LUKA 23
23
Yesu Yahilwa khu Pilato
(Mat 27:1-2,11-14; Mk 15:1-5; Yoh 18:28-38)
1Vandu vi shikhaalo shiosi vasinjila, nivahila Yesu khu Pilato. 2Varanga khumuyaala, nivavoola, “Khunyoli mundu uyu nakoyanyinyanga vandu veru, navavoolelanga valeshe khurunga vushuru khu Mwami wa Roma nukhwilaanga neye Masiha, uli Mwami.”
3Pilato yareeva Yesu, “Nivi Mwami wa Vayahudi?” Yesu yachipa, “Toto khuli uvooli.”
4Pilato yavoolela vasalisi vakali nende shituma shia vandu voosi, “Mbulakhu shindu shitamanu shia mundu uyu akholi shinyala khuchila ayaalwi.”
5Navutswa vamunika nivavoola, “Avwanyinyanga mulilu mu vandu khuvirila khu mechitso keke shia havundu hosi mu lusomo lwa Yudeya. Yaraanjila mu lusomo lwa Galilaya, khandi nunundi umali khutukha hanu?”
Yesu Yarumwa khu Herode
6Lwa Pilato yahulila ndio, yareeva, “Mundu uyu nu Mugalilaya?” 7Lwa yavoolelwa Yesu arulanga mu lusomo lwa Herode yamihanga, yaruma Yesu khu Herode, wali nali Yerusalemi mumatukhu kenako. 8Lwa Herode yalola Yesu, yasangala muno; shichila yali wahulila makhuva khulondokhana khuye, khandi yikombanga khumulolakhu khumatukhu manyishi. Yenyanga alole Yesu nakholanga viloleshitsu vilala. 9Khulwa yako, Herode yareeva Yesu mareevo manyishi, navutswa Yesu yambakhana khumuchipa. 10Vasalisi vakali nende veechitsi va Malako vasinjila, nivavoola vindu vitamanu khulondokhana khu Yesu. 11Herode nende vasikali veve vakholela Yesu shihenye henye khandi nivamunyeka. Vamufwala inguvu yu vukuuli vululu, nivamukalushitsa khu Pilato. 12Khulitukhu lilala lienelo, Herode nende Pilato vamanya nivakwa valina; yaka nikashili khwikholekha vali vamenya khuli vatsiku.
Yesu Yakhalachilwa Likhutsa
(Mat 27:15-26; Mk 15:6-15; Yoh 18:39—19:16)
13Pilato yalaanga halala vasalisi vakali, vimilili nende vandu; 14navavoolela, “Munderele mundu uyu numuvoola ndi neye ukoyanyinyanga vandu; khandi lwa mali khumurunishitsa imbeli wenyu, nyoli ndi shindu shitamanu shivulakhuho, shichilanga nu mumuyaala. 15Khali Herode avulakhu vutamanu vwa yamunyola nakholi, nako kachila namukalushitsa khu khutsi. Shindu shitamanu shivulakhuho shiu mundu uyu akholi, shinyala khuchila yiirwi. 16Khali ndio, nahaana vutswa lilako ashiutwi, nu khulakhulwa.” [ 17Shia litukhu liu Mulukha kwa Pasaka, Pilato yali nu mwiima kukhuvoholola muvohe mulala wa vandu venyanga]#23:17 Mahandiko Mutakatifu kandi kavula luvaso 17.
18Navutswa shituma shiosi shia vandu valaanjilila ikulu nivavoola, “Mwiiri! Khulakhulili Baraba!” 19(Baraba, yali wavohwa mucheela shichila yahinganyinya vwamihi vwi shivala, khandi yali wayiira vandu mu litaala likali.)
20Pilato yali ni lienya liu khuvoholola Yesu, nareeva khandi shituma shia vandu; 21navutswa vandu valaanjilila nivavoola, “Avambwi! Avambwi!”
22Pilato yavareeva lwa khavaka, “Mundu uyu anyala khuva nakholi vutamanu shina? Mbulakhu shindu shitamanu shianyoli niyakhola shinyala khuchila akhalachilwi khwiirwa! Yahaana vutswa lilako ashiutwi nu khulakhulwa.”
23Navutswa vali ni lienya liu khukholelwa vwangu ka vali nivikombi kakholeshe, nivatsililila khulaanjilila ikulu ndi Yesu avambwi. Valaanjilila ikulu muno, nivakuura. 24Khulwa yako, Pilato yakhalachila Yesu likhutsa, khuli venyanga kave. 25Pilato yavoholola mundu wali niyavohwa mucheela, shichila yahinganyinya vwamihi vwi shivala, khandi yali wayiira vandu, wa vandu vali nivareevi khuvohololwa; navutswa yahaana Yesu khuvo khukholwa khuli vene venyanga.
Yesu Yavambwa khu Musalaba
(Mat 27:32-44; Mk 15:21-32; Yoh 19:17-27)
26Lwa vasikali vali nivarulitsaho Yesu, vakumila mundu walaangwangwa Simoni wi litaala lia Kurene, wali nali khu luchendo lwelwe khurula mu muchitsi kwavo. Vamutiukha musalaba, khukuchinga nu khulonda Yesu.
