Mwa 12
12
Kwĩtwa Kwa Avalamu nĩ Ngai
1 #
Meko 7.2-3; Aevl 11.8 Mwĩai Ngai nĩwaneenie na Avalamu amwĩa atĩĩ, “Uma ũtie andũ ma ũko waku, andũ ma mũsyĩ waku, na andũ ma nyũmba ya ĩthe waku, na ũithi nthĩ ĩla nyie nĩkwony'a. 2Ngakũnenga nzyawa mbingĩ na ikatw'ĩka mbaĩ nene. Ngakũathima na ngĩkũtw'ĩkĩthya mũndũ wĩ nguma, nĩ kana wĩthĩawe wĩ ũathimo kwa andũ ala angĩ.
3 #
Aka 3.8
Ngaathima ala mekũathimaa,
Ĩndĩ ngaumanĩa ala mekũumanĩaa,
na kwĩsĩla kwaku ngaathima andũ ma mbaĩ syonthe ĩũlũ wa nthĩ.”
4Kwoou Avalamu nĩwaendie kwĩanana na ũndũ Mwĩai Ngai wamwĩĩte, na Loto aendany'a nake. Avalamu aĩ na ũkũũ wa myaka mĩongo mũonza na ĩtano yĩla waumie Aalani. 5Avalamu aendanisye na mũka wake Salai, na Loto mwana wa mwana-a-inyia, na akua syĩndũ syoo syonthe ila moombanĩtye o vamwe na andũ ala matw'ĩkĩte ngombo syoo me Aalani. Nĩmambĩĩisye kyalo kya kũthi Kanaani.
Yĩla mavikie Kanaani, 6Avalamu nĩwavĩtĩle nthĩ ĩsu avika vandũ vaĩ mũtĩ mũtheu wa Mole vetawa Sekemu. Ĩvindanĩ yĩu Akanaani mekalaa nthĩ ĩsu. 7#Meko 7.5; Aka 3.16 Mwĩai Ngai nĩwamumĩlĩĩle Avalamu na amwĩa atĩĩ, “Ĩno nĩyo nthĩ ĩla nĩnenga nzyawa syaku.” Nĩvo ĩndĩ Avalamu waakie kĩthembeo vau kwondũ wa Mwĩai Ngai ũsu wamumĩlĩĩle. 8Ĩtina wa ũu nĩwaendie ngalĩko ya ĩtheo nthĩ yĩ iĩma ĩla yaĩ ngalĩko ya wumĩlonĩ wa syũa wa ndũa ya Mbethi-eli. Nĩwambie ĩeema yake vandũ katĩ wa Mbethi-eli na Ai; Mbethi-eli yĩ ngalĩko ya ũthũĩlonĩ wa syũa na Ai yĩ ngalĩko ya wumĩlonĩ wa syũa. Vau o navo nĩwaakie kĩthembeo na amũthaithĩa Mwĩai Ngai vo. 9Avalamu nĩwaendeeie na kyalo kyake elekele ngalĩko ya ĩtheo ya Kanaani ĩla yĩtawa Nengevu.
Avalamu e Nthĩ ya Misili
10Nĩkweethĩiwe na yũa nthĩ ya Kanaani, na kwoou Avalamu atheea athi nthĩ ya Misili ekale kw'o kwa kavinda, nũndũ yũa yĩu yaĩ ĩnene. 11Yĩla wathengeeie kũlika nthĩ ya Misili, Avalamu nĩweeie Salai mũka wake atĩĩ, “Nĩnĩsĩ kana wĩ mũndũ mũka mwanake mũno. 12Yĩla andũ ma Misili meũkwona measya, ‘Ũũ nĩ mũka wake’ na kwoou nĩmeũmbũaa na ũkũeka wĩkale thayũ. 13#Mwa 20.2; 26.7 Matavye kana nĩtũsyaanĩw'e nĩ kana kwondũ waku mambĩke nesa na mailea kũmbũaa.” 14Yĩla Avalamu wavikie Misili, andũ ma Misili nĩmoonie kana Salai aĩ mũndũ mũka mwanake mũno. 15Anini ma mũsumbĩ moona Salai, nĩmaendie na matavya mũsumbĩ ũndũ Salai waanakavĩte, kwoou Salai nĩwatwaiwe nyũmba kwa mũsumbĩ wa Misili. 16Kwondũ wa Salai mũsumbĩ nĩweekie Avalamu nesa na amũnenga ndĩthya sya mbũi na malondu, ng'ombe, mang'oi, ngombo na ngamĩle. 17Ĩndĩ Mwĩai Ngai nĩwaeteie mũsumbĩ na andũ make mowau mathũku nũndũ wa kwosa Salai mũka wa Avalamu. 18Kwoou mũsumbĩ nĩweetie Avalamu na amũkũlya atĩĩ, “Ũũ nĩ ũndũ mwaũ ũmbĩkĩte? Waleile kũndavya kana Salai nĩ mũka waku nĩkĩ? 19Waisye nĩmũsyaanĩw'e nĩkĩ na watuma nĩmwosa ta mũka wakwa? Kĩveti kyaku nĩ kĩu, kyose na ũikwata nzĩa ũthi!” 20Mũsumbĩ nĩweeaĩie athũkũmi make, na kwoou mamwosa Avalamu mamũtwaa nza wa nthĩ ĩsu e vamwe na mũka wake na syĩndũ syonthe ila waĩ nasyo.
Nu geselecteerd:
Mwa 12: KAMBA
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
BIBLE SOCIETY OF KENYA © 2011
