Mataio 9
9
Iesu maea susuru eka karu la lei lareva leipe
(Mareko 2:1–12; Luka 5:17–26)
1Soka are oroti voa forea sitoi itai voa ufi, areve karikara kofa voa forerōpe. 2Foreri karu hea kakosa voa eaeiape maea susuru eka karu la taiovi kotipe. Iesu ereve sukaerereaita haiiri la ofae eovi, are maea susuru eka karu la mō ōpe, Atute e, rofo leitia; ave iri kaiae sasuka mutapaita meha. 3Soka Safu Karoro ore karu hea o elore elore mō ōpe, Mea vita Ualare la hasiavaita o la aipea. 4A—, Iesu ereve seseōvaiape haiiri ore lei, are mō ōpe, E eve haiiri voa maealolo la seseōvaipeta ipi levea? 5Heafo auke etau leavoa, o mō aritōva, Ave iri kaiae la sasuka mutapai vei ei? ō mō aritōva, Itei, mora keroria ei? 6Soka ipi ero lei ore leiti vei, Karu ve Atute mearovaeka voa iri kaiae la sasuka mutapai vei siahu ia, are maea susuru eka karu la mō ōpe, Itei, ave kakosa fareōvi taiovi ave uvi voa teraia. 7Lō mei, are itei areve uvi voa terōpe. 8Karu rauapo lea la ofae eovi, tore lei, Ualare la maeatipe ipi are lōfeare siahu karu la miarōpe eavia.
Iesu Mataio la isōpe
(Mareko 2:13–17; Luka 5:27–32)
9Iesu lōvoa kiripi terōpe soa, are karu rare Mataio, etau maeamaea ve takis oti voa aiseseiape la ofae eovi, arero mō ōpe, Araro aitetei kotiria. Lō mei are itei arero aitetaipe.
10Soka Iesu Mataio ve uvi voa larietau posa voa makea iavi, aea takis fareovaita karu rauapo, aeata iri kaiae leita karu ita koti, Iesu areve satiriaraita karu ita farehoria makea iavi siseiape.#Luk 15:1–2 11Farisea karu lea la ofae eovi, areve satiriaraita karu la lalasi lei mō ōpe, Eve lea satiriaraita papuvita takis fareovaita karu aeata iri kaiae leita karu ita fareho larietau loloita ipi levea? 12Are lea o la mapi mō ōpe, Maea rofo karu dokita haikaeai sore, a—, eka karu sa haria. 13Teraia, mea o ve eite seseōvi ore leitia, Ara sa maeaforoe leiti vei haikaeaipea, maso etau la savi omopa posaseai vei kasirau. Ara mai haura leita karu la isai vei koti kao, a—, kaiae leita karu vei.#Mat 12:7; Hose 6:6
Larietau avoha leita mai
(Mareko 2:18–22; Luka 5:33–39)
14Aite Ioane ve satiriaraita karu arero tai koti mō ōpe, Ipi levea ela aeata Farisea karu ita larietau avoha soa rauapo lei vovea, a—, ave karu avoha leiti sore ei? 15Iesu erero mō ōpe, Ua laeai vei leipeta vita ere ita farehoria meita soa, areve paumarehari larietau avoha leita ore ei? A—, sare aite forerai roi lea soa mea ua laeaita vita ere voa fareovai roi, aea ere lea sare voa larietau avoha leiti roi.
16Karu kokoeai auke leita puta áre taratara la ovi puta ōsi voa levi topiari totorai roi, ipi lea puta áre taratara arero torerapi, puta everove ata kiripai roi, aea lea uta lōfeare foromai maealolo leiti roi. 17Karu uaina áre la ovi uaina ruru everove voa sisōvai sore; are sisōvait’ oria, lea uaina áre ruru la lei haea sisapi veverapai roi, aea uaina ruru ta hasiavai roi. A—, karu uaina áre la ruru áre voa sisōvaitore, aea lōfeare ereuka oraka lareva leiti roi.
