Ruuka 24
24
Yeesu kaasuuruka
(Mataayo 28:1‑10; Maariko 16:1‑8; Yowana 20:1‑10)
1Mu‑ruguru, orusuku rwa okwamba rwa obhwoyo, abhagasi abho nibhagenda ku‑chituuro bhari na ebhirange bhinu bhaariga bheeraabhire. 2Bhejire bhaakinga, nibhasongʼana ribhuyi riyiringisiibhwe okusooka ku‑muryango gwa echituuro. 3Nibheengira mu‑fwa omwo, nawe ꞉bhataarorere‑mo omubhiri gwa Raatabhugenyi Yeesu. 4Omwanya gunu bhaariga nibhatangʼangʼara inguru ya omusango ogwo, awoawo bhamaraayika bhabhiri, bhanu bhaariga bhafwaye emyenda emyeru pee jinu jaariga nijibharangisya nibheemereeguru ayeeyi nabho. 5Nibheeya, abhagasi abho nibhagwatwa na echibhabhuko, nibheenama ebhisuusu bhyebhwe nibhikuunʼya aasi. Niwo, bhamaraayika abho nibhabhwira abhagasi abho ati, “Kurwa ki omuyenja omuwanga mu‑bhafuuwe? 6Atari‑wo anu, aasuuruka okusooka mu‑bhafuuwe! Mwichuke emisango jinu ꞉aabhabhwiriiye omwanya gunu mwariga muri aamwi nage mu‑mukoowa gwa Gariraaya. 7꞉Aayikire ati, ‘Anye Omwana wa Omuunu, neenderwe nituurwe mu‑mabhoko ga abha ebhibhiibhi, bhambumiirire ku‑musarabha, bhanyite, na ku‑rusuku rwa kasatu nirisuuruka!’#24:7 Ringira Ruuka 9:22.”
8Niwo, abhagasi abho nibheechuka emisango ja Yeesu.
9Kurwa ejo, abhagasi abho nibhasooka ku‑chituuro awo, nibhagenda okubhwira jitumwa ekumi na umwi ja Yeesu, aamwi na abhandi bhoone. 10Abhagasi bhanu ꞉bhaabhwiriiye jitumwa ja Yeesu emisango ejo, ni Maryamu okusooka mu‑musi gwa Magidara, Yoana na Maryamu nyiramwene Yakobho, aamwi na abhagasi bhanu bhaariga bhari aamwi nabho.
11Nawe, emisango jinu abhagasi abho ꞉bhaayikire nijibhonekana wuti ni ja chitaamutaamu ku‑tumwa. Kurwa ejo, jitumwa ꞉bhataajiikirisiisye.
12Nawe Peetero ˆneemuka, ˆnaabhirima okuja ku‑fwa. Ejire aakinga ˆneenama okusungurira mu‑fwa omwo, ˆnaarora risanda eryene era. ˆNaasubha iika enu ˆnaaruguuraga inguru ya emisango jinu jaakorekana.
Yeesu mu‑rugendo rwa okuja mu‑ruguuyo rwa Emaawu
(Maariko 16:12‑13)
13Mbe ringira, orusuku orwoorwo rwa obhwoyo, abheeyigisibhwa bhabhiri bha Yeesu, bhaariga bhari mu‑rugendo okuja mu‑ruguuyo rwa Emaawu. Okusooka Yerusareemu okuja Emaawu jaariga jiri wuti kiromeeta ekumi na imwi. 14Abhaanu abho, bhaaribhataga nibhasimuraga inguru ya emisango jinu jaakorekana Yerusareemu awo. 15Omwanya gunu bhaariga nibhasimura na okubhuusyanya, Yeesu omwene ˆnaabhakinga‑ko, ˆnaagenda aamwi nabho. 16Nibhamurora kwa ameeso geebhwe, nawe Nyamuwanga ˆnaakora bhasige okumusombookerwa.
