Va'Atəŋ 21
21
Uwa na Isak
1Yawe aɗɗumuk akat Sara va anahə, Yawe aɗɗa sətək Sara va aynan sət wən nani. 2#IBR 11:11Sara təgəmək daway, tuwə wiyin sən Abraham səka wəgal nata, də pay an Maŋgəlva anah sət lahəŋ naka. 3Abraham alvanək wiyin məs Sara tuwə sən nak na Isak. 4#VAA 17:12; WNM 7:8Aka wəvoŋ dodopoɗo Abraham askəl Isak awra va Maŋgəlva aɗi sən wən naka. 5Wəzva na Abraham səkati gala muwa Isak wətəni. 6Sara təmna: «Maŋgəlva agəɗ suwək zəga nawmasa! Ɗəf dəprəm pak wamas akawa.» 7Yaŋ təmnah: «Naway nawnah sən Abraham lahəŋ na Sara watəweɗgit kirni di? Yaŋ nəwə sənək wiyin aka əgal nani!»
Abraham arɓahatək Hagar də Ismayel
8Wiyin aɓayka, məvokni səmet bide. Abraham agəɗək wəzləra də waynabaya metiŋgin pay məvok Isak səmet bide.
9Yaŋ Sara tula wətət Hagar mə Eziptək tuwə sən Abraham əŋ əsmayã. 10#GAL 4:29,30Tənah sən Abraham na: «Arɓəhət balamək kəŋ də wətəta, vi wətət balamək azəm na gəla də wətu Isak ɓa.»
11Wənəs mbərayni diyɗa aza Abraham, aka wən na wətənənka. 12#ROM 9:7; IBR 11:18Yaŋ Maŋgəlva anah sən Abraham na: «Kədawla wənnəŋ va mbərayən azok aka batam wiyin dət balamək nok ɓa. Aprəm məs Sara tədawnah suk pakə, vi də Isak kədawɗi zeŋvuko. 13Ya an dəwəl sən wətət balamək na, wanəɗɗa dəsangən vanday, vi zeŋvuki ye'e.»
14Abraham asilik də mompummo pumu, agəmək peŋ də kwenekwene net iŋkile apsət Hagar. Alap sət wiyin awlata, yaŋ appat tələ. Təmbat slorslor a kapta-muyã na Ber-Seba. 15Adan iŋkile naddəv kwenekwene agrakaŋgə, təzgan wiyin ammba gaslamba. 16Təmbat əsat ɓuhu, gap nawhon hara. Vi tat ənəh na: «Nədawla əmta na wiynəŋ ɓa!» Təslan wəlat təhəmə. 17Maŋgəlva aprəmək wəla wiyna, maslay na Maŋgəlva ayət Hagar sə disiŋ. Apsət na: «Miy dərəhuk di Hagar? Kəgeslne' ɓa, vi Maŋgəlva aprəmək wəla wiyin sə təki asani. 18Asili! Asok zuk arma va wiyən ɓəlɓələ, vi wanəkkpaŋgan ka ɗiy diyɗa.» 19Yaŋ Maŋgəlva akol harata, tula vov net iŋkile. Təmbat təknəh kwenekwene naka, təpsən wiyna.
20Maŋgəlva asanək də wiyin naka, aɓayə, asan a kapta-muyã də gəla. Mətəvəla yi; 21asan a kapta-muyã na Paran, man təkay sən guluk səka dələv na Eziptə.
Wənmiyna na Abraham də Abimelek
22 #
VAA 26:26
Pay nanəska, Abimelek poh də Pikol, daya net məzəlpaŋ nani, anah sən Abraham na: «Maŋgəlva tay də is addəv zəga kədaɗɗa pakə. 23Asway su də Maŋgəlva aŋ kakaŋkəŋka, kəzəm na kiyu ɓa, kiyit kirtu də zeŋvu ɓa: Va moggon nəgəɗ suk aka dələv kəsok molhõyõ akanəŋka.» 24Abraham aɓsən na: «suwayə.»
25Abraham akak dolgoy aba Abimelek, aka wən na vov net iŋkile məs belemɗe nan amõhoŋgu. 26Abimelek, amna: «Nəsən ɗəf dəɗɗa zəgas ɓa; kənah su ɓa, in sən kiyu nəprəm ɗah an dəpaŋki ɓa ɓa.» 27Abraham agəmək gilew dit wasliɗe epsin Abimelek, ndəɗaŋ sulegit pak aɗiyaŋ wənmiyna. 28Abraham awelik kirit timeŋgiɗ muguluŋgit buhul temme. 29Abimelek anah sən Abraham na: «Kirit timeŋgiɗ kuwel buhuliŋ naɗɗa miy di?» 30Azlan sən na: «Atef timeŋgiɗ buhul səvawiŋki, dəssoŋgən ka narban na, intə nəso' vov net iŋkəleŋka.» 31Ndəni miya təki nan na Ber-Seba, vi adaki aswayaŋ sulegiti.
32Aɗiyaŋgək wənmiyna net a Ber-Seba. Abimelek asilik də Pikol daya net məzəlpaŋ nani, amndon aka dələv net mə Filistiɗe. 33Ampək wəlaŋga adawyaŋ na Esel a Ber-Seba adak akkaman Yawe Maŋgəlva an faɗ də iya nani. 34Abraham aliyək aka dələv net mə Filistiɗe diyɗa.
Nu geselecteerd:
Va'Atəŋ 21: GB
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
All right reserved
