Akisy. 8
8
Todipaar ŋakipi
1Nai abu nyimuryak Akuj Noa ka ŋibaren ta ibore daadaŋ ŋini ayari ŋini aya ka iŋes nataker. Kitukut Akuj ekuwuam anakwap, kitidipaiya ŋakipi. 2Togoloi ŋiitan ŋulu a ŋauwuata ka ŋirotin daadaŋ ŋulu ebuneneo akiru, nyisilimi tari akiru. 3Todipaar ŋakipi iwadio iwadio anakwap. Ekaku a ŋirwa amiat ka ŋatomonikan, tokudiokut ŋakipi anakwap. 4Ani edoli elap ŋolo a ŋikanikaarei ŋirwa ke elap ŋitomon ka ŋikanikaarei, totiyaun ataker kwap, kidokokin kidiama ŋimoru ŋulu enyaritae Ararat. 5Torubakis ŋakipi iyosete adipaar akitodol elap ŋolo a ŋitomon, ŋirwa ke elap epei a elap a ŋol, totakanut ŋaitae a ŋimoru.
6Ekaku a ŋirwa a ŋatomoniomwon, toŋaa Noa ŋidirisae ŋulu ewuakinit iŋes nataker. 7Kitoloma ekuruk kiŋa, kiyakiya kwap, kirim alokwap akitodol ŋina ejuwarya akwap. 8Kiyakiya nai Noa akuri akiŋolikin kijuwarit akwap; 9nai toryamu akuri emam neni kicaka alokwap, ido toboŋo nataker, anerae ariŋa ŋakipi erapuwarito akwap daadaŋ. Kirepu Noa akan keŋ alodirisa kikam akuri ya tooma ataker. 10Kidaridarak iŋes ŋirwa ŋikanikaarei, tosodi kiyakiya nabo anataker akuri kwap. 11Ani edoli eboŋ, toboŋu akuri neni a Noa iwokit anakituk akuyon ŋina ketubuni iŋes alokitoe a ŋolo enyaritae Olipa, ŋina keriŋa itilijauni. Kitaanyu ŋin Noa atemar kiŋoŋaar ŋakipi anakwap. 12Kidaridarak nabo ŋirwa ŋikanikaarei, tosodi kiyakiya nabo akuri kwap, ido abu akuri ŋin nyeboŋo neni keŋ jik.
13Akoloŋit ŋina esyaunan a elap a ŋolo ke epei, ekaru ŋolo aruworotor ŋikaru a Noa ŋamiae ŋakanikapei ke epei, kijuwa akwap ŋakipi, toono. Topuko Noa ataker alokidiama toripiya kwap, kiŋolik akwap kijuwa ka keono. 14Ani edoli ŋirwa ke elap ŋatomoniarei ka ŋikanikaarei elap ŋolo a ŋiarei, toonite akwap deu. 15Tolimok Akuj Noa tema, 16“Tolomutu anataker kaapei ka aberu kon ka ŋidwe kon ŋulusapa ta ŋaberu kec. 17Tolomutu kiŋa anataker kaapei ka ibore ŋini eyari daadaŋ: Ŋikyeny, ŋityaŋ, ŋiboorei ŋulu alyatok; ikotere touryata, topitut, kielakin akwap daadaŋ.” 18Aŋun apotu Noa ka aberu keŋ ka ŋidwe keŋ ŋulusapa ta ŋaberu kec tolomut kiŋa ataker. 19Tolomasi kiŋa ataker a ŋikabilae kec ŋityaŋ daadaŋ, ŋiboorei ŋulu alyatok daadaŋ, ŋikyeny daadaŋ ka ibore daadaŋ ŋini eyai nakwap.
Akiikinet ka Akuj neni a Noa
20Todukok Noa Namuroet aŋuna ka Akuj, tolemu ŋityaŋ ka ŋikyeny ŋulu itojokitae, tope a Namuroet erae ainakinet neni ka Akuj. 21Tojoik nooi Akuj eure a ŋainakineta a ŋun, tema alotau keŋ, “Mam nabo nyeceni ayoŋ ŋalup aŋuna a ituŋanan, anerae etami ituŋanan aronis ŋinapei eriŋa edit, kori mam nabo jik nyamunyari ayoŋ ibore daadaŋ ŋini eyari anakwap, lopite ŋolo abunio omunyarya paan.
22Ani ca eriŋa akwap eyai, erubakinete lu eyakasi nakwap:
apaki ŋinakitaet ka apaki ŋinalemet,
alilimu ka amwanis,
akiporo ka akamu,
apaaran ka akuwar.”
Nu geselecteerd:
Akisy. 8: NIB2008
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Ngakarimojong Interconfessional Bible © Bible Society of Uganda, 2008.
