SIONE 3
3
I Jisas mo kwaha mai Nikotimas
1A tangaloi lakua nona gwaloana noi Isrel* katukwale a hinana i Nikotimas, aia katukwale tina Varisi*. 2Vakatukwale, lolo bongi, u vanamai vaki mai Jisas mo viti lakwae kwara “Tisa. Keu kikilai kwara i nigo a tisa, i God u horako. Hete tangaloi kwara ne vai lai a kaivosangi lalakua hokinira hi komo toko vai, kehekeheki i God aia maia.” #Sione 7.50; 19.39 #a Mat 22.16; b Sione 9.16; Bol 10.38
3I Jisas mo daraki mo viti kwara, “Kareaki na viti lakwako, diko a tangaloi he vora te taliku kwara ne mulemai kina tangaloi karagwa nehe kikilai na vaitabetabe te noi God lakwa na tangaloi aira hi u hugwe korora. #3.3: Lo hala kairuaki a domidomi na leo i Jisas hi aia hokinia hika kwara, Kareaki na viti lakwako, diko a tangaloi he vora te taliku kwara ne mulemai kina tangaloi karagwa, nehe taga lavi na Vanua Karagwa tea hinea i God u hugwe koroa.”
4I Nikotimas mo uduhuri mo viti kwara, “?A tangaloi u lakua ba, vae ne vora kworohokinia taliku? Nehe soro lai te taliku tilolo tirae i retahina kwara ne vora taliku vakairuaki.”
5I Jisas mo daraki mo viti kwara, “Kareaki na viti lakwako, diko a tangaloi he vora tea kina kwai mana Tanungwe Kokona nehe mulemai lai te kina tangaloi hinea i God u hugwe koroa. #3.5: Lo hala kairuaki a domidomi na leo i Jisas hi aia hokinia hika kwara, Kareaki na viti lakwako, diko a tangaloi he vora te kina kwai mana Tanungwe Kokona nehe soro lai tea tilolo Vanua Karagwa hinea i God u hugwe koroa. #Taet 3.5 6Aia hi u vora tina tangaloi aia a tangaloi, vae a tanungwe na tangaloi u vora vanamai tina Tanungwe Kokona. 7Ko hatu idila huri nomo viti lakwako kwara, ‘U taritarisa kwara tulu ne vora taliku.’ 8A langi mo here takwanahavaki hokinia u lengaia. Komo rongo na roroki vae kohe kikilaia tea kwara u vanamai ave, diko ne vano lokive. Aira hinea rau vora kina Tanungwe Kokona aira hokinia hi.” #Pri 11.5
9I Nikotimas mo uduhuri kwara, “?A kinau hi ne mule kworohokinia?”
10I Jisas mo daraki mo viti kwara, “I nigo a tisa lakua nona gwaloana noi Isrel. ?Kohe kikilai na kinau hika tea? 11Kareaki na viti lakwako, keu kwaha keu kikilai. Keu hago leo lo kinau hi keu tagaia, vae hete katukwale tikamu kwara u hauhuri lo nomai hagoleo. #Sione 3.32; 8.26 12Nu viti huri na kinau lo varamana hika lakwakamu, vae tulu he hauhuri tea lugu. ?Vae diko na viti huri na kinau na taetae lakwakamu tulu ne hauhuri kworoho lugu? #Luk 22.67 13Hete tangaloi kwara u vano vaki lolo taetae, vae kehekeheki i nau a Natu* na Tangaloi, nu vanamai tina taetae. #Prov 30.4; Rom 10.6
14“Tuai lo vanua vuroki i Mosis mo lavi na ngwata u kihiana kina bras, mo tabe hakekinia lo vikai. Vae i nau a Natu na Tangaloi ranari tabe hakekiau hokinia hi, #a Nam 21.9; b Sione 8.28; 12.34 15kwara vae aira doluaki hinea rana hauhuri lugu rana hagwe na ahiana vaki tuai. #Sione 20.31 16I God u lagwa haburu mana tangaloi na varamana, mo tirakiau, i nau i Natuna, a Natu kwakehe, kwara vae aira doluaki hinea rana hauhuri lugu ranahe mate tea, vae rana hagwe na ahiana vaki tuai. #a Rom 8.32; 1 Sione 4.9-10; b Sione 3.36; 10.28; 1 Sione 5.13 17I God u horeau, i nau i Natuna, vaki lo varamana, hete huri kwara na viti a tangaloi rau hati rana sala, vae u horeau kwara ne lalahiau na vakahikinira. #a Sione 12.47; b Sione 5.22,30; 8.15-16; Bol 17.31
18“A tangaloi hinea u hauhuri lugu, i God he vitia tea kwara u hati ne sala, vae a tangaloi hinea he hauhuri te lugu, i God u vitia ba kwara u hati vae ne sala, huri he hauhuri tea lugu, i nau i Natu i God, a Natu kwakehe. #3.14-18: A tangaloi tuaki rau domi kwara a leo i Jisas u rovo lo leo hi lo ves 13 hinea u viti kwara “nu vanamai tina taetae.” Kwara vae diko a leo aira vano hika lo ves 14 rovonaki lo ves 21 aira hete a leo i Jisas, aia a leo na tangaloi hinea mo uli na buku hika, kwara vae a kaimatai na kwahakwaha aia hika “ ne tikei lo ves 14 maia lo ves 18. Vunu vake a kaimatai na kwahakwaha hokinia hika ” neri eno lo gweregwere na ves 13, vae ne tikei lo gweregwere na ves 21. Vunu a leo lo gweregwere na ves 14 vaki lo gweregwere ves 18 ne vano hokinia hika kwara, Vae ranari tabe hakeki na Natu na Tangaloi hokinia hi, 15 kwara vae aira doluaki hinea rana hauhuri luna rana hagwe na ahiana vaki tuai. 16 I God u lagwa haburu mana tangaloi na varamana, mo tiraki i Natuna, a Natu kwakehe, kwara vae aira doluaki hinea rana hauhuri luna ranahe mate tea, vae rana hagwe na ahiana vaki tuai. 17 I God mo hora i Natuna vaki lo varamana, hete huri kwara ne viti a tangaloi rau hati rana sala, vae u horae kwara ne lalahia ne vakahikinira. 