Yoa 5
5
Yésus a yete mbôbôk e Yérusalém
1E mvuse mame mete, e nde abô'ô beyude e nga bo, ane Yésus a nga bet a ke e Yérusalém. 2E Yérusalém valé, e mfa'a ya *mbé mintômba, beta ndame tam a nga too, be lo'one je e nkobô ébre na Bétzéta, é bili beta biyas bitan e mbési, 3vôm ate e nye bizu'u minkôkon bi nga bôô: mindindim, miñyeyem a mimbôbôk, mi mbe mi yange'e na mendim me fô'ôsan; 4amu éngele a mbe a sisik ébata mingum biyoñ a zu fô'ô mendim, a e môt y'ôsu ase a mbe a sisik éyoñe mendim ma fô'ôsan, a nga bo *mvo'é, ja'ane ôkone wé ô mbe z'avale ôkonôô. 5Môt éziñ a mbe valé, a koneya tañe mimbu mewôm melal a muam. 6Eyoñe Yésus a yeneya nye a bôô si, a yemeya fe na a mbili ôkone te ayap, e nde a nga jô nye na: Ye wo kômbô bo *mvo'é' 7Ane nkôkon ô nga yalane Yésus na: A Nti, me nji bi môt a ne bo na, éyoñe mendim ma kumutu, a ke wua ma étam été; éyoñe me ngenan me kelek, môte mfe a viane señesan ma ôsu. 8E nde Yésus a nga jô nye na, kôlô'ô si, nyoñe ôkala wôé ô wulu! 9Ane môt ate a nga bo *mvo'é été été, a nyoñe énoñe jé a wulu. Môs ôte ô mbe môse Sabat. 10Ane Beyude be nga jô môt a nga yete na: Ke den a ne Sabat, ajô te ô nji bi ngule ya be'e énoñe jôé. 11E nde nye k'a nga yalane be na: E môt a te bo ma *mvo'é e nye a te jô me na: Beke'e énoñe jôé ô wuluu. 12Eyoñ éte be nga sili nye na: E môt a te jô wo na: Beke'e ô wuluu a ne za' 13Ve môt a nga saéban a nji yem za a nga saé nye, amu Yésus a nga sôlan, éyoñ abui ndula bôt a sulaneya vôm ate. 14E mvus éte, ane Yésus a nga ke koone nye e *nda Zambe été a jô nye na: O lôô ane ô nto *mvo'é, te ñhe wo beta sem, e jam da lôt nsem e za bi wo. 15Ane môt ate a nga ke, a nga ke a kañete Beyude na Yésus nye a nga bo nye *mvo'é. 16Beyude ki be nga viane feme Yésus, amu na a nga bo mame mete e môse Sabat. 17E nde Yésus a nga yalane be na: Esaa wom a bo ésaé a za'a kui éyoñe ji, a ma fe ma bo ésaé. 18Beyude be nga beta ñhe dañe jeñe jeñ na be wôé nye, amu na, a nji tyame ve atiñe Sabat étam, a tu'aya fe beta jô na Zambe a ne Esaa wé, a nga bo émien a Zambe nté nkôñe wua.
