Ima̍tiyu 2

Āchɔga ɔnɔ̄kɔ̄kū nīi bū la yɛnɔ ɔ̄chī ma̍

1E̍ ma Iji̍sɔ̄ɔsi la ipwo̍gra yī Ibɛ̍tɛlɛhɛ̄ɛm abɔ̍ɔ la ajɛ yī Ijudi̍ya. Ihɛ̍rɔ̄ɔdi re̍ ɔchwɔ̄lɛ̍ yɛ̄grāa ɔla̍ā a̍nɛ. Yɛ̄grāa ɔla̍ā, āchɛ ɛha̍ nīi ē je̍ ochi̍chi̍ yī lɛlā bū la eyī ode rɛ i̍nyi̍nyɔ̍ɔwīyā ma̍ wā abɔ̍ɔ la Ijɛru̍sālɛm. E̍ bū la ɔcha ɔha̍ la wāā yɛnɔ ɔ̄chī. 2E̍ wā ma̍, e̍ chikpo̍ hīka, “Ɔyi̍ nīi e̍ ma amu nīi ge̍ē re̍ka ɔchwɔ̄lɛ̍ yī Iju̍u wa̍a̍ ma̍ kɔ̍ɔ̄? Wu̍chē oji̍ nɛ, alɔ ma̍ i̍nyi̍nyɔ̍ɔwīyā yī nū nīi nyɔ̄ bū abɔ̍ɔ la wāā yɛnɔ ɔ̄chī. Anu̍ nīi alɔ wā ma̍ ge̍ē ya̍ otūlichō de ɔ̍ a̍nɛ.” 3Ihɛ̍rɔ̄ɔdi nīi - ɔchwɔ̄lɛ̍ ma̍ plɛ̍ɛ̄lā nūma̍ ma̍, ūkpɔ̄tū ti̍ya anu̍ tū lēchi̍ lēchi̍. Alijɛru̍sālɛm wa̍a̍, ūkpɔ̄tū ti̍ya aa̍ tū i̍ngi̍ngɔ̍ɔ. 4Ihɛ̍rɔ̄ɔdi hī alɛhu̍ aligbe ba̍la āchɛ ongū Lihɔ yī Iju̍u ɛra̍ ge̍ grēeyī, che wa̍ ikpo̍ hīka aba̍ nīi ɛ̍lɛ ge̍ē ma Ɔhɔ̍ɔnyɛta̍ Nīi Ɔwɔ Ɔ̍lɔ Hōhu Ma̍?

5E̍ koko̍o de ɔ̍ bɛ̍ɛ̄nɛ̄ hīka, “Abɔ̍ɔ la ipwo̍gra yī Ibɛ̍tɛlɛhɛ̄ɛm la ajɛ yī Ijudi̍ya nɛ. Wu̍chē oji̍ nɛ, ɔ̄chɛ ɔkɛrɔ̄ yī Ɔwɔ ta̍ tū la īpū i̍ngɔ̍ɔ hīka,

6“ ‘Ibɛ̍tɛlɛhɛ̄ɛm yī ɔcha yī Iju̍da be̍e!

I̍ awɔ bi̍hi ka̍ka̍ lipu̍ yī alɛhu̍ ɔcha yī Iju̍da ehēhī a̍ni̍ ko̍ō!

Wu̍chē oji̍ nɛ, ɔlɛhu̍ ɔha̍ ge̍ē bū abɔ̍ɔ lipu̍ yī wɔ.

Anu̍ ge̍ē deyīrɛ Ali̍sɛ̄rɛli, āchɛ yī u a̍nɛ.’ ”

7Ihɛ̍rɔ̄ɔdi wā ge̍ bī āchɔga ɔnɔ̄kɔ̄kū ɛla̍ā nīi bū la wāā yɛnɔ ɔ̄chī ma̍ ga i̍kplɛ̍pa̍ ge̍ kā wɔ̄kā tāa aa̍. O̍ che wa̍ ikpo̍, jo̍ōkū yɛ̄grāa pi̍i̍ nīi i̍nyi̍nyɔ̍ɔwīyā ɔ̍lɔma̍ bīyɛchɛ ma̍. 8Bɛ̍ɛ̄nɛ̄, o̍ wā ge̍ de wa̍ tɛ̄rɔ̄ pīya yī Ibɛ̍tɛlɛhɛ̄ɛm, koko̍o de wa̍ hīka, “Ala̍ ā gāa ge̍ chikpo̍ hwɔhi hwɔhi, ɛbɛ nīi ɔyi̍ ɔ̍lɔma̍ hɔ̄ ma̍ gɛ. Ala̍ ge̍ ma̍ ɔ̄ mɛ̍, ala̍ ā ya̍ nīi n ā jo̍ōkū, hɛ̄ɛbɛ nīi ami titi ē gāa ge̍ ya̍ otūlichō de ɔ̍.”

