Jɛnɛsis 4
4
Ken Ɛn Ebɛl
1Adam gi in wɛf bɛlɛ ɛn i bɔn wan bɔypikin. I se, “PAPA GƆD dɔn ɛp mi fɔ gɛt bɔypikin,” so i gi am nem Ken#4:1 Ken I fiba di Ibru fɔ gɛt sɔntin. we min ‘gɛt’. 2I nɔ tu te i bɔn ɔda bɔypikin we nem Ebɛl. Ebɛl na bin man we de mɛn ship, bɔt Ken in na bin fama. 3Wande, Ken kɛr sɔm pan di tin dɛn we i plant ɛn mek sakrifays to PAPA GƆD. 4Ebɛl in kɛr sɔm pan di fɔs ship dɛn we bɔn. I kil dɛn, dɔn i gi di bɛst pat dɛn to PAPA GƆD as in yon sakrifays. PAPA GƆD bin pliz wit Ebɛl in sakrifays, 5bɔt i nɔ bin pliz wit Ken in yon. Dat mek Ken vɛks bad bad wan, ɛn sawa in fes. 6Nain PAPA GƆD aks am se, “Wetin du yu vɛks so? Wetin mek yu sawa yu fes so? 7If yu bin du wetin rayt, a nɔ bin fɔ tek yu sakrifays? Bɔt bikɔs yu nɔ du wetin rayt, sin de na yu domɔt de wet fɔ yu, bɔt yu fɔ tray nɔ fɔ kɔmit sin.”
8So Ken tɛl in brɔda Ebɛl lɛ dɛn go na gras fil. We dɛn rich de, Ken fɔdɔm pan in brɔda ɛn kil am.
9PAPA GƆD aks Ken se, “We yu brɔda Ebɛl?” I ansa se, “Mi nɔ no o! Mi na mi brɔda in wachman?”
10Nain PAPA GƆD se, “Wetin mek yu dɔn du dis bad tin ya so? Yu brɔda in blɔd de kray to mi frɔm di grɔn. 11Swɛ de pan yu ɛn yu nɔ go ebul fɔ mek fam igen. Di grɔn dɔn sɔk yu brɔda in blɔd, lɛkɛ se i bin opin in mɔt de wet fɔ am. 12Di grɔn nɔ go gro ɛnitin bɛtɛ fɔ yu ivin if yu wok traŋa wan; dɔn yu go de wirɔn ɔlɔbɔt na di wɔl.”
13Ken ansa PAPA GƆD se, “A nɔ go ebul fɔ bia dis pɔnishmɛnt ya. 14Yu de pul mi kɔmɔt pan fam wok ɛn fɔ de wirɔn na dis wɔl, ɛn ɛnibɔdi we si mi go kil mi.”
15Bɔt PAPA GƆD tɛl am se, “Nɔ o, If ɛnibɔdi kil yu, i go sɔfa sɛvin tɛm mɔ fɔseka dat.” Dɛn PAPA GƆD mak Ken, so dat ɛnibɔdi we si am nɔ go kil am. 16So Ken kɔmɔt go tap fa frɔm PAPA GƆD na wan kɔntri we nem “Nɔd” we min “Wirɔn” we de na di ist pat we yu kɔmɔt Idɛn.
Ken In Jɛnareshɔn
17Ken in wɛf bɔn bɔypikin ɛn i gi am nem Inɔk. I bil wan big siti ɛn i gi am in pikin in nem, Inɔk. 18Inɔk bin gɛt wan bɔypikin we nem Irad, we na bin Mɛujaɛl in papa, ɛn Mɛujaɛl bin gɛt wan bɔypikin we nem Mɛtushaɛl, we na bin Lamɛk in yon papa. 19Lamɛk bin gɛt tu wɛf: wan nem Ada, di ɔda wan nem Zila. 20Ada bɔn Jabal, we in jɛnareshɔn na dɛn wan we de slip insay tɛnt ɛn de mɛn kaw.#4:20 Kaw Na ship, got ɛn kaw. 21In brɔda na Jubal we in jɛnareshɔn na ɔl dɛn myuzishian dɛn we de ple ap ɛn flut. 22Zila bɔn Tubal Ken, we bin de mek ɔlkayn tul wit bras ɛn ayɛn. Tubal Ken in sista na Naama.
23Lamɛk tɛl in wɛf dɛn se:
“Ada ɛn Zila, una lisin to mi: Lamɛk in wɛf dɛn una lisin nɔ:
a dɔn kil wan man bikɔs i wund mi, wan yɔŋman fɔ we i nak mi.
24If pɔsin go sɔfa sɛvin tɛm mɔ fɔ we i kil Ken,
dɛn udat kil mi go sɔfa sɛvinti sɛvin tɛm mɔ.”
Sɛth Ɛn Inɔsh
25Adam ɛn in wɛf bɔn ɔda bɔypikin we dɛn gi nem Sɛth#4:25 Sɛth I fiba di Ibru fɔ “dɔn gi.” In wɛf se, “PAPA GƆD dɔn gi mi ɔda bɔypikin fɔ tek Ebɛl in ples, we Ken kil.” 26Sɛth bin gɛt wan bɔypikin we nem Inɔsh. Na da tɛm de pipul dɛn bigin fɔ wɔship PAPA GƆD ɛn kɔl in Oli Nem.
Nu geselecteerd:
Jɛnɛsis 4: KRIO13
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Krio Bible © The Bible Society of Sierra Leone, 2013.
