Markus 3
3
Hari Sabat Allah ake werlegat werek nggorlek, at Yesus nen ap inggi pelak lambelek mende pano kagakike wene
(Matius 12:9-14; Lukas 6:6-11)
1Yabunggane, at Yesus o it akoni Yahudi mende sembayan yiligogoma unggisike. Unggisikesik, o etoma ap omanggi inggi pelak lambelek mende welagike. 2Esigit diluk werekma unggisikemo nen, it ap amberek inakla nen men ambasuka,
“Yogondak, nininggi 7 paga Hari Sabat Allah ake werlegat dogolik, at nen ap eti pano kagasigin a? Dek a. Kagako kalok,
Kat weyak kagaken, yiluk, wene oba ʼbuwok o,” yiluk inilenggen waganggo laguka. 3Esigit diluk inilenggen waganggo nggorlek, at Yesus nen, ap inggi lambelek mende etnogo men yogokike,
“Kebe melatluk, ndumo ya eme o,” yiluk yogokikemo 4melasi lagikemo nen, it akoni yomenogo men yogisasike,
“Nininggi 7 paga Hari Sabat Allah ake werlegat dogolik pano kagarinabusak a? Weyak kagarinabusak a. Ndil inabusak a? Inasusak a,” yiluk yogisasikemo, inane dek puk aguka. 5Inane dek agukama, at Yesus ilenggen ʼbiriyilik lagikesik akla nen,
“Inobabut mbirla-mbarlarek yi re!” yiluk akla weyak atluk akla agaga dagasike. Esigit diluk it pasik akla agaga dagasike mende, akla weyak agikesik nen, ap etnogo men yogokike,
“Kinggi walokan,” yiluk yogokikemo, inggi walokogo laʼbisikemo nen arat pano agike. 6Inggi esigit diluk pano kagakikemo, it ap Farisi mende yomenogo dukisukasik ibat Herodes agoromi inoba lagukasik nen,
“Yesus ninggit diluk wasuwok,” yiluk inom abok mbalkuka.
At Yesus i Galilea yenggelek aik oba werekma akoni dogalegat oba nandokuka wene
7-8Esigit diluk kagatluk, yabunggane, at Yesus agoromi ane waganggo laguka mende yomenogo inomat, i Galilea yenggelekma etnogo aik oba laguka. Lagukama, akoni nen,
“Yesus yigit diluk kagarigogo, ndigit diluk kagarigogo,” yiluk obok yisinem, it akoni o Galilea agum mende dogalegat inasuk kol diluk inomborlik inomborlik lagonem, it akoni o Yudea agum mende inom, o Yerusalem mende inom, o Idumea agum mende inom, o i Yordan aik ilibagan mende inom, o Tirus Sidon mende inom, Yesus oba nandorli waguka. 9-10Esigit diluk nandorli wagukama, inebe dogalegat u pano kagarinakonem, it u inoba werek mende taʼbokogonat nen, akoni amberek kiyiriyigik-kiyariyigik Yesus ininggi pakawogoluk oba unggisi laguka eti paga, at Yesus nen, at agoromi ane waganggo laguka mende yomenogo men yogisasike,
“Akoni dogalegatma an neragalilu nggirlik-nggerlek asi wisunogo nen, nggu ʼbugurlagat mende omanggi an nake ʼbaniluk dogoni o,” yiluk yogisasike. 11U esigit diluk pano kagarinako nggorlek, it kugi inobabut weyak mende akoni inakla unggiluk welaguka mende nen Yesus ebe inilenggen kalok nen, ineloke sogum yisukasik nen, inane nggokogo yogoko dogolik, men yisi laguka,
“Allah Aʼbut, karat o,” yiluk yogoko laguka. 12Esigit diluk yogokuka mende, at Yesus nen men yogisasike,
“An Allah Aʼbut, yiluk nabok yogisausak mondok dek o,” yiluk ane obatnerogo mberisasike.
Yesus nen ap inebe 12 paga inayonggo ʼbisike wene
(Matius 10:1-4; Lukas 6:12-16)
13Esigit diluk mberisalok yabunggane, at Yesus ebe ndom oba dagasike. Dagiluk nen,
“Ap inebe eta noba wisuwak,” yiluk akla ambasike mende waisasikemo, oba dagasukama, 14-15inebe 12 paga mendiyasi dogolik, men yogisasike,
“Kit an ninom mondok dogoluk nen, pano wene yogisigik, kugi inobabut weyak mende akoni inakla unggiluk werekma, an nobatne wokisamo mukogo wula ʼbiyigik, pano kagarinabik noko dogobagik nen laʼbinagagin o,” yiluk mendiyasike. 16Inebe 12 paga mendiyasike mende yomenogo, inendaga yi: Simon endaga omanggi Petrus salkike mende etnogo inom, 17Zebedeus aʼburi Yakobus agot Yohanes imbisak inendaga nit ninane paga mbogot ane yiligogo negen yu kak, it inane paga Boanerges salinakike mende inom, 18Andreas inom, Filipus inom, Bartolomeus inom, Matius inom, Tomas inom, Alfeus aʼbut Yakobus inom, Tadeus inom, Simon,
“O yoma ninaiwerek mende arlek doguwok nen,” yiluk yisi lagike mende etnogo inom, 19Yudas Iskariot Yesus wasuwagaluk yabunggane yonggo lagike mende etnogo inom, inebe eta mendiyasike.
