मत्ती 7
7
ल्हो-ल्होत दोस् थल्हइतीउ
(लुका ६:३७-३८,४१-४२)
1येसुचे सुङ्जेत्ज्यी, “ल्हो-ल्होत दोस् थल्हइतीउ, होत्तज्यीम् पर्मेस्वर्चे एत दोस् ल्हइतीजेत्स्ये अरे। 2तलेपङ्सम् एङ्यीमाचे र्होत खले दोस् ल्हइतीज्यी, होलेनो पर्मेस्वर्चे एङ्यीमात दोस् ल्हइतीजेत्स्ये मुब। एङ्यीमाचे ताचे दप्ज्यीम् र्होत पीन्ब, हुजुचेनो दप्ज्यीम् एङ्यीमाचे यङ्स्ये मुब। 3खले एचे ल्हो-ल्होइ गोरी स्येत् ब्रब म्रङ्ब, तर र्हङ्की गोरी मइ ब्रब खले अम्रङ्ब? 4एचे र्हङ्की गोरी मइ ब्रब अम्रङ्सम् खले पङ्खम्ब, ‘खइ अले, एइ गोरी ब्रबे स्येत् दुत्लागे?’ 5एङ्यी कपटीमा! ङोन्ग्यम् र्हङ्की गोरी मुबे मइत ल्हब्लाको ओसेम् अलेइ गोरी मुबे स्येत् दुत्ज्यीम् ख्लाब खम्स्ये मुब।
6“पबीत्र स्य्हे नीकीमात थपीनो, पीन्ज्यी पङ्सम् हुजु नीकीचे दोःज्यीम् एङ्यीमात ख्रप्स्ये मुब। ओसेम् एङ्यीमाकी मोती तीलीमा#७:६ तीलीमा यहुदीमाचे तीलीमात नइबतेङ् असुद्द म्हेन्ब।की ङोन्री थख्लागो, अय्हीन् पङ्सम् हुजु तीलीमाचे मोतीमात कङ्चे प्लेलास्ये मुब।
र्हीतो, म्हइगो ओसेम् डोङ्-डोङ् लउ
(लुका ११:९-१३)
7“र्हीतो एङ्यीमात न्हङ्स्ये मुब, म्हयो एङ्यीमाचे यङ्स्ये मुब, ओसेम् डोङ्-डोङ् लउ एङ्यीमाकी लागीरी म्रप् ठोङ्जेत्स्ये मुब। 8तलेपङ्सम् खल्चे र्हीत्ज्यी, थेत न्हङ्स्ये मुब, खल्चे म्हइज्यी, थेचे यङ्स्ये मुब, ओसेम् खल्चे डोङ्-डोङ् लज्यी, थेइ लागीरी म्रप् ठोङ्जेत्स्ये मुब। 9एङ्यीमा न्हङ्री खल्त पङ्लेनो र्हङ्की जचे ग्येङ् र्हीत्सम् युङ्ब पीन्बो स्यीम्? 10ओसेम् तर्ङ र्हीत्सम् पुख्री पीन्ब? 11एङ्यीमा पापी तज्यीमएनो र्हङ्की ज-जमेमात ज्यबे स्य्हेमा पीन्ब स्येब पङ्सम् एङ्यीमाकी स्वर्गरी मुबे अपचे थेङ्त र्हीत्पलमात झेन् गत्ते य्हक्को न्हङ्जेत्स्ये मुब।
12“ल्हो-ल्हो म्हीमाचे एङ्यीमाकी लागीरी ता स्य्हेङ्पीन्खइ म्हेन्ज्यी, होलेनो एङ्यीमाचेएनो ल्हो-ल्हो म्हीमात स्य्हेङो। तलेपङ्सम् चुनो पर्मेस्वर्की नीयम्तेङ् अगम्बक्तमाचे लोप्पे तम्मा य्हीन्ब।
ज्यीद ग्यम्तेङ् ङ्हच्छ्यङ् ग्यम्
(लुका १३:२४)
13“ज्यीद म्रप्चे न्हङ्री वङो, तलेपङ्सम् नर्करी वङ्बे म्रप् ङ्हच्छ्यङ्तेङ् देबल तब। ओसेम् हुजु ग्यम्से न्हङ्री वङ्बलमा य्हक्को तब। 14तर खेमेएनो अबेबे जीवन यङ्बे ग्लारी वङ्बे म्रप् ज्यीत ओसेम् ग्यम् अदेबल तब। ओसेम् चु ग्यम् यङ्बलमामी चेक्कीनो तब।
दोङ्बोतेङ् दोङ्बोइ रोःरो
(लुका ६:४३-४४; १३:२५-२७)
