John 5
5
Bɛtsaeda Nsutaae ho Ayarsa
1Iyi ekyir no Jewfo afahyɛ bi durii, na Jesus kɔr Jerusalɛm.
2Na Jerusalɛm abobow a wɔfrɛ no Nguantsen Kuropon no ho nsutaae bi wɔ hɔ a wɔfrɛ no wɔ Hebriw kasa mu Bɛtsaeda a ɔwɔ nkrandaa enum. 3Na iyinom mu na ayarfo nyimpakuw pii, enyifurafo, mpakye, nye hɔn a wɔyar mbubui dedae [rotweɔn nsu no no nwosowee. 4Na odu mber bi a Ewuradze no bɔfoe sian nsutaae no mu bɔfon no; na obiara a nsu no fon ekyir no odzi kan kɔtɔ mu no, yarba biara a ɔyar no, onya ayarsa.]#5.3-4 Tsetse akyerɛwfo no binom mmfa iyi nnka ho. 5Nna nyimpa bi wɔ hɔ a oedzi mfe eduasa awɔtwe wɔ ne yarba mu; 6na Jesus hun dɛ ɔda hɔ, na onyim dɛ ɔakyɛr hɔ no, obisaa no dɛ, Epɛ dɛ wo ho yɛ wo dzen anaa? 7Ɔyarfo no buaa dɛ, Owura, minnyi nyimpa biara a sɛ wɔbɔfon nsu no a ɔdze me to nsutaae no mu: na sɛ mereba a, nna obi edzi m’enyim kan akɔtɔ mu. 8Jesus see no dɛ, Soɛr, fa wo kɛtɛ na nantsew. 9Na amonmu no ara nyimpa no ho yɛɛ no dzen, na ɔfaa ne kɛtɛ, na ɔnantsewee.
Nna da no yɛ ahomgyeda. 10#Neh 13.19; Jer 17.21 Dɛm ntsi Jewfo no see nyia wɔsaa no yarba no dɛ, Ndɛ yɛ ahomgyeda, innyi ho kwan dɛ esoa wo kɛtɛ. 11Obuaa hɔn dɛ, Nyia ɔmaa mo ho yɛɛ me dzen no, ɔnoara na ɔsee me dɛ, Fa wo kɛtɛ na nantsew. 12Wobisaa no dɛ, Woana nye nyimpa a ɔsee wo dɛ, Fa wo kɛtɛ na nantsew, no? 13Nna nyia wɔsaa no yarba no nnyim nyimpa kor no, osiandɛ nna nyimpadodow wɔ hɔ ntsi Jesus atwe noho efi hɔ. 14N’ekyir no Jesus hun no asɔrfi mu na ɔsee no dɛ, Hwɛ, wo ho ayɛ wo dzen: mma nnyɛ bɔn bio, mma dza omuo kyɛn yi aammba wo do. 15Nyimpa no sii mu kɛkaa kyerɛɛ Jewfo no dɛ Jesus na ɔmaa no ho yɛɛ no dzen. 16Dɛm ntsi na Jewfo no hiahiaa Jesus ho, osiandɛ ɔyɛɛ ndzɛmba yi ahomgyeda. 17Na Jesus buaa hɔn dɛ, M’Egya yɛ edwuma bodu sesei na mo so meyɛ edwuma. 18Na dɛm siantsir yi tsitsir ntsi na Jewfo no hwehwɛɛ dɛ woku no, osiandɛ nnyɛ ahomgyeda nko na ɔato, na eso ɔfrɛɛ Nyankopɔn nankasa n’Egya, dze yɛɛ noho dɛ ɔnye Nyankopɔn yɛ pɛr.
