LUK 20

A leo uhiuhi kwara ihe u rivuki Jisas

(Mat 21.23-27; Mak 11.27-33)

1Lo rani katukwale, i Jisas aia lolo Vanua* Kokona noi God u tuku huhui na tangaloi mo heretuvaki na Roro Karea lakwara. Hikani a tangaloi* lingilingi lalakua, mana tangaloi* kikikila na Uliuli* Kokona, mana ngwarasea* rusa, ramo vanamai vaki maia, 2ramo viti lakwae kwara, “Ko viti lakwakami. ?Ku hagwe na nomu bakotoana ave kwara kona toko vai na kinau vano hi? ?Ihe u rivukiko kinia?”

3I Jisas mo daraki lakwara mo viti kwara, “Hika i nau vake na uduhuri na leo katukwale kikamu. Tulu viti lakweau nga. 4?I God u rivuki Sione kwara ne bavtaes na tangaloi, diko a tangaloi rau rivukia?” #Mat 3.6,11; Mak 1.4,5,8; Luk 3.3,16; Sione 1.25-26; Bol 1.22; 10.37; 13.24; 18.25; 19.3,4

5Hikani ramo toko vikwahaki luna ramo viti kwara, “?Tana viti kworoho? Diko tana daraki kwara, ‘I God u rivukia,’ vae ne viti kwara, ‘?Kworoho tulu he va hauhuri tea lui Sione?’ #Mat 21.32 6Vae diko tana viti ‘A tangaloi rau rivukia,’ a vao hikani rana kosokosomikita, huri aira rau domi kareaki kwara i Sione aia a tangaloi* duruduruki.” 7Hikani ramo daraki ramo viti kwara, “I kami kehe kikilai tea kwara ihe u rivukia.”

8Vunu i Jisas mo kwaha maira mo viti kwara, “I nau vake nahe viti tea lakwakamu kwara nu hagwe na nogu bakotoana ave, nomo toko vai na kinau vano hi.”

A tavaluileo huri na tangaloi hati rau tava tano

(Mat 21.33-46; Mak 12.1-12)

9Vunu i Jisas mo viti na tavaluileo hika lakwa na tangaloi mo viti kwara, “A tangaloi mo rivuki na karo aira hi ramo toko vaivai waen lo kwaiga, a talu katukwale, mo tirakinia lakwa na tangaloi kwara rana boloki luna rana tava lakwae. Vunu aia mo lakao tina tatana u tuai. #Aes 5.1 10Lo taro na makuriana, mo hora na nona tangaloi boloki katukwale vaki mana tangaloi na tava tano vano hi kwara ne lai te kaitava tiura. Vae hikani a tangaloi na tava tano vano hi ramo takwili na tangaloi boloki hi vunu ramo horae mule taliku vuroki. 11Vunu mote hora na nona tangaloi boloki dolua vake, vae a tangaloi na tava tano vano hi ramo takwilia vake, rau vai bulakikinia haburu, vunu ramo horae mule taliku vuroki. 12Vunu mote hora na tangaloi boloki kaitoluki. A tangaloi na tava tano vano hi ramo kwohia, ramo tabatabae tivarea. #2 Kron 36.15-16 13Hikani a hugwe na talu hi mo viti kwara, ‘?Na va vai kworoho te hika? I nau na hora i natugu vohoki hika, a natu tabe, vae rana domi mavakinia.’ 14Vae lolona a tangaloi na tava tano vano hi ramo tagaia, ramo kwahakwaha kinira, ramo viti kwara, ‘!Tagaia! !A natu na hugwe hi aia hi! Vae te taroki a vanua noi tamana ne kwareki a nona. !Ta kwohi mateia! Vunu a nona vanua ne kwareki a noda.’ 15Hikani ramo kwalibibia ramo vohokinia tina talu hini ramo kwohi mateia.”

Vunu i Jisas mo uduhuri kinira mo viti kwara, “?Vae a hugwe na talu hi ne vai kworoho lakwa na tangaloi na tava tano vano hi? 16Ne vanamai ne kwohi matemateira vunu ne tau na talu hi tilo kaba na tangaloi na tava tano te dolua.”