18 A tangaloi hinea u hauhuri luna, i God he vitia tea kwara u hati ne sala, vae a tangaloi hinea he hauhuri tea luna, i God u vitia ba kwara u hati vae ne sala, huri he hauhuri tea lo Natu i God, a Natu kwakehe. #Sione 5.24 19A kakadiki rana kwalia huri na kinau hika. A leleha u vanamai vaki lo varamana, vae a tangaloi rau lagwa mana dodoki u sileti na leleha, huri rau tuku vai kinau rahe taritarisa tea. #Sione 1.5,9; 8.12; 9.5 20A tangaloi hinea u vai na hatiki u bena kina leleha, vae nehe vanamai lai te tilo leleha, huri he lengaia te kwara a leleha hi ne vosangi na kinau tivarea hinea mo toko vaira. #Eves 5.11-13 21Vae a tangaloi a nona bolokiana rau bakoto ne vanamai tilo leleha kwara vae a leleha ne vosangi na nona bolokiana tivarea kwara i God u lalahia luna mo vaira.”
I Sione a tangaloi na bavtaes tangaloi mo hago leo huri Jisas
22Takuni tiua hi, i Jisas mana nona ngwalagelo rau vano vaki lo vanua Sutia. Mo hugu maira takwa-hi kelekele mo vai a bavtaes. #Sione 3.26; 4.1-2 23I Sione vake u vai a bavtaes lo gwatuivanua Aenon, garagarani mana gwatuivanua Salim, huri a kwai u rusa takwa-hi. A tangaloi rau tuku vanamai vaki maia mo bavtaesira. 24Lo taro hi i Sione rahe taua te radu nga tilolo ingwa na gwarugwaru. #Mat 4.12; 14.3; Mak 1.14; 6.17; Luk 3.20
25A ngwalagelo noi Sione tuaki ramo toko vaivai viroroa mana gwaloana noi Isrel* katukwale, kwara rana vai kworoho vae rana ngwasara lo nako i God. 26Hokinia ramo vano vaki mai Sione, ramo viti lakwae kwara, “?Tisa, ku domihagwe na tangaloi hinea mo hugu maiko lo kwai Sotan tavaluki, aia hi komo toko viti huria? Hika u tuku vai a bavtaes, vae vunuhi na tangaloi rau vano vaki maia.” #Sione 3.22; 4.1-2
27I Sione mo daraki mo viti kwara, “A tangaloi nehe lai haro vuroki na boloki tea, vae kehekeheki i God ne bete lakwae. #Sione 19.11; 1 Kor 4.7; Hib 5.4 28I kamu a nogu kaihago na leo, tulu rongo ba nu viti lakwakamu kwara ‘I nau hete i Vurae* vae i God u horeau tomuakinia.’ #a Sione 1.20; b Mal 3.1; Mat 11.10; Mak 1.2 29A tangaloi hinea kwara ne laki ne lavi na vavine hinea ne laki maia. A tangaloi na tautau u tu u rongoa, vae mo rongo na leo na tangaloi na lakiana hi u havutia haburu. Hokinia hi i nau vake u havutiau. A kinau tikei vake kwara ne vaiau ne havutiau siletia hika. #Mat 9.15; Mak 2.19 30U taritarisa kwara i Vurae hi ne toko hake, vae i nau na toko hivo. #3.30: A tangaloi tuaki rau domi kwara a leo i Sione a tangaloi na bavtaes tangaloi u rovo hike lo gweregwere ves 30.
31“Aia hi u vanamai tina taetae u lakua sileti na tangaloi savia. Aia hi u vanamai tina varamana aia a tangaloi na varamana u kwahakwaha lo hala na tangaloi na varamana. Aia hi u vanamai tina taetae aia u aulu karakara sileti na tangaloi. #a Sione 8.23; b 1 Sione 4.5 32Aia u viti huri na kinau hi u taga vake u rongo, vae hete kwara te katukwale u lai tabetabeki na nona hagoleo. #a Sione 3.11; b Sione 8.26 33A tangaloi rau lai tabetabeki na nona hagoleo rau vosangi kwara a leo hi i God u vitia u kareaki. 34Aia hi i God u horae u kwahakwaha lo leo noi God, huri i God u vakakukwerea kina nona Tanungwe. 35A Tama u lagwa mai Natuna mo tau na kinau doluaki tilo kabana. #a Sione 5.20; 10.17; 15.9; b Mat 11.27; Luk 10.22; Sione 13.3 36A tangaloi hinea u hauhuri lo Natuki u hago a ahiana vaki tuai. A tangaloi he rongohuri na Natuki tea, nehe kikilai na ahiana tea, vae a lologute noi God ne eno luna vaki na tuai.” #a Sione 3.16; 1 Sione 5.13; b Eves 5.6
Nu geselecteerd:
SIONE 3: HWT
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Havakinau New Testament © Bible Society of the South Pacific, 2016.
