Matìyò 11
11
Jɔn ne nàʼà mənib tɔm ìmbi mə̀mə̀nənùg abə Yeso
(Lug 7:18-35)
1Anyumə̀ ne Yeso ya màni ni ghà inug mbo̰ abə ìmbi mə̀mə̀nənùg mbe ìghum chɔ̀b ibe, wì ya nɔ̀ʼ asiŋi ze ghò inga isiŋi mbe ne yaʼi iban iban pè ko ni chwiti inug bə̀ ghàm Ìngam Ŋwiye.
2Anyumə̀ we, Jɔn we ne yaya nàʼà mənib ya yaʼ inga nəb ndəŋ . Wì ya zug inug mbe ne Yeso Kristo yaya ghìyə̀. Ane, wì ya tɔm ìmbi mə̀mə̀nənùg ibo, 3gha mbe gho bìri ibo gha, “Àghò kə wə̀d we ne bədkə̀n ya gha wì biri yeʼe, kə̀ tì wa ghɔ̀mɔ wə̀d ndəŋ?”
4Yeso ya ywìtì inɔb gha, “Mbə̀ gho mə̀tì inug mbe ne mbə̰ mbe zùghə bə̀ mə̀tì inug mbe ne mbə̰ mbe bàrà abə Jɔn. 5Məfəg mbe se bàrà isiŋi. Bəd ne ighog sweʼe mbe se nɔ̀ʼɔ̀ yḛ̀ icheg chɔm. Aghɔn fə mèg igun bəd ne yaya ghɔ̰̀ àwàrikə̀m, mbi se zḛ. Bəd ne koro mbe se zùghə inug icheg chɔm fɔrɔ iwu bəd mbe zwème. Bəd mbe bə̀ ghà ikən chɔm abə bəd ne chəyi àzɔb. 6Ŋwiye zì àbɔrɔ̀bɔd igun wə̀d ne chəyi we jə̀mə̀ amə.”
7Anyumə̀ ne mə̀mə̀nənùg ìmbi Jɔn ya nɔ̀ʼi se ghò awɔb, Yeso ya ko ni ghàm imbə̀ʼ Jɔn abə tinɔ̰ bəd mbe gha, “Aghi ne mbə̀ ya gho inga tibad zɔbi ni nèn àkə aghə? Àkə wə̀d ne yaʼi icheg abo agyen ne ifə ya tìnde? 8Àmə kayi ane, mbə̀ ya si ghò ni nèn aghə? Wə̀d ne zi ndwi àka inun? Indèʼ ka! Bəd ne zìyè ndwi àka inun ya chùghə yaʼ inga ìtɔʼ. 9Aghi ze ne mbə̀ ya jiʼì ghò ni nèn àkə aghə? Àkə wə̀dkə̀n Ŋwiye? E! Mbə̀ ya bàd wə̀d ne che wə̀dkə̀n Ŋwiye. 10Jɔn ya wə̀d we ne mbi ya ŋwàʼri imbə̀ʼ aməd gha,
‹Nḛ, mə biri chà ìmə wə̀dtɔm ine imbìghè.
Wì biri tangi ìwe inɔnjì.›
11Mə gha tesiʼ inən gha, abɔ̀ʼ bəd mbe ne mbi gwi igun isəg aŋa məjìm, chəyi wə̀d mɔ̀ʼɔ ne bèrì ati chè Jɔn we ne yaya nàʼà mənib. Si ya gha, wə̀d we ne kə chè bəd məjìm inga anug ìfɔ̀n ikaŋ, tengàŋ bèrì ati chè Jɔn. 12Ni ko ane nyumə̀ we ne Jɔn gho̰ yaya ghà ikən chɔm yèʼe pè tèchɔ̀ŋ, anug ìfɔ̀n ikaŋ fə zə̰ ngəʼ ka ka, ne à ya bəd ne kìrə ika mbe nyḭ̀yḛ inga. 13Bədkə̀n Ŋwiye məjìm fɔrɔ inug ijìm mbe ne yaʼi inga mə̀nɔ̀ʼɔ̀ Muse yaya ghàmà imbə̀ʼ anug ìfɔ̀n ikaŋ yèʼe pè ane nyùmə̀ we abə Jɔn. 14Mbə̰ mə̀ kɔ̀ŋ ni bḛ, mbə̀ bḛ anug azo̰: Jɔn ya Èlayijà we ne bədkə̀n Ŋwiye yaya gha wì biri yeʼe. 15Wə̀d we ne tì wì zug anug, wì zug!
16Ze kə anìŋ mə mə̀grì iwaŋ bəd gho̰ ne amad anìŋ ane aghə? Mbɔb ya kwàʼ icheg bɔn kwa ne chughi a sàmi iywin se kàrà bɔn ndəŋ ghà gha,
17‹Tè fə tikyeg inam inən,
chəyi mbə̀ bḭ.
