युहन्ना 21
21
छो़ छीगदु येशु थो़न्न ठेप्प १-१४
1हीनी तीङ्ला लेन् च्यीक् यङ् येशु ॱलोप्टुक् दीब च्येल्ल तीबेरीयास्की छो़ छीग दीदु थो़म्ब बेत्। ॱनी हुगो हीन्दुक् झ्यीन युङ बेत्। 2छोब च्यीक्तु शीमोन् पत्रुस् दी, थोमा दीदीमस् दी, गालीलागी काना सार्की नथानेल् दी, जब्दीगी भु ॱङीबु दी, हुनी ॱलोप्टुक् ॱयोङ्म ॱङी झ्यीन जोम्न यो़प्प बेत्। 3ॱनी शीमोन् पत्रुस्की ॱयोङ्म घयेत् दीबल ङ ॱनी न सीन्दु डोगेन् झ्यीब बेत्। ॱनी ॱयोङ्म दीबे एक् ङीत् इत् डोगेन् झ्यीब बेत्। हुनी हुब कुरीक् फीन्न ढुल स्युन छोल न सीन्दु गीर बेत्। ॱनी छेङ्गङ् गीर्न अक्, न च्यीगी च्यीक् इक् हुबे सीन् ॱमत् छुब बेत्।
4हुनी ॱङेट्टो दी ॱङेन्ज्याल ॱलोप्टुक् दीब लोक्न युङ बेत्। ॱनी छो़ छीग दीन येशु टङील यो़प्प बेत्। ॱनी ॱलोप्टुक् दीबे हुगो येशु हीन्डो ॱनो़ब ॱमत् छ्यर बेत्। 5ॱनी ॱलोप्टुक् दीबल खोङ्गी ॱवे दगुसो, खीत्ल न थीप्मोङ? झ्यीब बेत्। हील हुबे ॱस्युली थीप्मोङ् झ्यीब बेत्। 6हुनी खोङ्गी हुबल खीत्रङ्गी जाली दी ढु दीगी ॱये छ्यो ङो़ल टोम्। हुनी हस्सो़त् थीप्केन् बेत् झ्यीब बेत्। ॱनी खोङ्गी ॱङाब दील नेन्न टम्नी, न छेत्मीत् थीप्न, जाली दी थीन्न ढु दील ॱलुक् दीरङ् ॱमत् छुब बेत्। 7हुनी येशुगी झ्यम्बे ॱलोप्टुक् दीगी पत्रुस्ल खोङ् चोव ज्यीन्दक् बेत् व सीन्न ॱस्येप्प बेत्। ॱनी हीगो घोनी, शीमोन् पत्रुस्की रोरङ्गी एल्ला पीक्न स्यक्पे घो़ छ्यी घो़ दी घो़न्न येशु ठेत्तु छ्युल छ्योङ्न एल्ला टप्नर बेत्। 8छो़ छीगल थो़म्बल ठु ज्यब ॱङीगी ची यो़प्प बेत्। ॱनी ॱयोङ्म घयेत् दी ढु ज्यक्कील्ल नदङ् डक्च्यक् च्येम्मे जाली दी ढी़त्न युङ बेत्।
9हुनी हुब छो़ छीगल थो़न्नी, उन ढोप्ची च्यीक् धङ् मी तङे मीरोक् च्यीक्ल न च्यीक् कप्न यो़प्प ठेप्प बेत्। 10ॱनी येशुगी ॱलोप्टुक् दीबल खीत्रङ्गी न सीम्ब हुनी इक् यरी खुर्लेत् झ्यीब बेत्। 11हुनी शीमोन् पत्रुस् फीन्न, हुगी नदङ् डक्च्यक् च्येम्मे जाली दी ढी़त्न पक्कल तो़म्ब बेत्। जाली दीन न गर्चम तोम्दु ज्यदङ् ॱङप्च्यु ॱङक्सुम् यो़प्प बेत्। नुक्मे न मङ सीन्नी इक्, जाली दी ॱमत् छ्येप्प बेत्।
12हुनी येशुगी ॱलोप्टुक् दीबल सम सदु ॱस्योक् सीन्न भो़ब बेत्। ॱनी ॱलोप्टुक् दीबे खोङ् चोव ज्यीन्दक् हीम्ब ॱह घोनी, हुबे खोङ्ल नीज्यरङ् ॱसु हीम्ब सीन्न ढीज्येमे ॱआर् हुब ॱसुल आक् मत् युङ बेत्। 13हुनी येशुगी ढोप्ची दी धङ् न दी खोङ्गी छ्यक्ल ॱनम्न हुबल गो़न टेप्प बेत्। 14येशु ढोङ्नी, यङ् ॱसोम्बुल लोङ्नी, हीगोदङ् लेम्म ॱसुम् ॱलोप्टुक् दीबल ठेप्प बेत्।
येशु धङ् पत्रुस्की तम् १५-२३
