Yoa 3
3
Yésus baa Nikôdém
1Môt éziñ a nga too e nsamba Befarizieñ, njôô Beyude, a too jôé na Nikôdem. 2E nde môt ate a nga ke e be Yésus a alu a jô nye na: A Rabbi, bi yemeya na ô ne ñye'ele bôt, ô nga so e be Zambe; amu teke môt éziñ a ne bo bitua bi mam wo bo, nge Zambe a se ke be nye. 3Ane Yésus a nga nyoñe nkobô a jô nye na: Bebela, bebela émien, ma kate wo na, nge môt teke bialé mfefé, a se ngul ya yen Ejôé Zambe. 4E nde Nikôdem a jôô nye na: Môt a ne beta bialé aya éyoñ a nto nnôm? Ye na a bulane ke nyiin abume be nyia, éyoñe te a beta bialé' 5Ane Yésus a nga yalane na: Bebela, bebela émien, me ma kate wo na, nge môte teke bialé a mendim a Nsisim, a se ngule ya nyiin Ejôé Zambe; 6e jôme ja bialé a minsôn é ne minsôn, a e jôme ja bialé a Nsisim é ne nsisim; 7te wo vembe amu ma jô wo na: Mia yiane bialé mfefé. 8Evuñulu ja vuñ mfa'a ja kômbô, wo wô'ô je éduñ, ve ô nji yem e mfa'a ja so, nge mfa'a ja ke; avale té fe e né a môt ase a bialé a Nsisim. 9E nde Nikôdem a nga yalan a jô nye na: Mame mete me ne boban aval avé' 10Ane Yésus ki a nga yalan a jô nye na: E wo ô ne ñye'ele ya Israél, ye wo yiane dimi mame mete' 11Bebela, bebela émien, ma jô wo na bia kobô ajô bia yem, a bia bo'olô e jôme bi nga yen, ve jame bia kañete mi nji kômbô nyoñe de. 12Eyoñ ma kate mia mame ya si ndôn, mi teke yebe, mia ye buni aya nge ma kate mia mam ya yôp' 13Teke'e môt éziñ a nga tameya bet e yôp, fo'o ve nyô a nga so yôb a suse si nye a ne Mone Môt. 14Aval ane Môze a nga tyelé nyo mvot akône nlinga yôb e fé été, avale te fe Mone Môt a yiane tyeléban e yôp 15na, e môt ase a buni nye, a bi ényiñe ya nnôm éto. 16Amu Zambe a nga dañ nye'e *si nyô, nde a nga ve atyi'i Mone dé, ajô te e môt ase a buni nye, a ne teke jañ, ve bi ényiñ ya nnôm éto. 17Amu na Zambe a nji lôme Mon wé *si nyô amu na a tyi'i *si nyô mejô, ve na si ndôn é bi ényiñ amu Mon. 18E môt a buni Mon a ne teke ajô; ve nyô ki a nji buni, nye ajô dé e tyi'iya, amu a nji buni jôé atyi'i Mone Zambe. 19Ntyi'an ajô ô ne na, éfufub é nga zu e si ndôn, ane bôte be nga viane nye'e dibi alôt éfufub; amu mimboone miab mi mbe *abé. 20Amu na e môt a bo mbia be mam a nji nye'e éfufup, a teke ke mfa'a éfufub é né, amu mimboone mié mi za kulan. 21Ve môte ki a bo mame bebela, e nye a ke éfufup, mimboone mié mi yenéé na mi nga boban e be Zambe.
Yésus baa Yôanes Babtist
(Yôa 1:19-24)
22E mvuse ya valé, ane Yésus baa beyé'é bé be nga ke e si ya Yudé, a ntoo wé, baa be be, a du bôt. 23Yôanes fe a mbe a du bôt e mendime me Ayinôn, bebé a Salim, amu mendim me mbe abui valé; bôte be nga zu ñhe a duban. 24Eyoñe te be ngenane te wua Yôanes e *nda mimbôk. 25Ane nsañetane nkobô éziñ a nga boban ajô ntunan e zañe beyé'é be Yôanes a mone Yude éziñ. 26E nde ñhe be nga ke e be Yôanes a jô nye na: A Rabbi, e môt mia nye mi mbe e kindi'i Yordane yat, e nyô ô nga kañete ajô dé, ke nye a nga du bôte nyô, a bôte bese ba mane ke e be nye. 27Ane Yôanes a nga yalan a jô na: Môt a se ngul ya nyoñe jôme si jôme kala éziñ, nge é nji bo nye mveane ya yôp. 28Miabebien mi ne ma bengaa ane me nga jô na, sake ma me ne Krist, ve na, me me ne nye *nlôman ôsu. 29E môt a bili mbom, e nye a ne nnôm; ve môt a ne mvôé ki, a tebe nye fefe, a wô'ô ane a kobô, a fônôk, amu a wô'ô *tyiñ nlu'u minga. E nde meva'a mame mete me nto njalan. 30Nye a yiane nenenen, ve me ki ma yiane wulanwulan si.
E nyô a so e yôp
31E nyô a so yôb a ne bôte bese e nlô yôp; e nyô a so e si a ne jôme ya si, a kobô fe mame ya si; ve nyô a so e yôp a ne bôte bese e nlô yôp; 32e jam a nga yen a wôk nde ete, a kañete ane ngaa y'été, ve teke môt a kañese nyoñe nkañetane wé. 33E môt a nyoñ e mva'a a tyik a kpwelé ndeme ya na Zambe a ne bebela. 34E nyô Zambe a nga lôm a kobô mejô me Zambe, amu Zambe a ve nye Nsisim teke vek. 35Esaa *a nye'e Mon, e nde fe a nga ve nye mame mese e wo été. 36E môt a buni Mon, a bili ényiñe ya melu mese; e nyô ki a nji buni Mon, aa vo'o yen ényiñ, ve ayaa Zambe da kôm éto e be nye.
Nu geselecteerd:
Yoa 3: BDCB
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Bible en langue Bulu © L'Alliance Biblique du Cameroun, 2007, 2015.
