Ruuka 16

Echijekekanyo cha omwangarisi wa omwandu

1Ka wone, Yeesu ˆnaabhwira abheeyigisibhwa bhaaye echijekekanyo ati, “Aariga ari‑wo omuniibhi umwi. Omuniibhi oyo aariga ari na omwangarisi wa omwandu gwaye. Omwangarisi oyo, ˆnaasitaakibhwa ati, aariga ˆnaanyamura omwandu gwa omuniibhi waaye. 2Mbe, omuniibhi oyo, ˆnaamubhirikira omwangarisi wa omwandu gwaye, ˆnaamubhwira ati, ‘Emisango emibhiibhi jinu enuungwa inguru yaawo, ni misango ki? Nuunyeresye echitabho cha obhukumi bhwa obhwitorotongyo bhwa omwandu gwani, kwa okubha utakutura okugenderera rindi okubha omwangarisi wa omwandu gwani!’

3“Omwangarisi oyo, ˆneebhuusya ati, ‘Mwami waani keenda okumbirimya emirimu. Woori nikore kutiki? Nitari na amanaga ga okurima, na enirora jiswaro okusabhiirisya. 4Mbe woori, nimenyere omusango gunu enija okukora, korereki omwanya gunu enija okubhirimibhwa emirimu, abhaanu bhankumega iika eweebhwe.’

5“Niwo omwangarisi oyo, ˆnaabhirikira omuunu umwiumwi, bhanu bhaariga nibhatongwa na omwami waaye. ˆNaabhuusya omuunu wa okwamba ati, ‘Awe owutongwa chiinu ki na omwami waani?’ 6Omwene ˆnaamusubhya ati, ‘Kaantonga amadebhe egana ga amafuta ga emijeyituuni.’ Neeya, omwangarisi oyo, ˆnaamubhwira ati, ‘Gega orupapura runu rukaamirwe‑ko ribhanja ryawo rinu, inyanja, uruyindure bhwangu, ukaame‑ko madebhe makumi gataanu.’

7“Ejire aamara, ˆnaabhuusya wa kabhiri ati, ‘Awe owutongwa chiinu ki?’ Omwene ˆnaamusubhya ati, ‘Kaantonga amagunira egana ga obhuro.’ Omwangarisi oyo, ˆnaamubhwira ati, ‘Gega orupapura runu rukaamirwe‑ko ribhanja ryawo rinu, ukaame‑ko amagunira makumi gataanu na gasatu.’

8“Mbe, omwami oyo, ejire aamenya emisango ejo, ˆnaakuuya omwangarisi oyo, ku‑bhwenge bhwaye bhunu ꞉aakorere.

“Naabhabhwira echijekekanyo echo, kwa okubha, abhaanu bhanu abhanyaakirira emisango ja ku‑chaaro chinu, bhari na obhwengeeso muno bhwa okusakirana abheene kwa abheene, okukira abhaanu bhanu abhagayuka emisango ja Nyamuwanga. 9Ka wone, enibhabhwira ati, obhuniibhi bhwa echaaro chinu bhuriwaa‑wo. Woori, musakirega abhaanu abhandi ku‑bhuniibhi bhunu muri nabhwo, niwo muribhonera abhasaani. Araabha murikora kutyo, Nyamuwanga aribhakuma mu‑bhwikaro bhwaye bhwa akajaanende koone.

10“Omuunu omwiyikanyibhwa ku‑misango emitooto, ni mwiyikanyibhwa noorwo ku‑misango eminene. Nyabhuriko, omuunu unu atari mwiyikanyibhwa ku‑misango emitooto, ataribha omwiyikanyibhwa noorwo ku‑misango eminene. 11Araabha mukarema okubha abheeyikanyibhwa ku‑bhuniibhi bhwa ku‑chaaro anu, niga unu aribheekirisya ku‑bhuniibhi bhwa echimari bhwa mu‑rwire? 12Araabha mwariga mutari abheeyikanyibhwa ku‑mwandu gwa abhaanu abhandi, niga kaja okubhayaana omwandu gwemwe emwe abheene? 13Atari‑wo omukosi unu kaatura okukorera abhaami bhabhiri ku‑mwanya gumwi. Aakakora kutyo, kaatura okusoka omwami umwi na okwenda owundi, amwi okuyaana echibharo owumwi na okugaya owundi. Kurwa ejo, mutakutura okukorera Nyamuwanga na obhuniibhi ku‑mwanya gumwi!”

14Mbe, Abhafarisaayo bhejire bhoongwa emisango ja Yeesu ejo, nibhamugaya, kwa okubha bhaariga bheendere jipirya muno. 15Kurwa ejo, Yeesu ˆnaabhabhwira ati, “Emwe, omwikora okubha abharengeresi imbere ya abhaanu. Nawe, Nyamuwanga amenyere emisango jinu jiri mu‑myoyo jeemwe. Okubha, emisango jinu abhaanu abharora ati ni ja kisi muno, ejo nijo ejifuruurusya Nyamuwanga muno!

