Mɑtʉ̈ɔ 10
10
Gɑŋntúu-Yɛ́su ntsɔ̌ppɑ́ nɛ́ nɛɡɛ́m
(Mɑ́lɛ́kúshi 3.13-19; Lúkɑ́shi 6.12-16)
1Yɛ́su ɡɛ ɛ́fúŋ ɡɑŋku pɛ́ ntsɔ̌ppɑ́ nɛ́ nɛɡɛ́m, ŋ́ɡɑ́ mɛtʉʉ mbɔ̌ pɔ́p nɛlɔk ńzuŋ mɛzẅikŋɛ kɛpɔŋ, mbɑ nɛlɔk ŋ́ɡɛ mɛɡɔɔ ntɛ́ nɛ́ ntɛ́ mɛ nǔu pʉɔ, mbɑ nɛɡɛ mɛlɔ́Ꞌ ntɛ́ nɛ́ ntɛ́ mɛ mbʉʉ-pʉɔ. 2Mɛlík-ɡɑŋntúu-Yɛ́su ntsɔ̌ppɑ́ nɛ́ nɛɡɛ́m ɛ̂yɑ́ pʉ́ɔ: Nduŋmbi Símɔ ẅí pɛ́ pɛnnɛ ɛ́fúŋ wɛ́ ŋɡɔ Pyɛ̂. Wɛcɔ́ pɔ́ Ndɛlɛ́yɑ ḿbɔ́ mɔ́ɔmɑ́ pɛ́ Pyɛ̂. Pɛcɔ́ pɔ́ Jɑ̂k mɔ́ɔ-Zɛbɛ́dɛ́ɛ pɔ́p mɔ́ɔmɑ́ wɛ Jɑ̂ŋ, 3ŋ́ɡɛ Filîp pɔ́p Pɑtɛlɛmî, ŋ́ɡɛ Tɔ́mɑ́shi pɔ́p Mɑtʉ̈ɔ, ẅi ɑ ḿbɔ́nɛ ńcẅɛ́ɛntsup Pɑlɔ́mɑ ŋ́ɡɛ Jɑ̂k mɔ́ɔ-Alfɛ̂ pɔ́p Tɑdɛ́ɛ, 4ŋ́ɡɛ Símɔ mɔ́ɔ-ŋɡɔŋ pɔ́p Jẅidɑ Iskɑlyɔt ẅí ɑ kɑ ɡɛnɛ ɛ́fɛn Yɛ́su.
Yɛ́su túu pʉɔ pɛ́ ntsɔ̌ppɑ́ nɛ́ nɛɡɛ́m
(Mɑ́lɛ́kúshi 6.7-13; Lúkɑ́shi 9.1-6; 10.4)
5Yɛ́su ɡɔ́ ńtúu ɡɑŋntúu pɔnɛ ntsɔ̌ppɑ́ nɛ́ nɛɡɛ́m, ńcú mbɔ̌ pɔ́p ŋɡɔ: Kɔɔ pʉʉ ɡʉ tsɛt mɛlɑ́Ꞌ pʉɔ pínɛ pɔ́p kɑ́ pɔ́ Pɑyúdɑ pɔ́, kɔɔ pʉʉ kúu tsɛt mɛtʉ́sɔŋ Pɑsɑmɑlii. 6Pʉʉ ɡʉ ńdɔɔ Pɑíslɑyɛ̂l, pɔ́p púunɛ pɑ́Ꞌ mɛnjinjɔ. 7Pʉʉ ɡʉ ńnɛn mɛzʉꞋ mɛzʉꞋ ɛ́sɑ́Ꞌ ɛ́sẅíi pʉɔ ŋɡɔ: Nɛfɔɔ-Sɛ́ kẅɛ́Ꞌlɛ tɛ ḿbɔ́ ḿbɑ́ɑtɛ. 8Pʉʉ ɡʉ ŋ́ɡɛ ɡɑŋɡɔɔ fíitɛ, ŋ́ɡɛ pɛpfú ńzẅíimɛ, ŋ́ɡɛ pɛɡɑŋkɑꞋ-pɑ́p fíitɛ, ńzuŋ mɛzẅikŋɛ kɛpɔŋ. Pɛ́ ɡɑ́ mbɔ̌ pʉʉ níinɛ, pʉʉ pɛn ŋ́ɡɑ́ yʉ́ʉ níinɛ. 