9E̍ plɛ̍ɛ̄lā nūma̍ ma̍, e̍ pīya bɛ̍ɛ̄nɛ̄. E̍ yɛ la ɔpɔ̄pū ma̍, i̍nyi̍nyɔ̍ɔwīyā ɔla̍ā pi̍i̍ nīi e̍ ma̍ la ɔcha wāā yɛnɔ ɔ̄chī ma̍ bīyɛchɛ che abɔ̍ɔ ɔpɔ̄ɔpɛ̄. O̍ yɔbū de wa̍ i̍ngɔ̍ɔ hrēdēdēdē ge̍ ku̍ jīyarɛ yɛ̄grāa yī ɛbɛ nīi ɔyi̍ gbo ma̍. 10E̍ ma̍ i̍nyi̍nyɔ̍ɔwīyā ɔla̍ā ma̍, e̍ wīyā kpɛ̍ɛji. 11E̍ chɛ̄ gāa ga u̍nu̍ ge̍ ma̍ ɔyi̍ bɛ̍ɛ̄nɛ̄, ba̍la Imeri̍ ɛ̍nɛ̍ yī nū. E̍ pīya pīyēkū la ajɛ ya̍ otūlichō de ɔ̍. E̍ ga la abɔ̄ tū ga liba yī wā, wu̍ ɛjā kɔ̄ de ɔ̍: Ɔha̍ de igo̍olu; ɔha̍ de ɔjā oni̍pī kwɛ̍kwɛ̍ nīi re̍ka ifra̍nkīsɛ̄ɛsi ma̍; ɔha̍ de yanɔ̄ oni̍pī kwɛ̍kwɛ̍ nīi re̍ka ima̍a ma̍.

12Ɔwɔ ta̍ wā ɔna la wɔ̄na ka ɛ̍lɛ ge̍ e̍e ku̍chē gala ɛbɛ yī Ihɛ̍rɔ̄ɔdi gɛ ni̍. E̍ wā ge̍ pīya yī ɔcha yī wā gala ɔpɔ̄pū ɔha̍ bɛ̍ɛ̄nɛ̄.

E̍ gwɛ̍ɛnya la ɔyi̍ ga I̍jīipu

13Āchɔga ɛla̍ā pīya bɛ̍ɛ̄nɛ̄ ma̍, ɔyɛ̍ɛ̄chɛ̄rɔ̄ yī Ādā Nīi - Ɔwɔ Ma̍ wā dikpo̍ba̍ Ijo̍sɛ̄ɛfu la wɔ̄na. O̍ koko̍o de ɔ̍ hīka, “Nīichō nīi a ā gwɛ̍ɛnya la ɔyi̍ ɔla̍ā ba̍la ɛ̍nɛ̍ yī nū pīya ga ɔcha yī I̍jīipu. Hɔ̄ abɔ̍ɔ kpɛɛ nīi n ā wā ge̍ ka hīka pīya, o̍bū nīi a ā pīya. Wu̍chē oji̍ nɛ, Ihɛ̍rɔ̄ɔdi yɛ abɔ̍ɔ ge̍ē gāla̍ ɔyi̍ ɔla̍ā hɛ̄ɛbɛ ge̍ē de ɔ̍ ngmo̍.”

14Ijo̍sɛ̄ɛfu wā ge̍ nīichō bɛ̍ɛ̄nɛ̄. O̍ pīya la ɔyi̍ ba̍la ɛ̍nɛ̍ yī nū la otu̍ ga ɔcha yī I̍jīipu ke̍e̍. 15O̍ hɔ̄ abɔ̍ɔ kpɛɛ nīi Ihɛ̍rɔ̄ɔdi ɔla̍ā pīyaku̍.

Lɛlā nūma̍ ya̍ lɛbɛ nīi lɛlā nīi Ɔwɔ Ādādā ka ga la oko̍o yī ɔ̄chɛ ɔkɛrɔ̄ yī nū nīi mwɔ̍ɔmu ma̍ ge̍ē de ē pīya ichɛ̄ɛhi. O̍ ka hīka,

“N hī Ɔyi̍ yī u ɔnɔ̄ngrɔ̄ɔ ɛra̍ ngmɛ̍ɛchɛ bū la ɔcha yī I̍jīipu.”

