Mt 13

Parabol enn planter

(Mk 4:1-9; Lk 8:4-8)

1Sa mem zour la Zezi sorti deor, li al asiz dan borlamer. 2Enn gran lafoul ti finn antour li; lafoul ti telman gran ki li ti finn bizin mont dan pirog e li asize; lafoul finn res ater dan bor dilo. 3Alor Zezi koz ar zot an parabol, li dir, “Tann sa: enn planter sorti pou al seme; 4letan li seme, enn parti lagrin tom dan bor sime; bann zwazo vini, manz tou. 5Enn lot parti tom dan landrwa inpe ros-ros kot pena boukou later; zot pouse vit-vit parski later ti bien mins. 6Me kan soley tape, zot griye, zot fletri parski zot pa ti ena ase rasinn. 7Enn lot parti tom dan pikan; pikan la monte, grandi e touf zot. 8Enn lot parti tom dan bon later, zot pouse e raport boukou fri, enn raport san, enn lot swasant, enn lot trant. 9Saki ena zorey pou tande, ava tande.”

Kifer Zezi koz an parabol?

10So bann disip vinn ar li e dimann li, “Kifer to koz an parabol?” 11Li reponn zot, “Parski zot, finn donn zot kapasite resevwar don pou konn sekre Rwayom Bondie, me lezot pa finn resevwar sa. 12Parski seki ena, pou gagn ankor plis e li pou gagn plis ki bizin; me seki pena la, mem sa tigit ki li ena, sa osi pou pran ar li. 13Ala kifer mo koz ar zot an parabol, parski zot pe gete san trouve e zot pe ekoute san tande e san konpran. 14Sa parol ki profet Izai ti dir pou zot la, pe akonpli:

‘Zot pou bon ekoute me zot pa pou konpran

zot pou bon gete e zot pa pou trouve.

15parski leker sa pep la finn vinn dir;

zot zorey bouse,

zot finn ferm zot lizie,

pouki zot pa get ar zot lizie,

pouki zot pa ekout ar zot zorey,

pouki zot pa konpran ar zot leker,

e ki zot pa konverti; e mo ti pou geri zot.’

16Me zot, zot bienere, parski zot lizie trouve e zot zorey tande. 17Laverite, mo dir zot, boukou profet ek dimoun ki viv drwat devan Bondie ti anvi trouv seki zot finn trouve, me zot pa finn trouve; e ti anvi tann seki zot finn tande, me zot pa finn tande.”

Zezi explik parabol planter

18“Ekout bien sinifikasion parabol planter. 19Kan kikenn tann koze lor Rwayom Bondie e li pa konpran, diab vini, ras tou saki finn seme dan so leker. Li resanble sa sime kot lagrin finn tonbe la. 20Saki finn seme dan terin ros li resanble sa dimoun letan li tann laparol, toutswit li resevwar li dan lazwa. 21Me pena rasinn dan li e laparol res dan li pou enn ti moman; me ler persekision ek lezot problem vini akoz laparol, so lafwa tom enn sel kout. 22Saki finn seme dan pikan, li resanble sa dimoun ki tann laparol, me bann problem lavi tou lezour, lamour dibien materyel touf tou e li pa raport okenn fri. 23Me saki finn seme dan bon later, li resanble sa dimoun ki tann laparol, konpran li bien e ki raport bann fri; ena raport san, enn lot swasant e enn lot bann trant.”

Parabol move lerb

24Zezi rakont lafoul enn lot parabol: “Kapav konpar Rwayom Bondie ar enn dimoun ki finn sem enn bon lagrin dan so karo; 25me ler tou dimoun pe dormi, enn lennmi vini e sem move lerb dan karo dible la, apre li ale. 26Alor letan bann pie dible pouse e donn bann zepi, move lerb la osi pouse. 27Bann serviter propriyeter vinn dimann li, ‘Met, eski to pa finn sem bon lagrin dan to karo? Kot sa bann move lerb la sorti alor?’ 28Li reponn zot, ‘Enn lennmi ki finn fer sa.’ Bann serviter dir li, ‘Eski to oule ki nou al ras zot?’ 29Li reponn, ‘Non, parski letan zot ras move lerb la, zot kapav derasinn osi bann pie dible. 30Les toulede grandi ansam ziska rekolt; lerla mo pou dimann bann travayer ramas move lerb avan, atas zot ansam, fer bann pake pou bril zot, me ramas dible dan mo grenie.’ ”

Parabol lagrin moutard

31Zezi rakont zot enn lot parabol, li dir, “Rwayom lesiel, parey kouma lagrin moutard ki kikenn pran pou sem dan so karo; 32limem pli tipti lagrin dan tou bann lagrin, me kan li grandi li vinn pli gran touf. Apre li vinn enn pie kot bann zwazo vinn fer zot nik dan so brans.”