Lolona a tangaloi ramo rongo na leo hika, ramo viti kwara, “!E! !Hete vohoki!”

17Vunu i Jisas mo taga vovohira mo viti kwara, “Tulu domidomi lo domiana na Uliuli* Kokona hinea mo vitia kwara,

‘A beru hinea a kaitabe na ingwa ramo bega kinia

rau domi kwara u hati,

vae mo mulemai mo kwareki a beruberu aulu.’ #Sam 118.22

18Diko te tangaloi katukwale ne sovi tilo beru hini, vae a tarabehina ne mavurivuri, vake diko a beru hi ne sovi tilo tangaloi te katukwale, ne biha vurivuria ne mule ki gwia.”

A leo uhiuhi huri na voli takis

(Mat 22.15-22; Mak 12.13-17)

19A tangaloi* kikikila na Uliuli* Kokona mana tangaloi* lingilingi lalakua rau vai kwara rana kwalibibi Jisas hi lai nga, huri rau kikilai kwara u viti na tavaluileo hi, u kwahakwaha kaga, vae rau mataku kina tangaloi maira. #a Mat 21.46; Mak 12.12; 14.1-2; Luk 19.47-48; 22.2; b Sione 5.18; 7.30 20Hikani ramo toko tagataga-bibi Jisas kwara vae te lo taroki ne vakasile lo leona. Rau lengaia kwara rana taua tilo kaba na kavman lakua huri a kavman lakua hi a nona huirana eia. Hikani ramo voli a tangaloi kwara rana tiusina i Jisas rana vosangi kwara aira a tangaloi bakoto. Vunu ramo horara vaki mai Jisas kwara rana tiusinae kina leo uhiuhi. #Luk 11.54 21A tangaloi tiusina vano hi ramo vanamai vaki mai Jisas, ramo kwaha maia, rau viti “Tisa. I kami keu kikilai kwara savi na kinau hi komo toko vitira, vake savi na kinau hi komo toko huhui na tangaloi kinira rau kareaki. I nigo kohe domi huri tea kwara a tangaloi u lakua diko he lakua tea, vae ku tuku huhui na tangaloi savia kina hala noi God lo hala bakoto. #Sione 3.2 22Ko viti lakwakami. ?Diko tana voli a takis lakwai Sisa*, a hugwe lakua Rom, tana galo lo noda Tangwata* diko hetea?” #Rom 13.6-7

23Vae i Jisas u taga lalahira kwara rau tiusinae, mo kwaha maira, mo viti kwara, 24“Tulu vosangiau te kina mane* vatu, na tagaia. ?A nakohe luna? ?A hinahe luna?”

Ramo daraki ramo viti “A nako i Sisa mana hinana.”

25Aia mo tau mo viti kwara, “U karea, a kinau hinea a noi Sisa, tulu bete lakwai Sisa. A kinau hinea a noi God, tulu bete lakwai God.”

26Hikani rahe vai suri lavia tea kwara ne sovi lo leona kwara te katukwale lolo nako na tangaloi maira. Rau idila haburu kina nona kaidaraki, vae ramo hugu butu.

A leo uhiuhi huri na marakaana tina mateana

(Mat 22.23-33; Mak 12.18-27)

27A Satiusi* ratuaki ramo vanamai vaki mai Jisas. Aira hi rau tuku viti kwara a tangaloi rau mate vae ranahe maraka te taliku tina mateana. Ramo uduhuri kinia, #Bol 23.8 28ramo viti “Tisa. I Mosis u uli na tangwata hika hurikita hinea mo viti ‘Diko a tangaloi u mate ti vavinehina, vae raru he bava te natu, vunu i tuana ne lavi na gwatina, raru ne bava natu, ne lai tanotano i tamana hi mo mate.’ #Dut 25.5; Jen 38.8 29Vakatukwale a ratua aira kaibitu, a natu tomua mo laki, vae va mate he bava te natu. 30Vunu i tuana kairuaki mote laki kina vavine hi mo mate tiua, 31vunu kaitoluki hokinia nga. Vae a ratua hi kaibitu aira vunu rau vai hokinia hi, rau mate rahe bava te natu vohoki. 32Mo vano vae ki rovonaki a vavine hi mo mate. 33?Vae lo rani kwahaia hi a mateana rana ahi taliku lo Rani na Marakaana, vae a vavine hi ne kwareki i vavinehihe? A ratua hi kaibitu aira vunu rau laki maia.”