9Kɔɔ pʉʉ níꞋ ŋkɑ́p pɑɑ, tɛ mbɑ pɑ́Ꞌ ɛ́ lɑɑ ḿbɔ́ pɔ lɑ́ɑ lɑ́. 10Kɔɔ pʉʉ ɡɔ ńcʉ́ɔ sɛ̂ndúŋ ńdyɛp pɑɑ, kɔɔ pʉʉ pɛ́ɛ ŋkúpmɛ-ndẅí, kɔɔ pʉʉ pɛ́ɛ ŋkúp-mɛtɑp, kɔɔ pʉʉ tẅɛꞋ ntẅí. N cú pɑ́Ꞌɑ mbíꞋŋɡɔ ŋu lɑɑ ḿbɔ́ ɛ́fɑꞋ ɡɔ́ lɑ́, mbɔ yúujʉ́ pɛ́ ɡʉ ɛ́fú zúꞋu. 11Pʉʉ ɡʉ tɛ ŋ́kúu tsɛt tʉ́sɔŋ kɛ tsɛt njɛ́Ꞌ ɔɔ, pʉʉ túŋtɛ nɛjí kɛ ŋu ẅí ɑ ɡʉ kúkŋɛ wʉ́ʉ ɡʉ ńcẅɛt zúꞋu ɔɔ, ḿbɔ́ tɛ ńjʉ́ɔ wɛ́, pʉʉ nɑ́ŋ pɔ njɛ́Ꞌ yɛ tɛ ńdɑ́Ꞌ ɛ́fú tsɛt yîyɑ́ lɑ́Ꞌ ŋ́ɡʉ. 12Pʉʉ ɡʉ tɛ ŋ́kúu ndɑ́-ŋu, pʉʉ cú ŋɡɔ: «Sɛ́ níꞋ mbɔ́tnɛ tsɛt yɔ ndɑ́.» 13Pʉɔ pínɛ pɔ́p tsɛt yîyɑ́ ndɑ́ lɑɑ ŋ́kúkŋɛ wʉ́ʉ, mbɔ Sɛ́ ɡʉ ńníꞋ mbɔ́tnɛ nǔu pɔ́p! Lɑ́ ḿbɔ́ yi pɔ́p lɑɑ ḿbɔɔ wʉ́ʉ kúkŋɛ, mbɔ mbɔ́tnɛ yʉ́ʉ ɡʉ ḿbɛn nǔu pʉʉ. 14Pʉʉ lɑɑ ŋ́kúu njɛ́Ꞌ-ŋu kɛ pɔ tsɛt yɛcɔ́ tʉ́sɔŋ ɔɔ, pɛ́ lʉꞋ nɛkúkŋɛ wʉ́ʉ, ńdʉꞋ nɛzúꞋ sẅiŋɛ yʉ́ʉ, pʉʉ ɛ́fú zúꞋu ŋ́ɡʉ, ŋ́ɡɔ ŋ́ɡʉ ḿbúꞋ pɛ́pɛ́p nǔu mɛku mʉ́ʉ ḿmɛꞋ. 15Mɔ ɛ́sẅíi wʉ́ʉ, kwɑꞋ nɛ́nẅín, lɛ́Ꞌ yi Sɛ́ ɡʉ ńdɑ́Ꞌ ḿbɔ́ ńzɑ́Ꞌ mɛtsɑŋ-pʉɔmɛsɔŋ, ŋɡʉ̈ɔ́Ꞌ-pîpɑ́ pʉɔ zɑ́ɑ ńtsɑ yɛ́ pʉɔ-Sɔdɔ́m pɔ́p yɛ́ pʉɔ-Ŋɡɔmɔ̂ɔ.
