San Juan 8
8
1Ka Jesusi Olibusï juátarhu niraspti, 2ka pauandekuarhu, ambamantku, tiósïo niántaspti ménderu. Andarherasptiksï, ka ima uaxakaspti ka uénani jurhentpeni.
3Jimajkanksï juramukua jurhentpiricha ka fariseouecha péraspti uarhitini ma engaksï ísku ambe ma niátani p'iárapka nema jinguni. Terujkanksï péraspti, 4ka Jesusinksï arhispti:
–Jurhentpiri, íni uarhitinksï jima p'iárasti enga ísku ambe ma niátani jápka nema jinguni. 5Ka Moisesiri juramukuarhu arhisïndi eskachi indeni járhati uarhitichani tsakapkuerauaka. ¿T'u na uandasïnki?
6Imaksï ts'éjkunisï kurhamarhepti, eskaksï ísï jámani xékuntapiringa néna jimbo ambe ma arhiparhatani. Ka Jesusi sánderu arhisïrempti munchujkurhakua jimbo kuiruntskarani. 7Ka jimbokaksï inchajtsïmantani jápka kurhamarheni, jauaraspti ka arhiani:
–Ne enga cha ma isï no k'amanharhintstika, ima urheta k'uanire. 8Ka ménderu uéntaspti ch'úndentani ka karantskarani. 9Isïksï kurharini, mándani arhisptiksï kéndikuni, ka sánderu k'ératichaksï uénaspti jarharentani. Enga Jesusi na uarhiti jinguniterku pakarapkia, 10Jauaraspti ka kurhamarheni:
–Nana, ¿Na úskiksïa andi? ¿Nónemakini k'amanharhirantaski?
11Ka ima uarhiti arhispti:
–Nónema Tata.
Ka ménderu Jesusi arhispti:
–Jíjtukini no k'amanharhirantaxaka; ni kókuani níntani ka ásteru jáma k'amanharhintani.
Jesusi parhakpeni anapu eramarhandekuesti
12Tátsekua Jesusi ménderu uéntaspti arhijpeni:
–Parhakpeni anapuecha jinguni jísïni t'íntskueka, ne engarini chúxapuska, intsïnhati t'íntskua enga tsípekua íntskuaka, ka nómeni p'ájpakandu jámaati.
13Fariseouechaksï uandaspti:
–T'úri uandakorhexaka: Ka inde isï nómbemesti.
14Jesusi arhiaspti:
–Engani uandantani jaka isïsti, náuejkini uandakorhentani jarhani, jimbokani míteska ji nani jutiski, ka nani niraxamki; ka chájtsï no míteska ji nani jutiski, ka nani niraxamki. 15Chájtsï parhakpeni anapueni eranguntasïnga ambe. Ji nónemani arhimarhesïnga; 16ka engani ambe arhinharhipejka, imanisïni arhijpejka enga isïjka, jimbokani no jandiojkusïni arhijpejka, jucheti Táte jingunisïni arhijpejka, ima engarini axaka. 17Chári juramukuarhu karakata jarhasti eska imasï jukaparharanhaaka engaksï tsimani méntkueni uandantaaka. 18Ka xéchka je, ji máeskia engani uandakorhentani jaka, ka Táte engarini axaka ima máteru uandantstisti.
19Ka kurhamarhesptiksï:
–¿Andi chéti táte nani jarhaski?
Jesusi arhiaspti:
–Chájtsïni no míteska, níjtujtsï jucheti Táteni míte; engajtsïni mítepiringa jíndeni, jucheti Tátenijtujtsï mítepiringa.
20Ísï ambe uandaspti Jesusi Tióstarhu jurhentpeni jatini, jima engaksï k'éjtsïtatarakuecha jápka. Ka nónema jámaspti jupikakuekani, jimboka nótki niaranchasïrempka.