15“भ्यु पङ्बे अगम्बक्तमा ग्यम्से होसीयार्ले टीउ। थेङ्यीमा ग्युकी ल्हीःरी खब, तर न्हङ्पट्टीचेम् लोङ्बे फरामा र्हङ्ब तब। 16एङ्यीमाचे थेङ्यीमाकी लक् ग्यम्सेनो थेङ्यीमात स्येस्ये मुब। म्हङ् पुजुइ दोङ्बोचे अम्बरु रोब? ओसेम् पानइ दोङ्बोचे स्याउ रोब स्यीम्? 17ज्यबे दोङ्बोरी ज्यबे रोरोनो रोब। तर अज्यबे दोङ्बोचे अज्यबे रोरोनो रोब। 18ज्यबे दोङ्बोचे अज्यबे रोरो रोब अखम्, ओसेम् अज्यबे दोङ्बोचे ज्यबे रोरो रोब अखम्। 19ओसेम् ज्यबे रोरो अरोबे दोङ्बोमा जम्मत थाज्यीम् मेरी युलास्ये मुब। 20होलेनो भ्यु पङ्बे अगम्बक्तमात थेङ्यीमाकी लक् ग्यम्सेनो एङ्यीमाचे स्येस्ये मुब।
21“ओसेम् ङत ‘प्रभु, प्रभु’ पङ्बलमा जम्मनो स्वर्गइ य्हुल्री वङ्म्यङ्स्ये अरे। तर स्वर्गरी स्य्हुबे ङइ अपइ थुः अनुसार लक् स्य्हेङ्बे म्हीमाकीनो स्वर्गइ य्हुल्री वङ्म्यङ्स्ये मुब। 22न्यायकी दीन्री य्हक्को म्हीमाचे ङत चोले पङ्स्ये मुब, ‘प्रभु, प्रभु, ङ्यीमाचे थेङ्की छेन्री अगम्बानी अपङो स्यीम्? ओसेम् थेङ्की छेन्री म्हङ्माएनो अल्हबो स्यीम्? ओसेम् थेङ्की छेन्री तेङेन्की लक्माएनो य्हक्को अस्य्हेङो स्यीम्?’ 23हुजु बेलोरी ङ थेङ्यीमात पङ्स्ये मुब, ‘एङ्यीमा दुस्ट म्हीमा, एङ्यीमात ङचे खेमेएनो स्येबल अरे। एङ्यीमा ङ ग्यम्से थारीङ् य्हरो!’
थो ङ्य्हीइ दीम्
(लुका ६:४७-४९)
24“होत्तज्यीम् खल्चे ङचे पङ्बे तम् ङ्येन्ज्यीम् हुजु र्हङ्ले ब्रब हुजु म्हीम् र्हङ्की दीम्की जग् कोङ्बे युङ्ब जोरी स्य्हेङ्बे बुद्दी मुबे म्ही र्हङ्ब य्हीन्ब। 25नम् युज्यीम् भल् युज्यी, ओसेम् लाबलुङ् खज्यीम् हुजु दीम्त प्रुङ्ज्यी, तर हुजु दीम् अफुप्। तलेपङ्सम् हुजु दीम्की जग् युङ्ब जोरी युबल मुबल। 26तर खल्चे ङचे पङ्बे तम् ङ्येन्ज्यीमएनो हुजु र्हङ्ले अब्र, हुजु म्हीम् र्हङ्की दीम् बलुव जोरी स्य्हेङ्बे मुर्ख म्ही र्हङ्ब य्हीन्ब। 27ओसेम् नम् युज्यीम् भल् युज्यी, ओसेम् लाबलुङ् खज्यीम् हुजु दीम्त प्रुङ्ज्यी। ओसेम् हुजु दीम् फुप्ज्यीम् नास् तज्यी।”
28येसुचे डबमात चोले लोप्जेत्पल थ्येःब बीसेम् य्हक्को म्हीमा तेङेन् तज्यी। 29तलेपङ्सम् थेङ्चे धर्म लोप्पोन्माचे र्हङ्ले अय्हीन्, तर अधीकार् लज्यीम् लोप्जेत्प मुबल।
Nu geselecteerd:
मत्ती 7: WTDG
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2024 (Active), Wycliffe Bible Translators, Inc. All rights reserved.
