GENESIS 11
11
Ubahare Oduk ke Ofuri Ererimbot Oto ke Tower Babel
1NDIEN ofuri ererimbot ekedi usem kiet ye ikɔ kiet. 2Ekem ke mmɔ ema ekedaha ke edem usiaha utin mmɔ edisim ke una isɔŋ kiet ke isɔŋ Shinar; ndien etie do.
3Ndien mmɔ edɔhɔ kiet ye kiet ete, ekam eyak nnyin ibot brick inyuŋ itim mmɔ. Ndien brick oro eyedi itiat mmɔ, bitumen onyuŋ edi mortar mmɔ, 4Ndien mmɔ edɔhɔ ete, Ekam eyak nnyin ibɔp obio inɔ idem nnyin, ye edikoŋ ufɔk eke ibuot esie edisimde ke enyɔn; inyuŋ inam enyiŋ inɔ idem nnyiŋ, mbak idisuana ke iso ofuri ererimbot. 5Ekem Jehovah osuhɔre ete ise obio oro ye edikoŋ ufɔk oro nditɔ Adam ebɔpde. 6Ndien Jehovah ete, Sese, mbio emi edi kiet, kpukpru mmɔ enyuŋ enyene usem kiet; enyuŋ etɔŋɔ ndinam emi: ndien ke emi idikpanke mmɔ baba ŋkpɔ kiet eke mmɔ edikerede ndinam. 7Ekam eyak nnyin isuhɔre, inyuŋ itimere usem mmɔ do, man kiet okukop ikɔ kiet eken. 8Ndien Jehovah anam mmɔ edaha do esuana ke iso ofuri ererimbot: ke ntre ke mmɔ etre ndibɔp obio oro. 9Mmɔdo enyiŋ esie ekerede Babel; koro Jehovah etimerede usem ofuri ererimbot do: Jehovah onyuŋ anam mmɔ edaha do esuana ke iso ofuri ererimbot.
10Mme mmɔ emi edi emana Shem: Shem osim isua ikie, ndien obon Arpachshad, ini ukwɔ ebede isua iba: 11ndien Shem odu uwem ke ama okobon Arpachshad, isua ikie ition, onyuŋ obon nditɔ-iren ye nditɔ-iban.
12Ndien Arpachshad odu isua edip ye efut, ndien obon Shelah: 13ndien Arpachshad odu uwem, ke ama okobon Shelah, isua ikie inaŋ ye ita, onyuŋ obon nditɔ-iren ye nditɔ-iban.
14Ndien Shelah odu uwen ke isua edip ye duop, ndien obon 15Eber: ndien Shelah odu uwem, ke ama okobon Eber, ke isua ikie inaŋ ye ita, onyuŋ obon nditɔ-iren ye nditɔ-iban.
16Eber onyuŋ odu uwem isua edip ye duopenaŋ, ndien obon 17Peleg: ndien Eber odu uwem, ke ama okobon Peleg, ke isua ikie inaŋ ye edip ye duop, onyuŋ obon nditɔ-iren ye nditɔ-iban.
18Ndien Peleg odu uwem isua edip ye duop, ndien obon Reu: 19ndien Peleg odu uwem, ke ama okobon Reu, ke isua ikie iba ye usukkiet, onyuŋ obon nditɔ-iren ye nditɔ-iban.
20Reu onyuŋ odu uwem isua edip ye duopeba, ndien obon 21Serug: ndien Reu odu uwem, ke ama okobon Serug, ke isua ikie iba ye itiaba, onyuŋ obon nditɔ-iren ye nditɔ-iban.
22Serug ŋko odu uwem ke isua edip ye duop, ndien obon Nahor: 23ndien Serug odu uwem, ke ama okobon Nahor, ke isua ikie iba, onyuŋ obon nditɔ-iren ye nditɔ-iban.
24Ndien Nahor odu uwem isua edip ye usukkiet, ndien obon 25Terah: ndien Nahor odu uwem ke ama okobon Terah, ke isua ikie ye efurenaŋ, onyuŋ obon nditɔ-iren ye nditɔ-iban.
26Ndien Terah odu uwem ke isua ata ye duop, ndien obon Abram ye Nahor ye Haran.
27Mme mmɔ emi enyuŋ edi emana Terah: Terah obon Abram, ye Nahor, ye Haran; Haran onyuŋ obon Lot. 28Ndien Haran ebem Terah ete esie iso akpa ke isɔŋ emana esie, ke Ur mme Chaldee. 29Ekem Abram ye Nahor edɔ iban: enyiŋ aŋwan Abram edi Sarai; enyiŋ aŋwan Hahor ŋko edi Milcah, eyen Harran aŋwan, ete Milcah, ye ete Iscah. 30Ndien Sarai edi ada; imanke eyen.
31Ndien Terah ada Abram eyen esie, ye Lot eyen Haran, eyen eyen esiemɔ, ye Sarai ukot esie, ŋwan Abram eyen esie; ndien mmɔ etiene mmɔ edaha ke Ur mme Chaldee, ete ika isɔŋ Canaan ndien mmɔ edisim Haran, enyuŋ eduŋ do.
32Ndien usen Terah edi isua ikie iba ye ition: ndien Terah akpa ke Haran.
Nu geselecteerd:
GENESIS 11: ENA
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Efik Old Bible With Sectional Headings © Bible Society of Nigeria, 2013, 2019.