17ˆNaabhabhuusya ati, “Ni misango ki jinu omuribhaata nimusimura ku‑njira kunu?” Abheene nibheemereeguru bhasurumbaayega. 18Owumwi weebhwe, ˆnaatogwaga Kiriyoopa, ˆnaamusubhya ati, “Jitari ati, naawe omugenyi era mu‑Yerusareemu, unu atakumenya jinu jikorekeene‑mo ejorirya anu?” 19Omwene ˆnaabhuusya ati, “Misango ki ejo?” Nibhamusubhya ati, “Eswe echisimura emisango jinu jaamaakorekana ku‑Yeesu wa Najareeti. Abhaanu bhoone noorwo Nyamuwanga, bhaamaarora ati Yeesu ni muragi owa obhuturo, kwa okubha emisango jinu aariga ˆnaakora na ameeyigisyo gaaye bhyariga bhiri na obhuturo muno. 20Abhakuru bha abhagabhisi na abhatungi bheeswe, nibheekirisya ati, eetwe. Nibhamubhumiirira ku‑musarabha. 21Nawe eswe cheeyikanyaga ati, niwe akeeruuye Yisirayeeri. Okusookerera emisango ejo jikorekane, reero ni rusuku rwa kasatu. 22Ka wone abhagasi abharebhe bha eweeswe anu, bhanu bhaagenda ku‑fwa mu‑ruguru, bhachikangusya kwa okuchibhwira ati, 23bhaasongʼana omubhiri gwaye gutari‑mo mu‑fwa. Nibhaaja nibhachibhwira ati, bhaasoromokerwa na bhamaraayika. Bhamaraayika abho, nibhabhabhwira ati, Yeesu ni muwanga. 24Bhejire bhaamara okuchibhwira, abheejaasu nibhagenda ku‑chituuro, nibhasongʼana joone jiri rwa kutyo abhagasi abho ꞉bhaachibhwiriiye. Nawe Yeesu omwene ꞉bhataamurorere.”
25Yeesu ˆnaabhabhwira ati, “Abhataamutaamu emwe! Kurwa ki emyoyo jeemwe ni mikomeeye okwikirisya emisango jinu ꞉jaayikirwe na abharagi? 26Angu, jaariga jiteenderwe Kirisito okubhona ebhinyaasyo ebhyo, niwo eengire mw‑ikusyo ryaye?” 27Niwo, Yeesu ˆnaabhatondera emisango joone jinu jikaamirwe inguru yaaye, okwambira mu‑bhikaame bhya Muusa okukingira mu‑bhikaame bhya abharagi bhoone.
28Bhejire bhaarebherera okukinga mu‑ruguuyo runu bhaariga nibhajaa‑mo, Yeesu ˆneekora wuti keenda okuturira‑ko. 29Nawe, nibhamwirembeeresya muno, nibhamubhwira ati, “Nuubhe aamwi na eswe anu! Okubha woori anu risuubha ryaguuwe, ingeta yeengiiye.” Niwo, Yeesu ˆneengira eweebhwe okwinyanja nabho.
30Omwanya gunu ꞉bhaategere inenda okurya ebhiryo, Yeesu ˆnaagega omukaate, ˆnaasiima Nyamuwanga, ˆnaagubheganya, ˆnaabhayaana. 31Niwo Nyamuwanga ˆneegura ameeso geebhwe nibhasombookerwa ati unu ni Yeesu. Awoawo omwene ˆnaabhura okusooka mu‑meeso geebhwe. 32Mbe, nibhabhuusyanya ati, “Omwanya gunu aari ˆnaayika na eswe ku‑njira, ˆnaachiyobhooreraga Ebhikaame Ebhyeru bhya Nyamuwanga, emyoyo jeeswe ꞉jaakondeeywe muno, jitari kutyo?”
33Omwanya ogwoogwo, nibheemuka nibhasubha Yerusareemu. Bhejire bhaakinga, nibhasongʼana jitumwa ja Yeesu ekumi na umwi, na abharuubhirisya abhandi bheekumanyiisye aamwi. 34Nibhabhwira bhanu bhaariga bheekumanyiisye awo ati, “Ni chimari, Raatabhugenyi weeswe aasuuruka! Aasoromokera Simooni!” 35Niwo abheeyigisibhwa abhabhiri abho, nibhatondera abheejaabho emisango jinu jaakorekana ku‑bheene ku‑njira na kutyo ꞉bhaamenyere Yeesu omwanya gunu ꞉aabheganyiisye omukaate.
