Luka 14

Yesu tay əmbəlgən məsgbəgba'a

1Yesu atoŋguk eŋgil ana daya net Farisaɗe da pay naffet vi kawzəma, yaŋ adawsiviwini. 2Ɗəf məskan pay abani. 3Yesu azlani, aɓsit mərbaŋ-mahenziŋ dit Farisaɗe dawnəh na: Tive tay nawmbəlgən ɗəf pay naffet sa tay ɓa? 4Ndəɗaŋ ɓataɓata. Yaŋ Yesu agəma, ambəlgəni, appan ambatə. 5#MAT 12:11Yaŋ aɓsit na: Naway səmmbokum, an wətəni awaniɓa medgeɗge nan abətək a vov net iŋkile pay naffet na agəm na zən əkdəhən ɓa di? 6Dəɓap əzlanən aket zəgeɗis ɓa.

Əwel təkiya gəm əya ɗiy əkkala

7Yesu apelik wənməkkpaŋga sit ɗiy miyeti vi awlek əwel zəga nassa na sləma. Aɓsit na: 8#WƏN 25:6,7An ɗəf ayukuk a təki nawɓele, kədassok aka zəga nassa na sləma ɓa, kuzuŋ ayək ɗəf gagdak daykiko, 9ka ɗəf məs dəyukum adazzan ənah suk na: Apəl təki sən ɗəfəŋka, ka is kaddok də wil arok əssok aka zəga nassa an ɗarə. 10Ya an məyuki a təki əkkal na, dok əsok aka zəga nassa an ɗarə, vi an ɗəf məs dəyuk adek na, wanah suk na: Baynawa ade əsok aka zəga nassa na sləma. Asna wakərah gagdak abet ɗiy məs kəssok əzəm dənɗaŋ vet pakə. 11#MAT 23:12; LUK 18:14Vi ɗəf an dəɓaygən ki zən pak kawɓe'gəni, ɗəf an dəɓe'gən kiyən pak kawɓaygəni.

12Yaŋ aɓsən ɗəf məs dəya nak tam na: An kəgəɗək zəga nawzəm kapaya awaniɓa moskoyo, kədawye bayneŋgiɗuk ɓa, milmiŋgiɗuk ɓa, həlfiŋgiɗuk ɓa, meggeŋgiɗuk məsaryeɗ ɓa, vi adawyukun tam laha kawfaɗ suk agəlan ɓa. 13An kədək waynabaya na, aye məssehẽŋɗe, maŋgalɓayeɗi, vədalɗe gəm deŋgerɗe dərəŋgə. 14Wasan suk ka əzaɓa vi aɓapən na əfaɗ suk agəlan ɓa. Vi kawfaɗ suki agəlan pay əsilye net ɗiy en təstəs səka əmta.

Wənməkkpaŋga na waynabaya

(MAT 22:1-10)

15Yaŋ ɗəf taka səmmbet ɗiy məyet aprəm wənəska, aɓsən Yesu na: Əzaɓ aka ɗəf an nawzəm way addəv məlĩ na Maŋgəlva. 16Yesu azlan sənək na: Ɗəf maɓɓan adək waynabaya də moskoyo, ayək ɗiy diyɗa. 17Pay nawzəm way vanəska, aslənək balam nan dənah sitgin ɗiy miyet na: Məde vi zəga pak məzaɓani. 18Baymet pak atəŋgaŋgək əpel məstaka na gədəvən adawda ɓa. An daabəŋ aɓsən na: Nəlbahək gulyo, wəray tay nəmbatgən ulani, kamə gədəvuk adawda akaw ɓa. 19Ɗəf maɓɓan amna: Nəlbahək wasliɗe nense kəlaw waməmbat əyegeti kamə gəduvuk adawda akaw ɓa. 20Dəf maɓɓan amna: Kakaŋ nəgəm gulku vini nərah na əmbat ɓa. 21Balam amndanək aza daya nani, anah sənək wən nan pakə. Yaŋ gədəv afən gəla adə, aɓsən balam nan nak na: Go' dok aket tiveɗ gugriɗ dit memeɗeŋɗe na walaŋgəla-metiŋ kəkigin məssehẽŋɗe, maŋgalɓayeɗi, deŋgerɗe gəm vədalɗe aŋka. 22Yaŋ balam anah na: Daya an məs kəɗi wən nan nak agəɗka, ya təki apələk əmpa'e. 23Daya aɓsən balam nak na: Dok aket tiveɗ gugriɗ gəm dəmet mambereɗi, aska wəlet ɗiy dətoŋgoŋgən vi gəla naw dəknahgəni. 24Vi in tat ənah sukum: Ɗəf taka səmmbet ɗiy miyet daabəŋ nek tay nawnen way naw ɓa.

Tive nakkpaŋ gawla na Yesu

(MAT 10:37-38)

25Ɗiy diyɗa tay əzbanən Yesu. Ndən kpaŋ aɓsit na: 26#MAT 10:37An ɗəf adek azawa, an dəzel afən ɓa, man ɓa, guluk nan ɓa, kirtin ɓa, milmiŋgiɗin mezeŋleket dit məguluŋgit ɓa, mãy zeŋgilen pak ɓa na, aɓap na əsan ka gawla naw ɓa. 27#MAT 10:38; 16:24; MAR 8:34; LUK 9:23Ɗəf an dəslan məzliwrihe nan dəzbawgən ɓa, aɓap na əsan gawla naw ɓa. 28Naway səmmbokum an aŋgələk ərka gəla-mələklək na, asan əɗɗum tagay aka an məs adawzani kawlan na an navan vanəs na wagrak wəza vanə sa di? 29Vi an atəŋgəka ya dəɓap əgrakən ɓa na, ɗiy en məs dədawlanən pak wamasaŋ akan 30dawnəh na: Ɗəfəŋka, atəŋgək ərka gəla ya dəɓap əgrakən ɓa. 31Awaniɓa məlĩ awani, an tay əmbat əlpa də məlĩ mbərən na, asan na əɗɗum tagay na, an waɓap əmbat dit ɗiy gabal kəlaw kawləm sən ɗəf an dədazzan akan dit ɗiy gabal kaklaw sula ɓa di. 32Ya an aɓap na ɓa, adan məlĩ andak tay faraɗa tagay waslən metiveɗ azani vi kassohon əslere. 33Vaski kan asan sən ɗəf nammbokum pak məs dəppet zəgeɗ nan pak ɓa, aɓap na əsan gawla naw ɓa.

Bətu məs atər na wəray ɓa

(MAT 5:13; MAR 9:50)

34Bətu zəga moggoni, ya an lelem na bətu agraka mi adawtər əmpa di? 35Atər na wəray aza dəlvafuŋ ɓa awaniɓa vi ba'ar ɓa, kaggbo'ni a gizbe. Məs də sləman naprəma dəprəma.

Nu geselecteerd:

Luka 14: GB

Markering

Deel

Kopiëren