Halloo 26
26
Yisaaqi Geraaree Showooch Koto
1Abrahami yemeenooba bi tunetoommon shaacoo are showoo bulliich giyiye. Ebich Yisaaqi tiyiꞌi, Filsixeemee taatoo Abimeleek waan, Geraaree showooch hammiye. 2Arooba Doono Yeeri biich bekkeꞌi ishichiye: “Neech ta gettemmi showooch kotebani, desh Gibits hammaahine. 3Giisheche yemeenoon hini showooch kotebe. Ta neenna tookki tunemmo taane; neen diiremmo taane. Hini showoo bullin neennaa ne shiijjereenaꞌonoyich imiree, ne nihoo Abrahamich ta wogeti wogoon ceechemmo taane. 4Ne shiijjereenaꞌon shimaajji xojjenoochoommon meechemmo taane; hini showoo bullin ne shiijjereenaꞌoyich immemmo taane; showee toommeexi aageteenaꞌo bulli ne shiijjereenaꞌochi gommona diireyemminaꞌone. 5Ebiyoo Abrahami ta qaaroon bi waayetoyich, ta getoon, ta qociyoonaa ta sheeroonon bi quyetoyichiye” iye.#Hal. 22:16-18 6Ebich Yisaaqi Geraaree showooch kotehe.
7Arooba are showeexi asheenaꞌo Yisaaqin bi mechechon boonoshi echemmona, “Ta maneene” iye. Bi ishichito, “ ‘Ta mecheene’ ta getigaata, Ribiqi mallet gaawe ure bi tunetoyich, biicha getiree hini showeexi asheenaꞌo taan wuxemminaꞌone” ii bi shattitoyichiye.#Hal. 12:13; 20:2
8Yisaaqi meeti aaboon arooch bi kotetoyee gubb, ikke areddoon Filsixeemee taatoo Abimeleeki bi kechi mallee kelloochaa dugilla ciinniꞌi, Yisaaqinaa bi mecheena tekkii kaachii boonoshi beetaa beeggiye. 9Ebich Abimeleeki Yisaaqin ceekkiiꞌi, “Ne mecheen aabichaꞌa, ‘Ta maneene’ inne?” iye.
Yisaaqiyoo “ ‘Biicha getiree asho taan wuxemmone’ iyaꞌaniye” iye.
10Abimeleeki wochiꞌi, “Ebiyoommi mooyon no toommooch tuniiya bedaano neene. No ashi daggoochee ikkoo ne mecheen yechito gaata, no toommooch gondoon shakkiyesho toon neene?” iye.
11Ebich Abimeleeki “Hini uroon woyee bi mecheen ikke mooyo hallimmo koniyoona bi tunegaata, qitibe” immi getoon bi asheenaꞌo bullich beshiihe.
12Yisaaqiyoo are showooch beebee, maayoon shookkiye. Doono Yeeri biin bi diiritoyich, aroobee natooba balle kishoon danehe. 13Oogeton bi gaannemmi wottoon, gaanno biich daakkee daakkee hammiye. 14Bagoonaa emmishoona, miimonaa gaddireteenaꞌona biich oogeton meettiyeete. Ebich Filsixeemee asheenaꞌo qanaateheete; 15Yisaaqichi nihoo Abrahami kashoona bi beetaa, bi gaddireteenaꞌo iijjiti aachi oppeenaꞌo bullin Filsixeemeenaꞌo showoona shicciꞌi dookkiyeete.
16Arooba Abimeleeki Yisaaqin “Noyee beshoon giidecho tuneto neene. Ebich no showoochee tiyiree hambe” iye.
17Ebich Yisaaqi aroochee tiyii hammii, Geraari bambooch bi duukkaanoon xogii arooch kotehe. 18Yisaaqiyoo bi nihoo Abrahami kashoona beebee iichiiti, tunebaani Abrahami qitiichaa Filsixeemee asheenaꞌo dookkiti aachi oppeenaꞌon wochinnoon iichiihe; bi nihoo shigiiti aafi shigoona ceeggiye.
