MARKUS 3
3
Yesus poman ban sipi ipic ajaworomtewef
(Mat. 12:9-14; Luk. 6:6-11)
1Barewen. Yesus sembahyang cem aofiwefen. Erasan ara, poman ban sipi ipic aemapefen. 2Wun erasan owam, “Yesus pwicakas aemama,” inim atakam botaw, jak aserememfesen. Inimas e ow, e Yesus aemefas, manmok fak atiwemfesen. Ar Yesus e ipic Ses Ban Jo dam baworomtew epen baporen. 3Yesusam atakam e ban sipi ipic aotawefen. “Or awamces ow takas bipu basitemey.” Inim aeefen.
4Bare, Yesus jonow e erasan aememfes ow atowporefen. “Dar e Ses Ban Jo Jirmec ji aecom, dar ucimas emcom? Dar akatas bwem aranew? Pwicakas bwem aranew? Dar ow bajortew aranew? Ow bacatiw aranew?” Inim aeefen. E ow nat, atep bajit opok cowok arawen.
5Yesusam e fumi aamwiciremfes ow bi takas aoworporefen. Aram jak amop aememefen. E nat, ar e ow jen faknakut aporefen. Inimas aram jak pwicak aememefen. Ar masirin, atakam e ban sipi ipic aotawefen. “E ban bajoromey.” Inim aeefen. Bare, aram sop ajoromefen. E ban masirin, akat aememefen. 6Bare, e Parisi ow afisfesen. Afisfes masirin, ar e Herodes mamkawi owcin Yesus bacatiw atakam aamsakamfesen.
Ow arke e Galilea bwipu aememfes
7Barewen. Yesusam, amamkawi owam, e bwi juwas Galilea e jopir aotasiemfesen. Ow arkenakutam Yesus fa asoromfesen. E ow, Galilea capinmi owam, Yudea capinmi owam, 8kota Yerusalem owam, Idumea capinmi owam, Yordan jo poman owam, kota Tirusam Sidonam e jamam owam, inim ow arawen. E ow arkenakut e Yesus aemefas, atakam jen ajifesen. Inimas ar Yesuspu asayosfesen. 9Yesusam e ow arkenakut aporefen. Inimas ar e amamkawi ow, ci batawkenemsemtam, atakam aotawefen. E ow arkenakut aramat ipic kekenakap bwemasin. 10E ow, Yesus, dam ow arke ajaworomtawef aporfesen. Inimas e dam ow takas Yesus dam ban bakurumtew aememfesen. Aram aramat ipic kekenakap aememfesen. 11Datam Yesus bi aporfesen. Aporfes masirin, aram aramat ipic bipu bi fop aneyjiapfesen. Aram atakam afakaytawfesen. “Or Allah atiw ara.” Inim aefesen. 12Yesusam jirmec fak e dat ajirimefen. “Car, ‘E ipic Allah atiw ara,’ inim atakam wun ow botaw arapok.” Inim aeefen.
Yesus, amamkawi ow dua belas ajiwar aereremtawef
(Mat. 10:1-4; Luk. 6:12-16)
13Barewen. Yesus sikon op aaptometefen. Aram e aereremtawef ow ajateefen. E ow masirin, Yesuspu aapenfesen. 14Ar ow dua belas ajiwar aereremtawefen. Aram atakam aotawefen. “Car dor akac mememawar aereremtawmin. Dor masirin, car wun asan bacacapiom atewosomcimin.” Inim aeefen. 15Aram dat botewerisim fakas, e ow atetamtotorefen.
16Bare, e Yesus aereremtawef ow dua belas ajiwar, Simon ara. (Yesusam wun juwas Petrus e ipic aamefen.) 17Yakobusam, arawec juwas Yohanesam, ara. Ar Sebedeus atiperes ara. (Yesusam juwas Boanerges e ipic jamnuk aamefen. “Boanerges” daratakam juw buwumtew, “wir atiperes” ara.) 18Andreas ara. Filipus ara. Bartolomeus ara. Matius ara. Tomas ara. Alfeus atiw juwas Yakobus ara. Tadeus ara. Simon ara. (Aramat ipic agama fak ipic.) 19Yudas Iskariot ara. (Ar Yesus e jokmen ow botasimemtam ipic ara.) Yesus inim ow aereremtawefen.
20Barewen. Yesus cem afiwefen. Ow arkenakutam erasan ajarewsiemfesen. Inimas Yesusam, amamkawi owam, amos bweman asan opoken. 21Yesus ajowowam inim atakam jen ajifesen. Inimas ar aramat ipic botaw ajisosfesen. “Aramat ipic jayic ara.” Inim aefesen.
Yesusam, Beelsebulam, atakam
(Mat. 12:22-32; Luk. 11:14-23, 12:10)
22Barewen. Allah Jirmec mamememtam ow Yerusalem ewenawfesen. Aram atakam aotawfesen. Beelsebul ewamec ipic jak aman awap. E dat kepala ipic, fakas, ewamec ipic atetamama. Inimas ewamec ipic e wun dat aotewerisimama. Inim aefesen.
23Yesusam e ow arke ajateefen. Ar masirin, baposomtew atakam e ow aotawefen. “Iblis arma botewerisim ucimaram? 24Samat cowok aramaman owen aamoces, aram apacayoscemes. 25Cem owam aramaman owen aamoces, aram apacayoscemes. 26Iblisam, datam, aramaman owen aamoces, aram apacayoscemes. Inimas aemces, aram aanioscemes.”
27“Owam fak ipic cem bafiw, wunam e apok ces bwetew, bare inimas bwemem asan opok. E nat, ar e fak ipic manam atakamjikapomces, ar e acem pok ces bwetew araman.”
28“Atakamnak ara, Allah, ow e aemamesas dosa jukpiri takas, akokoromosomtamcema. Aram ow e cemew atakam atawcesas takas, akokoromosomtamcema. 29E nat, ow cemew atakam Roh Kudus aotawces, Allah e dosa bakokoromosomtam opok cowok aemcema.” Yesus inim aeefen. 30(Bap ara, e wun ow atakam, “Dat ewamec ipic jak aman awap.” Inim aefes. Yesusam inim atakam aporef, wunam a atakam aotawefen.)
Yesus arosowocam, arewcewesam, atakam
(Mat. 12:46-50; Luk. 8:19-21)
31Barewen. Yesus arosowocam, arewcewesam, erasan ameromfesen. Aram e cesen aememfes, wunam ar ow Yesus baytetam janim aanimfesen. 32Ow arkeam Yesus fumi aamwicirapfesen. Wun ow masirin, atakam aotawfesen. “Jakaperey. Orosowocam, orewcewesam, cesen awamces. Aram or apowmenes.” Inim aefesen.
33E Yesus masirin, “Dorosowoc cam? Dorewcewesam cam?” Inim aeefen. 34Aramat ipicam e afumi aamwicirapfes ow bi aoworporefen. Ar masirin, atakam aotawefen. “Jakaperey. Awapes ow dorisepesam, dorewcewesam, ara. 35E Allah akat apormaras jipu aemames ow, bare e ow dorewcewesam, dotarsepesam, dorisepesam, aememames.” Yesus inim aeefen.
Nu geselecteerd:
MARKUS 3: LAICNS
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
LAI 1985
