Luka 18
18
Parabole o loki taupaita ua vei
1Soka Iesu mea parabole o erero o moipe, ere Ualare la haisora auke ita loki taupai vei. 2Are mō ōpe, Karikara farakeka voa kōto laua seseōvi tava miaraita vita aea peiape. Are Ualare la tore auke lei, aea karu ta taivotai kasirau. 3Lea karikara voa ua lelesi farakeka aea ta ia, aea are arero tai koti koti, loki serea ita lei mō moiape, Kōto lei, arave ote karu la lei araro haura leiti vei seseōvaia. 4Soka sare hea are mapai haikaeai kao; a—, aite voa are areve haiiri voa o mō ōpe, Ara Ualare tore leiti sore, karu ta taivotai sore, 5etau farakeka mea ua lelesi araro taupi heafo la leipea; ara kōto lei arero haura leiti vei seseōvai roi, are araro tai soa rauapo koti koti araro lei haisora leiti ave.
6Aea Papuvita o ata topiari mō ōpe, Lea haura auke kōto laua seseōvi tava miaraita vita ve o la haiiri voa seseōvaia. 7Soka Ualare sare ita faita ita arero fi ō vovo roroa, are sa haikaea maravaita lea karu la lei haura levi leiti roi ei? Are erero toarai vei lekaleka leiti roi ei? 8Ara ero o mō la auai, Are utohoa seseōvi tava miōri erero toarai roi. Etau farakeka, Karu ve Atute sa koti soa are arero sukaereraita karu la sukaeai roi ei?
Parabole o Farisea karu aea takis fareovaita karu vei
9Are mea parabole o, karu hea ere ereve elore mai haura vei maeamarōva lei, karu haria la sukavuteaita lea karu la mō ōpe. 10Karu orakoria Maso Uvi voa pataipe Ualare la loki leiti vei; farakeka Farisea karu, farakeka aea takis fareovaita karu. 11Farisea karu hariakao pōvi, loki lei mō ōpe, Ualare e, ara aro maeati ipi ara karu haria ve mai mōfeare leiti sore, torea karu, mai kaiae leita karu, ua torea karu, aea usoso lea takis fareovaita karu ve mai feare. 12Hebedoma foromai ara sare orakoria voa larietau avoha lei vovea, ara ovi meita etau foromai la ten firu faeafaea firu farakeka la ovi Ualare vei miara vovea. 13A—, takis fareovaita vita maea kokoavi áraita pōvi, areve ofae kauri voa moravai usoso auke lei, areve haiposa la totoa, o mō moipe. Ualare e, ara kaiae leita karu, araro rapi maeaforoe leitia. 14Ara ero o mō la auai, Mea karu areve uvi voa haura lei faukōpe, a—, lea Farisea karu are feare leiti kao. Ipi ereve elore maea la moravaita karu foromai la ipi voa sukavutea fafukai roi; a—, ereve maea la ipi voa leita lea karu la arori voa moravi papatavai roi.#Mat 23:12; Luk 14:11
Iesu atutemori kaekae la o sa lei lareva leipe
(Mataio 19:13–15; Mareko 10:13–16)
15Soka karu hea atutemori kaekae Iesu tai lariōvōpe, are erero mai paeai vei; a—, satiriaraita karu lea la ofae eovi erero o erere ōpe. 16A—, Iesu erero arero tai isa mō ōpe, Atutemori rapi ere roroa, ere araro tai koti vei erero o erere levi aria; ipi kauri ve basileia ve karu ere fefeare. 17Ara ero okofa omoi, Ualare ve basileia la atutemori ve mai feare ovai auke leitita lea karu levi oropai roi.
