Mataio 5
5
Iesu raepa voa itoro ōpe
(Luka 6:20–23)
1Soka Iesu karu sitavu la ofae eovi raepa voa patei, avi, areve satiriaraita karu arero tai koti, 2are ape fapi erero satiriōri mō ōpe,
3Haiiri‐ipi karu, ere ta lareva ia, ipi kauri ve basileia ereve.
4Haiiri fi ita roroaita karu ere ta lareva ia, ipi Ualare sa erero vovoro leiti roi.#Isa 61:2
5Haimafu ita roroaita karu ere ta lareva ia, ipi ere mearovaeka la ovai roi.#Sal 37:11
6Mai haura vei eroa sa’ aea kōvōre‐tolo lei roroaita karu ere ta lareva ia, ipi ere ére popai roi.#Isa 55:1–2
7Haiiri maeaforoe lei vovo roroaita karu ere ta lareva ia, ipi Ualare sa erero maeaforoe ta leiti roi.
8Haiiri sirisiri auke karu ere ta lareva ia, ipi ere Ualare la ofae eavai roi.#Sal 24:3–4
9Karu la lei omopa totoea vo roroaita karu lareva ia, ipi ere rare Ualare ve atutemori rare aravai roi.
10Mai haura vei karu sa hasiavaita lea karu ere ta lareva ia, ipi kauri ve basileia ereve.#1 Pet 3:14
11Arave rare vei karu o maeamariti ero ari oria, aea ero hasiavai vei aitetai oria, aea havara apeva ero paraeai oria, lea mea e lareva ia.#1 Pet 4:14 12Haimeta leitia, hailareva foromai leitia, ipi eve kauri voa eaeipeta tava rovaea kofa; ipi ere eve soa ve omopa karu, lea peroveta karu ta lōfeare leiape.#2 Basil 36:16; Apos 7:52
Sōlo aea Ovava
(Mareko 9:50; Luka 14:34–35)
13Mearovaeka karu ve sōlo e reha. A—, sōlo ve peroro veverapait’ oria, arero ata lei lareva leita otiharo kasirau. Are eite kao; karu sa arero au mutapaitore, karu ve mora sa patai vei.#Mak 9:50; Luk 14:34–35
14Mearovaeka karu ve ovava e reha. Raepa ovoharo voa turi avaita karikara arorisaita ore kao.#Ion 8:12; 9:5 15Karu lamepa la elōela sa kaupi vipai vei a mopai sore, a—, lamepa ve posa kofa voa vipai vei, aea are uvi karu foromai ve ovava lōri leiti roi.#Mak 4:21; Luk 8:16; 11:33 16Soka eve ovava karu foromai ve soso voa lōri haeaia; ipi ere eve leita mai lareva la ofae eovi, eve kauri voa peita Oa la maeati vei.#1 Pet 2:12
Evera safu aeata safu áre
17Haiiri mōfeare levi seseōvaia, ara Mose ve Safu O aeata peroveta karu ve o ita la safukavai vei forerai; ara safukavai vei forerai kao, a—, ipi erero lei kekese leiti vei foreri mea. 18Ipi ara ero okofa omoi, soa tetete kauri ita mearovaeka ita sa kaleitita soa, Safu O ve leta seikako ō areve karoro ve maka farakeka levi veverapai roi tetete areve eite foromai forerai roi.#Luk 16:17 19Lea vei karu farakeka aea Safu O seika kofa la paraeaita, aea karu haria la lōfeare satiriaraita, lea karu kauri ve basileia voa aite kofa karu leiti roi. A—, karu farakeka aea lea Safu O la mapi kakeva leitita, aea karu la lōfeare satiriaraita, are kauri ve basileia voa omopa kofa karu leiti roi. 20Ara ero o mō la auai, eve mai haura Safu Karoro ore karu aea Farisea karu ita ve mai haura la sapatai auke leitita, a—, e kauri ve basileia voa levi oropai roi.
21Evera karu la moipe mea o e mapi malasa lei roroa, A karu la levi paeaia; aea karu la paeaita lea vita la fasi kōto leiti vei lariōvi terai roi.#Eso 20:13; Deut 5:17 22A—, ara ero o la moi, Areve marehari la kitou ita meita lea vita, arero fasi kōto leiti lariōvi terai roi. Aea areve marehari la mō arita, Maeakakare! lea vita la fasi kōto rovaea voa lariōvi terai roi; aea areve marehari la mō arita, Atute merava! lea vita la fasi Gehena ve a voa lariōvi terai roi. 23Lōfeare vei, a ave meru la alitara voa omopa posaseaita lea mea, aea ave marehari a ita faeafaea haiiri ia, a lea la haiiri seseōvi ore leitit’ oria, 24ave meru alitara voa miavi, are eaea, aea te omopa a ave marehari ita totoeai ao, aite ata koti ave meru la omopa lōri posaseaia.