Pɛ́ ɡʉ ŋ́ɡɛ ŋ́kʉ́ʉnɛ ɡɑŋku-Yɛ́su
(Mɑ́lɛ́kúshi 13.9-13; Lúkɑ́shi 12.11; 21.12-19)
16Tsuŋnɛ ńzúꞋ n túu wʉ́ʉ pɔ pɑ́Ꞌ ɛ́ lɑɑ ḿbɔ́ pɛ́ túu mbí tsɛtsɛt mɛnɑɑŋɡwɛ. Pʉʉ kɛ́ ŋ́ɡɔ́ ńnɛn ńdʉ́ɔꞋ pɑ́Ꞌ nɔ́, ḿbɛn ḿbɔ́ pɛmbúꞋ pɑ́Ꞌ puutɛ lɑ́. 17Pʉʉ lɑk tú yʉ́ʉ, mbíꞋŋɡɔ pʉɔmɛsɔŋ ɡʉ ŋ́ɡɛ ɛ́fɛn wʉ́ʉ pɛ́ ŋɑk wʉ́ʉ, ńdɔk ŋɡwɑɑ ńtswɑ́ɑ wʉ́ʉ tsɛt mɛndɑ́-cúꞋlɛ mɔ́p. 18Pɛ́ ɡʉ ńdɑ́Ꞌ ŋ́ŋɑk wʉ́ʉ mbi pɛŋɡɔ́mnɑɑ pɔ́p pɛfɔɔ mɛlɑ́Ꞌ wɑ́ɑ. Pʉʉ lɔk ŋ́ɡẅɛɛ shʉ́ nɛlɔk ɛ́sẅíi wɔ́p mbɑ pɑkɛ́jí Sɛ́, ŋu ẅí mɔ jʉ́. 19Pɛ́ ɡʉ ḿbɔ́ tɛ ḿbɔ́ ńdɔk wʉ́ʉ ŋ́ɡʉ, kɔɔ pʉʉ púꞋ mbʉʉ yʉʉ ŋɡɔ pʉʉ ɡʉ ńtɔ́ zúꞋu cú ŋɡɔ kʉ̈ɔ́ ɔɔ? Ɛ́ ɡʉ ḿbɔ́ ŋkɑ́ ɛ̂yɑ́, Sɛ́ ɡɑ́ wʉ́ʉ nɛ́ sẅiŋɛ, 20mbíꞋŋɡɔ pʉʉ ŋ́ɡʉnɛ ńzɛɛ ńdɑ́Ꞌ ńcú nu pɔ́. Zẅikŋɛ-Tɑ̌ɑ wʉʉ ɡʉnɛ ńdɑ́Ꞌ ńdɔk wʉ́ʉ ńcú nu. 21Ŋu ɡʉ ŋ́ɡẅɛɛ mɔ́ɔmɑ́ wɛ ŋ́ɡɑ́ pɛ́ jẅí, Tɑ́-mɔ́ɔ ɡẅɛɛ mɔ́ɔ nɛ ŋ́ɡɑ́ pɛ́ jẅí, mbɔ́ŋkʉ̈ɔ́ ɡʉ ńdɑ́Ꞌ ńdɔ sɛ́ ńtsʉ́Ꞌ ɡɑŋmbuu pɛtɑ́t pɔ́p, ŋ́ɡɛ pɛ́ jẅí wɔ́p. 22Pʉɔ tsʉʉ ɡʉ ńdɑ́Ꞌ ḿbɑɑ wʉ́ʉ mɛlɑ́Ꞌ wɑ́ɑ, lɑ́ ŋu ẅí ɑ sʉknɛ kɛ́ kɑ́ɑ ɡʉ ŋ́ɡɛ ńduk. 23Pɛ́ zɑ́Ꞌ ku yʉ́ʉ tsɛt yɔ tʉ́sɔŋ, pʉʉ kʉɔ ŋ́ɡʉ tsɛt yɛcɔ́. Ŋ ɡʉ ɛ́sẅíi wʉ́ʉ, kwɑꞋ nɛ́nẅín, pʉʉ kɛ́ lɑ́Ꞌ ŋ́kúu mɛtʉ́sɔŋ-Íslɑyɛ̂l tɛ ḿmɛk kɛ́ pɔ́ yi Mɔ́ɔ-Ŋu tɔ́ pɔ́. 24NzíꞋyúu kɑ́ tsɑ cícɑ wɛ pɔ́, ŋkwɑɑ pɛn ŋ́kɛ́ mbɔɔ tɑ́t wɛ tsɑ. 25Pɑ́Ꞌ pɛ́ piitɛ́nɛ ɛ́fúŋ ŋɡɑŋndɑ́ ŋɡɔ: Bɛlzɛbûl#10.25 Bɛlzɛbûl Bɛlzɛbûl fɔɔ-mɛzẅikŋɛ kɛpɔŋ., pɛ́ ɡʉ ŋ́kúu nǔu pʉɔ-ndɑ́ pɛ́, lɑ ńnɑ́ kɛ́ fúŋ wɔ́p pɔ́Ꞌɔ, kɛkʉ̈ɔ́? Yúu mi ɛ́ ɡɛnɛ cícɑ, yîyɑ́ yúu ɡʉ ńdɑ́Ꞌ ŋ́ɡɛ ŋu ẅí ɑ sɛ́ ńzíꞋ nu yɛ́, ḿbɔ́ yi kʉ̈ɔ́ lɑ́ ɡɛ tɑ̌ɑ pɛ́ ŋkwɑɑ lɑ́, mbɔ yîyɑ́ yúu ɡʉ ḿbɛn ńdɑ́Ꞌ ŋ́ɡɛ ŋkwɑɑ ɡúu.
