebee mak moris, hanesan animal hakiak, animal fuik, ho manu fuik sira, buat hotu nebee sai hamutuk ho imi hosi roo nee. 11Hau nia aliansa nunee: Hau sei la halo tan rai nabeen, para hamate buat hotu nebee iha moris, i harahun buat hotu iha mundu.
12-13Hau tau arkuiris iha loro leten hanesan sinal hodi foo hanoin mai Hau, kona ba Hau nia aliansa nebee nunka kotu ho imi ho buat hotu nebee moris iha mundu. 14Bainhira Hau halo kalohan taka rai, i arkuiris mosu iha kalohan nee, 15entaun Hau sei hanoin Hau nia aliansa ba imi ho ba animal hotu-hotu katak, bee boot sei la harahun tan buat hotu-hotu nebee iha vida. 16-17Bainhira arkuiris mosu iha kalohan, Hau sei haree, i sei hanoin Hau nia aliansa ba buat hotu-hotu nebee iha vida. Aliansa nee sei la kotu. Nee mak sinal nebee hatudu Hau nia aliansa nee.”
Noé foo malisan ba nia oan Kam
18Noé nia oan sira nebee sai hosi roo, mak nee: Sem, Jafé no Kam. (Kam nee Kanaán nia aman.) 19Ema hotu-hotu iha mundu nia jerasaun mai hosi Noé nia oan nain tolu nee.
20Noé nee ema toos nain. Nia mak hahuu fofoun kuda uvas. 21Iha loron ida, nia hemu tua uvas too lanu todan. Nia hasai tiha nia hena hodi toba molik deit iha nia tenda laran. 22Bainhira Kam haree nia aman isin molik, nia halai sai ba liur, konta ba nia maun Sem ho Jafé. 23Depois sira nain rua foti manta ida, kahe iha sira nia kabaas, i hakiduk tama ba tenda laran, hodi taka sira nia aman nia isin molik. Sira hateke ba sorin para la bele haree nia molik. Depois sira sai ba liur.
24Bainhira Noé nia oin komesa moos ona, nia hatene saida mak nia oan ikun halo ba nia. 25Entaun nia hatete, “Kanaán! Hau foo malisan ba o! O sei sai atan ba o nia maun sira.
26Hahii ba NAI, Sem nia Maromak!
Kanaán nia aman sei sai Sem nia atan.
27Nai Maromak sei amenta Jafé nia rain halo luan;
i nia jerasaun moris dame ho Sem nia jerasaun.
Maibee Kanaán nia aman sei sai Jafé nia atan.”
28Komesa hosi bee boot nee hotu, Noé sei moris tan tinan 350. 29Nia mate ho tinan 950.
Nu geselecteerd:
Jenesis 9: BTDT
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2024 Wycliffe Timor-Leste.