Parabol levin

33Li rakont zot enn lot parabol, “Rwayom Lesiel, parey kouma levin ki enn madam pran pou melanz avek trwa goble lafarinn ziska tou lapat la monte.”

Kifer Zezi servi parabol?

(Mk 4:33-34)

34Zezi ti koz an parabol avek lafoul; li pa ti dir nanye san servi parabol. 35Li fer sa pouki parol profet realize:

“Mo pou koz an parabol,

mo pou anons bann kiksoz ki finn res kasiet depi kreasion lemonn.”

Zezi explik parabol move lerb

36Zezi kit lafoul e rant lakaz. So bann disip vinn kot li, e dir li, “Explik nou parabol move lerb dan karo.” 37Li reponn, “Sa dimoun ki sem bon lagrin la limem Garson Limanite. 38Karo la samem lemonn; e bann bon lagrin la zotmem bann zanfan Rwayom Bondie; move lerb reprezant bann zanfan lennmi Bondie, 39sa lennmi ki sem move lerb limem Satan, rekolt reprezant lafin-dimonn, e bann travayer zotmem bann anz. 40Parey kouma nou ramas bann move lerb pou brile, koumsamem li pou ete ler lafin-dimonn arive. 41Garson Limanite pou avoy so bann anz; zot pou ramas tou bann ki finn antrenn lezot dan lemal pou met zot andeor so rwayom e li pou fer parey ar bann ki finn komet lemal. 42Li pou zet zot dan enn gran dife, kot pou ena plore, kriye ek grinsman ledan. 43Lerla, bann ki finn res fidel pou briye kouma lalimier soley dan rwayom zot Papa. Seki ena zorey ava tande.”

Parabol trezor

44“Rwayom lesiel, parey kouma enn trezor ki finn kasiet dan enn karo. Ler kikenn dekouver li, li rekasiet li; li telman kontan ki li vann tou seki li ena e li al aste sa karo la.”

45“Rwayom lesiel, parey kouma enn marsan ki pe rod bann perl rar; 46ler li trouv enn ki ena enn bel valer, li al vann tou seki li ena pou al aste sa perl la.”

Parabol file

47“Rwayom lesiel, parey kouma enn file ki zot avoy dan lamer. File la may tou sort kalite pwason; 48kan li finn bien ranpli, zot amenn li ater, zot asize, zot met bann bon pwason dan enn panie e zet bann seki pa bon. 49Koumsamem li pou ete ler lafin-dimonn arive. Bann anz pou vini, pou separ bann ki move avek bann ki finn res fidel. 50Seki move pou zet zot dan sa gran dife la, kot pou ena boukou plore ek kriye e grinsman ledan.”

Vie ek Nef

51“Eski zot finn konpran tousala?” Zot reponn, “Wi.” 52Lerla li dir zot, “Tou dokter lalwa ki finn vinn disip rwayom lesiel, li kouma enn propriyeter lakaz ki separ dan so trezor saki nef ek saki vie.” 53Ler Zezi fini rakont sa bann parabol la, li kit sa landrwa la, li ale.

Bann dimoun dan Nazaret rezet Zezi

(Mk 6:1-6; Lk 4:16-30)

54Li al dan vilaz kot li ti grandi e li koumans ansegn dimoun dan zot sinagog. Sa bann dimoun la ti etone e zot dir, “Kot li finn gagn sa kalite sazes la? Kouma li kapav fer bel-bel mirak koumsa? 55Pa limem garson sarpantie? So mama, pa Marie? So bann frer pa Zak, Zozef, Simon ek Zida? 56Tou so bann ser pa res isi avek nou? Be kot li finn gagn tou sa pouvwar la, li?” 57Zot refiz aksepte li. Me Zezi dir zot tou, “Enn profet, li onore partou, exsepte dan so prop pei e dan so fami.” 58E li pa ti kapav fer okenn mirak dan sa landrwa la, parski zot lafwa ti feb.

Nu geselecteerd:

Mt 13: NTKM2009

Markering

Deel

Kopiëren