मात्ति 15
15
रितिथितिगा उतुम्बे चिन्दुचिहा
(मार्कुस ७:१-१३)
1यारुसालेमभाङ् एकोहिप्पाङ् फारिसिचि नुङ् धार्मासाप्ला चिन्खुबाचि येसु वायानाबे न्दायाहोङ् न्छिम्दु, 2“इजाङ् ङ्गा चेलाचिङा पा-पुम्चिभाङ् न्जोगुक्तुहा रितिथिति पालाना न्जोग्वानिन्हा? इजाङ्बाङ्निङ् उङ्चिङा चामा हाक्निङ् ओन्दाङ् मुक ङ्वासिॽवान्चिनिन!”
3येसुङा पोलोवा पिचि, “ङ्खाॽलाभोङ् न्निङ्दा चा रितिथिति येम्माना निहुङ्बे इजाङ् निङ्वाफुमागा धार्मिक आग्गे ङ्येन्वाम्गान्हा? 4खेप्सानुम निङ्वाफुमाङा खाॽला कायामा, ‘ङ्गा म्बा-म्मा आदार चोगुचि, न्हाङ् इसा उप्पा-उमागा बिरुद्दाबे इसिॽनुङ् चेङ्मे, न्ना सिसानुम॥’#पारास्थान २०:१२; २१:१७; ब्यावास्था ५:१६; लेबि २०:९ 5ङ्खाॽनिङ्गो न्निङ्दा च्हेन काइवागा– ‘इसाङा उप्पा-उमा सोयाचु न्जिङ्दा काभाङ् इहा तोक्माहा साया, ङ्खा निङ्वाफुमाबे तिसिक्सुङ्हा कायाभोङ्, 6न्नाङा च्हेन उप्पा-उमागा सेवा चोक्मा पोरान्जोङ्मेन्हा॥’ खाॽला न्निङ्दा न्निङ्गा रितिथितिगा लागि निङ्वाफुमागा चेॽया काम लामेन्जोक्खुबा लोॽवा मित्वाम्गा॥ 7ओ किहि काप्खुबाचि! निङ्वाफुमाभाङ् चेक्खुबा यासाइयाङा कायाहा खा चेॽया न्निङ्दानुङ् ठ्याक्काइ तोङ्मेहा–
8 ‘खा याॽमिचिङा का उङ्चि याङा से आदार चोङ्मेहा!
ङ्खाॽनिङ्गो ङ्खाचिगा निङ्वा का पोटि मान्ना॥
9 ङ्खाचिङा न्जिन्दुचिहा चेॽया याॽमिचिङा न्जोगुहा रितिथिति से ओम॥
ङ्खोङ्माङ् ङ्खाचिङा का बित्थाबे आराधाना चोङ्मेहा॥’” #
यासाइया २९:१३
याॽमि आसुद्दा चोक्खुबा चेॽया
(मार्कुस ७:१४-२३)
10न्हाङा येसुङा न्नाबे न्छुप्साहा याॽमिचि काचिहोङ् खाॽला लुचि, “आचेॽया निङ्वा पिम्घोङ् खेप्सानुम न्हाङ् आसानुम॥ 11इहा याभाङ् उमे, ङ्खाङा याॽमि आसुद्दा न्जोग्वान्ना, ङ्खाॽनिङ्गो याभाङ् लोन्दाहा इसिॽहा चेॽयाङा च्हेन उङ् आसुद्दा चोग्वाना॥”
12मिहेक्साङ् चेलाचि न्दायाहोङ् येसु न्लु, “न्दा लुचिघा चेॽयाङा फारिसिचिगा उङ्चि लोक खोताहा बाङ्ना चेॽया न्दा था तोक्तुघा?”