Ovo eka leipe ua aea Iairo ve mori
(Mareko 5:21–43; Luka 8:40–56)
18Are erero laua sukavaiape lea mea, harofave vita farakeka aea arero tai foreri, hiopi taivotei mō ōpe. Arave mori faitora opai, a—, kotiria, ave mai arero paea are ata makuri leiti vei. 19Soka Iesu itei arero aitetaipe, areve satiriaraita karu ta reha.
20Soka ua farakeka aea sisoro twelve ovo eka lei meiape. Are Iesu ve aite voa koti, areve puta ve peto fufusi la mai sa mopōpe. 21Ipi are arevo haiiri voa mō ōpe, Ara areve puta la haria mai sa mopaita, a—, ara lareva ata leiti roi. 22Iesu aiterori a’ arero ofae eovi, arero mō ōpe, Mori e, rofo leitia, ave sukaerereaita haiiri sa aro lei lareva loita meha. Soka lea ua lea ora kofa voa lareva leipe reha.
23Soka Iesu lea harofave vita ve uvi voa foreri, mioho fōfōaita karu, ora fofaita karu rauapo ita la eovi mō ōpe, 24Maria voa forera puavaia; mori opai kao, are ivutu la eaea. A—, ere arero area sa vutea ōpe. 25Lea karu rauapo la maria voa taivati, Iesu oropi, lea mori ve mai la paea, are itoipe reha. 26Soka lea fari lea otioti foromai voa fafarapōpe.
Ofae kuku karu oraka
27Soka are lea oti kiripi ata terōpe lea mea, ofae kuku karu oraka arero aitetei, maea fi rovaea ita mō isa moipe, Davida ve Atute e, elakaro maeaforoe leitia. 28Are uvi voa oropi, lea ofae kuku karu oraka arero tai koti, aea Iesu ereukaro lalasi lei mō ōpe, Eukave sukaerereaita haiiri ara eukaro lei ovava leiti vei siahu ia ei? Ereuka arero mō ōpe, Papuvita e, a. 29Soka are ereukave ofae la mai sa mopi mō ōpe, Eukave lea sukaerereaita haiiri feare, euka vei lōfeare leitia. 30Lō mei, ereukave ofae ovava leipe. Iesu ereukaro o kere ita o erere a’ mō ōpe, Mapaia, mea etau karu farakeka aea la lei ore levi leitia. 31A—, ereuka pisiri voa foreri areve fari lea otioti foromai voa fafarapaiape.
Okuku karu
32Ereuka maria voa terōpe soa, ere harisu sa toōpe okuku karu la arero tai lariōvi kotipe. 33Iesu lea harisu la larivatōpe lea mea, okuku karu laua sukavōpe reha. Karu sitavu haihava lei mō ōpe, Mōfeare mai Israela voa evera eavai kao. 34A—, Farisea karu mō ōpe, Are harisu harofave vita ve siahu ita harisu la larivataitore.#Mat 10:25; 12:24; Mak 3:22; Luk 11:15
Fare rovaea pisahu meha
35Soka Iesu karikara metameta aea karikara kaekae foromai voa sariva lei lei, ereve sunako uvi uvi voa satiriōri, aea basileia ve Ovoro Lareva la itoro a’ a’, aea eka hariaharia foromai, aea hehea hariaharia ta lei lareva leiape.#Mat 4:23; Mak 1:39; Luk 4:44 36Are karu sitavu sitavu la ofae eovi erero maeaforoe leipe, ipi ere haisora lei, maea‐uti sisapi, kiva vita auke mamoe feare lei vovo roroaiape.#Num 27:17; 1 King 22:17; 2 Basil 18:16; Esek 34:5; Mak 6:34 37Soka are areve satiriaraita karu la mō ōpe, Fare rovaea pisahu meha; a—, tivi karu hiake.#Luk 10:2 38Fare ve Papuvita la loki leitia, are tivi karu hea ta areve fare taita otioti voa haisa itapai vei.
Nu geselecteerd:
Mataio 9: TQO1983
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Published by the Bible Society of Papua New Guinea in 1983.
