Luka 20
20
Lalasi o Iesu ve siahu vei
(Mataio 21:23–27; Mareko 11:27–33)
1Sare farakeka voa are Maso Uvi voa karu la satiriōri Ovoro Lareva itoro ape soa, maso harofave karu ita Safu Karoro ore karu ita opasora‐sora ita foreri, 2arero mō ōpe, Elaro moia, a mea leita siahu ve ipi leavoa, aeata mea siahu aro leisa miarōpe ei? 3Are erero tava o mō ōpe, Ara ta o farakeka ero lalasi leiti ao; araro o moia, 4Ioane sa leiape lea bapatiso ve ipi leavoa, Ualare voa ei, ō karu voa ei? 5Ere elore elore o mō seseōvōpe, Ereita mō arit’ oria, Ualare voa, a—, are ereitaro mō ari roi, E arero sukaerereai auke ipi levea? 6A—, ereita karu voa o arita, a—, karu foromai ereitaro fave sa toai roi; ipi ere haiiri kekese kofa Ioane are peroveta vita reha. 7Soka ere tava o mō ōpe, Areve forerōpe soa ela ore kao. 8Lō mei, Iesu erero mō ōpe, Ara ta mea mai leipeta siahu ve ipi ta ero levi moi roi.
Parabole o vine oti kiva karu maealolo vei
(Mataio 21:33–46; Mareko 12:1–12)
9Lea soa are mea parabole o karu la mō moipe, Karu farakeka vine forova oti porōpe. Pori are lea vine oti tava itai ovai vei otoare a’, vine forōva arita karu hea sa kiva leiti vei miōri, maea lei oti haria voa te soa savori lōvoa peiape.#Isa 5:1 10Fare taita pisahu forerōpe lea mea, are sarufa karu aea la vine kiva karu tai itapōpe, ere vine oti ve fare hea arero miarai vei; a—, lea vine kiva karu arero tola sa teavi sa’ sa’ arero maea harokao larivatōpe. 11Aea are sarufa karu aea la ata itapi, ere arero ta tola sa teavi sa’ sa’, arero lei maeamariti foromai lei, arero maea harokao larivatōpe. 12Soka are oroisoria soa karu aea la itapi, ere arero ta toa maea tofei maria voa mutapōpe. 13Lea mea vine oti ve papuvita mō ōpe, Ara leati roi? Ara arave haikakare araita atute la itapi, ere arero taivotaita varo. 14A—, lea vine kiva karu o elore elore a’ mō ōpe, Hasu ovai o oita vita kofa meha; ereita arero paeaia, areve oti lōri ovai vei. 15Lō mei ere arero ovi vine oti ve koravasa voa toapi arero paeōpe reha.
Soka vine oti ve papuvita erero lea’ leiti roi? 16Are koti roi, lea oti kiva karu la saroroapi, vine oti la fareōvi, kiva leiti karu haria la miarai roi. Ere lea o la mapōpe soa ere mō ōpe, Are kaka eaea! 17A—, are erero ofae fofoisa mō ōpe, Buka voa uka siseita mea o ve eite lekōru?
Uvi turaita karu sa haiarara lei eite auka o ōpe lea fave,
are arori lalave fave lei la eaea.#Sal 118:22
18Lea fave ve arori voa putoita lea karu foromai furira taratara leiti roi; a—, are ereve arori voa oaita lea karu foromai la toa hohōroai roi.
Kalsara la miaraita takis moni
(Mataio 22:15–22; Mareko 12:13–17)
19Lea soa kofa voa Safu Karoro ore karu, maso harofave karu ita arero sukafori paea vei seseōvōpe, ipi ere ore are lea parabole o ere vei moipe, a—, ere karu la tore leipe. 20Soka ere soa kofa vei arero ofae sa kiva lei, aea okofa harapi leita karu maeahahauhahau la itapōpe, ere areve laua la mapi ovi havara apeva arero paraea, gavana ve fasaita siahu voa arero miarai vei. 21Soka ere arero lalasi mō leipe, Satiriaraita Papuvita e, ela ore a o haura la mei satiriarai vovea, aea karu ve soso o ari sore, a—, Ualare sa haikaeaita mai la okofa ita satiriarai vovea. 22Takis moni Kaisara la miaraita haura ei, ō haura kao ei? 23A—, Iesu ereve maeahahauhahau la ore lei, erero mō ōpe, 24Silva moni farakeka aea la araro aura muiai. Mea ove ita karoro ita leive? Ere mō ōpe, Kaisara ve. 25Iesu erero mō ōpe, Soka Kaisara ve etau Kaisara la miaraia, aea Ualare ve etau ta Ualare la miaraia. 26Ere karu ve omopa voa are moipe lea o la ovi lei kaiae leiti vei ore kao; a—, ere areve tava o vei haihava lei, ape kavuarōpe.
