Matìyò 8
8
Yeso ghù wə̀d àwàrikə̀m
(Mag 1:40-45; Lug 5:12-16)
1Anyumə̀ ne Yeso ya swiʼi ikaŋ iwum, tinɔ̰ bəd mɔ̀ʼɔ ya beni abɔ̀ʼ məd. 2Wə̀d àwàrikə̀m#8:2 aghɔn azo̰ ya ghìyə̀ mbi se nḛ̀ wə̀d gha chəyi wì zḛ icheg ne mə̀nɔ̀ʼɔ̀ Muse kəbi. mɔ̀ʼɔ ya yeʼe pè gɔ̀m itog inwḭ aseg ibo imbìghè ghà ibo gha, “Anɔŋisəg, àghò mə kɔ̀ŋ, àghò ghiyə aghɔn azo̰ ne yaʼi igun inum ze meghe, mə zen.”
3Yeso ya sèmì abo bètì aməd ywìtì ibo gha, “È! Mə kɔ̀ŋ. Àghò zen!” Kwàʼ ati, àwàrikə̀m ze ya mèg igun wə̀d we, wì bə zen. 4Yeso ya si ghà ibo gha, “Nḛ, imbə̀ʼ àghò gha awe anug ne du abə wə̀d mɔ̀ʼɔ. ndò chwi ìwe nyɔd yaʼ abə wə̀d mbàn Ŋwiye. Àghò bə nàʼ ighi mbe ne Muse ya gha gha bəd mənyìʼ ya nàʼà ni chwi aneni gha àwàrikə̀m fə mèg igun ine.”
Ibḛfiŋ ìwi atog wə̀d igun mə̀sogyì iki
(Lug 7:1-10)
5Anyumə̀ ne Yeso ya nyi inga Kàpenàwum, atog wə̀d igun mə̀sogyì iki ya ghò ni gha Yeso wete aməd. 6Wì ya gha, “Anɔŋisəg, ìmə wə̀d àfàʼì ne buʼrə we inga nəb zə̰ ngəʼ.”
7Yeso ya ghà ibo gha, “Mə biri yeʼe ghù aməd?”
8Atog wə̀d igun mə̀sogyì we ya ywìtì gha, “Anɔŋisəg, chəyi mə̀ koʼi ane wə̀d ne tì àghò yèʼe inum inga achan. Ane, àghò ghami ghami wən, ìmə wə̀d àfàʼì biri bɔti. 9Aton ya gha, mo inum ya wə̀d ne yaʼi aton wə̀d kyen. Mo ya bə̀ atog wə̀d abə mə̀sogyì. Mə mə̀ ghà abə ìwi mɔ̀ʼɔ gha, ‹Ndò!› Wì ya ghò. Mə mə̀ ghà abə ìwi ndəŋ gha, ‹Yeʼe!› Wì ya yèʼe. Mə mə̀ ghà abə wə̀d àfàʼì gha, ‹Ghiyə anìŋ!› Wì ya ghìyə̀.”
10Anyumə̀ ne Yeso ya zughi anug azo̰, anug ya chè aməd, wì si ghà abə bəd ne yaya bène abɔ̀ʼ məd gha, “Mə ghà tesiʼ inən; chəyi mə̀ kiri bari wə̀d mɔ̀ʼɔ inga Izre ne beri iku ibḛfiŋ gho̰. 11Mə ya anìŋ ghà inən gha, bəd ndan ndàn biri nɔʼ inga isiŋi mbe ne yaʼi aba isəg ze ne nyùmə̀ we dùwə̀ fɔrɔ aba isəg ze ne nyùmə̀ we fḛ, yèʼe niŋ ìmbɔb iti, jəg iteri inga anug ìfɔ̀n tikaŋ tì Abràham tì Azìg fɔrɔ Jàkɔb. 12Si ya gha, mbi biri chì bəd mbe ne beri anug ìfɔ̀n ikaŋ ghò màʼ isəg inga afub, asiŋi ne mbi biri ya dèghè kùrə asɔŋ.” 13Anyumə̀ ne Yeso ya ghàmi ane, wì ya si ghà abə atog wə̀d igun mə̀sogyì we gha, “Àghò gho! Ze yaʼ kwàʼ icheg ne àghò bḛ.” Bə̀ kwàʼ anyumə̀ we, wə̀d àfàʼì we ya bɔti.
Yeso ghù bəd nɔʼ nɔʼ
(Mag 1:29-34; Lug 4:38-41)
14Anyumə̀ ne Yeso ya yeʼe pè nyi inga nəb ìzi Pità, wì ya bàd nyɔ ìwi Pità wì yaʼi igun abaʼ, nyɔd kɔʼɔ̀. 15Yeso ya bètì abo abə àyi we, nyɔd kɔʼi we mèg. Àyi we si nɔ̀ʼ nàʼ ighijəg ibo.
