John 9
9
Jesus Bue Nyia Wɔwoo no Onyifurafo Enyiwa
1Na orutwa mu no, ohun nyimpa bi a ɔyɛ onyifuranyi fi n’awoo mu. 2Na n’esuafo bisaa no dɛ, Rabae, woana na ɔyɛɛ bɔn, nyimpa yi anaa n’awofo a, dɛ wɔwoo no onyifuranyi? 3Jesus buaa dɛ, Nnyɛ nyimpa yi na ɔyɛɛ bɔn, eso nnyɛ n’awofo a, na mbrɛ Nyankopɔn ndwuma bɛda edzi wɔ no mu ntsi a. 4Otwar dɛ, adzekyee wɔ do yi, yɛyɛ nyia ɔsomaa me no no ndwuma; na adzesaa reba a obi nnkotum ayɛ edwuma. 5Mowɔ wiadze yi, emi nye wiadze ne kan. 6Ɔkaa dɛm yi no, ɔtoo ntafi guu daadze, na ɔdze ntafi no yɛɛ dɛtse seraa n’enyiwa do, 7na ɔsee no dɛ, Kɔ kɔhohor wɔ nsutaae Siloam mu (ne nkyerɛase nye, Nyia wɔasoma no). Na osii mu kɔree kɔhohoree, na ɔbae no nna ohu adze. 8Dɛm ntsi no sɔnmufo nye hɔn a nkan no wohun no dɛ ɔyɛ ohuafo no see no dɛ, Ana nnyɛ oyi na ɔtse hɔ serɛserɛ adze no? 9Binom see dɛ, Ɔno nye yi; binom so see dɛ, Dabi, na ɔnye no sɛ; na nankasa dze ɔsee dɛ, Emi nye no. 10Na wɔsee no dɛ, Wosii dɛn buee w’enyi no? 11Obuaa dɛ, Nyimpa a wɔfrɛ no Jesus no yɛɛ dɛtse dze seraa m’enyi do, na ɔsee me dɛ, Kɔ nsutaae Siloam mu kɔhohor; na mokɔree kɔhohoree nna muhu adze yi. 12Wobisaa no dɛ, Ɔnoara wɔ hen? Obuaa dɛ, Minnyim.
Farisiifo no Hwehwɛ Ayarsa no Mu
13Wɔdze nyia nkan no ɔyɛ onyifuranyi no kɛmaa Farisiifo no. 14Na da a Jesus yɛɛ dɛtse na obuee n’enyiwa no yɛ ahomgyeda. 15Dɛm ntsi Farisiifo no so bisaa no bio, mbrɛ osii hun adze. Na ɔsee hɔn dɛ, Dɛtse na ɔdze guu m’enyiwa do, na mohohoree, na muhun adze. 16Na Farisiifo no mu binom see dɛ, Nyimpa yi mmfi Nyankopɔn nkyɛn, osiandɛ onnsie ahomgyeda; binom so see dɛ, Ɔbɛyɛ dɛn na nyimpa dzebɔnyɛnyi botum ayɛ nsɛnkyerɛdze a ɔtse dɛm yi? Na mpaapaamu baa hɔn mu. 17Na wɔsee onyifuranyi no bio dɛ, Na ɔwo dze, eka dɛn wɔ no ho, dɛ obuee w’enyiwa? Ɔsee dɛ, Ɔyɛ nkɔnhyɛnyi.