27Shituma shikali shia vandu vamulonda. Vakhali vali muvo valilanga, nivavelele shichila Yesu. 28Navutswa Yesu yishevukha navoola, “Munyi vakhali vamenyanga mu Yerusalemi! Muleshe khulila, shichila inzi, navutswa muve numwilililanga vene na vaana venyu. 29Matukhu kaliitsa khutukha lwa vandu valiitsa khuvoola, ‘Vali ni ikhaavi vakhali vakuumba, vakhivula vaana, khandi vavula vaana vatoro vu khununyinya!’ 30Nalwo lwa valiitsa khuraanga khuvoolela vikulu, ‘Kwi khu khutsi’; khandi khu rukulu, ‘Khukhunishi!’ 31Niiva vindu khuli vienevo viliitsa khwikholekha mumatukhu ki misala chili mivisi, ni shina shiliitsa khwikholekha lwa misala nichive chiuma?”
32Vandu venavo voosi vavili, vali nivakhola vindu vitamanu, vahilwa khutsia khwiirwa na Yesu. 33Lwa vatukha havundu halaangwangwa, “Shihanga,” va vambilaho Yesu, na vandu vavili vali nivakhola vindu vitamanu, mulala khuluveka lu mukhono musatsa kwa Yesu, na wundi khuluveka lu mukhono mukhali kwa Yesu. 34Yesu yavoola, “Tata, uvasemehe, shichila vakorwa ka vakholanga.”#23:34 Mahandiko Matakatifu kandi kavula, “Tata, uvasemehe, shichila vakorwa ka vakholanga.”
35Vandu vasinjilaho nivaheenzanga; navutswa vimilili va Vayahudi vamukholela shihenye henye nivavoola, “Yahonyinyanga vandi; leshi yihonyinyi mwene, niiva neye Masiha wa Nyasaye yarovola!”
36Vasikali vamukholela khandi shihenye henye: vatukha khuye nivamuha shilulu, 37nivavoola, “Niiva uli Mwami wa Vayahudi, yihonyinyi mwene!”
38Ikulu khu musalaba kwekwe vahandikakhu makhuva yaka: “Uyu neye Mwami wa Vayahudi.”
39Mulala khu vandu vali nivakhola vindu vitamanu wali navambilwi khu musalaba yanyeka Yesu navoola, “Shiunyala khuva Masiha tawe? Yihonyinyi mwene, khali ukhuhonyinye khutsi!”
40Navutswa weshie woyo yamukondeshela, namuvoolela, “Shiunyala khuha Nyasaye luyali tawe? Wakhalachilwa likhutsa khuli ye yakhalachilwa. 41Likhalachilwa lieru ni liatoto, shichila khurungwangwa ka khwakhola; navutswa ye avulakhu shindu shitamanu shia yali nakholi.” 42Yavoolela Yesu, “Unzitsushitse lwa uliitsa khwinjila mu vwami vwovwo!”
43Nalwo lwa Yesu yamuvoolela, “Khusuuvilitsanga nunundi ndi uliitsa khuva ninzi mu Paradiso.”
Likhutsa lia Yesu
(Mat 27:45-56; Mk 15:33-41; Yoh 19:28-30)
44Tsiali tsisaa sita tsiu mbasu lwa liuva liasinjila khwakha, ma shivala shiosi nishimwama khutukha tsisaa tisa. 45Luvaala lwali nulwelela mu Litempeli lwarandukhanamu hali khavili. 46Yesu yalila nu mwoyo mukali, navoola, “Tata, khuheetsanga mwoyo kwanje!” Yavoola ndio, nakhutsa.
47Lwa mwimilili wa vasikali imia indala yalola kali nikakholeshe, yitsominya Nyasaye; navoola, “Ni kilikali, mundu uyu yali mundu wi likhola liu vulunji!” 48Lwa vituma via vandu voosi vali nivakanile halala khulola ku khuchenyinya kali nikakholeshe, vakalukha ingo wavo voosi nivituuyanga khu viliru viavo nivavelele. 49Vandu voosi vali nivamanya Yesu, khali vakhali vali nivamulondi khurula mu lusomo lwa Galilaya, vasinjila ihalekhu, nivaheenza vindu viakholekhanga.
Khuyeveelwa khwa Yesu
(Mat 27:57-61; Mk 15:42-47; Yoh 19:38-42)
50Khwali nu mundu walaangwangwa Yosefu khurula mu litaala lia Arimatseya, mu lusomo lwa Yudeya. Yali mulahi muno khandi mundu wi likhola liu vulunji; yali mulala khu vandu vi shikhaalo shia Vayahudi, 51navutswa yali wayambakhana ka Vayahudi venyanga kakholwi nende vikholwa viavo. Yalindililanga khwitsa khu Vwami vwa Nyasaye. 52Mundu uyu yasimukha natsia khu Pilato, nareeva mmbili kwa Yesu. 53Yishitsa hasi mmbili kwa Yesu, nakulinjila mu luvaala lwa naavwa khu machoro malahi ku khunavakhu, khandi nakura mu shilindwa shiali nishiayevwa khale mu lwanda, shiu mundu wosi yali nashili khuyeveelwamu. 54Liali litukhu liu mulwakharanu, khandi litukhu li Lisabato liali nilili himbi khuraanga.
55Vakhali vali nivalondi Yesu khurula mu lusomo lwa Galilaya, valonda Yosefu, nivalola shilindwa, shiu mmbili kwa Yesu kwarelwamu. 56Vakalukha ingo, nivarechekha vindu vihuunyanga mwayu mulahi nende makura ku khwivekha valombele mmbili kwa Yesu.
Vahulukha khulitukhu li Lisabato khulondokhana khuli Malako kavoolanga.
Nu geselecteerd:
LUKA 23: LLLCATHOLIC
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© The Bible Society of Kenya, 2013
