maṯa 8

asa 8

ḏɩŋiriḏa nanu ḏeḏi gwiji gwun gwiṯi ŋilo

mks. 1:40-45, lk. 5:12-16

1gwune nugwulo gi lɩrgwom elo na liji gwujane lutu. 2na gwiji wila lugwun gwun gwiṯi ŋilo, nuiḏi gi jei ganu lugwun nueicɩno, gwele gwi, da ŋa məmɩnyi ŋa məṯi ŋɩma ŋiiŋiri nanu. 3na yecu kuwa ḏi duŋun nudɩmumi nanu nueicɩno, nyi gwəmɩnyu; iŋiriḏi nanu. na cou na ŋilo abɩre lugwun nuiŋir nanu. 4na yecu eicɩno, aṯaŋuməḏɩjo gwiji gwetɩdo no, ŋamɩni ele ŋaŋɩjo gɩsisŋ aŋɩna yuŋa, ŋaḏəḏə eloŋu ŋɩdio ga dino ŋun ŋaŋijaŋalo musa ani liji aŋu.

gaḏam geḏi gwele gweḏi ajana yun yiro ḏuɽi ḏi mamule

lk. 7:1-10

5gwune na yecu ṯɩmi kabranaum na gwele gweḏi ajana yun yiro ḏuɽi di wila lugwun, gwuɽoṯəḏɩlo gworki, 6nueicɩno, gwele gwi, wainy gwi gwo gwiḏɩro dunu gwumɩde ganu mɩdeḏ, gwiṯi ŋwuɽede nanu gworki. 7na yecu eicɩno, nyi gwila gwigele muma. 8na gwele gweḏi ajana yun yiro ḏuɽi di nuwɩrlijo ŋuɽuna nueicɩno, gwele gwi, nyi gwate gwɩḏeleḏo ŋa gwəḏi kwu dunu gwi no, ŋamɩni umə ŋuɽuna mino na wainy gwinyi gwamule. 9gi gwune nyi dino, nyi gwiro gwiji gwun məṯɩnu ŋele, na nyi gwəṯi ajana gi ḏi ḏinyi. na ḏa mieico yeno no, wiḏi, namɩni wele; na ŋiro kaja, ḏa mieicɩno, wila numɩni wila, na ḏa mieico wainya gwi no, arrɩlo ŋeno, namɩni ŋularre. 10gwune na yecu diŋɩni ŋuɽuna ŋeno nuobaga ṯuṯ lugwun, nuluməḏɩjo lun ligwujanɩlo, gwerkwe ganu nyi gweiceijɩno, nyi gwate manbuje gi liji leḏi isreiyil ḏɩməṯo ḏɩbuḏo ḏiro gi gworo kweno no. 11na nyi gweiceijɩno, liji luṯu laje lila kalo gun gaṯɩn anyin abuḏa na gun gaṯɩn anyin bɩɽe, nalajiga ibraimŋale na isak na yagub ŋele ŋeḏi kanyin; 12namɩni nyaɽe nyeḏi ŋele nyalnyiwini kirɩm ge kɩluḏo; na ŋɩnəwei ḏərio gwula ḏaje na ḏiʼino gi jɩŋaḏ. 13na yecu uməḏɩjo gwelɩnya gweḏi ajana yun yiro ḏuɽi di nueicɩno, wiḏi; na ŋiro gi gwune əṯo ḏɩməṯo na ŋaro lugwuŋa. na wainy gwuŋun mule gi sa ceno.

gwunən gweḏi simian gwun gwiro gwa na lun liro kaja lutu lɩmagelini muma

mks. 1:29-34, lk. 4:38-41

14gwune na yecu əḏi kwu dunu gweḏi buṯrus nuaŋu gwunən gwun gwiro gwa gweḏeḏo nanu, aŋɩnu yuŋun yɩbuḏu nanu. 15nuḏɩmumi ḏi ḏuŋun na ŋɩɽainy ete cou, nudiɽi ga nuəpijo ŋɩru. 16gwune na galo ro garage naləpijo liji lun ləṯi ḏiŋeroma lutu. nuldi ḏiŋeroma ŋuɽun ŋe, na liji lun leḏeḏo nanu nulgele muma, 17kani ŋwuṯɩmi ŋuɽuna ŋun ŋuməḏulo nebi gwun gwan isaia ŋarno, ŋu gwimape ḏumə ḏage na məbɩri ŋɩɽainy ŋage.

