Mwa 10
10
Nzyawa Sya Ana ma Noa
(1Mav 1.5-23)
1Ii nĩsyo nzyawa sya ana ma Noa ala nĩ Semu, Amu na Yavethi. Kĩla ũmwe woo nĩwakwatie syana ĩtina wa ĩla mbua ya kĩw'ũ kingĩ.
2Ana ma Yavethi maĩ Ngomeli, Makoki, Matai, Yavani, Tuvali, Meseki na Tilasi ala nĩmo aaũmae ma andũ onthe ala metanĩaw'a namo. 3Ana ma Ngomeli maĩ Asikenasi, Livathi, na Tokalima. 4Ana ma Yavani maĩ Elisa, Talisisi, Saivulasi na Lotesi. 5Asu nĩmo aaũmae ma andũ ala matũaa ũtee wa ũkanga na ithamanĩ. Andũ asu nĩmo nzyawa sya Yavethi ala matũaa ta mbaĩ na nthĩ syĩ kĩvathũkany'o, kĩla mbaĩ yĩna kĩthyomo kyayo.
6Ana ma Amu maĩ Kusi, Misili, Limbya, na Kanaani. 7Ana ma Kusi maĩ Seva, Avila, Savita, Laama, na Saviteka. Ana ma Laama maĩ Sieva, na Ndetani. 8Kusi nĩwasyaie mwana ũngĩ weetawa Nimiloti ũla watw'ĩkie mũndũ wa mbee kwĩthĩwa atasindĩka kaũnĩ ĩũlũ wa nthĩ. 9Kwa ũtethyo wa Mwĩai Ngai Nimiloti nĩwatw'ĩkie mũsyĩmi wĩ nguma na kĩu nĩkyo kĩtumaa andũ masya atĩĩ, “Mwĩai Ngai nĩakũtonyethye kwĩthĩwa mũsyĩmi wĩ nguma ta Nimiloti!” 10Mbeenĩ ũsumbĩ wake waĩ na ndũa ii: Mbaveli, Eleki, na Akandi. Isu syonthe syĩ nthĩ ya Sinali#10.10 Sinali: Kana Mbavilonĩ.
11Kuma nthĩ ya Mbavilonĩ, Nimiloti aendie nthĩ ya Asuli na aaka ndũa ii: Nineva, Leovothi-ili, Kala, na 12Leseni ĩla yĩ katĩ wa Nineva na ndũa nene ya Kala.
13Misili nĩwe waĩ ĩthe wa Lutimu, Anamimu, Leambimu, Navituimu, 14Vathulusimu, Kasiluimu ũla nĩwe wumo wa Avilisiti na Kavutolimu.
15Ana ma Kanaani maĩ Sitoni, ũla nĩwe mwana wake wa mbee, na Ethi, 16Ayevusi, Aamoli, Angilikasi, 17Aivi, Aaliki, Asini, 18Aalivati, Anzemali, na Amathi. Ĩtina andũ ma Kanaani nĩmanyaĩĩkie kũndũ kwĩ kĩvathũkany'o. 19Kĩsio kĩla Akanaani matwĩe kyaumĩte Sitoni kwelekela Ngelali na kũthi kũvika Ngasa, na kwelekela Sondomu, Ngomola, Andima na Nzevoiimu kũthi kũvika Lasa. 20Andũ asu nĩmo nzyawa sya Amu ala matũaa ta mbaĩ na nthĩ syĩ kĩvathũkany'o, kĩla mbaĩ yĩna kĩthyomo kyayo.
21Semu, mũkũũe wa Yavethi, nĩwe waĩ ũmae wa andũ onthe ma Eveli. 22Syana sya Semu syaĩ: Elamu, Asuli, Alivakasandi, Lundi, na Alamu. 23Syana sya Alamu syaĩ Ũsi, Ũli, Ngetha, na Masi. 24Alivakasandi nĩwe waĩ ĩthe wa Siela, ũla waĩ ĩthe wa Eveli. 25Eveli aĩ na ana elĩ: Ũmwe eetawa Veleki nũndũ ĩvindanĩ yake andũ ĩũlũ wa nthĩ nĩmaanĩkĩte. Mwana ũla ũngĩ eetawa Yokitani. 26Ana ma Yokitani maĩ Alimotati, Selevu, Asalimavethi, na Yela, 27Andolamu, Ũsali, Ndikĩla, 28Ovali, Avimaeli, Sieva, 29Ovili, Avila, na Yovavu. Asu onthe maĩ nzyawa sya Yokitani. 30Kĩsio kya nthĩ ĩla matwĩe kyaumĩte Mesa kwelekela Sevali kũthi kũvika nthĩ yĩ iĩma ĩla yĩ wumĩlonĩ wa syũa. 31Andũ asu nĩmo nzyawa sya Semu ala matũaa ta mbaĩ na nthĩ syĩ kĩvathũkany'o, kĩla mbaĩ yĩna kĩthyomo kyayo.
32Asu onthe nĩmo nzyawa sya Noa kwĩanana na mosyaanĩo moo me nthĩnĩ wa mbaĩ syoo. Ĩtina wa ĩla mbua ya kĩw'ũ kingĩ, mbaĩ syonthe sya andũ ĩũlũ wa nthĩ nĩsyaumie nzyawanĩ sya ana ma Noa.
Nu geselecteerd:
Mwa 10: KAMBA
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
BIBLE SOCIETY OF KENYA © 2011