“At Yesus eti Beelzebul oba duksekma kagarik liligogo,” yiluk yisuka wene
(Matius 12:22-32; Lukas 11:14-23; 12:10)
20Esigit diluk mendiyalok suguluk aguma wusa wagikemo, akoni dogalegat yabunggane oba nandorli wagukama, Yesus agoromi inom inambiri ninggit diluk naʼbugat kagat lagike. 21Esigit diluk kagat lagikemo, akoni amberek nen,
“At endainggen kunu-gunu agasik werek o.” yisinem, it Yesus agarlagi inasuk kolkukasik, at ebe waganuwogoluk waguka. 22It wago nggorlek, it ap Allah wene kolal mbalek indewerek mende o Yerusalem nen dagi wagukasik nen, men yisuka,
“Beelzebul kugi inobabut weyak mende inewe nggok etnogo Yesus oba duksek werek o. Esigit diluk werekma nogo nen, at obatne paga kugi at agoromi negen inobabut weyak mende akoni inakla unggiluk werekma mukogo wula ʼbiyiligogo o,” yiluk yisuka. 23Esigit diluk yisukama, at Yesus nen akoni dogalegat yomenogo waisasikesik nen, wene oba lisogo men yogisasike,
“Iblis akoni inakla unggiluk, enggaerek nen mukogo erlok wula ʼbakausak nogo? Mondok erlok dek o. 24Nen, ap endaganggok omanggiat mende agoromi apma pagisek dogoligogo mende inom it-it kurli mbal diluk inom weyak dogogun kalok, omanggiat dogolik inobatne welaguka kak dogogun dek. Kai asugun o. 25Nen, ap omanggi aʼburi inom kurli mbal diluk inom weyak dogogun kalok, ap omanggiat aʼburi inom dogolik pano welaguka kak dogogun dek o. Weyak asugunat o. 26Eti kak, at Iblis enggaerek agoromi kugi inobabut weyak mende inom kurli mbalogo inom weyak atlepma, dogoligogi kak inobatne dogolep dek o. Arat dek atlep o. 27Nen, ap omanggi obatneyak mende inggi kerle warogo ʼbigidek, aguma amende yi mende ndi mende ininggi abusak wagani unggusak erlok dek o. At te, inggi kerle warogo ʼbilugat, erlok wagani unggusak o,” yiluk yogisalok wene omanggi men yogisasike,
28“Nane eberogonat yokisak. Akoni nen yi weyak ndi weyak kagarigogi mende inom, inakla nen kai diyalok, inane paga nen inendaga weyagat diyiligogi mende inom, at Allah nen erlok sagalogo deget diyausak mende, 29Allah Agurengge eti inakla kai diluk endaga weyagat disi kalok, sagalogo deget diyausak dek o. Weyak kagasugun eti ake wene inoba mondok-mondok dogogin o,” yiluk yogisasike. 30Wene esigit diluk yogisasike eti it nen,
“Yesus kugi obabut weyak mende akla unggekesik werek,” yiluk yisukama nen, yogisasike o.
Yesus agoya inom agoromi inom oba waguka wene
(Matius 12:46-50; Lukas 8:19-21)
31Wene esigit diluk yogisasikesik werekma, at Yesus agoya inom, agoromi inom, wagukasik silimo mendek dogolik, Yesus duki wisuwagaluk akoni inoba yonggo nggola ʼbiyasuka. 32Nggola ʼbiyasukama it akoni dogalegat Yesus eragalilu korek welaguka mende nen men yogokuka,
“Yesus, lakan! Kat kagoya inom, kagoromi inom, kweyakabik wagakasik silimo werek o,” yiluk yogokuka. 33Yogokukama, at Yesus nen,
“An nagoya nagoromi eti sani nogo,” yiluk yogisasikesik, 34akoni at eragalilu korek welaguka mende yomenogo ilenggen ʼbiriyalik lagikesik nen, men yogisasike,
“An nagoya, nagoromi kit yiat o. 35Ta nen, at Allah akla ambaligogo mende motogo kagarigogo kalok, at eti an nagot, niru, nagoya, werek o,” yiluk yogisasike.
Nu geselecteerd:
Markus 3: DNA
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
