Ruuka 17

Ameeyigisyo inguru ya amaregeejo na okufwirana echigongo

(Mataayo 18:6‑7, 18:21‑22; Maariko 9:42)

1Yeesu ˆnaabhwira abheeyigisibhwa bhaaye ati, “Amaregeejo ganu agakora abhaanu bhakore ebhibhiibhi, garibha‑wo ku‑siku joone. Nawe, jirimubhona omuunu unu arireterera amaregeejo ago. 2Jikabheeye ja kisi muno omuunu oyo abhoyerwe mu‑bhicha orubhuyi runene rwa okuseera‑ko, na okweswa mu‑nyanja, okukira okureterera owumwi wa abhatooto bhanu abhanduubha akore echibhiibhi! 3Kurwa ejo, mwiyangarire mwasiga okukora ebhibhiibhi!

“Araabha omuyiri waawo aakakukayira, nuumugonye. Akata echikayo chaaye, mufwire echigongo. 4Araabha bhuri mwanya akabha ˆnaasubha kw‑awe ˆnaakubhwira ati, ‘Naata,’ mufwire echigongo! Noorwo araabha aakakukayira kwiya kataanu na kabhiri ku‑rusuku rumwi, mufwire echigongo!”

Amanaga ga eriikirisya

5Niwo, jitumwa jaaye nibhamubhwira ati, “Raatabhugenyi nuuchoongesye eriikirisya!”

6Omwene ˆnaabhasubhya ati, “Araabha mukabheeye na eriikirisya ritooto, rwa akaro ka iyaradaari, mwakabhwiriiye rikuyu rinene rinu ati, ‘Iiyika anu, ugende, wiiyambe mu‑nyanja!’ ryakabhagayukire.

Ameeyigisyo inguru ya obhugaya

7“Chaayike ati, owumwi weemwe ari na omugaya, unu kaamurimira amwi kaamureebhera jinaama. Omugaya oyo akasubha iika okusooka eyo, omwami waaye kaatura okumubhwira ati, ‘Iija anu bhwangu, winyanje, urye ebhiryo’? 8Wuri. Kaamubhwira ati, ‘Nuunyiraabhire ebhiryo, wiiraabhe ufurubhendere omwanya gunu owubha nindya na okunywa. Nikamara, niwo awe wone owuja okurya na okunywa.’ 9Noorwo atakusiima omugaya oyo, kwa okubha aakora jinu aaragirirwa okukora.

10“Nyabhuriko emwe wone, mukamara okukora joone jinu muragiriiywe na Nyamuwanga, mwayike ati, ‘Eswe chiri abhagaya era. Chaakora jinu chaari cheenderwe okukora.’”

Yeesu kaawosya abhagenge ekumi

11Omwanya gunu Yeesu aariga ˆnaagenda mu‑musi gwa Yerusareemu, ꞉aaturire ku‑rubhibhi rwa emikoowa ja Samaariya na eja Gariraaya. 12Ejire eengira mu‑ruguuyo rumwi, ˆnaabhugana na abhagenge ekumi. Abhagenge abho, nibheemereeguru kura‑wo okusooka anu Yeesu aariga ari, 13nibhaamura obhuraka nibhaayika ati, “Mwami Yeesu, nuuchifwire echigongo!”

14Yeesu ejire aabharora, ˆnaabhabhwira ati, “Mugende mwiyeresye ku‑bhagabhisi ati mwawora.” Omwanya gunu bhaariga nibhagenda, nibheesibhwa.

15Owumwi weebhwe, ejire aarora ati, aawosiibhwe, ˆnaasubha ku‑Yeesu, ˆnaamuraga obhuraka ˆnaakuuyaga Nyamuwanga. 16Ejire aakinga ku‑Yeesu, ˆnaagwa bhwifumbike ku‑maguru gaaye, enu ˆnaamusiimaga. Omuunu oyo, aariga ari Musamaariya.

17Yeesu ˆnaayika ati, “Abhaanu bhanu bheesibhwa ni kumi! Woori, abhandi abhataanu na abhaana bhari aaki? 18Ataasubha noorwo omuunu owundi ˆnaakuuyaga Nyamuwanga, tari mugenyi unu era?” 19Niwo Yeesu ˆnaabhwira omuunu oyo ati, “Imereeguru, ugende ewaawo! Waawosibhwa ku‑songa ya eriikirisya ryawo.”

Emisango jinu jirikorekana omwanya gunu Omwana wa Omuunu ariija

(Mataayo 24:23‑28, 24:37‑41)

20Mbe, Abhafarisaayo nibhabhuusya Yeesu ati, “Obhukama bhwa Nyamuwanga, obhuuja ri?” Yeesu ˆnaabhasubhya ati, “Okuuja kwa obhukama bhwa Nyamuwanga bhutari rwa echibharikisyo chinu echiturwa okurorwa na ameeso. 21Abhaanu bhataritura okwayika ati, ‘Ringira! Nguyu anu!’ amwi ati, ‘Mburya arya!’ Mutegeresye muungwe! Obhukama bhwa Nyamuwanga bhuri mu‑myoyo jeemwe.”