Ngulenjôane Mon
19Ane Yésus a nga yalan a jô be na: Bebela, bebela émien, ma kate mia na, Mon a se ngule ya bo a nye émien e jôm a nji yen Esaa a bo'ok; amu na e mam Esaa a bo, Mon a bo fe me avale da. 20Amu na Esaa *a nye'e Mon a liti fe nye e mame mese a bo, a ye fe liti liti nye e mame ma dañe mana, na mia bebien mi bo fe'e ne vema. 21Aval ane Esaa a wômôlô mimbim a ve ényiñ, avale te fe Mon a ve ényiñ e be môt ase a kômbô ve. 22Esaa a nji ve môt éziñ mekua, amu a nga ve Mon ngul ya tyik ajô ese, 23e nde bôte bese ba ve Mon ôlu'u be va'a fe Esaa ôlu'u avale da; e môt a nji ve Mon ôlu'u a ne fe teke ve Esaa a nga lôme nye ôlu'u. 24Bebela, bebela émien, ma jô mia na e môt a wô'ô mejô mam a buni fe e Nyô a nga lôme ma, môt ate a mbili ényiñe ya melu mese, a nji zu vôm ya ntyi'ane mejô, amu a lôteya a kôlô'ô awu a kui ényiñ. 25Bebela, bebela émien, ma jô mia na, awolo da zu, e soya ke so, éyoñe mimbim mia ye wô'ô tyiñe Mone Zambe, e bôte ba ye wô'ô je mbe ba ye nyiñ. 26Aval Esaa a bili ényiñ e be émien, avale te fe a nga ve Mone na nye fe a bi ényiñ e be émien. 27E nde fe a nga ve nye ngul éjôé ya tyi'i mejô, amu na a ne Mone Môt. 28Te mia vembe jame te, amu awolo da zu, awolo bôte bese be ne e mesoñ ba ya wô'ô tyiñe jé; 29bevok, e ba be nga bo mbamba be mam, ba ye wômô a nyoñ ényiñ, e ba bevok, e ba be nga bo mbia be mam, ba ye wômô a nyoñe mekua. 30Me nji bi ngule ya bo jam éziñ a mamien étam; avale ma wôk, e nde ma tyik, a ntyi'ane wom ô ne *zôsôô, amu me nji jeñ nkômbane wom, ma jeñ ve nkômbane môt a nga lôme ma.
Bengaa ba tyi'i mva'a ajô Yésus
31Nge ma tyi'i mamiene mva'a, e mva'a ma tyik a nji bo bebela. 32Môte mfe e nye a tyi'i mva'a ya be ma, a ma yeme na e mva'a a tyi'i ma a ne fo'o bebela. 33Mia bebien mi nga lôme bôt e be Yôanes, ane a nga tyi'i mva'a ntyi'ane bebela. 34E mva'a ma tyik, me nji nyoñe nye e be môta binam, ve ma kobô mame ma na mi bi ényiñ. 35E môt ôsu a mbe lambe a yôñ e va'a fe éfufup, ve mi nga kômbô vak a éfufub jé ve mon étun éyoñ. 36Ve me ki me bili nkañetan wo dañ wu Yôanes: amu mingume mi mam Esaa wom a nga ve me na me bo, e mame ma bo mete e me ma liti na Tate a nga lôme ma. 37A Esaa wom a nga lôme ma e nye a tyi'i mva'a ya be ma. Ve teke'e éyoñ éziñ mi nga kômbô vô'ôlô tyiñe jé nge yene kik e mam a liti, 38a mi nji bi mejô mé me too mia e minlem été, amu na, e nlômane wé a nga lôm, mia bebien mi nga ben mi buni'i wô. 39Mia ke mia fas Mintilan, amu mia bebiene mia yene na, ényiñe ya melu mese, mi ne nyoñ je été; a Mintilane mite mibien, mia bo'olô ajô dam. 40Ve mia ben mi za'a be ma na mi bi ényiñ. 41Me nji nyoñe duma éziñ e be bôt; 42ve ma yeme mia, mi nji bi nye'ane Zambe e minlem. 43Me nga so a jôé Esaa wom, e nde mia bene nyoñe ma; nge môte mfe a ke ñhe so a jôé dé émien, nyuli ate e nye mia ye nyoñ. 44Mi ne ngul ya buni aya, mia mia yeme nyoñe ve duma da so e zañe jenan, ve duma da so e be Zambe étam kik, mi te jeñe de' 45Te mia simesane na ma ma ye somane mia e be Tate; Môze nye a ye somane mia, e Môze mi too nye ndi. 46Amu na, nge mi to fo'o buni Môze, nge mia buni fe ma; amu a nga tili e mame ma tinane ma. 47Nge mi nji buni e mam a nga tili, e mame ma kobô, mia ye buni me aya'
Nu geselecteerd:
Yoa 5: BDCB
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Bible en langue Bulu © L'Alliance Biblique du Cameroun, 2007, 2015.