16Anyumə̀ ikwìri, mbi ya niŋ bəd ndan ndàn ne izwighi tibɔ̀ŋ ya yaʼi inga inɔb yèʼe abə Yeso. Wì ya kamni izwighi tibɔ̀ŋ mbe ane ìngam ichug məd, bə̀ ghù bəd məjìm ne yaya ghɔ̰̀. 17Inug mbo̰ ijìm ya dù ane tesiʼ kwàʼ icheg ne wə̀dkə̀n Ŋwiye Àzayà ya fə gha gha:
“Məd fə niŋ ìmba inug tibɔ̀ŋ
bə̀ ghù ìmba ighɔn ijìm.”#8:17 Ngam gho̰ yaʼ inga Àŋwàʼrì Isaiah 53:4
Anug ni beni abɔ̀ʼ Yeso
(Lug 9:57-62)
18Anyumə̀ ne Yeso ya bàri inɔ̰ bəd ne ya kari aməd chuʼ, wì ya ghà abə mə̀mə̀nənùg məd gha mbe bani atəŋ ghò injḭ igyi ìywin. 19Icheg ne wì ya gha ane, àchwitì mə̀nɔ̀ʼɔ̀ mɔ̀ʼɔ ya ghò ghà ibo gha, “Àchwitìnùg, asiŋi ne àghò we ghò, mə biri beni abɔ̀ʼ ine.”
20Yeso ya ywìtì gha, “Ìchɔb bèrì ìmbɔb isiŋi chughi, tìnən bə̀ bèrì ìtɔb kàn, àsi Ŋwan Wə̀d, chəyi wì beri achan.”
21Àmə̀nənùg mɔ̀ʼɔ ya bə̀ ghà ibo gha, “Anɔŋisəg, àghò saŋa mə̀ bi ghò twə̀ŋi ìmə mbaʼ.”
22Yeso ya ywìtì ibo gha, “Àghò beni abɔ̀ʼ inum sàŋì bəd ne fə ku mbe twəŋi ìmbɔb iwu bəd.”
Yeso ghì afim sɔbɔ
(Mag 4:35-41; Lug 8:22-25)
23Yeso ya ghàm ane nɔ̀ʼ nyi inga abaŋ igyi. Mə̀mə̀nənùg məd ya beni abɔ̀ʼ məd. 24Mbi ŋa zə̰, afim ka ka ko se chè, àwàwà ka ka bə̀ ko se chìʼrè atəŋ kyen ze. Àzɔb abaŋ igyi yaya se kə̀bə̀ ni nyi aton igyi, ne Yeso yaya gwḛ yi. 25Mə̀mə̀nənùg məd ya ghò nɔ̀ aməd ghà ibo gha, “Anɔŋisəg, nɔ̀ʼɔ pùmni awa! Tì ya anìŋ kùyə!”
26Yeso ya nɔ̀ʼ ywìtì inɔb gha, “Mbə̰ ya kwàʼ bəd ne ibḛfiŋ kə! Mbə̀ kə bɔ aghə?” Wì ya ghàm ane, si nɔ̀ʼ kyen abə afim fɔrɔ àwàwà ze. Isiŋi ya si nyi bɔd gwèd.
27Anug ya chè mbaŋà te. Mbi ya se bìre mbɔb mbɔb gha, “Wə̀d gho̰ kə iku wə̀d weg ne afim fɔrɔ àwàwà ze zùgrə aməd?”
Yeso ghù mbaŋà tibe ne izwighi tibɔ̀ŋ ya yaʼi inga inɔb
(Mag 5:1-20; Lug 8:26-39)
28Anyumə̀ ne Yeso ya pe inga aba aben ze a Gadarèn, mbaŋà mɔ̀ʼɔ tibe ne izwighi tibɔ̀ŋ ya yaʼi inga inɔb ya yeʼe kɔ̀ti aməd. Mbaŋà te ya dù inga tiseg ne mbi ya to inga tigho. Mbaŋà te yaya tɔ ane ikuchèg ne chəyi tì wə̀d mɔ̀ʼɔ ya ywìrì chè ane aba ze ne mbɔb yaya chùghə angu. 29Icheg ne mbi ya bɔ̀mbi tì Yeso ane, mbi ya kyen gha, “Ŋwan Ŋwiye, àghò kə kə̀bə̀ aghə tì ina? Àghò kə̀ yèʼe anìŋ ni chə awa ne chəyi nyùmə̀ kiri koʼi.”
30Inɔ̰ ìkuŋə kyen mɔ̀ʼɔ yaya jə̀ghə iban asiŋi ze. 31Izwighi tibɔ̀ŋ mbe ne ya yaʼi inga bəd mbe ya gha ane si boʼ ibo abə Yeso gha, “Àghò mə kàmni awa chì inga bəd mbo̰, àghò cha awa inga inɔ̰ ìkuŋə mbin.”
32Yeso ya ghàm abə izwighi tibɔ̀ŋ mbe gha, “Mbə̀ gho!” Ane mbi ya dù ghò nyi inga ìkuŋə mbe. Inɔ̰ ìkuŋə we ya nòrò ghò sùyə̀ ibəm kəŋ, fen inga atəŋ ze, si fum. 33Bəd ne yaya jə ìkuŋə mbe ya bàd anug azo̰ nòrò ghò ikye aben pè ghà abə bəd. Mbɔb ya mə̀tì anug ne du igun ìkuŋə mbe fɔrɔ igun bəd mbe ne izwighi tibɔ̀ŋ ya yaʼi inga inɔb. 34Ane, aben ajìm ya zug dù ghò ni bàd Yeso. Anyumə̀ ne mbi ya bàri aməd, mbi ya boʼ ibo ibo gha wì duwə yi inɔb inga aba aben.
Nu geselecteerd:
Matìyò 8: MBTP
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2019 CABTAL