22Neeya, Yeesu ˆnaabhwira abheeyigisibhwa bhaaye ati, “Mu‑siku jinu ejiija, muriigomba okurora noorwo rusuku rumwi runu anye Omwana wa Omuunu nitungire echaaro, nawe mutarirurora. 23Abhaanu bharibhabhwira ati, ‘Ringira! Ngurya arya!’ amwi ati, ‘Ringira! Nguyu anu!’ Nawe abhaanu abho, mwasiga okubharuubha. 24Musombookerwe ati, anye Omwana wa Omuunu omwanya gunu nirisubha, niriija rwa kutyo orurabhyo orungʼarabhya mbaara joone ku‑rutumba. 25Nawe okwamba, ni bhusibhusi anye Omwana wa Omuunu nibhone ebhinyaasyo bhyafu na okuremwa na abhaanu bha orwibhuro runu.

26“Rwa kutyo jaariga jiri mu‑siku ja Nuuwu, nikwo kutyo jiribha ku‑rusuku rwa okusubha kwani anye Omwana wa Omuunu. 27Mu‑siku ja Nuuwu, abhaanu bhaariga nibharya na okunywa, bhaariga nibhatwara na okutwarwa, okukingira ku‑rusuku runu Nuuwu na abhaanu bhaaye ꞉bheengiiye mu‑ngarabha. Bhejire bhaamara okwingira era, induruma nyafu muno niigwa, amanji nigeejura echaaro choone, nigasingaarisya abhaanu abhandi bhoone.

28“Noorwo mu‑siku ja Ruuti wone, emisango jaariga jiri kutyokutyo. Abhaanu bhaariga nibharya na okunywa, bhaariga nibhagura ebhiinu na okugusya, bhaariga nibharima na okuyamba jimbibho na bhaariga nibhoombaka. 29Nawe, orusuku runu Ruuti na abhaana bhaaye ꞉bhaasookere mu‑musi gwa Sodoma, omuriro omururu kabhukabhu nigugwa rwa ingʼubha okusooka ku‑rutumba, nigusingaarisya abhaanu abhandi bhoone.

30“Nikwo kutyo jiribha orusuku runu anye Omwana wa Omuunu nirisubha ku‑chaaro anu, Nyamuwanga arinswerurwa. 31Orusuku orwo, omuunu unu aribhaga ariinyire ku‑rusara rwa inju yaaye, na ebhiinu bhyaye bhikabha bhiri mu‑nju, aasiga okwika okubhigega‑mo, tari neeke era na okubhirima. Nyabhuriko, omuunu woonewoone unu aribhaga ari mw‑isambu, aasiga okusubha iika okugega echiinu choonechoone, tari aturire eyo abhirime. 32Mwichuke jinu ꞉jaabhwene omugasi wa Ruuti!#17:32 Omugasi wa Ruuti. Nyamuwanga ꞉aasoosiisye indamu induru muno ku‑mugasi wa Ruuti, kwa okubha omugasi oyo, ꞉eegombere okusubha Sodoma, mu‑musi gunu Nyamuwanga aariga ayaaye ebhitiibha na okusingaarisya. Ringira Obhwambiro 19:26. 33Omuunu woonewoone unu keenda okuwonʼya obhurame bhwaye, niwe aribhusya obhuwanga bhwa akajaanende koone. Nawe omuunu woonewoone unu kaabhusya obhurame bhwaye, niwe aribhona obhuwanga bhwa akajaanende koone.

34“Enibhabhwira ati, ingeta ya orusuku orwo, abhaanu bhabhiri bhanu bharibhaga bhamaamire ku‑bhuriri bhumwi, Nyamuwanga arigega owumwi, arisiga owundi. 35Araabha abhagasi bhabhiri bharibhaga nibhaseera aamwi, Nyamuwanga arigega owumwi, arisiga owundi. 36[Abhamura bhabhiri, bharibhaga nibhakora emirimu mw‑isambu, Nyamuwanga arigega owumwi, arisiga owundi.]”

37Abheeyigisibhwa nibhamubhuusya ati, “Raatabhugenyi, emisango ejo jirikorekana aaki?” ˆNaabhasubhya ˆnaabhabhwira echijekekanyo ati, “Rwa kutyo jipungu ejiikofyanya aamwi anu ityanyi inu ifuuwe iri.”

Nu geselecteerd:

Ruuka 17: jit

Markering

Deel

Kopiëren