Ameeyigisyo ga ebhiraagiro na obhukama bhwa Nyamuwanga

(Mataayo 11:12‑13, 5:31‑32; Maariko 10:11‑12)

16“Ebhiraagiro bhya Muusa na ebhikaame bhya abharagi, bhyariga nibhigayukwa na abhaanu okukingira omwanya gwa Yowana Omubhatiija. Okusookerera omwanya ogwo, Emisango ja Ekisi inguru ya obhukama bhwa Nyamuwanga, jaariga nijiraasibhwa, na abhaanu bhoone abhakomeeresibhwaga okujigayuka.#16:16 Abhaanu bhoone abhakomeeresibhwaga okujigayuka. Obhugajuro obhundi obhutura okubha ati, abhaanu bhoone bheenderwe bhabhwingire‑mo kwa amanaga. 17Ni bhwangu muno, orutumba na echaaro okuwaa‑wo, okukira inyuguta imwi inooto ya ebhiraagiro bhya Nyamuwanga okubhurwa indiyo.

18“Araabha omurume akataana na omugasi waaye, neeya ˆnaatwara omugasi owundi, omurume oyo, kaakora obhuromesi. Omurume unu kaja okutwara omugasi unu aasigwa, omurume oyo, kaakora obhuromesi.”

Echijekekanyo cha omuniibhi na Rajaaro

19Yeesu ˆnaagenderera okubhabhwira echijekekanyo ati, “Aariga ari‑wo omuniibhi umwi. Omuniibhi oyo, aariga ˆnaafwara emyenda ja ekisi, ja irangi ya ijambarawu ja obhugusi obhurambu. Bhuri rusuku aaryaga na okunywa rwa omuunu unu ari na obhugenyi. 20Ka wone, aariga ari‑wo omutaka umwi, ˆnaatogwaga Rajaaro. Rajaaro oyo, aariga ari na ebhironda bhiswirire omubhiri gwone. Bhuri rusuku aariga ˆnaamaamibhwa kw‑irango rya omuniibhi urya. 21Rajaaro eegombaga okurya ebhiryo bhinu bhyaragaraga okusooka ku‑meeja ya omuniibhi oyo. Noorwo jimbwa jaariga nijiija nijimuramba ebhironda bhyaye.

22“Ejire eeya, Rajaaro omutaka aafwa, bhamaraayika nibhamugega nibhamusira mu‑rwire, ayeeyi na Bhurayimu. Omuniibhi urya wone ˆnaafwa, ˆnaasiikwa. 23Mbe, omuniibhi oyo, omwanya gunu aanyaakaga muno nyombe eyo, ˆneenamusya ameeso, ˆnaarora Bhurayimu ari kura, na Rajaaro ari mu‑chifubha cha Bhurayimu. 24Omuniibhi ˆnaamura obhuraka ˆnaabhirikira ati, ‘Raata Bhurayimu, nuunfwire echigongo! Eninyaaka muno mu‑muriro munu! Nuutume Rajaaro aaje anu, eene isonde ya echaara chaaye mu‑manji, atonyisye ritone rya amanji ago ku‑rurimi rwani arunyirisye.’

25“Bhurayimu ˆnaamusubhya ati, ‘Mwana waani, ichuka ati omwanya gunu waariga uri ku‑chaaro, awe ꞉waabhwene emisango ja ekisi mu‑bhurame bhwawo, nawe Rajaaro, ꞉aabhwene emisango emibhiibhi mu‑bhurame bhwaye. Woori anu kutya, omwene kaafungʼamibhwa, omwanya ogwo awe wone owunyaasibhwa. 26Aamwi na ejo, agati yeeswe enu na emwe eyo, riteeywe‑wo riwugo enene muno, korereki omuunu unu keenda okusooka kw‑iswe enu okuuja kw‑imwe eyo, ataamiibhwe okuryambuka. Nyabhuriko omuunu unu keenda okusooka kw‑imwe eyo okuuja kw‑iswe enu, wone ataamiibhwe okuryambuka.’

27“Omuniibhi oyo, ˆnaamubhwira ati, ‘Mbe woori raata Bhurayimu, enikusabhwa nuutume Rajaaro agende iika ku‑raata, 28akengye abhamura bhaasu bhataanu, bheekenge na ebhibhiibhi. Akore kutyo, korereki abheene wone aribha bhaafwa bhaasiga okureetwa enu mu‑bhinyaasyo ebhiruru bhinu.’

29“Bhurayimu ˆnaamusubhya ati, ‘Abhamura bhaanyu, bhari na ebhikaame bhinu bhikaamirwe na Muusa na abharagi. Bhategeresye ebhikaame ebhyo!’

30“Omuniibhi oyo, ˆnaamusubhya ati, ‘Wuri, raata Bhurayimu! Araabha omuunu akasooka mu‑bhafuuwe enu ˆnaabhajaa‑ko, niwo abhaja okuta ebhibhiibhi bhyebhwe.’ 31Bhurayimu ˆnaamusubhya ati, ‘Araabha abhamura bhaanyu abho, bhaakarema okuungwa emisango jinu jikaamirwe na Muusa na abharagi abhandi, bhatakuja okuungwa omuunu noorwo akasuuruka okusooka mu‑bhafuuwe.’”

Nu geselecteerd:

Ruuka 16: jit

Markering

Deel

Kopiëren