34Hikani i Jisas mo daraki lakwara mo viti “A ngwera mana ravavine lo taro hikani rau laki. 35Vae lo taroki ne vanamai, a ngwera maira mana ravavine hinea i God u tagaira kwara rau taritarisa kwara rana maraka taliku tina mateana rana toka lo taro hi, ranahe laki tea. 36Aira hoki na kaihora tina taetae vae aira ranahe mate tea. Aira i raranatu i God, huri rau maraka ba tina mateana. #Gal 4.5-7 37Vunu i Mosis vake u matangwasaraki kwara a mateana rana ahi lai taliku. Lo vevehuri huri na vikai kelekele hi mo kao, mo viti matangwasaraki na hina i God Tatoka kwara aia ‘a God noi Evraham, a God noi Aesik, a God noi Sekov.’ #a Eks 3.2; b Eks 3.6,15,16 38A leo hi a domianaki kwara i God aia a God na tangaloi rau ahi, aia hete God na tangaloi rau mate, huri i God u tagai na tangaloi savia, hokinia rahe mate tea, rau ahi.” #Rom 14.8-9

39A tangaloi* kikikila na Uliuli* Kokona ratuaki ramo kwaha rau viti “Tisa. A nomu leo ku darakinira rau karea haburu.” 40Ramo viti kwehini huri rau maemae kwara rana uhia te ki leo uhiuhi taliku.

A leo uhiuhi huri i Vurae

(Mat 22.41-46; Mak 12.35-37)

41Vunu i Jisas mo uduhuri kinira mo viti “?Kworohokinia ramo toko viti kwara i Vurae* aia a gwaloana noi Devit kehekeheki? 42I Devit sibona u viti lo buku na Sam kwara,

‘A Hugwe i God u viti

lakwa na nogu Hugwe* kwara,

“Ko hugu hikeni lo matuagu,

ko mabu.

43tarisaki hi na vai na nomu tavaluivuro

rana hugu tavutimu,

rana kwareki a nomu tangaloi* boloki vuroki.” ’ #Sam 110.1

44I Devit u kwarekinia kwara a nona ‘Hugwe’. ?Vunu kworohokinia i Vurae mo kwareki a gwaloana noi Devit?”

I Jisas u kwaha likoki na nona ngwalagelo huri na tangaloi kikikila na Uliuli Kokona

(Mat 23.1-36; Mak 12.38-40)

45Lolona a vao doluaki ramo toko gwerongo huri i Jisas, mo viti lakwa na nona ngwalagelo kwara, 46“Tulu likoki na tangaloi* kikikila na Uliuli* Kokona, hinea rau lagwa kwara rana lakao laliki rana lugwaki lugwaga hinea rau gwagwaravu, vunu rau lagwa vake kwara a tangaloi rana vai mavakinira lo nako na tangaloi maira na sara. Rau lengaia kwara rana hugu lolo vale* na tiutangaroa lo hagehagele hinea rau karea karakara, vake rau lai a hagele karekarea nona tangaloi lalakua lolo kanikani. 47Rau tuku sinasina na gwati ravavine rau balu savi na noga kinau. Vunu vake rau tiutangaroa gwagwaravu kwara rana sina na tangaloi kwara a tangaloi rana domi mavakinira. Vae rana kwali na kakadiki ne huira haburu.”

Nu geselecteerd:

LUK 20: HWT

Markering

Deel

Kopiëren