15ॱनी सम दी से छर्नी, येशुगी शीमोन् पत्रुस्ल युहन्नागी भु शीमोन् खो़त् हीब घयेत्ले ॱल्हक्मा ङल झ्यम्ब खुको़र्प्प? सीन्न ढीब बेत्। ॱनी पत्रुस्की लेम्बुल चोव ज्यीन्दक् ङे नीज्यरङ्ल झ्यम्ब यो़प्प दी नीज्यरङ्ल ॱस्यो़च्च्ये यो़क्केन् बेत्। ॱनी हुल येशुगी रङ् ङे लुक्टुक् घयेत्ल सम बीन्न ॱसो़ झ्यीब बेत्। 16हुनी फीच्च्य यङ् येशुगी युहन्नागी भु शीमोन् खोक्की ङल झ्यम्ब खुको़र्प्प? सीन्नी, यङ् हील पत्रुस्की चोव ज्यीन्दक् ङे नीज्यरङ्ल झ्यम्ब यो़प्प दी नीज्यरङ्ल ॱस्यो़च्च्ये यो़क्केन् बेत् झ्यीब बेत्। ॱनी येशुगी रङ् ङे लुक् घयेत् ॱसो़ज्यीत् झ्यीब बेत्। 17हुनी इक् यङ् फीच्च्य येशुगी युहन्नागी भु शीमोन् खोक्की ङल झ्यम्ब खुको़र्प्प? सीन्न ढीब बेत्। ॱनी हीगोदङ् लेम्म ॱसुम् थम्ब येशुगी हुन्दुक् झ्यीनी, पत्रुस् ॱसीम्ब दुक्न येशुल चोव ज्यीन्दक् नीज्यरङ्ल कुरीक् ॱस्यो़च्च्ये दुक्। ङ नीज्यरङ्ल झ्यम्ब खुको़र्त् झ्यीब बेत्। ॱनी येशुगी रङ् ङे लुक् घयेत्ल सम बीन्न ॱसो़ झ्यीब बेत्। 18हुनी येशुगी यङ् फीच्च्य पत्रुस्ल ङे रङ्ल गन्दीय ॱस्येत् योङ्। रङ् स्यो़म्ब यो़प्पे यङ्ल रङ्गी घो़ दी रङ्गीरङ् घो़न्न रङ्गी ॱनो़साल रङ् छीगङ् फीम्ब बेत्। ॱनी रङ् नेस्सो गेनी, हुनी रङ्गी लक्प च्यङ्न, रङ्ल घो़ दी ॱयोङ्गी को़न्न बीन्न, रङ्गी धेच्च्ये मीप्पे ॱसनेल रङ् ठीक्केन् बेत्। 19ॱनी म दीरङ् ङे लम्ल थीरी दो़च्च्यीत् झ्यीब बेत्। हीगो को़न्ज्योक्ल तो़प्प युङ्ज्येल पत्रुस् घन्दुक् झ्यीन ॱस्यीगो़दङ् हुगो येशुगी तो़न्न ॱस्येप्प बेत्।
20हुनी पत्रुस्की तक्ल लोक्न तेनी, येशुगी झ्यम्बे ॱलोप्टुक् दी उन लोन यो़प्प थोङ बेत्। सम तीङ्स्युक्म सये यङ्ल हुगो येशुगी लोदु देत्न, खोङ्ल डलक्ल तोङ्गेन् दी ॱसु बेक्क? सीन्न येशुल ढीब हीङ्गो़प्प बेत्। 21झ्यम्बे ॱलोप्टुक् दीगी ढीक्ल पत्रुस्की येशुल चोव ज्यीन्दक् हीगोल स्युक्ला घन्दुक् झ्यीब युङ्गो़दङ् सीन्न ढीब बेत्। 22ॱनी येशुगी लेम्बुल हीगो ङ फीच्च्य तीङ्मा युङ् युङ् थुक्ल ॱमत् ॱस्यीय दो़त् सीच्च्ये ॱनो़ब यो़त्न अक्, हीगो रङ्ल ॱस्यो़च्च्ये मत् युङ्न अक् डीक्केन् बेत्। रङ् ङे लम्ल थीरी दो़च्च्यीत् झ्यीब बेत्।
23ॱनी हीगी केच्च्य हीगो पी़न्ज्या घयेक्की नङ्ल धर्न युङ्नी, हुबे हीगी ॱलोप्टुक् हीगो ॱमीत् ॱस्यीगेन् ब अक् ॱनो़ब झ्युङ बेत्। ॱनी हीगो मेम्ब, येशुगी पत्रुस्ल झ्यीब दी ङ फीच्च्य तीङ्मा युङ् युङ् थुक्ल ॱमत् ॱस्यीय दो़त् सीच्च्ये ॱनो़ब यो़त्न अक्, हीगो रङ्ल ॱस्यो़च्च्ये मत् युङ्न अक्, डीक्केन् बेत् झ्यीबरङ् बेत्।
24हीगो जेङ्गी पङ्बु झ्यीक्केन् दी ङ ॱलोप्टुक् हीगो हीन्। ङे पङ्बु झ्यीन घङ् ढीबे केच्च्य घयेत् हीगो गन्दीय खुङ्देन् बेत्। हीगो ङीत् कुरीक्ल ॱस्यो़च्च्ये यो़क्केन् बेत्।
25ॱनी हील ढीन मत् स्यक्प, येशुगी ले ॱयोङ्म आक् गज्येन् जेप्प बेत्। ॱनी हुगो जेङ् ढीन यो़प्प हीन्न, हुगी यीगी दी म दीरङ् जम्बुलीङ्ल ॱमीत् ॱस्योङ यो़ट्टो।
Nu geselecteerd:
युहन्ना 21: LHM
Markering
Delen
Kopiëren
Wil je jouw markerkingen op al je apparaten opslaan? Meld je aan of log in
© 1995 Wycliffe Bible Translators, Inc. and Nepal Bible Society