Kɔɔ pʉʉ pɔ́k pʉɔmɛsɔŋ, pʉʉ ɡɛ nu-nɛfɔɔ Sɛ́ cẅɛt mɑ́ntɑ́ɑ
(Lúkɑ́shi 12.2-9)
26Pɔ́Ꞌɔ zúꞋnɛ, kɔɔ pʉʉ pɔ́k pʉɔmɛsɔŋ, pʉʉ mɑꞋ pɔ Ŋkʉʉ wʉ́ʉ. Nu yí ɛ́ lʉɔmɛ́nɛ, pʉʉ ɡẅɛɛ nɛɡɛ ɛ́ cẅɛt mɑ́ntɑ́ɑ, nu-ntsɛm pʉʉ ɡẅɛɛ nɛɡɛ pɛ́ jí. 27Nu yí n cúnɛ mbɔ̌ pʉʉ tsɛt nzɛ́nzʉ́ʉ, zʉꞋ lɑɑ ŋ́ɡɛ fúk pʉʉ cú. Nu yí n dɛmtɛ pɔ nɛtúutɛ pʉʉ, pʉʉ ɡɛ ŋ́kɔ́Ꞌ zɑ́n lɑ ɛ́sɑ́Ꞌ yîyɑ́ nu. 28Kɔɔ pʉʉ pɔ́k pʉɔmɛsɔŋ, pɔ́p kuꞋ pɔ ndɑꞋ nɛjẅí mbɑp-mbʉʉ, ḿbɛn ŋ́kɛ́ mbɔɔ kuꞋ nɛkuu zẅikŋɛ pɔ́. Pʉʉ pɔ́k pɔ ndɑꞋ Sɛ́, mbíꞌŋɡɔ ḿbɔ́ ɑ tɛmtɛ mbɑp-mbʉʉ pɔ́p zẅikŋɛ ŋ́ɡwɛ́tnɛ, ḿbɛn ŋ́kuꞋ nɛmɑꞋ tsɛt múk. 29Pʉʉ jí ŋɡɔ pɛ́ fɛn pɛtsẅíkɔt pɛ́pɑ́ ɛ́ pɔɔ kuꞋ yɛcɔ́ yúu pɔ́. Tɛ mbɑ pɔ́Ꞌɔ, ḿbɔ́ wɛcɔ́ tɑ́Ꞌ pɔɔ vu sɛ́ kɛ́ pɔ́ yi Tɑ̌ɑ wʉʉ Sɛ́ pɛ́mnɛ pɔ́. 30Ɛ́ ɡʉ nǔu pʉʉ, mbɔ Sɛ́ sɛ́ ńjí ndwɛn-mɛnuk-tú mʉ́ʉ. 31Pɔ́Ꞌɔ lɑ́, pʉʉ pɑ́ɑ nɛpɛn ḿbɔ́k, pʉʉ mbɔ̌ Sɛ́ ḿbɔ́ yúu tʉʉndɛn ńtsɑ pɛtsẅíkɔt tɛ ńzɑ́ɑ. 32Jínɛ ŋɡɔ ŋu lɑɑ ńcú mbi lɑ́Ꞌ ŋɡɔ: «ɑ ŋu wɑɑ.» Mbɔ ŋ ɡʉ ńdɑ́Ꞌ ńcú yɑ́ɑ mbi Tɑ̌ɑ mɔ ẅí ɑ tʉ́nɛ́pú ŋɡɔ: «Ŋu wɑ́ wɑɑ ŋu.» 33Lɑ́ ŋu lɑɑ ḿmuŋɛ wɑ́ɑ mbi lɑ́Ꞌ, mbɔ mɔ Mɔ́ɔ-Ŋu ŋ ɡʉ ńdɑ́Ꞌ ḿmuŋɛ yɑ́ɑ wɛ́ mbi Tɑ̌ɑ mɔ ẅí ɑ tʉ́nɛ́pú.
34Kɔɔ pʉʉ kwɑŋɛ ŋɡɔ ŋ kɑ tɔ́ ŋɡɔ mbɔ́tnɛ pɔ́ ndǔ tsɛ́tsɑ́Ꞌ. Mɔ ŋkɑɑ lɔk mbɔ́tnɛ ńtɔ́ pɔ́, ŋ kɑ lɔk pɔ fyɑkŋɛ ńtɔ́. 35Ŋ kɑ tɔ́ mɑꞋ fyɑkŋɛ tsɛtsɛt ŋu pɔ́p tɑ́t wɛ, tsɛtsɛt mɔ́ɔ mɑŋɡɛ́ pɔ́p mɑ́ wɛ, tsɛtsɛt nzwɛ́-mɔ́ɔ pɔ́p mɑ́ndúu mɛ. 36Gɑŋmbuu-ŋu ɡʉ ńcẅɛt pɔ tsɛt tsɛnndɑ́ yɔ́p.