25Aro sosori oita vita ita omopa lavelave totoeaia, euka kōto ve otiharo voa tera vovo roroaita lea mea, are aro seseōvi tava miaraita vita ve mai voa miavai ave, aea lea seseovi tava miaraita vita aro dibura kiva karu la miōri, aro dibura voa itapai ave. 26Okofa ara aro o la moi, A lea oti levi kiripai roi tetete a kaiae tava moni foromai la miarai ao.
27Evera karu la moipe mea o e mapi malasa lei roroa, A herei levi leitia.#Eso 20:14; Deut 5:18 28A—, ara ero o la moi, Ua la haikaea arero ofae koko haria fofoisaita lea vita, areve haiiri voa arero torea loita reha. 29Ave ofae toare sa aro lei kaiae leitit’ oria, arero suka fareōvi mutapaia; ipi maea voa etau farakeka veverapaita lea lareva ia, a—, ave maea foromai la Gehena voa mutapaita, lea foromai maealolo kofa.#Mat 18:9; Mak 9:47 30Aea ave mai toare sa aro lei kaiae leitit’ oria, arero sarapi mutapaia, ipi maea voa mopi fofoeaita etau farakeka veverapaita lea lareva ia, a—, ave maea foromai Gehena voa mutapaita lea foromai maealolo kofa.#Mat 18:8; Mak 9:43
31O aea ta mōfeare, areve ua la haiarara lei sukavuteaita lea vita, are arero kiripai pepa uka arero miarai ao.#Deut 24:1–4; Mat 19:7; Mak 10:4 32A—, ara ero o la moi, Karu sa torea auke leita ua, areve vita arero kiripaita, a—, lea vita areve ua la lei torea ua leiti roi, arero vita aea sa laeaita lea soa voa; aea vita sa kiripaita ua la laeaita lea vita are ta ua torea mai loita reha.#Mat 19:9; Mak 10:11–12; Luk 16:18; 1 Kor 7:10–11
33Evera karu la moipe mea o ta e mapi malasa lei roroa, A otoare apeva levi aria, a—, a Papuvita voa arita lea otoare la lei okofa leitia.#Levi 19:12; Num 30:2; Deut 23:21 34A—, ara ero o la moi, A otoare la okofa lei oita o farakeka ita levi topiari moia; kauri ve rare o ta levi aria, ipi are Ualare ve terona eavia;#Iak 5:12; Isa 66:1; Mat 23:22 35mearovaeka rare o ta levi aria, ipi Ualare ve mora peita posa are reha; Ierusalema rare o ta levi aria, ipi King Rovaea ve karikara are reha.#Isa 66:1; Sal 48:2 36Aeata a otoare la okofa lei oita o, ave harofave rare o ita levi aria, ipi a tui farakeka aea la lei sea leitita, ō lei uru leitita ore kasirau. 37A arita o mō aria, A, a, aea kao, kao. Lea o la topiaraita o Kaiae Vita voa forera vovea.
38Evera moipe mea o e malasa lei roroa, Ofae ve tava ofae, tao ve tava tao.#Eso 21:24; Levi 24:20; Deut 19:21 39A—, ara ero o la moi, Aro hasiavaita karu la levi sukavuteaia; a—, aro heva toare voa toaita lea vita, heva itai ta eakoa arero muiaia. 40Karu ave iri puta vei aro kōto leiti haikaeaita, a—, ave arori puta ta arero miaraia. 41Karu maili farakeka terai vei aro serea leitit’ oria, maili orakoria are ita fareho teraia. 42Aro loki leita lea karu la au miaraia, aea ave etau la ovi aro aite ata miarai vei haikaeaita lea karu la kōutoa levi avaia.
43Evera moipe mea o e mapi malasa lei roroa, A ave haekao peita karu la maeaforoe lei haikakare leitia, aea ave ote la kaifa leitia.#Levi 19:18 44A—, ara ero o la moi, Ave ote karu la haikakare lei vovo meava, aea aro hasiavai vei aitetai vo meita lea karu vei ta Ualare la loki leitia. 45E eve kauri voa peita Oa ve atutemori lōri leiti vei. Ipi are areve sare la maealolo karu voa, aeata lareva karu voa lei patai vovea; aea areve lai la haura karu voa aeata kaiae karu voa lei ō vovea. 46Ipi e ero haikakare leita karu la haikakare leita, a—, e tava lekōru la ovai roi? Takis fareovaita karu ta lōfeare leiti kao ei? 47Aea e eve maraiosu la haria foforoe meha o arita, a—, eve leita mai ve lareva ve rovaea leavoa? Toruipi hariaharia karu lōfeare leiti kao ei? 48Soka eo, e mai lareva lareva‐eite kofa la lei vovo roroava, eve kauri Oa sa mai lareva lareva‐eite kofa la lei vovo meita lōfeare.#Levi 19:2; Deut 18:13
Nu geselecteerd:
Mataio 5: TQO1983
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Published by the Bible Society of Papua New Guinea in 1983.