13येसुङा लुचि, “वालोकपेॽना आप्पाङा न्लितुनाहा घाक उथाप उसामनुङ् एन्नाहाङ्मेहा॥ 14ङ्खाचिगा चेॽया ङ्खेप्सानुम्निन, ङ्खाचि गो मिक्सुरुम्बा हाङ्गुम्बा ओम्चि॥ एको मिक्सुरुम्बाङा हेकोना मिक्सुरुम्बा तिक्तुभोङ् हिपापाङ् होॽलुम्बे ङ्ङामेन्चिन्हायि?” #लुका ६:३९
15पात्तुरुसङा लु, “खा आसुद्दा चोक्खुबा चेॽयागा उतुम्बे कानिङ् उचुन योक्मेता॥”
16येसुङा लुचि, “इना न्निङ्दा हाकुचा ङ्ङास्वाम्गान्हा? 17न्निङ्दा था मान्ना? याभाङ् उयाहा गो फोकपे तास्वा, न्हाङ् पाखा लोङ्खेन्दिमे॥ 18ङ्खाॽनिङ्गो याॽमिगा याभाङ् लोम्मेहा चेॽया च्हेन उका उनिङ्वाभाङ् लोम्मे, न्हाङ् ङ्खाङामाङ् याॽमि आसुद्दा चोग्वाना॥ 19इजाङ्बाङ्निङ् याॽमिगा उनिङ्वाभाङ्माङ् इसिॽनुङ् मिॽमाना, याॽमि सिमाना, घाक खाले ब्याभिचार चोक्माना, खुमाना, मेन्हा गाबाहि पिॽमाना, निन्दा चोक्माना लोॽवाहा इसिॽहा चेॽया लोम्मे॥ 20याॽमिचि आसुद्दा चोक्खुबा चेॽया खामाङ् ओम, ङ्खाॽनिङ्गो मुक मेवासिॽले चामानिङ् याॽमि आसुद्दा न्लेङ्मेनिन्हा॥”
मामु याॽमिगा बिस्वास
(मार्कुस ७:२४-३०)
21येसु न्ना ठोङ् नाओहोङ् टुरोस नुङ् सिदोन साहारपोटि ख्या॥ 22ङ्खिङ्बेला न्नाबेॽना एको कानानि जातिगा मामु तायाहोङ् ओक्साङ् खाॽला लु, “ओ हाङ्बा, दाउदका सान्तान, का दाया चोगाङ्! आका आच्या मामु इसिॽना मुइङा तुक्नुङ् तुखि पिक्सुना॥” 23ङ्खाॽनिङ्गो येसुङा न्ना मामु इच्चा पोलोवा म्बिन॥ न्हाङ् उका चेलाचि न्दायाहोङ् येसु सेमेसाङ् खाॽला न्लु, “ना मामु पाक्साहाक्सु, इजाङ्बाङ्निङ् न्ना ओक्साङ् एङ्गा हेक्साङ् लाचोक्मासिमेॽना॥”
24न्हाङा येसुङा लुचि, “निङ्वाफुमाङा का गो म्मासाब्याहा सामुङ्चि लोॽवा न्लेक्सानेसाहा इजिरेलि जातिगा याॽमिचि से फाॽमागा पाक्साङ्ना ओम॥”
25खा चेॽया खेप्सुहोङ् न्ना मामुङा येसु फोप सेमेसाङ् लु, “ओ हाङ्बा, का फाताङ्!”
26ङ्खाॽनिङ्गो येसुङा लु, “पिछाचिगा चाम्योङ्बा नाप्माहोङ् कुचुमाचि पिॽमा उचुन न्लेङ्मेन्हा॥”
27न्हाङ् मामुङा लु, “ओम हाङ्बा, न्ना गो ठिक ओम! ङ्खाॽनिङ्गो कुचुमाचिङा चा उङ्चिगा मालिकचिङा न्ज्वानिङ् आयाख्याहा टुक्रा गो ङ्गोबुच्वाबा!”