19Yisaaqichi gaddireteenaꞌo bare aachi oppoon bambooch iijjii aacon daneheete. 20Tunebaani Geraaree showeexi qiddeenaꞌo “Aaco noochone” iꞌi, Yisaaqichi qiddeenaꞌona hayeheete. Ebi aroyicha ii boonoshi hayetoyich, ebi aachi oppee shigoon, Eseeqi#26:20 Eseeqi geto, “Hayo” getone. ii ceeggiye. 21Aroochee bare aachi oppoon iijjiyeete. Ebi aroyichoo wotta kaareheete. Ebi aachi oppee shigoon, Sixini#26:21 Sixini geto, “Kaaro” getone. ii ceeggiye. 22Aroyee besheꞌi bare aachi oppoon iichiihe. Ebi aroyich kaareyaaneenaꞌo boonoshi tunetoyich, “And Doono Yeeri noon gamichitone; showee toommoochoo meettemmo noone” iꞌi, ebi aachi oppee shigoon, Rehobooti#26:22 Rehobooti geto, “Gabini showoo” getone. iye.
23Aroochee Yisaaqi Beershaab kechiye. 24Aroobee xum Doono Yeeri biich bekkeꞌi ishichiye: “Ta ne nihoo Abrahami Nuggishoo taane. Shattaahine; ta neenna tookkaa beeto taane. Neen diiremmo taane; ta guuno Abrahamicha getiree ne shiijjereenaꞌon meechemmo taane” iye.
25Yisaaqiyoo are xaaꞌooch deejjee gudoon shuuneꞌi Doono Yeerich goyinnehe. Aroochoo bi duukkaanoon xogiye. Bi gaddireteenaꞌoo aachi oppoon arooch iijjiyeete.
Yisaaqinaa Abimeleekina Wogoon Gimo
26Abimeleeki, bi mikkirechi Ahuzaatinaa bi ginee iraashoo Fikoolina tookkii Geraaree showoochee Yisaaq waan waahe. 27Yisaaqiyoo “Taan shixxii ittoshi yookkitoyee gubb, aakkiya ta waan waahote?” iye.
28-29Boonoshiyoo ishichiyeete: “Iberoon Doono Yeeri neenna tookkii beemon beeggeto noone; ebich ‘Neennaa noonna daggooch wogo gibe. Ne toommooch gondoon shuuneyaanoon, gaawe mooyon baach tuniyaabee diggoona no showoochee ne kechemmoyich no tuniitoommon, ebiyoommon wotta gondoon no toommooch ne shuuneyaachemmoyich neenna tookki wogoon gibone’ iyaꞌaniye. And Doono Yeerina diireeto neene” iyeete.
30Yisaaqiyoo gifiroon qanniiꞌi giddiihe. Tookkii maa uchiyeete. 31Bi dechara maaddoona tiyii, wogoon giyiyeete. Yisaaqiyoo boonoshin deenaa, diggoona kechii hammiyeete.
32Arooba Yisaaqichi gaddireteenaꞌo waaꞌi, boonoshi iijjiti oppeechon Yisaaqich gettiyeete. Boonoshiyoo “Aacon daneto noone” iyeete. 33Biyoo ebi aachi oppoon, Shaabi ii ceeggiye. Ebich are katemee shigo hanaach beddaahaa, Beershaabi getteehe.#Hal. 21:31
Esayi Hitee Yaroochee Mecheenaꞌon Shaago
34Esayi bi shiijjeti aabbe natona, Hitee asho Beerichi bushee Yudiitin, wotta Hitee asho Eloonichi bushee Basematin shaaggiye. 35Ebi gutte genneenaꞌo naboyich Yisaaqinaa Ribiqinochi mullo oogeton ayiniye.
Nu geselecteerd:
Halloo 26: KBRC
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
SIM International, 2020.