ḏɩḏeijo ḏeḏi liji lun lar laro calɩmis

lk. 9:57-62

18gwune na yecu aŋu liji lutu luɽeico galo nulḏəḏə ŋuɽuna gwar gwəmuri kɩməmu ge ḏɩrawe ŋun ŋiro kaja. 19na gaṯɩm gete wila lugwun nueicɩno, mualɩm gwi, nyi gwaŋagwujane kalo wei gun gar ganwele. 20na yecu eicɩno, nyəjəɽi nyəṯi gwɩbuɽulo na nyiɽuwə nyeḏi kanyin nyəṯi jɩdio, namɩni ŋaɽe ŋeḏi liji ŋate ŋəṯi gala gunḏɩri lja lugun no. 21na ṯalɩmis ḏiro kaja uməḏɩjo nueicɩno, gwele gwi, dəḏinyi ŋuɽuna nyidare gwerre nyikwuri babaŋ gwi. 22namɩni yecu eicɩno, gwujani, ouwɩricil liji lun laiyo alkwuri gworo gwagin gwun gwaiyo.

yecu gwuḏuḏɩni ḏɩronia nyɩkwom

mks. 4:35-41, lk. 8:22-25

23gwune nuəḏi kwu murkab ganu na calɩmis juŋun gwujane, 24na ḏɩron obɩḏa ḏutu na ŋau upi gworo kəbe nalkɩɽɩbə murkab, na ŋu gwiḏɩro. 25nalwila lugwun, naldiɽio naleicɩno, gwele gweri, abɩrije na ilar lai. 26nuleicɩno, gwudaro gəko nanyaḏonye dino, nyaŋa lun lɩti ḏɩməṯo? nudiɽɩ nugɩreṯɩnya ḏɩronia na ḏɩrawe na ŋau auwɩdeice ga. 27na ləmɩnyo obaŋa ṯuṯ nalarno, iyo kweno gwiro aŋe gəko na ḏɩron na ḏɩrawe əṯeijo gani?

liji lun ləṯi ḏiŋeroma leḏi jɩrgisin

mks. 5:1-20, lk. 8:26-39

28gwune nuwila kɩməmu giro kaja kamɩrɩgen yeḏi lijaḏarin nalobeḏe liji le lɩttən lun ləṯi ḏiŋeroma, liji lituḏi kalo geḏi nil, nalro dri, na dino gwatɩn gwetɩdo gwandare gi ṯaṯ ṯeno no. 29na luŋa nalərəjo gwula nalarno, ga gwar anada ŋa ŋaɽe ŋeḏi elo? ga gwuwiḏi ŋɩne kalo gijɩre ga gwijigwuruṯimɩni a? 30na ŋɩnəwei galo gwola ganu juḏur jijo jutu jiṯi ga. 31na ḏiŋerom ɽoṯəḏɩjo gworki, naleicɩno, da ŋamajidio ouwɩricije anəḏi gi juḏur ganu. 32nuleicɩno, wiḏɩl. naltuḏə naləḏi gi juḏur ganu, na juḏur wei abɩre nalriḏe lɩrgwoma nanu, nalouṯaḏe gi ḏɩrawe nalḏɩrede. 33namɩni laɽa nalabɩre, nalwele kamɩrɩgen, nalumə ŋuɽuna wei ŋun ŋɩwiḏi gi liji lun ləṯi ḏiŋeroma. 34na liji wei leḏi amɩrɩgen tuḏə nalobeḏaṯe yecuŋale, na gwune nalaŋu nalɽoṯeḏe gworki gwele gi diɽil deḏi amɩrɩgen ŋagin.

Nu geselecteerd:

maṯa 8: OTR1966

Markering

Deel

Kopiëren