“Chájtsï no úaka jini nirani engani ji nirani jámka”
21Jesusi ménderu fariseouechani arhiaspti:
–Ji niraxamka, ka chájtsïni jirinhantaaka, ka chári k'amanharhintskua jinguntsï uarhiaka. Chájtsï no úaka jini nirani engani ji nirani jámka.
22Judiouechajtuksï támu arhijperaxapti:
–¿O i uándikukorheni eratsexaki? ¿Ka jimbo ísï uandaxaki eskachi no úaka inde jinguni nirani?
23Ka Jesusi arhiaspti:
–Chájtsï ixu kétsekua anapueska, ka ji jini karhakua anapueska; chájtsï íni parhakpeni anapueska, ka ji no íni parhakpeni anapueska. 24Jimboksïnisï arhijka eskajtsï chári k'amanharhitskuechani jinguni uarhiaka; jimboka ekajtsï no jakajkuska eskani Jíska, chári k'amanharhitskuechani jingunijtsï uarhiaka.
25Jimajkanksï arhispti:
–¿T'u néski andi?
Jesusi arhiaspti:
–Sési xéntaparini, nájkichkaksïni uénanitki aiangia andi. 26Uánekua ambe uandakua ka arhinharhikukuaksïni patsachexaka, ka ima engarini axaka imani ambe uandasïndi enga ísïka, ka engani ji parhakpeni anapuechani xáni ambe arhiani jaka, imesti engani imani kurhajchaka.
27Ka imaksï no kurhanguspti eska Tátjemberisï arhiani jápka. 28Jimbosï Jesusi arhiapti:
–Jiájkani engajtsï Acha Uájpani tarhatatini jauakia, míteakajtsï eskani Jíska, ka eskani nómbema juramukorhesïnga úni; imankusïni uandajka engarini Táte jurhendaka. 29Jimboka ima engarini axaka, jíndeni jinguni jarhasti; nórini méni jandiojku jurarkusti, jimbokani ji méntku isï imani ambe úsïnga enga imani sési p'ikuastajka.
30Uánekuaksï jakajkukuspti enga ísï uandapka.
K'amanharhintskueri jántspiricha
31Ka tátsekua Jesusi arhiaspti judiouechani engaksï jakajkukupkia:
–Eka cha méntkisï kurhandirakuska jucheti uandakuani, sési jimbojtsï jucheti jurhengorheriuaka; 32míteakajtsï imani ambe enga ísïka, ka jimbokajtsï míteaka imani ambe enga ísïka, nóteru ambemerijtsï jántspiriuaka.
33Imaksï [fariseuecha] mókuntaspti:
–Jucha Abraniri sïrukueska, ka nónemerichi jántspiriska; ¿Néna jimborisï arhijkia eskachi nóteru némeri jántspiriuakia?
34Jesusi [fariseuechani] arhiaspti:
–Sésiksïnisï arhini jaka eskajtsï iámendu ima engaksï k'amanharhintajka, k'amanharhintskueriksï jántspiristi. 35Jántspiri ma no méntku isï ánchetpirio anapuesïndi; ka enga uájpeuaka, ima k'óru méntkisï imao anapuesïndi. 36Ísï jimbo, engaksïni Uájpa maiampecheska, chájtsï sési jimbo nóteru jántspiriuakia. 37Míteska eskajtsï Abraniri sïrukueska; ka k'órujtsïni uéksïnga atani uándikuni jimbokajtsï jucheti uandakuani no jiókorhesïnga. 38Ji imani ambesïni uandajka engarini Táte jucheti exeraka; chájtu méntkueni imani ambe u je engajtsï chári táteni kurhajchaka.
39Imaksï arhispti:
–¡Abranichkasï juchari táteti!
Ka Jesusi arhiantaspti:
–Engajtsï sési jimbo Abrani uájpepiringa, imentsï jámapiringa. 40K'óru, náuejkiksïni aiangunia engarini Diósï jurhendaka enga ísïka, chájtsïni uéksïnga atani uándikuni. ¡Abrani nómeni ísï jámasti! 41Chájtsï májkueni ambe úsïnga eska chári táte.