28न्हाङा येसुङा न्ना मामु लु, “ओ मामु, ङ्गा बिस्वास इखिङ् चात्तुना! न्दा कायाघा लोॽवा लेङ्नि॥” उका उच्या ङ्खिङ्बेलामाङ् नुयाब्या॥
येसुङा ना माहोम्बोक याॽमिचि चामेतुचिहा
(मार्कुस ७:३१–८:१०)
29न्ना ठोङ् नाओहोङ् येसु गालिल तालगा उलाप-उलाप ख्या, न्हाङ् कोङ्गुबे थाङाहोङ् युङा॥ 30न्हाङा प्याक याॽमिचि न्नाबे न्दाया॥ उङ्चिङा न्दाचिहा लाङ्मुक मेन्दाखुबा, मिक्सुरुम्बा, लाङ्सुरुम्बा, यामेन्दाखुबा नुङ् हेकोहा प्याक तुखाबाङ्चि येसुगा उयुम्बे ङ्युक्सुबि, न्हाङ् उङा ङ्खाचि नुमेतुचि॥ 31लेम्सुरुम्बाचि चेक्मा न्दारोक्तु, म्बुप्साब्याहाचि न्नुया, लाङ्सुरुम्बाचि लाम्मा न्दारोक्तु न्हाङ् मिक मेनिखुबाचिङा निमा न्दारोक्तु॥ खा न्निसुहोङ् याॽमिचि आच्चाम्मा ङ्ङेता, न्हाङ् ङ्खाचिङा इजिरेलगा निङ्वाफुमागा माहिमा न्जोगु॥
32न्हाङा येसुङा उका चेलाचि काचिहोङ् लुचि, “खा याॽमिचि निसुङ्चिङ्होङ् का तुक्नुङ् आलुङ्मा तुक्तुगेतुचिहा, इजाङ्बाङ्निङ् खाचि कानुङ् ङ्वेॽयाहा हेन सुम लेन न्लेक्साब्यामा, न्हाङ् हाकु खाचिगा चाम्योङ्बा चा मेन्दाब्यामा॥ का खाचि इहाचा मेन्जाले म्बाक्स्वान्चिङान्हा, मानुङ्गो खाचि लाम्बुबे साॽङा न्सिमेहा॥”
33चेलाचिङा येसु न्लु, “खिङाहा याॽमिचि ना इहाचा मेॽनिङ्ना ठोङ्बे हेॽनाहाङ् चाम्योङ्बा ताॽमाहोङ् चामेॽमाहाचि?”
34येसुङा ङ्खाचि छिम्दुचि, “न्निङ्दानुङ् इखिङ् चालेप्पा ङ्वेॽयाहा?”
चेलाचिङा पोलोवा म्बि, “ला ओटा चालेप्पा नुङ् मिॽयाङ् मिमिॽहा नासाचि ङ्वेॽयाहा॥”
35येसुङा याॽमिचि चाउरबे युङ्मेतुचि॥ 36न्हाङा उङा ङ्खा चालेप्पा नुङ् नासाचि उमुकपे याङुचिहोङ् निङ्वाफुमा नुनिङ्वा पि, न्हाङ् चालेप्पा एगुचिहोङ् चेलाचि हाम्मेतुचि॥ चेलाचिङा याॽमिचि ङ्हाप्सुबिचि॥ 37न्नाबे घाकङा खानुङ् न्जोहोङ्चा ङोन्दा, ङ्खा ङोन्दाहा टुक्रा चेलाचिङा ङ्गोबुनिङ् ला ओटा डालो इप्तुचि॥ 38न्नाबे चाखुबा याॽमिचि मामुचि नुङ् पिछानाछाचि मेॽनिङ् बाबुचि से ना माहोम्बोक हिङ् न्साया॥ 39न्हाङा येसुङा ङ्खा याॽमिचि बिदा पिहाक्सुचि, उङ् च्हेन डुङ्गाबे थाङाहोङ् मागादान बाङ्ना लिङ्खामबे ख्या॥
Nu geselecteerd:
मात्ति 15: YAKH
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2023, Wycliffe Bible Translators, Inc. and Nepal Bible Society
