Génesis 4
4
Caín yéetel Abel
1Le j xiibo' tu nupajubáa yéetel x Eva u yatan, leti'e' x yo'omchaji ca tu síijsaj u paal, lela' tu kaaba'intaj Caín,#4.1 Caín bey cu kaaba'intilac u yáax paal Adan yéetel Eva; le kaaba'a' u káat u ya'ale' U kuchul yantal. ca tu ya'alaj: Yaan teen jun túul in j xibil paal, Yuumtzil j dzaab teen. 2Cu dzo'ocole' tu síijsaj Abel u yíidzin Caín. Abele' tu dzajubáa u tzéent j tamano'ob, Caine' tu dzajubáa u meyajt le lu'umo'.
3J máan le kiino'obo'. Jun p'éel u kiinile' Caine' tu bisaj jun p'éel ti'ibil óolal, u yich u paakal u ti'al u kub ti' Yuumtzil. 4Bey xan Abel tu bisaj ti' Yuumtzil u asab ma'alobil u yáax paal u x tamano'ob. Yuumtzile' tu kamaj yéetel utzil óolal Abel bey xan u ti'ibil óolal, 5Ba'ale' ma' bey ka'amic Caín mix u ti'ibil óolali'; let o'olale' Caine' sen kuuxilnaji ca j dzíicchaj u táan yich. 6Yuumtzil túune' tu ya'alaj ti': ¿Ba'ax teen ca p'u'ujul yéetel ca dzíiccuntic u táan a wich? 7Wa ca beet ba'al utze', je'el u páajtal a líiksic a wiche'; ba'ale' tu yo'olal ma' ta beetique', le kebano' táan u pa'atic u súutuquil u ti'al u t'ona'ancuntiquech. Tu jaajile' teche' je'el u páajtal a t'ona'ancuntic lo'obale'.
8Jun p'éel u kiinile', Caine' tu ya'alaj ti' Abel u yíidzin, co'ox j xíimbal; le ca j kucho'ob tu ca'a túulalo'ob te j káaxo', Caine' tu pulajubáa u beet loob ti' Abel u yíidzin, ca tu quíimsaj. 9Yuumtzil túune' tu káatchi'itaj ti' Caín:
¿Tu'ux yaan Abel a wíidzin? Caine' tu núucaj:
Ma' in wojeli'. ¿Teen wa u najmal in canantic?
10Yuumtzile' tu ya'alaj ti':
¿Ba'ax teen ta beetaj le looba'? U ki'ikel a wíidzin le dzo'oc a wequic yóokol le lu'umo', awatbil u káatic ca in beet ba'ax no'oja'an. 11Let o'olale' loolob t'anta'an yanilech, tojolch'inta'an yanilech ti' le lu'um tu dzu'udzaj u ki'ikel a wíidzin ta quíimsajo'. 12Quex ca a meyajt le lu'umo' ma' bíin u dzáa teech tu ca'a téen u yichi'. Yaan a p'áatal chéen máanel a ca'aj yóokolcaab, mix bikin xan bíin yanactech je'elel.
13Ca túun tu núucaj Caín ti' Yuumtzil:
Tene' ma' tu páajtal in mukyajtic jun p'éel jaadz sen nojoch beyo'. 14Bejela'e' dzo'oc a tojolch'intiquen ti' le lu'uma', yaan in máan yóokolcaab chéen mina'an u jaajil, náach ti' teech; mix bikin bíin páatac in je'elel. Tu jaajile' je'el máaxac ca yilene' cu quíimsiquen.
15Ba'ale' Yuumtzile' tu núucaj ti':
Wa ca quíimsa'aquech tumen wa máaxe', yaan u sen ja'adzal.
Yuumtzil túune' tu dzaj jun p'éel chíicul tu wíinclil Caín, u ti'al beyo' ma' u quíimsa'al tumen je'el máaxac nactáatique'. 16Caine' j luk t j cúuchil tu'ux t'aanaj yéetel Yuumtzil, ca j cuxlaj chéen máanel u ca'aj tu lakin Edén.
U ch'i'ilancab Caín
17Caine' tu nupajubáa yéetel u yatan leti' túune' x yo'omchaji ca tu síijsaj Enoc. Cu dzo'ocole' Caine' tu líiksaj jun p'éel nojoch caaj ca tu dzaj u kaaba'int Enoc, je'el bix u kaaba' u paale'. 18Enoque' u taata ca'ach Irad, Irade' u taata ca'ach Mehujael, Mehujaele' u taata ca'ach Lamec. 19Lameque' yanchaj ca'a túul u yatan, jun túule' tu kaaba'intaj x Ada u láake' x Zila. 20X Adae' tu síijsaj Jabal, u láaktzil máaxo'ob caja'ano'ob ti' chuybil najo'ob, cu tzéentico'ob wacaxo'ob ca'ach xan. 21Jabale' yanchaj jun túul u yíidzin tu kaaba'intaj Jubal, u láaktzil le máaxo'ob cu paxico'ob arpa bey xan le cu paxico'ob flautao'. 22X Zila xane' tu síijsaj Tubal-caín máax cu meyaj ca'ach ti' u beet máascab, cu beetic ca'ach nu'uculo'ob bronce u ca'aj, bey xan le fierro u ca'aj. Tubal-caine' yanchaj jun túul u yíidzin tu kaaba'intaj x Naama.
23Jun p'éel kiine' Lameque' tu ya'alaj ti' x Ada yéetel ti' x Zila u yatano'ob:
U'uye'ex ma'alob ba'ax quin in wa'ale':
Wa jun túul wíinic cu loobiltiquene',
quin ko'oko'olic,
wa jun túul j xi'ipal cu ko'okoliquene', quin quíimsic.
24Wa le máax bíin quíimsic Caín
yaan u sen ja'adzale',
tin wo'olale' yaan u sen babal ja'adzal.
U yóox túul paal Adán yéetel x Eva
25Adane' tu nupajubáa yéetel u yatan, leti'e' yanchaj jun túul u yaal ca tu dzaj u kaaba'int Set,#4.25 Set u kaaba' u yíidzin Caín, le kaaba'a' u káat u ya'al: u jeelintaj, tumen j dza'ab tumen Ku u ti'al u jeelint Abel. tumen tu ya'alaj: Kue' dzo'oc u dzáic ti' teen u láak paal u jeelint Abel le máax quíimsa'ab tumen Caine'.
26Set xane' yanchaj jun túul u paal, lela' tu dzaj u kaaba'int Enos. Ti' le kiino'oba' jo'op' u ch'a'achi'ita'al u kaaba' Yuumtzil.
Nu geselecteerd:
Génesis 4: MAYABI
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Texto Maya © Sociedades Bíblicas Unidas, 1992