18Na Jewfo no anngye no ho asɛm no enndzi, dɛ nkyɛ ɔyɛ onyifuranyi na afei ohu adze, dze kodur dɛ wɔfrɛɛ nyia ohun adze no n’awofo. 19Na wobisaa hɔn dɛ, Ana hom ba a hom se wɔwoo no onyifuranyi no nye yi? Afei ɔyɛ dɛn na ohu adze yi? 20N’awofo no buaa hɔn dɛ, Yenyim dɛ hɛn ba nye yi, yenyim so dɛ wɔwoo no onyifuranyi; 21na mbrɛ ɔyɛe na afei ohu adze yi dze, yennyim; na nyimpa kor a obuee n’enyiwa no so, yennyim; ɔnoara oenyin; hom mbisa no, na nankasa bɛka noara asɛm. 22N’awofo kaa yi, osiandɛ wosuroo Jewfo no, nna Jewfo no apam dada dɛ, sɛ obi paa mu ka dɛ ɔno nye Kraest no a, wɔbɛpam no efi nhyiamudan mu. 23Dɛm ntsi na n’awofo kaa dɛ, Oenyin: hom mbisa no no. 24Na wɔfrɛɛ nyimpa a nkan no ɔyɛ onyifuranyi no ne mpɛn ebien, na wɔsee no dɛ, Fa enyimnyam ma Nyankopɔn, na hɛn dze, yenyim dɛ nyimpa yi yɛ dzebɔnyɛnyi. 25Na obuaa dɛ, Sɛ ɔyɛ dzebɔnyɛnyi a, minnyim. Adze kor na minyim, dɛ nkyɛ meyɛ onyifuranyi, na afei dze muhu adze. 26Wɔsee no dɛ, Ɔyɛɛ wo dɛn? Oduaa dɛn buee w’enyiwa? 27Obuaa hɔn dɛ, Maka akyerɛ hom dada, na hom enntsie; ebɛnadze ntsi na hom repɛ etsie bio? Ana hom so pɛ dɛ hom dan n’esuafo anaa? 28Na wɔyaw no na wɔsee dɛ, Ɔwo na eyɛ no suanyi, na hɛn dze, Moses esuafo nye hɛn. 29Yenyim dɛ Nyankopɔn akasa akyerɛ Moses, na oyi dze, yennyim mbrɛ ofi. 30Nyimpa no buae see hɔn dɛ, Iyi mu na ɔyɛ nwanwa, dɛ hom nnyim mbrɛ ofi, naaso obuee m’enyiwa. 31Yenyim dɛ Nyankopɔn nntsie ndzebɔnyɛfo, na sɛ obi yɛ Nyankopɔn no somfo na ɔyɛ n’apɛdze a, ɔno na otsie no. 32Ofitsi dɛ wiadze hyɛɛ ase wɔnntsee dɛ obi ebue nyia wɔawo no onyifuranyi no n’enyiwa pɛn: 33sɛ oyi mmfi Nyankopɔn nkyɛn a, nkyɛ orunntum nnyɛ hwee. 34Wobuae see no dɛ, Ɔwo, bɔn mu koraa na wɔwoo wo, nna ɔwo na erekyerɛkyerɛ hɛn yi? Na wɔpaam no fii hɔ.
Sunsum mu Enyifura
35Jesus tsee dɛ wɔapam no efi edzi, na ohun no no, obisaa no dɛ, Ana egye Nyankopɔn Ba no dzi? 36Na obuae see no dɛ, Mo wura, ɔno nye woana, ma mengye no mindzi? 37Jesus see no dɛ, Ehu no na eso nyia ɔnye wo rekasa yi nye ɔno. 38Na ɔsee no dɛ, Mo wura, megye midzi; na ɔkotowee sɔɔr no. 39Na Jesus see dɛ, Atsɛmbu ntsi na mebaa wiadze yi mu: ma hɔn a wonnhu adze no woeehu, na hɔn a wohu adze no wɔaadan enyifurafo. 40Na Farisiifo no mu bi a wɔnye no wɔ hɔ tsee nsɛm yi, na wɔsee dɛ, Aso hɛn so yɛyɛ enyifurafo? 41Jesus see hɔn dɛ, Sɛ hom yɛ enyifurafo a, nkyɛ hom nnyi bɔn; na afei hom se dɛ, Yehu adze: ntsi na hom bɔn aka hɔ no.
Nu geselecteerd:
John 9: MFANBRP
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Mfantse Bible © Bible Society of Ghana, 2011.