Yeesu kaasoromokera abheeyigisibhwa bhaaye
(Mataayo 28:16‑20; Maariko 16:14‑18; Yowana 20:19‑23; Ebhikorwa bhya Jitumwa 1:6‑8)
36Omwanya gunu bhaariga bhachaayika inguru ya emisango ejo, awoawo Yeesu omwene ˆneemereeguru agatigati yeebhwe. ˆNaabhabhwira ati, “Omurembe gubhe aamwi na emwe!” 37Nibhakanguka na okuubhaya muno kwa okubha bhaariga nibheetogera ati, bhaarora risambwa. 38Nawe, Yeesu ˆnaabhabhwira ati, “Mbawo mwajira echibhabhuko mu‑myoyo jeemwe? 39Muringire amabhoko na amaguru gaani, niwo mumenye ati naanye omwene! Mumbabhaate, mwirorere abheene, kwa okubha risambwa ritari na eminofu na amawa rwa kutyo omundora anye niri nabhyo.” 40Yeesu ejire aamara okubhabhwira ejo, ˆnaabheeresya amabhoko na amaguru gaaye. 41Mbe, abheeyigisibhwa bhaaye ꞉bhateekirisiisye echimari echo, kwa okubha ꞉bhaakondeeywe muno na okutangʼangʼara. Niwo, Yeesu ˆnaabhabhuusya ati, “Angu, muri‑yo na ebhiryo bhyonebhyone anu?” 42Nibhamuyaana risinja rya iiswi inu ikarirwe. 43ˆNaagega risinja eryo, ˆnaarirya imbere yeebhwe.
44Ejire aamara okurya, ˆnaabhabhwira ati, “Emisango jinu nijo ꞉naabhabhwiriiye omwanya gunu naariga niri aamwi na emwe. ꞉Naabhabhwiriiye ati, ni bhusibhusi jikuumire joone jinu jikaamirwe inguru yaani mu‑bhiraagiro bhya Muusa, ku‑bharagi na mu‑Jabhuri.”
45Niwo, ˆneegura obhwenge bhwebhwe korereki bhasombookerwe jinu jaariga jikaamirwe mu‑Bhikaame Ebhyeru. 46Ka wone ˆnaabhabhwira ati, “Jikaamirwe ati, Kirisito arinyaasibhwa na okwitwa na ku‑rusuku rwa kasatu arisuuruka okusooka mu‑bhafuuwe. 47Abhaanu bha amaanga goone okwambira Yerusareemu, bhariraasibhwa okuta na okufwirwa echigongo ebhibhiibhi bhyebhwe kwa risiina ryaye. 48Emwe neemwe abhabhambaasi bha emisango ejo.
49“Woori muringire, enibhareetera Mwoyo Mweru rwa kutyo Raata waani aariga aragire. Nawe mwikare mu‑musi munu, okukingira omwanya gunu muriyaanwa obhuturo okusooka inguru mu‑rwire.”
Yeesu keengʼengibhwa okugenda mu‑rwire
(Maariko 16:19‑20; Ebhikorwa bhya Jitumwa 1:9‑11)
50Yeesu ejire aamara, ˆnaabhatangasya okuja mu‑ruguuyo rwa Bheetaniya. Bhejire bhaakinga, ˆneemusya amabhoko gaaye, ˆnaabhayaana amabhando. 51Omwanya gunu aariga achaabhayaana amabhando, ˆnaabhaawuka‑ko, ˆnaagegwa okuja mu‑rwire.
52Nibhamuramya, bhejire bhaamara nibhasubha Yerusareemu nibhakonderwaga muno. 53Mbe, nibhabha mw‑Iyekaru rya Nyamuwanga nibhamukusyaga bhuri rusuku.
Nu geselecteerd:
Ruuka 24: jit
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2023, Wycliffe Bible Translators, Inc. All rights reserved.
