BOTHUBO 35
35
Jacob Je Kukideve tsü
1Alhou no Jacob vilo pi, “Ithulo, Bethel lo iqholo eno tilau küghünauve lo. Nono o mu Esau launo poche kelo Alhou khuu o lau ipeghi keno, Pa lau akümlla-khache shiqhe lo.” 2Ikehu Jacob no pa kibolomi eno pa gholo akeqo kümtsü vilo pi, “Inaghami lhou nongu gholo akeqo qhive no nongu ampi shikimthe lulo eno nongu phimini kilive lo. 3Tishino ningu ithu no Bethel lo iqhoni nolo, tishianguno Alhou khuu no I veküsa tsala lo I khochile tsü eno khile khilemu I gholo acheni keno, I no Pa lau akümlla-khache shiqheni.” 4Ikehu panongu no inaghami lhou pano gholo akeqo eno pano kini lo kighi chekeu kümtsü Jacob tsüve. Jacob no tipaqo pesü Shechem lo aphisübo#35:4 Momu terebinth sübo 12:6 qholo küsüve.
5Panongu no chesü wuche kelo, Alhou launo thüghüi kepu lakhi panongu hokümxa lo mishighünaqo shou ikughive, ikehu panongu ye Jacob nuliqo hawu move. 6Jacob ngo pa gholo kichemi kümtsü no Luz (ti ye, Bethel), khikhi Canaan yeghi lo ani keno, tile ighive, 7eno tilehi pa no akümlla-khache shiqhe no tipa-a pesü El-bethel kuvetsü, kughengu pa no pamu launo posü wuche kelo, tipa-a lono Alhou no pa lau ipeghi ke. 8Eno Rebekah hikujuu Deborah ye thive, li ye Bethel phivilo aphisübo qholo shiqhove. Ikehu tipa-a je pesü Allon-bacuth kuvetsü.
9Kughou Jacob no Paddan-aram lono ighive keno, Alhou no pa lau itaghi ipeghi no pa kümghatsü. 10Eno pa vilo pi, “O je ye Jacob ke; ikemu itehi o je ye Israel ipi kuniae.” Ikehu Alhou no pa je Israel kuvetsü. 11Eno Alhou no pi, “Ni ye Akughushu Lhou ke; athi pithilu eno kighishelu lo. O launo shiye lakhi lighimi ipeghi nani, eno o phi lono kükami ipeghi nani. 12I no Abraham ngo Isaac tsükeu yeghi o tsü nani, eno o shelo o tikughukomi lau I no ayeghi tsü nani.” 13Tishino Alhou ye pa pütsa akeu-a lono kunguu ikuve. 14Alhou no khileno pa pütsa keno Jacob no tile atu no atsükucho shiqhe pukuve. Pa no atsaizü kümllagho eno thazü tipau shou lepukuve. 15Ikehu Jacob no Alhou no pa pütsa keu-a pesü Bethel kuvetsü.
Rachel ngo Isaac Kithi
16Tithiu panongu no Bethel lono chesü wuve. Panongu no Ephrath tonike kushuo kumo lo, Rachel ye küaküzü do tove no apunu küsü süuve. 17Kughou li no apunu kushokütsü shive keno, hikujuu no pi, “Msa kevilo, kughengu no ye itaghi kiptimi ithuluvae.” 18Li ngulho no li qhimphi lono (kughengu li ye süthauveni ye shiveke), li no pa je Ben-oni#35:18 Akiqi ye I kumto momu I ghime nu kuvetsü; ikemu pa pu no pa je Benjamin#35:18 Akiqi ye au ajeu nu kuvetsü. 19Eno Rachel ye thive, li ye Ephrath (ti ye Bethlehem) kuwula lo shiqhove, 20eno Jacob no li kumo shou atsükucho lakhi shiqheve. Ti ye Rachel thigho tsükucho ke, tipau ye ishi kutolo acheni. 21Israel ye chesü wuve no Eder ghukhe-a ghüngü lo pa phiki shiqheve.
22Israel no tipa yeghi lo küghüna akelo, Reuben no wuno papu nipu amishiu Bilhah shipüthave. Israel no tipa sütsa chiluve.
Jacob nuli chighikini ye hipaqo: 23Leah nuli: Reuben (Jacob nu anoghiu), Simeon, Levi, Judah, Issachar eno Zebulun. 24Rachel nuli: Joseph ngo Benjamin. 25Rachel qeliu Bilhah nuli: Dan ngo Naphtali. 26Leah qeliu Zilpah nuli: Gad ngo Asher. Hipaqo no Jacob nuli Paddan-aram lo ake lono punu keqo ke.
27Jacob no Abraham ngo Isaac pama no kachena shi acheke-a Mamre, momu Kiriath-arba (ti ye Hebron) lo papu Isaac lau ighi. 28Isaac ye ampe 180 xüe. 29Isaac ye ateasü kutolo xüno thive eno pano timi gholo thihuve. Eno pa nu Esau ngo Jacob pama no pa kumo shiqhove.
Nu geselecteerd:
BOTHUBO 35: SUMRVBSI
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
The Bible Society of India
© 2023, Used by permission. All rights reserved. More