Pisoso rovaea vita la moipe o
(Mataio 19:16–30; Mareko 10:17–31)
18Soka lohio karu aea arero lalasi lei mō ōpe, Satiriaraita vita lareva e, ara etau etau lekōru la lei peita makuri la aite ovai vei? 19Iesu arero mō ōpe, A araro lareva o levei auai? Karu foromai lareva kakaeite, a—, Ualare sa haria. 20A safu o foromai ore, a ua torea levi leitia, a karu levi paeaia, a etau torea levi leitia, a havara apeva levi paraeaia, a ave oa ave lou ita la maeaforoe lei taivotaia.#Eso 20:12–16; Deut 5:16–20 21Lō mei, are arero mō ōpe, Satiriaraita vita e, soa arave karu áre soa voa itiiti faitora ara lea safu o foromai la mapi kiva lei vovea. 22Iesu lea o la mapi, arero mō ōpe, Haikaeaita etau farakeka a sa leitia kao: ave ovi meita etau etau la itaea lei miōri, ereve tava la ovi merava karu la aioraia, aea a pisoso etau kauri voa lōri ovai roi; aea araro aitetei kotiria. 23A—, are lea o la mapi, haiiri eae foromai leipe reha, ipi are pisoso rovaea vita eavia.
24Iesu areve haiiri eae la ofae eovi mō ōpe, Pisoso rovaea ita roroaita karu ere Ualare ve basileia voa oropaita heafo foromai rovaea kofa lei vovea. 25Nila kōvi ve uta voa kamela sa oropaita taheka mafu maea feare, a—, pisoso karu Ualare ve basileia voa oropaita, heafo foromai rovaea reha. 26Lea o la mapōpe karu mō ōpe, Soka leiro lei makuri leiti roi ei? 27Iesu tava o mō ōpe, Karu sa leitita usoso auke leita lea etau, Ualare sa leitita ore.
28Petero mō ōpe, Ofae eavaia, ela elave etau foromai la kiripi aro aitetei vovo la roroa. 29Iesu erero mō moipe, O kofa ara ero o mō la auai, areve uvi, ō ua, ō mariosu, ō oalou‐ita, ō atutemori, Ualare ve basileia vei kiripaita lea vita, 30lea ve tava soa rauapo topiari ovai roi mea faitora soa voa, aeata aite soa voa soa sarapai auke lei peita makuri la ovai roi.
Iesu areve opi ata itoi vei oroisoria soa o moipe
(Mataio 20:17–19; Mareko 10:32–34)
31Iesu twelve karu itai voa lariōvi, erero mō ōpe, Mapaia, ereita Ierusalema voa la pataipea meha, aea lōvoa peroveta karu sa Karu ve Atute vei uka siseita o foromai ve eite la okofa lei forerai roi. 32Ipi karu sa arero toruipi haria karu ve mai voa miōri, aea ere arero area sa vutea a’, sukavutea, arero pea sa soea, 33arero teavi sa’ arero paeai roi; paea, a—, oroisoria sare voa are itoi roi. 34A—, ere lea etau foromai vei haiiri ovava auke lei, lea o ve eite ere haveva lei, aea ere Iesu sa moipe lea o voa ereve haiiri fapai kasirau.
Ofae kuku karu leriko voa
(Mataio 20:29–34; Mareko 10:46–52)
35Are Ieriko voa forerai vei haekao leipe soa, ofae kuku karu farakeka meru ovai vei otiharo peto voa loki avi leiape. 36Are foapōpe karu sitavu ve hohororo la mapi, lea ve eite vei lalasi leipe. 37Ere arero mō moipe, Iesu Nasareta karu sa foapai. 38Soka are o mō isa moipe, Iesu, Davida ve Atute e, araro rapi maeaforoe leitia. 39Omopa voa teraiape lea karu arero o erere a’, ape sasaukai o ōpe. A—, are i foromai rovaea ita mō isōpe, Davida ve Atute e, araro rapi maeaforoe leitia. 40Iesu sukatai pōvi, ere ofae kuku karu la arero tai lariōvi iti vei moipe. Are haekao leipe soa, Iesu arero lalasi mō leipe, 41Ara aro leiti vei haikaeaipeta etau larelekōru? Lei, are mō ōpe, Papuvita e, araro lei ara ofae ata eavai vei. 42Lō mei Iesu arero mō ōpe, Ofae eavaia; a sa sukaerereaipeta eavia, aro lei lareva loita meha. 43Aea utohoa areve ofae ovava lei, are arero otiharo voa Ualare la marase o ita aitetaipe. Karu sitavu lea la ofae eovi, ere foromai Ualare la maeatipe reha.
Nu geselecteerd:
Luka 18: TQO1983
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Published by the Bible Society of Papua New Guinea in 1983.