Gɑŋku-Yɛ́su pɛ́m nɛpfú pɑ́Ꞌ jʉ́
(Lúkɑ́shi 14.26-27)
37Ŋu kɔŋ tɑ́t wɛ kɛ pɔ mɑ́ wɛ ɔɔ, tɛ ńdɛɛ wɑ́ɑ, mbɔ ŋɡɑŋ kɑ́ kuꞋ nɛpɔ́ wɑɑ ŋu pɔ́. Ŋu kɔŋ mɔ́ɔ nɛ wɛ mbɛ́ɛnɛ kɛ wɛ mɑŋɡɛ́ ɔɔ tɛ ńdɛɛ wɑ́ɑ, mbɔ ɑ kɑ́ kuꞋ nɛpɔ́ wɑɑ ŋu pɔ́. 38Ŋu lɑɑ mbɔɔ tíi yɛ́ tʉ́ mbɑ́ŋtɛ pɑ́ŋtɛ́nɛ, ńdɔk ḿbɛ́m nɛpfú lɑ ńcʉ́ɔ nzʉʉ mɔ pɔ́, mbɔ ḿbɔ́ ɑ pɔɔ kuꞋ nɛpɔ́ ŋɡɑŋku wɑɑ pɔ́. 39Ŋu lɑɑ ŋɡɔ ɑ ɡʉ ḿbɑ́ɑ wɛ nɛpɔ́, mbɔ ɑ ɡʉ ḿbɛ́, lɑ́ ŋu ẅí ɑ pɛn ḿbɛ́m nɛpɛ́ mɛlɑ́Ꞌ wɑ́ɑ ɡʉnɛ ḿbɔ́ ɡú.
Ŋu lɑɑ ŋ́kúkŋɛ wʉ́ʉ, mbɔ ɑ kúkŋɛ pɔ wɑ́ɑ
(Mɑ́lɛ́kúshi 9.41)
40Ŋu kúkŋɛ wʉ́ʉ, mbɔ ɑ kúkŋɛ pɔ wɑ́ɑ, ŋu pɛn ŋ́kúkŋɛ wɑ́ɑ, mbɔ ɑ kúkŋɛ pɔ ŋu ẅí ɑ kɑ túunɛ wɑ́ɑ. 41Ŋu kúkŋɛ tɑ́Ꞌ Ŋɡɛ́mndʉ̈ɔ́Ꞌ-Sɛ́ pɑ́Ꞌ Ŋɡɛ́mndʉ̈ɔ́Ꞌ-Sɛ́, mbɔ pɛ́ ɡʉ ńdɑ́Ꞌ ŋ́ɡɑ́ wɛ́ nɛ́ tsɔ́ꞋfɑꞋ pɑ́Ꞌ wɛ́ Ŋɡɛ́mndʉ̈ɔ́Ꞌ-Sɛ́. Ŋu pɛn ŋ́kúkŋɛ ŋu ẅí ɑ ɡẅɛɛnɛ nɛpʉ́ʉ-Sɛ́ pɑ́Ꞌ ŋu ẅí ɑ zúꞋnɛ́nɛ Sɛ́, mbɔ pɛ́ ɡʉ ńdɑ́Ꞌ ŋ́ɡɑ́ tsɔ́ꞋfɑꞋ yɛ́ pɑ́Ꞌ yɛ́ ŋu ẅí ɑ zúꞋnɛ́nɛ Sɛ́. 42Mɔ ɛ́sẅíi wʉ́ʉ, kwɑꞋ nɛ́nẅín, ŋu ɡɑ́ pɔ ndɑꞋ ntúꞋ-ŋki ẅí ɛ́ sɛ́ ŋ́ɡẅɛɛ mbɔ̌ mɔ́yúu mɔ́ɔ, ńdɔk pɑ́Ꞌ ẅîwɑ́ mɔ́ɔ ŋɡɑŋku wɑɑ ŋ́ɡɑ́, mbɔ yɛ́ tsɔ́ꞋfɑꞋ ŋ́ɡʉ ńdɑ́Ꞌ ḿbɛ́ pɔ́.
Nu geselecteerd:
Mɑtʉ̈ɔ 10: JGO
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
CABTAL, 2017