Ayi̍ nīi e̍ kpo̍ ngmo̍ ma̍

16Ihɛ̍rɔ̄ɔdi ma̍ hīka āchɔga ɛla̍ā nīi ɛ̍lɛ bū la wāā yɛnɔ ɔ̄chī ma̍ ɛ̍lɛ ya̍ anu̍ obu̍gūbugū ma̍, o̍ ya̍ ɔtū ngurangura kpɛ̍ɛji. O̍ de āchɛ tɛ̄rɔ̄ gāa ge̍ kpo̍ aɛ̍pɛ̄ yī Ibɛ̍tɛlɛhɛ̄ɛm ba̍la ɔta̍kakatū yī nū ngmo̍ cha̍cha̍. Ayi̍ anāngrɔ̄ɔ bū lɛ̍yi̍ ɛpa wā la ajɛ, e̍ ngmo̍ wā cha̍cha̍. Wu̍chē oji̍ nɛ, o̍ bla lɔkɔ nīi āchɔga ɛla̍ā ka de ɔ̍ ku̍ yɛ̄grāa nīi e̍ ma̍ i̍nyi̍nyɔ̍ɔwīyā ɔ̍lɔma̍ ma̍.

17Bū la ɛbɛ ɔla̍ā, lɛlā nīi Ijɛrɛma̍ya ɔ̄chɛ ɔkɛrɔ̄ yī Ɔwɔ mwɔ̍ɔmu ma̍ de pīya ichɛ̄ɛhi. 18O̍ ka hīka,

“Ojiya rɛ abɔ̍ɔ la Ira̍ma gba̍a̍!

Ojiya yī lɛgba ba̍la ejrīkā nɛ.

Ira̍chɛ̄ɛli yɛ ē drɛ̄ɛgba yī ayi̍ yī nū a̍nɛ.

O̍ dɛ̄ kpɛ̍ɛ, ɔ̄chɔ̄chɛ i̍ ku̍ ɔ̄ abɔ̄ mɛ ni̍.

Wu̍chē oji̍ nɛ, e̍ i̍ hɔ̄leyī gɛ ni̍.”

E̍ ku̍chē cha bū la I̍jīipu

19Ihɛ̍rɔ̄ɔdi pīyaku̍ bɛ̍ɛ̄nɛ̄ ma̍, ɔyɛ̍ɛ̄chɛ̄rɔ̄ yī Ɔwɔ gāa dikpo̍ba̍ Ijo̍sɛ̄ɛfu la wɔ̄na abɔ̍ɔ la I̍jīipu. 20O̍ ka de ɔ̍ hīka, “Nīichō nīi ā bī ɔyi̍ ba̍la ɛ̍nɛ̍ yī nū ku̍chē pīya yī ɔcha yī I̍sɛ̄rɛli gɛ. Wu̍chē oji̍ nɛ, āchɛ nīi chikpo̍ ge̍ē de ɔyi̍ ē ngmo̍ ma̍ pīyaku̍ mɛ̍.” 21Ijo̍sɛ̄ɛfu wā ge̍ nīichō bɛ̍ɛ̄nɛ̄. O̍ bī ɔyi̍ ba̍la ɛ̍nɛ̍ yī nū cha wā la ɔcha yī I̍sɛ̄rɛli.

22Ijo̍sɛ̄ɛfu po̍ hīka Ake̍lēyusi ɔ̍lɔ re̍ ɔchwɔ̄lɛ̍ yī Ijudi̍ya nāa ɛbɛ yī Ihɛ̍rɔ̄ɔdi a̍dā yī ɔ̍lɔ a̍nɛ ma̍, o̍ de tūuhwi yī ɔcha wā abɔ̍ɔ. Ɔwɔ chabɔ̄ yī lɛlā yɛ̄mɛ̄mɛ̄ la wɔ̄na hu̍ ɔ̄ lɔkɔ nīi o̍ ge̍ē ya̍ ma̍. Ijo̍sɛ̄ɛfu pīya la aa̍ ge̍ hɔ̄ la ajɛ yī Iga̍līli. 23Ipwo̍gra nīi o̍ gāa ge̍ kū wɔlɛ̍ ma̍ re̍ka Ina̍jārɛ̄ɛti. Onūma̍ ya̍ nīi lɛlā nīi ɔ̄chɛ ɔkɛrɔ̄ yī Ɔwɔ mwɔ̍ɔmu ma̍ ge̍ē de pīya ichɛ̄ɛhi. O̍ ka hīka, “E̍ ge̍ē hī ɔ̄ ka Olina̍jārɛ̄ɛti.”

Nu geselecteerd:

Ima̍tiyu 2: YBASR

Markering

Deel

Kopiëren