Ɔba no no Tum
19Na Jesus buae see hɔn dɛ, Meka no nokwar mu kyerɛ hom dɛ, Ɔba no nankasa nntum nnhyɛ noho nnyɛ hwee, gyedɛ dza ohu Egya no dɛ ɔyɛ; na biribiara a Egya no yɛ no, ɔnoara Ɔba no so yɛ no dɛmara. 20Na Egya no dɔ Ɔba no, na ɔkyerɛ no dza nankasa yɛ no nyina, na ɔbɛkyerɛ no ndwuma a ɔkyɛn yinom, na aayɛ hom ahobow. 21Na dɛ mbrɛ Egya no nyan ewufo na ɔma hɔn nkwa no, dɛmara so na Ɔba no dze nkwa ma hɔn a ɔpɛ. 22Na eso Egya no mmbu obiara atsɛn, na ɔdze atsɛmbu nyina ahyɛ Ɔba no nsa, 23ama obiara eedzi Ɔba no nyi, dɛ mbrɛ wodzi Egya no nyi. Nyia onndzi Ɔba no nyi no, onndzi Egya a ɔsomaa no no so nyi. 24Mereka akyerɛ hom nokwar mu dɛ, nyia ɔtse m’asɛm, na ɔgye nyia ɔsomaa me no dzi no, ɔwɔ onnyiewiei nkwa, na ɔremmba atsɛmbu mu, na mbom oetwa mu efi owu mu aba nkwa mu. 25Mereka akyerɛ hom wɔ nokwar mu pi dɛ, dɔn no reba na enya edu a ewufo bɛtse Nyankopɔn Ba no ne ndze, na hɔn a wɔbɛtse no benya nkwa. 26Na dɛ mbrɛ Egya no wɔ nkwa wɔ nankasa no mu no, dɛmara so na ɔdze maa Ɔba no dɛ onnya nkwa wɔ nankasa no mu. 27Na ɔmaa no tum dɛ ombu atsɛn so, osiandɛ ɔyɛ Onyimpa Ba. 28Mma yi nnyɛ hom nwanwa: na dɔn no reba a hɔn a wɔwɔ nda mu nyina bɛtse me ndze, 29#Dan 12.2 na wɔasoɛr epue; na hɔn a wɔayɛ papa no, bɔkɔ nkwa wunyan mu; na hɔn a wɔayɛ dza omuo no, akɔ afɔdzi wunyan mu.
Hɔn a Wɔgye Jesus ho Dase
30 Mankasa munntum mennhyɛ moho nnyɛ hwee; dza metse no nna mubu ho atsɛn, na m’atsɛmbu tsen, osiandɛ monnhwehwɛ dza mankasa mepɛ, na dza nyia ɔsomaa me no pɛ a. 31Sɛ mankasa midzi moho dase a, me dasee nnyɛ nokwar. 32Obi wɔ hɔ a odzi mo ho dase, na minyim dɛ ne dasee a odzi wɔ mo ho no yɛ nokwar. 33#Joh 1.19-27; 3.27-30 Hom somae kɔr John hɔ, na ɔagye nokwar no ho dase: 34na emi dze, menngye nyimpa hɔ dase, na meka yinom ama hom eenya nkwa. 35Ɔno nye kandzea a ɔdzɛw na ɔhyerɛn, na hom pɛɛ dɛ hom enyi gye wɔ ne kan mu mber kakra. 36Na emi dze, mowɔ dasefo a ɔkyɛn John, na ndwuma a Egya no dze ama me dɛ munwie no, ndwuma a meyɛ noara gye mo ho dase dɛ Egya no na ɔasoma me. 37#Mat 3.17; Mar 1.11; Luk 3.22 Na Egya no a ɔsomaa me no nankasa agye mo ho dase. Hom nntsee ne ndze da, eso hom nnhun no su, 38na hom nnyi n’asɛm tse hom mu, osiandɛ nyia ɔsomaa no no, hom nngye no nndzi. 39Hom hwehwɛ kyerɛwsɛm no mu, osiandɛ hom susu dɛ yinom mu na hom wɔ onnyiewiei nkwa; naaso yinom nye dza wɔgye mo ho dase, 40na hom mmpɛ dɛ hom ba me nkyɛn ma hom eenya nkwa. 41Menngye enyimnyam wɔ nyimpa hɔ. 42Na minyim hom dɛ hom nnyi Nyankopɔn no dɔ wɔ hom mu. 43Emi dze, menam m’Egya dzin do maba, na hom nngye me; sɛ obi nam nankasa ne dzin do ba a, ɔno na hom bɛgye no. 44Hom bɛyɛ dɛn etum agye edzi, hom a hom gye enyimnyam wɔ homho nkorkor, na hom nnhwehwɛ enyimnyam a ofi Nyankopɔn hɔ ba no? 45Mma hom nnsusu dɛ emi na mobɔkɔ akɔtoa hom ama Egya no, na nyia ɔtoa hom wɔ hɔ, mekyerɛ Moses a hom dze hom werɛ atwer no no. 46Na sɛ hom agye Moses edzi a, nkyɛ hom bɛgye mo so edzi; osiandɛ nankasa kyerɛɛw mo ho nsɛm. 47Na sɛ hom nngye ne kyerɛw no nndzi a, hom bɛyɛ dɛn etum agye m’asɛm edzi?
Nu geselecteerd:
John 5: MFANBRP
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Mfantse Bible © Bible Society of Ghana, 2011.