Opi ata itoita laua
(Mataio 22:23–33; Mareko 12:18–27)
27Soka Sadukea karu, opi ata levi itoi o la satiriaraita lea karu hea, arero tai foreri arero lalasi lei mō ōpe,#Apos 23:8 28Satiriaraita Papuvita e, Mose ereita vei o mōri ukōpe, karu aea ve paua opi are ua ia, a—, atutemori auke leitita, a—, areve marehari sa lea ua vitōva la laea, atutemori areve paua ve rare ita lei epai vei.#Deut 25:5 29Soka paua ita mariosu ita seven pepeiape; pepea omopa vita ua laea aea mere auke ita opōpe; 30opi, aite vita lea ua ta laea opi, 31aite oroisoria vita ta reha, aea lea karu seven foromai ta lōfeare, ere atutemori auke ita opaiape. 32Aite kofa voa lea ua ta opōpe. 33Soka opi ata itoita soa voa arero leisa ovai roi? Ipi lea karu seven sa arero laeaiape eavia.
34Iesu erero tava o mō ōpe, Mea mearovaeka soa ve karu ere vita ita, ua ita laeaitore. 35A—, aite makuri ve soa, aea opi ata itoita soa la ovai vei mai haura leita karu ere vita ita ua ita levi laeai roi. 36Ere usoso aneru fefeare lei, aea ata levi opai roi. Ere Ualare ve atutemori leiti roi, ipi ere opi ata itoita soa ve karu eavia. 37Soka karu opi ata itei makuri leiti o Mose sa tola meke ve fari voa uka la eaea, are Papuvita rare la aravi mōri moipe, Abrahama ve Ualare, Isako ve Ualare, aea Iakobo ve Ualare.#Eso 3:6 38Lea o ve eite lea karu ere makuri, ipi are opaita karu ve Ualare kao, a—, makuri karu ve, ipi karu foromai are vei makuri leititore. 39Safu Karoro ore karu hea tava o mōri moipe, Satiriaraita Papuvita e, ave tava o lareva reha. 40Lea ve aite voa ere arero ata lalasi ivara ita leiti kao.
Lalasi o ipi Davida ve atute vei
(Mataio 22:41–46; Mareko 12:35–37)
41Soka Iesu erero lalasi lei mō ōpe, Karu Keriso are Davida ve atute lea o la leafeare moi vōvea? 42Ipi Davida areve elore mai sa Salamo buka voa o mōri moipe,
Papuvita Iehova are arave Papuvita la mō ōpe,
Arave mai toare voa avaia,#Sal 110:1
43tetetete ara ave ote karu la ovi, ave mora posa ve ora voa miavai ao.
44Lōfeare Davida are Keriso la Papuvita rare aravaita, a—, Keriso areve atute leafeare leitita ore ei?
Safu Karoro ore karu ve mai maealolo
(Mataio 23:1–36; Mareko 12:38–40)
45Soka karu foromai arero mapaiape soa, are areve satiriaraita karu la mō ōpe, 46Safu Karoro ore karu vei kiva lei vovo roroava; ere mopaita puta savori ita mora kerori kerori a’, aea itaea leita otioti pisiri voa karu sa erero maeatita o moi vei, aea sunako uvi voa toare kiriposa, aea sosoka soasoa voa toare oti voa avai haikaea vovo roroa vovea. 47A—, ere ua vitōvavitōva ve etau maeamaea ta maravaita karu, aeata ere veveu o si ita lohalai toaitore. Soka kaiae ve tava rovaea‐rovaeaeite erero aite miarai roi.
Nu geselecteerd:
Luka 20: TQO1983
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Published by the Bible Society of Papua New Guinea in 1983.
