Halloo 25
25
Abrahamichi Bare Shiijjereenaꞌo
(1 Kiinoo 1:32-33)
1Abrahami Qexuuri getteebeeti bare mecheen shaaggiye. 2Biyoo Zimiraanin, Yoqishanin, Medaanin, Miidiyamin, Ishibaaqinaa Shuhinon shiyahan. 3Yoqishaniyoo Sheebinaa Dedaaninon shiyihe. Dedaanichi shiijjereenaꞌo Ashuureenaꞌo, Lexusheenaꞌonaa Lehumeenaꞌonane. 4Miidiyami bushiishoo Efaahi, Efeeri, Hanooki, Abidinaa Elidaahinane. Eboshi bulli Qexuuri bushiishoone.
5Abrahamiyoo biich beeto bullin Yisaaqich immiye. 6Bare maacheenaꞌo waanee shiijjeti bi bushiishoyichoo batt kashoona beebee wojjoon immiꞌi, Yisaaqiyee wohiree boonoshi beeyemmoyich, aabi-keyo waan beeti showooch daachiihe.
Abrahami Qitii Duukko
7Abrahami balli shabaa uucha nattiichii, 8bi kasho abbetehe; geenaa baayeꞌi qitiye; qititi bi asheenaꞌo waan xaꞌeehe. 9Bi bushiishoo Yisaaqinaa Ishmaꞌeelina Mamiri goroochaa aabi-keyo waan beeti, Hitee asho Tsohaari bushoo Efiroonichi buchi daggooch beeti, Makifeli xaqqee gofooch duukkiyeete. 10Ebi budo wonna Abrahami Hitee asheenaꞌo waanee bi kemetone. Arooch, bi mechee Saarichi gaꞌooch duukkehe.#Hal. 23:3-18 11Abrahami qititoyee gubb, Yeeri Abrahami bushoo Yisaaqin diiriye. Arooba Yisaaqi Lahayi Rooꞌi aachi oppee gaꞌoochiye bi beeto.
Ishmaꞌeelichi Shiijjereenaꞌo
(1 Kiinoo 1:28-31)
12Gibitsee ashe Haggaari, Saarichi gonnee, Abrahamich shiyeti bushoo Ishmaꞌeelichi mooyo ebine.
13Ishmaꞌeeli bushiishoo boonoshi shiijjee yaaroona eboshine: Bi gutenee bushoo Nebayooti, Qedaari, Adibeeli, Mibisaami, 14Mishimi, Dumaahi, Masi, 15Hadaadi, Teemi, Yexuuri, Nafishinaa Qedeeminane. 16Eboshi Ishmaꞌeeli bushiisheenaꞌone. Boonoshiyoo aaraa gutte yoodeenaꞌochi qaabbechi niheenaꞌone. Boonoshi koteti gafi gafoonaa xaaꞌi xaaꞌoona boonoshi shigoona ceekketone. 17Ishmaꞌeeli balli shaashaa shabaatta nattiichii qitiꞌi, bi asheenaꞌo waan xaꞌeehe. 18Ishmaꞌeelichi shiijjereenaꞌo boonoshi beeyi xaaꞌoon, Hawilinaa Shuurina gutte daggooch tuniiheete. Ebi xaaꞌoo beeto, Gibitsaa aabi-keyo waan, Asooree showooch daammiibeeti gommoochiye. Bare Abrahami shiijjereenaꞌo waanee wokkii shixeyoona beeheete.
Esayinaa Yaaqobina Shiijjo
19Abrahami bushoo Yisaaqi mooyo ebine.
Abrahami Yisaaqin shiyihe. 20Yisaaqiyoo bi shiijjeti aabbe natona, Ribiqin shaaggiye; Ribiqi Mesopotaamee showooch beeti Araamee asho Batuꞌeelichi busheenaa Araamee asho Labaanichi maneenane.
21Yisaaqiyoo bi mechee bushoon shimo bi qajjetoyich, Doono Yeeri bi mecheyich bushoon bi immemmoyich corootiye. Doono Yeeriyoo bi corootoon waayehe; Ribiqiyoo xifahan. 22Bushiishoo bi maacoochaa biinnaa biinna xuꞌeehe. Biyoo “Ebi amoyich ta toommooch tunehe?” iyaa Doono Yeerin echeya hammahan.
23Doono Yeeriyoo biich ishichiye:
“Ne maacoochee shiijjemmi,
gutte aageteenaꞌo tunemmi bushiisheenaꞌo
gubb boonoshinaa boonoshina shixemmi
aageteenaꞌon tunemminaꞌone;
ikkoo baroyee beshe giidecho tunemmone;
qaabboo guuchoyich hajjeyemmone” iye.
24Ribiqi shiyemmi aabo shagaa, qaappa anaami bushiishoon shiyahan. 25Shiichiꞌi shiijjeto kaawo, bi ashittinoonoo eexo bulletone; ebich, Esayi#25:25 Esayi geto, “Bi ashittinoon eexo bulleto” getone. getaa shigehe. 26Aroochee dabbii bi manoo shiijjehe; bi kishoona Esayichi shoqqoon yechiꞌiniye bi shiijjeto; ebich, Yaaqobi#25:26 Yaaqobi geto, “Shoqqoon yechi” woyee “Dawushecho” getone. getaa shigehe. Ribiqi ebi bushiishoon bi shiyehooba, Yisaaqi shiche nati ashoone.
Esayi Bi Qaabbittinoon Kemo
27Bushiisheenaꞌo diccii boonoshi oogetoyee gubb, Esayi kubbooch heechiibeeti, aricheti aaddoo tunehe; tunebaani Yaaqobi magge shuriyechonaa duukkaanoochee wohaani uroonane. 28Esayi wuxii deebiibeeti coochi meenoochee bi maa beetoyich, Yisaaqi Esayin shunniye; tunebaani Ribiqi Yaaqobin shunnahan.
29Ikke areddoon Yaaqobi woxoon shuunee bi beetaa, Esayi oogeton shaaceꞌi kubbee waahe. 30Esayi Yaaqobin “Oogeton shaacaa maraateto taane. Kaateree ebi ne shuuneti ceelle woxoochee taach ne imaa mamona” iye. Ebich bi shigo wotta, Edoomi#25:30 Edoomi geto, “Ceello” getone. getteehe.
31Yaaqobiyoo “Shiichiree ne qaabbittinoon taach kemiichibe” iye.
32Esayiyoo “Tawolla qitiya ii beete, ebi qaabbittino taach amoon halleshone?” iye.
33Yaaqobiyoo “Eke shiichiree taach wogeechibe” iye. Ebich Esayi wogeꞌi, bi qaabbittinoon Yaaqobich kemmiye.
34Arooba Yaaqobi Esayich koshonaa michiyee woxoonon immiye. Maa uchiꞌi, tiyii hammiye.
Ebiyoommi gommona Esayi bi qaabbittinoon qallayiye.
Nu geselecteerd:
Halloo 25: KBRC
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
SIM International, 2020.
