BOTHUBO 11
11
Babel Qoghe
1Inahuu ye ayeghiqha kümtsü lo atsa lakhi eno atsathi aphiphi shi ache. 2Timiqo no kipelau no phuthe ighi kelo, panongu no Shinar yeghi lo aqa lakhi ithulu eno tilau küghünave. 3Panongu lakhino lakhi vilo pi, “Ighilo, ningu pititu mlani nolo, eno ami lono tsaqüi tipaqo pitini.” Panongu no atu züqhulo pititu, eno aghani züqhulo tsübuta peithae. 4Tithiu panongu no pi, “Ighilo, ningu ampi no mishighüna eno qogheki lakhi, tipa kütsüqa no atsütsü ikuto mlani nolo, eno ni likhi ni juaje shini nolo, tikumo aye ningu ye ayeghi lono apanaghave nosae.” 5Ampeu no mishighüna eno qogheki khikhi timi nuliqo no shiqhe keno juniye iqighi. 6Eno Ampeu no pi, “Julo, panongu ye ashiaye lakhi, kümtsü atsa lakhi, eno hi ye panongu no kiu shi nani keno hukuthu likhi aphie. Panongu no kughuphe keu kiunomu pano ghenguno tokümlapu shini chemoe. 7Ighilo, ningu iqi no pano tsa kübangüve tsüni nolo, tishianguno panongu lakhino lakhi tsapi vetha mlave peni.” 8Tighenguno Ampeu no tilehi no panoqo pesü ayeghiqha kümtsü lo apanaghave tsü, eno panongu no mishighüna mlapishepe qhive. 9Ikehu tipa-a je pesü Babel kuvetsü, kughengu tileno Ampeu no ayeghiqha tsa kümtsü kübangüve tsüke. Eno tileno Ampeu no ayeghi kümtsü lo panoqo apanaghave tsüe.
Shem Kughukomi
10Hipaqo no Shem laghaphi. Kughou Shem no ampe 100 shi akeno, züqozü ighi kethiu ampe kini shi ake lono Arpachshad punu. 11Eno Arpachshad punuve kethiu Shem ye ampe 500 xü, eno anuli kütami kiptimi totimi ithulu.
12Kughou Arpachshad no ampe 35 shi akeno Shelah ithulu. 13Arpachshad ye Shelah ithuluve kethiu ampe 403 xü eno anuli kütami ghi ithulu.
14Kughou Shelah no ampe 30 shi akeno, Eber ithulu. 15Shelah ye Eber ithuluve kethiu ampe 403 xü, eno anuli kütami ghi ithulu.
16Kughou Eber no ampe 34 shi akeno, Peleg ithulu. 17Eber ye Peleg ithuluve kethiu ampe 430 xü, eno anuli kütami ghi ithulu.
18Kughou Peleg no ampe 30 shi akeno, Reu ithulu. 19Peleg ye Reu punuve kethiu ampe 209 xü, eno anuli kütami ghi ithulu.
20Kughou Reu no ampe 32 shi akeno, Serug ithulu. 21Reu ye Serug punuve kethiu ampe 207 xü, eno anuli kütami ghi ithulu.
22Kughou Serug no ampe 30 shi akeno, Nahor ithulu. 23Serug ye Nahor punuve kethiu ampe 403 xü, eno anuli kütami ghi ithulu.
24Kughou Nahor no ampe 29 shi akeno, Terah ithulu. 25Nahor ye Terah punuve kethiu ampe 119 xü, eno anuli kütami ghi ithulu.
26Kughou Terah no ampe 70 shi akeno, Abram, Nahor eno Haran ithulu.
Terah Kughukomi
27Hipaqo no Terah laghaphi. Terah ye Abram, Nahor eno Haran noqo papu; Haran no Lot papu. 28Haran ye pano bolomi yeghi, Chaldeami ghakhu Ur, lono papu Terah küa lono thive. 29Abram ngo Nahor pama ye anipu luve. Abram nipu je no Sarai, eno Nahor nipu je no Haran nonga Milcah, Haran ye Milcah ngo Iscah pama papu. 30Sarai ye anuhami; li ye anuli kühano ache.
31Terah no pa nu Abram, pa tilimi Haran nu Lot, pa nu Abram nipu eno pa mukishiu Sarai, ishi sasü kümtsa Chaldeami yeghi Ur lono Canaan yeghi lo wuniye cheve, ikemu kughou panongu no Haran lo ighi keno, panongu no tile xüsüve. 32Terah mpe ye 205, eno Terah ye Haran lono thive.
Nu geselecteerd:
BOTHUBO 11: SUMRVBSI
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
The Bible Society of India
© 2023, Used by permission. All rights reserved. More