Tè bə̀ ywìrì zə̀ʼ tikyeg iwu inən,
chəyi mbə̀ bə dèg.›
18À ya bə̀ ane ne Jɔn ya yeʼe, chəyi wì yaya jə̀ghə kə̀ bè no mənoʼ, bəd se gha, ‹Azwighi tibɔ̀ŋ ze inga məd.› 19Ŋwan Wə̀d yeʼe, wì ya jə̀ghə bə̀ no mənoʼ, bəd se gha, ‹Mbə̀ nḛ, wə̀d gho̰ ya àfaŋi ìfə bə̀ yaʼ atəd mənoʼ. Məd we jə̀ghə àsə̀ʼ tì bədtag fɔrɔ bəd ne ghìyə̀ inug tibɔ̀ŋ.› Tesiʼ ya gha, mbi biri kyeri iwe ne Ŋwiye nàʼi ane icheg ne bəd mbe ghìyə̀ inug ne koʼi.”
Isiŋi mbe ne chəyi bəd ya bḛ ikən chɔm angu
(Lug 10:13-15)
20Yeso ya ko ni ghàm, gaŋ abə bəd inga isiŋi mbe ne wì ya taŋ ghì iyeti inug nɔʼ nɔʼ inga imbə̀ʼ icheg ne chəyi mbi ya bə̀ŋi ìtɔb fìŋ sìkì inug tibɔ̀ŋ. 21Wì ya ghà inɔb gha, “Ngəʼ kyen biri nyi igun ine, àghò Kòrazìn! Ngəʼ kyen biri nyi igun ine, àghò Bèsayidà! Àkə aghi ne iyeti inug mbe ne mə̀ ya ghi inga àzən aben ya mə̀ ya ghi yaʼ a Tayì tì a Sidòn, nji bəd mbe angu ya fə bə̀ŋì ìtɔb fìŋ aneg aneg, zì ndwi ideg bə̀ fùʼì nyɔd ane aburi. 22Tesiʼ ya gha, igun aneg ze ne Ŋwiye biri sɔb isaʼi igun bəd, wì biri dìgrì igun bəd mbe a Tayì tì bəd mbe a Sidòn chè icheg ne wì biri dìgrì igun inən! 23Àsi awe, àghò Kàpenàwum, mbi wa biri nɔ̀rì awe ikaŋ? Indèʼ ka, mbi biri swi awe màʼ inga aben iwu bəd. À ya ane imbə̀ʼ icheg ne iyeti inug mbe ne mə̀ ya ghi inən kə mə̀ ya ghi a Sodòm, nji aben Sodòm kiri biri pè tèchɔ̀ŋ! 24Mə gha tesiʼ inən gha, igun aneg ze ne Ŋwiye biri sɔb isaʼi igun bəd, wì biri dìgrì igun bəd a Sodòm chè icheg ne wì biri dìgrì igun inən!”
Anug imbə̀ʼ àzwètì ne Yeso we nàʼà
(Lug 10:21-22)
25Anyumə̀ we ne Yeso yaya ghàmà ane, wì ya gha, “Ìmə Mbaʼ, Anɔŋisəg ne beri ikaŋ fɔrɔ ìseg, mə nàʼ məyakà ine imbə̀ʼ icheg ne àghò nə̀m inug mbo̰ abə bəd mbe ne kɔ̀ndɔ gha mbɔb bèrì iwe bə̀ kyèri inug, si chwi yaʼ abə bɔn kwa. 26E! Ìmə Mbaʼ, à ya icheg ne àghò kə̀bi gha ze yaʼ.
27Ìmə Mbaʼ fə nàʼ ighi ijìm inum. Chəyi wə̀d ne kyeri Ŋwan chèyi ane Mbaʼ. Chəyi wə̀d ne bə kyèri Mbaʼ chèyi ane Ŋwan fɔrɔ bəd mbe ne Ŋwan chɔʼi awɔb ghì gha mbe kyeri Mbaʼ.”
28“Mbə̀ yeʼe abɔ̀ʼ inum, mbə̰ məjìm mbe ne fə bɔri bə̀ bèʼì mbèʼ ni nìri, mə biri ghì gha mbə̀ zwete. 29Mbə̀ niŋ ìmə mbèʼ bèʼì, bə̀ kwèmbi inug inum imbə̀ʼ icheg ne mə we bɔ̀tɔ ane fìŋ bə̀ swìye ìmə nyɔd aseg. Mbə̰ mə̀ ghì ane, ìtən fìŋ biri zùtì inga. 30Ìtən fìŋ biri zùtì imbə̀ʼ icheg ne inug mbe ne mə̀ biri gha mbə̀ ghiyə ya inug ne zami ni ghì. Mbèʼ ze ne mə̀ biri nàʼ inən gha mbə̀ beʼe, ze bə̀ zàm ni bèʼì.”
Nu geselecteerd:
Matìyò 11: MBTP
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2019 CABTAL
