MARKUS 16
16
Kaelanen Yesus
(Mat. 28:1-8; Luk. 24:1-12; Yoh. 20:1-10)
1Tawuk anrau Sabat haut paitah, hi Maria Magdalena, hi Maria ineh Yakobus, anri hi Salome tulak lepuh midi kasai pakai ngasai bangkai Yesus. 2Kaayat subuh tawuk mate anrau hulet, hang anrau palanungkai minggu yiru, here tulak ma pasaran. 3-4Hang penah lalan here kaeau anri sameh here, “Hie sa tau ngarawah takam nyasar watu panutup wawa pasaran?” Daya watu yiru hante tatuu. Kude dami here hampe hang yiru here kadinung watu yiru haut pasasar. 5Balalu here masuk mawuang pasaran yiru. Hawuangni hang tiba tuhi kawan, here kadinung erang kaulun muda makai jubah mahilak rahat maharung, balalu here embah tatuu.
6Ulun muda yiru kaeau, “Ada takut! Aku karasa naun ngantara Yesus ulun Nazaret sa haut nabalasangar. Hanye puang uweng hang yiti. Hanye haut kaelan welum mulek! Mara naun ninung, iti bakas uneng here ngangkading hanye. 7Itati hulu tulak, wara kabar yiti ma kawan ulun sa umba hanye, wara pada ma hi Petrus. Wara, ‘Hanye tulak dahulu teka naun hampi Galilea. Hang yaru naun sagar kadinung hanye, kala sa haut nawarani ma naun.’ ”
8Balalu here kaluar teka pasaran yiru palus nempat daya embah nelang takut. Here puang iwara inun-inun ma hie-hie, daya takut.
AKHIR KARANGAN MARKUS MANURUT NASKAH ISA UHANG
Yesus nantarang tengani ma hi Maria Magdalena
(Mat. 28:9-10; Yoh. 20:11-18)
[9Udi Yesus kaelan welum mulek teka pampatei, kaayat subuh hang anrau Minggu, hanye palanungkai nantarang tenga ma hi Maria Magdalena. (Teka hi Maria Magdalena yiru suah Yesus ngaluar pitu roh jahat.) 10Maka hi Maria Magdalena balalu tulak iwara kajadian yiru ma kawan hengau Yesus, sa ganjah mahanang atei nelang nungkau. 11Kude tawuk here karengei Yesus welum, nelang hi Maria haut kadinung hanye here puang parisaya.
Yesus nantarang tenga ma rueh kaulun ulun sa umba hanye
(Luk. 24:13-35)
12Udi yiru Yesus nantarang tenga ma rueh kaulun ulun sa umba hanye anri sara lain. Yiru jari tawuk rueh kaulun yiru rahat takia ma isa tumpuk. 13Balalu here miulek palus iwara hal yiru ma here lainni. Kude here puang parisaya.
Yesus nantarang tenga ma kawan ulun sa umba hanye
(Mat. 28:16-20; Luk. 24:36-49; Yoh. 20:19-23; Kes. 1:6-8)
14Akhirni, Yesus nantarang tengani ma kasawalas kaulun ulun sa umba hanye, tawuk here rahat kuman. Hanye nagur here daya here kurang kaparisayaan nelang kajut karas atei hampe puang parisaya ma kawan ulun sa here raerai haut kadinung Yesus haut welum. 15Balalu Yesus kaeau ma here, “Hulu kia ma katuluh dunia nelang wara Kabar Maeh teka Alatalla yiru ma katantuluh ulun murunsia. 16Ulun sa puang parisaya sagar nahukum. Kude ulun sa parisaya nelang nabaptis, sagar salamat. 17Jari bukti neu here parisaya, kawan ulun yiru sagar ngusir roh jahat makai ngaranku; here sagar bapaner makai kawan basa sa puang here kataru. 18Amun here negei anipe atawa nguut rasun, here puang sagar silaka. Amun here hanrapak tangan hang ambau kawan ulun sakit, kawan ulun yiru sagar ware.”
Yesus mihimuk ma surga
(Luk. 24:50-53; Kes. 1:9-11)
19Udi Tuhan Yesus bapaner anri here, hanye mihemuk ma surga. Hang yaru hanye marentah baya anri Alatalla. 20Maka kawan ulun sa umba hanye tulak palus iwara Kabar teka Alatalla ma awe-awe. Kamulek Tuhan pada umba bagawi baya anri here nelang mambuktini itetei kawan kaajaiban inun sa nawara here yiru tuu.]
AKHIR NASKAH UHANG ISA LAIN
[9Kawan wawei yiru tulak nunung hi Petrus anri kawan hengauni, balalu nyarita anri imbe katuluh sa haut nawara ma here daya ulun muda yiru. 10Udi yiru, Yesus raerai itetei kawan ulun sa umba hanye iwara kabar teka timur ma barat kabar sa maeh nelang kalalawah neu salamat sa kalalawah.]
Nu geselecteerd:
MARKUS 16: MHY
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
@ LAI 1999 Indonesian Bible Society (Lembaga Alkitab Indonesia)