Imaksï arhispti:
–¡Jucha no ísku jándi uájpeska; Diósïjkusï Táteti!
42Jesusi arhiaspti:
–Enga sési jimbo Diósï chári tátepiringa, chájtsïni xénhchapiringa, jimbokani ji Diósïri uéjtateska ka imeri jimbo jurhaska, ji no p'itsïkorheska jurhani, Diósïrinisï axati. 43¿Andijtsïnisï no kurhanguchejki? Jimbokajtsï no úsïnga kurhani jucheti uandakuani. 44Chári táte nóambakitisti; chájtsï imeriska, ka jángorhesïngajtsï imani ambe úni enga ima uéjka. Nóambakiti uénani jámantki uandikpitisti. No méni jurhimbekua jingunisti, ka méntkisï chkuándirasïndi. Enga chkuándirajka, imanisï uénhejti enga jatanheka; jimboka chkuándireska ka ima sánderu k'éri chkuadirakuesti. 45Ka chájtsïni no jakajkuchesïnga jimbokani ji imani ambe uandasïnga enga ísïka. 46¿Ne cha ma ísï ua xarhatani eskani ji k'amanharhintstiska? Ka ekani ji imani ambe uandajka enga ísïka, ¿Andijtsïnisï no jakajkuchejki? 47Ne emanga Diósïrika, kurhajtsïtasïndi Diósïri uandakuechani; ka jimbokajtsï cha no Diósïriska, nójtsï uéksïnga kurhani.
Jesusi Abrani jinguni t'uínisptia
48Judiouechaksï arhispti:
Sési jimbochisï arhijka eskari Samaria anapueska ka eskari nóambakitini ma incharhekorhetixaka.
49Jesusi arhiaspti:
–Nóma nóambakitini kámaxaka. Jucheti tátenisïni janhanharhijka ka chájtsïni no janhanharhisïnga. 50Ji no k'érikua jirinhakorhexamka; jarhasti ma enga jirinhajka, ka imasï arhinharhikpejti. 51Sési jimboksïni arhixaka, ne enga kurhandirakuska jucheti uandakuani, no uarhiati.
52Judiouechaksï ménderu arhispti:
–Iásï k'óruchi sánderu sési jánhaskaskia eskari nóambakitini kámaxaka. Abrani, ka iámenduksï Diósïri uandaricha uarhisti, ka t'úri uandasïnga: “Ne enga kurhandirakuska jucheti uandakuani, no uarhiati” 53¿Andi t'u sánderu ambeski eska juchari táte Abrani? Ima uarhisti, ka Diósïri uandarichajtuksï uarhisti. ¿Andirisï xáni sési xékorhki?
54Jesusi arhiaspti:
–Engani ji jandiojku k'éri ukorheaka, jucheti k'érikua nómbemesti. Jucheti Táterinisï k'óru k'éri újti, ima enga cha uandajka eskajtu chári Diósïska 55Enga úka, chájtsï no míteska. Ji míteska; ka ekani no míteni uandapiringa, jíjtuni májkueni chkuándirapiringa eska cha. Ka sési jimbo ji míteska, ka kurhandirakusïnga imeri uandakuani. 56Abrani, chári táte, tsípespti jimboka exepiringa jucheti jurhiani; ka exesti, ka iámu tsípesti.
57Judiouechaksï Jesusini arhispti:
–Nótkiri jamberi tsimani ekuatse ka témbeni jatiriska ¿Ka Abraniniri xéni uandasïnki?
58Jesusi arhiaspti:
–Sési jimboksïni arhixaka eskani ji Abrani jinguni t'uínispkia.
59Jiájkani k'óruksï tsakapu k'arhantaspti k'uaniranksï uékani; ka Jesusi jirikorhespti ka tiósïo uéntaspti; terujkani isï nitamakuaspti uéntani jámani.
Nu geselecteerd:
San Juan 8: BI-PURHE
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Biblia en P´urhépecha, Michoacán, México © Sociedad Bíblica de México, A.C.
