Lk 20

E ngule njôane Yésus

(Mt 21:23-27; Mk 11:27-33; Lk 2:34-35)

1E wua ya mimôs mite, mbôlô Yésus a mbe a ye'ele'e bôt e *nda Zambe été a a mbe a kate'e mbamba foé, minlô betuni a *beyeme bekalate a bemvendé be nga zu 2a jô na: kate bia ngule fé wo bo mam mete, nge na za a nga ve wo ngule njôan éte' 3A nga yalane be na: ma fe ma ye sili mi nsili. 4Katane ma, e nduane Yôanes ô nga so vé ye yôp ye bôt' 5Ve be nga fas e bebien été na: nge bia yalane na: e yôp, a ye jô na: amu jé mi nga bo te buni nye. 6A nge bia yalane na: E bôt, bôt bese ba ye lume bia *mekok, a ba yeme na Yôanes a mbe *nkulu mejô. 7E nde be nga yalane na be nji yem e vôme nduane te ô nga so. 8Yésus nye be na: Ma fe, me teke kate mia a ngule fé ma bo mam mete.

Nkana beba'ale afube mindik

(Mt 21:33-46; Mk 12:1-12)

9Wôna a nga taté na a kane bôt e *nkana wu na: môt éziñ a nga bé afube mindik, a ve de beba'ale be belane de nté éziñ a a nga kôlô si jé asu ya kandane je ôbe ayap. 10Eyoñe nkolane bibuma, a nga lôme mbo ésaé e be beba'ale afube na be ve nye bibuma bi afube mindik. Ane beba'ale be nga bôm a bulane nye mo zesé. 11A nga lôme mbo ésaé mfe; be nga bôme nye be kpwe'ele nye a bulane nye mo zesé. 12A nga beta lôme nyô lale, be nga balé nye meveñ a titane nye. 13E nde miene afube mindik a nga jô na: Ma ye bo aya? Ma ye lôme mone wom ma dañe nye'e, éko éziñ ba ye semé nye. 14V'éyoñe beba'ale be nga yene nye, be nga fas e zañe jap a jô na: E nye a ne nli'i élik, e ñwôane nye, nalé ate élik ja ye bo énjangan. 15A be nga wua nye afube mindi'i atan a wôé nye. Eyoñe ji miene afube mindik a ye bo be aya' 16A ye so, a bo na beba'ale bete be wôéban, a a ye ve afube mindik e be beba'ale befe.

Eyoñe be nga wô'ô nalé, be nga jô na: jame te daa ye ke boban! 17V'éyoñ a fombôya be, Yésus a nga jô na: E jam é ne ntilane di da tinane ñhe aya:

ako'o belôñ be nga wua fé

e su'ulaneya bo di ôsu, di ya jua'

18Nyô ase a ye ku ako'o te yôp a ye bu'i été, a nyô da ye ku yôp, da ye ko'o nye.

19Minlô betuni a *beyeme bekalate be nga jeñ ane be ne bi nye awolo te ebien, ve be nga ko bôte woñ. Be nga yeme na Yésus a nga kane *nkana te asu dap.

E ñya'ane Sézar Toya

(Mt 22:15-22; Mk 12:13-17)

20Be nga taté na ba ke ba fase Yésus: E nde be nga lôme bebole bôt e mbe bete be mbe be yené'é ane bôte ya buni, asu ya bi nye a jia ya bifia bié a kee nye e be bôte metiñ a e be éjôé ngovina. 21Bôte bete be nga sili nye nsili wu na: A Nye'ele, bia yeme na wo kobô a ye'ele *zôsôô, a na ô ne teke semé ngume môt, ve na wo ye'ele zene Zambe aval ane *zôsôô a né. 22Ye é ne bia nkañesan ye momo na bi ya'ane Sézar *toya' 23Ve Yésus, éyoñ a yemeya mboon akute wop, a nga yalane be na: lita'ane ma e nsañe moné. 24Ô be'e éyeka'a a e ntilane za? Be nga yalane na: E bi bi Sézar. 25E nde a nga jô be na: bula'ane ñhe Sézar e jôm é ne ji Sézar a Zambe e ji é ne ji Zambe. 26Be mbe teke nguleya bi nye a jia ya bifia bié e mise me bôt; ve, mbiban a éyalane jé, be nga tabe bivô.

Besadusieñ a ñwômane miñwuan

(Mt 22:23-33; Mk 12:18-27; 1 Ko 15)

27Bevo'o ya Besadusieñ, e mbe ba yemete na ñwômane miñwuan ô ne momo, be nga subu a sili nye nsili wu na: 28A Nye'ele: avale di e nde Môze a nga bendé bia: nge monyañe môt éziñ a wu, a bili minga ve teke mon, monyañ a ye lu'u minga a biaé monyañe mvoñe bôt. 29Da yené na bobenyañe zamgbwal be nga too. E Ntôl ô nga luk a wu teke mon. 30Ebatan a nyô lale be nga lu'u nkus; 31e nga kui nalé e be be zamgbwa, be nga wu teke li'i *bon. 32E mvuse jap, minga fe a nga wu. 33E ñwômane miñwuan, minga ate a ye bo e nyô za? Amu be zamgbwal be nga lu'u nye. 34Yésus a nga yalane be na: Bone ya zia biyoñe nyô ba nyoñe binga a beyôm, 35ve ba ba ye yené na ba yiane nyoñe ngap e zia biyoñ ja zu a e ñwômane miñwuan ba ye bo teke nyoñ nge binga nge beyôm. 36Ba ye fe bo teke wu, amu ba ye funane beéngele a ba ye bo bone be Zambe, amu be ne bone be ñwômane miñwuan. 37Miñwuan mia wômô, jame te e nde Môze a nga liti ajô ntut, éyoñ a loone Nti e Zambe Abraham, e Zambe Izak, a e Zambe Yakob. 38Ve da yené na: Zambe a nji bo e nyô miñwuan, ve nyô bevevee; amu e mfa'a wé bese be ne bevevee. 39Bevo'o ya *beyeme bekalate be nga yalane na: A Nye'ele, ô yemeya kobô. 40A be nga bo teke fe ayo'o ya beta sili nye nsili éziñ.

Ye Krist a ne mone David'

(Mt 22:41-46; Mk 12:35-47; Yer 23:5-6)

41Yésus a nga jô be na: Be ne jô aya na Krist a ne e Mone David' 42David émien a jô e kalate besam na:

E Nti a nga jô e Nti wom na:

Tabe'e e mbo nnôme wom,

43akekui ma bo besiñe bôé ételé mebo jôé.

44E David a loone nye Nti,

(Krist) a ne bo nye mon aya'

Bijô e be beyeme bekalate

(Mt 23:1-33; Mk 12:38-40)

45Eyoñe te bôte bese be vô'ôlô'ô nye, a nga jô beyé'é bé na: 46Taba'ane *beyeme bekalate ntyee; ba nye'e ba wulu be be'e meyabe bizingi; ba nye'e mebatan e mevôme bôte bese ba sulan, bito y'ôsu e meba me Zambe a bito y'ôsu e bisulan bidi. 47Ba mine menda minkus, ba bo ayabe meye'elane bebadu'u. Ba ye tôban ngum avale *melep ne teke fianga.

Nu geselecteerd:

Lk 20: BDCB

Markering

Deel

Kopiëren